فدا احمد: دلیر ءُ جرتمندیں بلوچ رہشون
اداریہ
بلوچستان ءِ ہلک کیچ ءَ ودی بیوکیں فدا احمد، بلوچ راج ءِ ہما دلیر ءُ تمردیں رہشوناں چہ یکے در کئیت کہ آ بلوچ سیاست ءِ آوکیں دپتر ءَ مٹ کنگ ءَ وتی گران بھائیں کردارے پیلو کنت۔ آ وتی کسانی سالی ءِ دور ءَ نہ تہنا یک ہُنرمند ءُ وانوکیں نودربرے بیت بلکیں یک جیڑوک، پگر کنوک ءُ پہ ھک ءَ جہد کنوکیں ورناہے بیت۔
فدا احمد 1957 ءَ کیچ ءَ ودی بیت ءُ بنداتی وانگ ءَ وتی بُنکی میتگ تربت ءَ سرجم کنت ءُ گیشیں وانگ ءَ پہ بلوچستان شہدربرجاہ شال ءَ روت اِنت۔ آ چہ کسان امُبری ءَ سیاسی چِست ءُ ایرانی بھر بیگ ءِ ھُب ءُ واھگ دار ایت پدا دیمتر ءَ 1971ء ءَ آ نودربر سیاست ءِ بھر بیت، ہمود ءَ چہ آ وتی سیاسی سپر ءَ بندات کنت۔ اے ہما دور اِنت کہ نودربر سیاست بازیں اڈ ءُ جنجالانی آماچ اِنت ءُ پدا پوجی آمریت بیت ءُ سیاسی سُرپُرانی سر ءَ بندش جنگ بیت۔ ہمے بندشانی سوب ءَ بلوچ نودربر سیاست ءُ بلوچ مہلوکی سیاست نزور بنت بلے فدا اے میان ءَ وت ءَ دار ایت ءُ ہما واب کہ آئی ءَ کسانی ءَ دِستگ آئی ءَ سرجم کنگ ءِ ہاتر ءَ گرانیں دور ءُ باریگاں اوشت ایت ءُ وت ءَ مہکمیں سیاسی جہدکارے کنان بیت۔ ہشتاد ءِ دھک ءَ کہ بلوچ راجی سیاست سیاہ ءُ تہاریں مُجاں گار بیت، مایوسی ءُ زوالی ءِ نیمگ ءَ روگ ءَ بیت، سرجمیں بلوچستان ءَ بے تواری بیت ءُ بازیں نپ پرست ءُ زاتپرستیں مردمے سیاست ءَ ہوار بیت ءُ بلوچ سیاست ءَ لیکہی رنگ ءَ نزور کنگ ءِ جہد کنت۔ بلے فدا ہما دلیر ءُ جرتمندیں رہشون بیت کہ آ بلوچ مہلوک ءِ وشہالی ءُ بلوچ سیاست ءَ لیکہی ءُ ادارہ جاتی رنگ ءَ مہکم کنگ ءِ واب ءَ نہ تہنا گند ایت بلکیں آئی ءَ پیلو کنگ ءِ ہاتر ءَ مزنیں سُرپرے کنت۔
فدا احمد پہ بدواہ ءُ جُنز ءِ توکی نپ پرست ءُ دوتل ءُ پوستیں مردمانی دیم ءَ نہ تہنا اوشت ایت بلکیں آہانی راستی ءَ بلوچ سیاست ءِ تہ ءَ پدر کنت ءُ آہاں پاشک کنت، پمیشکا آ زروار ءُ موہ پرستیں مردمانی چماں کُنٹگے بیت۔ مرچی اگاں بلوچ سیاست یک تچکیں راہے ءَ دیم ءَ جُنزان اِنت گڑا اشی ءِ پُژدر ءَ فدا ءِ ڈولیں رہشون ءُ سیاسی جہدکارانی مزنیں کردے ہوار اِنت کہ آہاں سی سال ءَ پیسر بلوچ سیاست ءِ تہ ءَ موہ پرست ءُ دوتل ءُ دوپستیں مردم نہ تہنا پاشک کُتگ اَنت بلکیں آہاں سیاست ءَ ردیں نیمگے ءَ برگ ءَ داشتگ ءُ بلوچ سیاست ءَ تچک ءُ ادارہ جاتی رنگ ءَ آرگ ءِ جُہد کتگ۔
بلوچ سیاست وتی ارتقائی عمل ءَ گوزانءَ کہ وت ءَ جاہے سر کتگ، فدا ءِ ڈولیں رہشونانی واب کہ مرچی پیلو بیان اَنت ءُ بلوچ ءِ بدواہ ءُ دوزواہ پدر بیتگ اَنت، اشانی سر گوست ءِ سیاسی عمل ءُ جہد ءِ برورد اِنت۔ فدا ءَ زی بلوچ ءِ بدواہیں ٹولیاں گوں جنگ کُت ءُ آہاں تچک ءَ گوشت ءُ ایرجت ءُ بلوچ راج ءِ دیم ءَ پاشک کُت اَنت، بدواہاں اے اوپار نہ بیت ءُ دو مئی 1988ء ءَ فدا گوں سنگتاں تربت ءَ کتاب ءِ دکُان ءَ نندگ کتاب وانگ ءَ بیت کہ بلوچ بدواہیں مردم کائینت ءُ آئی ءَ تیرباران کن اَنت۔ مرچی آئی ءِ کُشندہ وت ءَ فدا احمد ءِ دوزاہ لیک اَنت، ہما نپ پرست ءُ بدواہیں مردم کہ زی فدا ءِ کوش ءَ ہوار بیتگ اَنت مرچی فدا ءِ نام ءِ سر ءَ وتی نپ پرستیں سیاست ءَ کنگ ءَ اَنت۔ بلے راجدپتر ہچ کرُتناں بیھال نہ کنت ءُ ناکہ بلوچ راج اے ڈولیناں ماپ کنت۔ فدا جسمانی دروشم ءَ چہ بلوچ سیاست ءَ سِد ایت بلے آئی ءِ شہموکیں پگر روچء مرچی ہم نہ تہنا زِندگ اِنت بلکیں باز دیم ءَ شُتگ ءُ مہکم بیان اِنت۔
بلوچ اسٹوڈنٹس ایکشن کمیٹی
