یوسف عزیز مگسی: بلوچ سیاست ءِ دورچاریں رہشون
اداریہ
یوسف عزیز مگسی 1908 ءَ مگسی تُمن ءِ سردار نواب قیصر ھان مگسی ءِ بُنکی ھند جھل مگسی ءَ ودی بیت۔سردار قیصر ھان ءَ نہ تہنا بلوچ ءِ سیاسی ءُ ٹکی چِست ءُ ایراں چہ مزنیں دزرسے بوتگ بگندئے بلوچستان ءُ سندھ ءِ مزنیں کشت ءُ کشاری زمینانی واہند ھم بوتگ۔ ھمے زانت ءُ دورچاری ءِ برورد اَت کہ نواب قیصر ھان ءَ وتی زھگانی علم ءُ زانت ءُ ھیلکاری ءِ ھاتر ءَ نوکیں راہے شوھاز کُتگ اَت۔
یوسف عزیز مگسی وتی بِنداتی وانگ ءَ بُنکی میتگ ءَ سرجم کنت، آئی ءَ چہ پد اردو، فارسی ءُ عربی ءِ وانگ ءُ زانگ ءَ دربارت۔ پہ انگریزی زانت ءِ ھاتر ءَ یک ءُ نیم سال ڈنی اُستادے آرگ بیت ءُ یوسف عزیز مگسی ءَ انگریزی زُبان ءُ ادب ءِ تہ ءَ زانت دیگ بیت۔
یوسف عزیز مگسی ءَ دُژمن ءِ ھلاپ ءَ علم ءُ زانت وتی تُپنگ ءُ توپ جُوڑ کُتگ اَت ءُ کسانیں مُدّتے ءَ وتی کسانیں زند ءُ سیاسی سپر ءِ تہ ءَ یک عظیمیں سیاسی ءُ آشوبی جُنزے ءِ بُنیاد ءَ ایر کنت ءُ بلوچ جُنز ءِ تہ ءَ آ یک عظیمیں رہشونے ءِ نام ءَ زانگ ءُ پجارگ بیت، یوسف عزیز بلوچستان ءِ ھما سروکانی لڑ ءَ ھوار اِنت کہ آہاں زورگر ءِ ھلاپ ءَ یک مُھکمیں ءُ توانائیں جُھدے بندات کُتگ، مگسی ءَ زورگریں برطانیہ ءُ ھندی سرداری نظام ءِ ھلاپ ءَ جُھد کنان ءَ بلوچ راج ءَ را سیاسی سَما ءُ راجی یکجاہی ءِ ھاتر ءَ سرپدی داتگ۔ آ نا تہنا یک آشوبی زانتکار ءُ ادیبے اَت بگندئے آ یک مخلص ءُ دورچاریں رہشونے اَت کہ آئی لیکہ ءُ عمل مروچی ھم رہشونی ءِ وسیلہ زانگ بنت۔
انگریز زورگر ءِ کبزہ، زُلم ءُ جبر ءِ ھلاپ ءَ بلوچ راج ءِ تہ ءَ سیاسی ءُ شعوری بیداری ودی کنگ ءُ سرپدی دیگ ءِ ھاتر ءَ 17 نومبر 1929 ءَ یوسف عزیز مگسی “فریاد ِ بلوچستان ” ءِ نام ءَ یک نبشتانکے نبشتہ کنت ءُ اے نبشتانک ءِ تہ ءَ یوسف عزیز مگسی بلوچ راج ءَ گوں دزبندی کنت کہ پہ بلوچ ءُ بلوچستان ءِ وتواجہی ءَ یکجاہ بہ بہ اَت، برطانیہ ءِ پالیسی ءُ ریاست قلات ءَ برطانیہ ءِ داشتگ ئیں مزن وزیر شمس شاہ ءِ پالیسیاں ایر جنت کہ آئی دگہ یک نبشتانکے “شمس گردی” انت۔ چریشی ءَ ابید رہبندی گہتری ءُ گہبودی ءِ لوٹ ءَ ھم کنت۔ گُشگ بیت کہ مگسی ءِ نبشتانک “فریادِبلوچستان ” بلوچ راجدوستی جُنز ءِ نبشتہی اولی سیاسی لیٹریچر ءِ بستار ءَ زانگ بیت۔
سال 1929ءَ یوسف عزیز مگسی “فریاد ِبلوچستان ” ءِ نبشتہ کنگ ءِ جرم ءَ دزگیر کنگ ءُ زندان ءَ بندیگ کنگ بیت۔ ھمے زمانگ ءَ یوسف مگسی وتی کش ءُ گور ءِ درستیں سیاسی ورنایاں گوں ھال ءُ اھوال کنان ءَ گوں آہاں نزیکی دار اِیت ءُ پہ دیم ءِ کارانی ھاتر ءَ پالیسی اڈّ دیگ بیت۔ عبدلعزیز کُرد ءُ آدگہ سیاسی سروکانی ھواری ءَ انجمن اتحاد بلوچستان ءِ جوڑشت ایر کنگ بیت۔ 1932 ءُ 1933 ءَ بلوچ کانفرنس ءِ نام ءَ جیکب آباد ءُ حیدرآباد ءَ مزنیں راجی مُچی اڈ دیگ بیت کہ آئی تہ ءَ بازیں ھند ءِ بلوچ رہشون، سیاسی سروک ءُ لس مہلوک ءِ مزنیں کساسے ءَ بہر زُورگ بلوچ جُنز ءَ گامے دیم ءَ بران ءَ انگریز کبزہ ءِ ھلاپ ءَ بلوچ راج ءِ یکجاہی ءِ سوب جوڑ بیت۔
بد بہتی ءَ 31 مئی 1935 ءِ زمین چنڈ ءَ یوسف عزیز مگسی شال ءَ بیران بیت ءُ آئی بیرانی ءَ بلوچ راج یک توانائیں توارے ءَ چہ زبہر بیت۔ مروچی ھم بلوچ سیاست ءُ جُنز ءِ تہ ءَ یوسف عزیز مگسی یک رہشونے ءِ بُنیات ءَ یات کنگ بیت ءُ آئی داتگیں دیمونی مروچی ھم پہ بلوچ ورنا ءُ مہلوک ءَ پہ دائمی جُھد ءُ جُنزگ ءِ سکین ءَ بکشاینت۔
بلوچ اسٹوڈنٹس ایکشن کمیٹی
