ہشت مارچ بلوچ شیرزالانی نام ءَ
گُلیں راج،
مروچی میان استمانی زالبولانی روچ اِنت ءُ اے روچ ماں جہان ءَ زالبولانی سیاسی ھک ءُ اُگبال ءُ جہان ءَ زالبولانی کِرد ءِ درگت ءَ دارگ بیت۔ چوشکہ ابید ءِ زالبول ءَ انسانی راجمان سرجم نہ اِنت ءُ زالبول چاگرد ءِنیم بہر اَنت۔ بلے دگنیا ءَبازیں ایردست ءُ پدمنتگیں راجانی تہ ءَ زالبول جہل جنگ بیتگ اَنت، آہانی انسان بیگ ءِ ھک پچ گرگ بیتگءُ آ ایردست ءُ ڈالچار کنگ بیتگ اَنت۔گوست ءَ چوشیں بازیں جہد بیتگ اَنت کہ اودد ءَ زالبولانی سیاسی ھکاں پہ جہد بیتگ بلے دومی نیمگ ءَ راجی جہدانی تہ ءَ زالبولانی ہم مزنیں کردارے گندگ بیت، آ توری روسءُ فرانس ءِ آشوب بہ بیت یاکہ افریکی ءُ اشیا ءِ ایدگہ آشوبانی جہد بہ بیت۔ اے گپ زانگی اِنت کہ ھچ چاگرد ھما وھد ءَ داں دیمروی کُت نہ کنت دانکہ سماجءِ ھمک تبک ءِ مردم آئی ءِ دیمروی ءِ ھاتر ءَ وتی بہرشت ءَ مہ دنت۔ ھمے رنگ ءَ یک چاگِردےءِ نیام ءَ اگاں زالبول ءِ کِرد ءَ بہ کش ات گڑا ھما چاگرد نیم توام بیت ءُ آ چاگرد اے تیزگامیں دُگنیا ءَ پشت کپ ایت ءُ دومی راج ءُ تاکت آہانی ایردست کنگ ءَ ھچ چک ءُ پد نہ بنت۔ انچوکہ یک چاگردے ءِ دیمروی ءِ ھاتر ءَ اژدری اِنت کہ زالبول ءُ مردین ھواری ءَ جہد بہ کن اَنت گڑا پہ ایردستیں راجےءَ دو ھمبچو اژدری بیت کہ چاگرد ءِ ھمک تبک ایردستی ءِ پروش دیگ ءِ ھاتر ءَ ھواری ءَ جہد بہ کن اَنت۔
شرپمندیں بلوچ راج
اگاں بلوچ چاگردءُ بلوچ راجدپتر ءَ چمشانک دیگ بہ بیت گڑا بلوچ زالبول مُدام چاگرد ءِ دیمروی ءِ ھاتر ءَ چہ مردینے ءَ کمتر نہ بوتگ اَنت۔ بانڑی ءَ بگر داں بانک کریمہ ءَ بیا اے میان ءِ سرجمیں دپتر گواہ اِنت کہ بلوچ چاگرد ءَ زالبول ءَ ڈالچار کنگ ءُ چاگردی ءُ سیاسی چست ءُ ایرانی بہر بوگ ءِ ھک پچگرگ نہ بوتگ ءُ زالبول چہ مردینے ءَ کمتر لیکگ نہ بوتگ اَنت۔ بلوچ چاگرد ءَ مُدام زالبول ءَ چہ مردین ءَ ہم گیش شرپ ءُ عزت داتگ، آئیءِ مستریں درور بلوچ زالبول ئے ءِ جنگ ءِ میان ءَ دور کنگ ءُ جنگءِ ھلاس کنگ ءُ سَلاہ کنگ ءِ دود اِنت۔ مروچی ھم بلوچ جُنز ءَبلوچ زالبولانی مزنیں کِردے است اِنت، بلوچ زالبول رہشونی ءِ سرپ ءَ اوشتوک اَنت۔ بلوچ راج ءِ گور ءَ زالبول پہ وتی نپری ءُ زاتی واہشت ءُ ہکاں پہ جہد ءَ نہ اَنت بلکیں آسیاسی پڑ ءَ پہ راجی مکسد ءَ راجی جہدءَ ہوار اَنت
باسمائیں نودربراں
ایردستی ءِ گوستانک ءَ اگاں ما وانیں گڑا ما زانت کن ایں کہ ایردست انسان ءَ چہ انسانی ءِ کَٹ ءَ بارت ءُ در انسانی جوڈ کنت۔ ھشت مارچ ءِ پُشدر ھم ھمے ایردستی ءَ گوں بندوک اِنت۔ ایردستیں راجانی زالبول ایردستی ءِ ھلاپ ءَ جتائیں وھد ءُ جتائیں دروشُماں گہگیری کن اَنت دانکہ اے روچ پہ ھما زالبولانی گہگیری ءِ پُشدر ءَ نامینگ بیت۔ زوراوار ءَ مُدام ایردست چہ انسانی کٹ ءَ بُرتگ ءُ جانورانی پیم ءَ چارتگ ءُ مرچی ھم ھمے رنگ ءَ بوگ ءَ اِنت۔ مرچی بلوچ، کُرد بہ بنت یاکہ ایدگہ زُلم جتیں راج بہ بنت، زیکیں افریکی راج بوتگ اَنت یاکہ بنگالی بوتگ اَنت درستیں جاہاں ھال یکین بوتگ کہ سرجمیں انسان زلم جتگ بیتگ اَنت ءُ اے میان ءَ زالبولاں چہ گنتر انسانی ھک پچ گرگ بیتگ اَنت بلے ما اے ہم گندیں کہ آ گھگیری ہم کنگ ءَ اَنت ۔ دنیا ءِ سرجمیں آشوباں زالبولانی ھک وت پہازیتگ اَنت پرچاکہ راجی آشوب راجی بستارءَ اتکگ اَنت پمیشکا راجی آشوبانی سوبمندی بہ زاں زالبول ءِ ھکانی پہازگ اِنت۔بلوچ ءَ اے گپ باور کنگی اِنت کہ بلوچ زالبول ءَ ابید ھچ چاگرد دیمروی کُت نہ کنت ءُ ناکہ ابید ءِ زالبول ءِ ھواری اے جُنز سرجم بوت کنت۔ بلوچ جہد ءَ اے گپ وت پدر کتگ کہ اے راجی جہد ءَ زالبول ءِ سیاسی ھک بندوک اَنت پمیشکا ہمک زالبول ءَ اے زانگی اِنت کہ ہستیں دور ءَ آئیءِ جیڑہانی توجیل بلوچ راجی سیاستءَ گوں بندوک اِنت، ہمنچو راجی جہد مہکم بیت ہمنچو بلوچستان ءِ سرجمیں تبکانی ھک پہازگ بنت۔
بلوچ اسٹوڈنٹس ایکشن کمیٹی
