وابانی سازوک کندیلیں صباء
اداریہ
دنیا ءَ آگہیں ءُ آگہی ءَ مانا دیوکیں انسان وَ لکانی کچ ءَ اَنت بلے چاگرد ءَ واب گندوک ءُ واب ءِ مانا کنگ ءَ چہ وتی زِند ءَ گسر کپوک آرت ءِ تہ ءَ واد ءِ کچ ءَ اِنت، بلے ہمے آرت ءِ تہ ءِ واداں گوں وتی واب گندگ ءُ آہانی مانا کنگ ءِ سپر ءَ بازینے آگاہ کتگ ءُ زند ءِ راستیں اکس پیش داشتگ۔ واب ہما عمل اِنت کہ آئی ءَ انسان گَار ءُ سِنگ ءُ کوراسیاں چہ زُرتگ ءُ آزمان ءَ سر کنگ ءَ ہوار آئی ءَ انچیں رُژنے بکشاتگ کہ چہ آئی ءِ برانزاں دگہ ہزار واب گندوک پیداگ کتگ ءُ روچ ء مرچی ہم راستی ءُ ھک ءِ سپر ءَ دیم ءَ جُنزان اَنت۔ واب بگندئے ہمک کس بہ گند ایت بلے ہمائی ءِ واب مانا بنت کہ آ پہ اشاں وتی زِند ءِ سرجمیں کٹ ءُ متاھاں ببا دیگ ءَ ہوار وتی ساہ ءِ پرواہ ءَ ہم مہ دار ایت، ہمے ڈولیں دلیر ءُ راستی ءِ پہازوکاں چہ یکے نمیرانیں کندیلیں استاد واجہ صباء دشتیاری اِنت۔
صباء انچیں جہانے ءَ چماں پچ کنت کہ اود ءَ راستی ءِ پہازگ ءُ ھک ءَ پہ ہزاریں سر پیسر ءَ ندر بیتگ بلے اے انسانی ابرم اِنت کہ ہمک دور ءُ باریگ ءَ ھک ءُ آشوب ءَ پہ واب گندوک ودی بیت ءُ گوں وتی واباں چاگرد ءَ نوکیں آشوبی زرمبشتے بکشائیت، یونان ءِ سُکرات بہ بیت یا مصر ءِ منصور، اٹلی ءِ جوڈانو برونو، امریکہ ءِ مالکولم ایکس، فرانس ءِ سارتر ءُ روس ءِ لینن ءَ بہ گر داں بلوچستان ءَ ھیر بکش ءُ صباء ءَ بیا، اشاں ہوار دگہ ہزاریں سراں کہ پہ باندات ءِ راستی ءُ ھک ءِ ہاتر ءَ زہر ءِ پیالو وارتگ یا تیرانی دیمپان بیتگ اَنت۔ بلے واب ءُ لیکہ ہمک آوکیں دور ءُ باریگ ءَ گیشتر شاہ جنان ءَ مہکم بیان بنت، پرچاکہ دانکہ انسانی سسا زِندگ ءُ سلامت اِنت انسان واب گندگ ءُ وابانی بزانت دیگ ءَ پہ ندر بیان بیت ءُ روت۔
ہمک دور ءَ لجوزیں تاکتے بیتگ کہ آہاں راستی ءُ ھک ءِ گُٹگیر کنگ ءُ وابانی کُشگ ءَ پہ سرانی سر شہید کتگ اَنت بلے اے گپ چو آزمان ءِ پراہی ءَ راستی یے کہ واب نہ مر اَنت بلکیں آ ہمک دور ءُ باریگ ءَ وت ءَ زندگ کنان ءَ دانکہ مانا بہ بنت۔ مرچی صباء ءِ واب ہم ہمے پیم ہزارانی کچ ءَ بلوچ ورنایاں چماں کُتگ ءُ پہ آئی ءِ بزانت دیگ ءَ راستی ءُ ھک ءِ پہازگ ءِ سپر ءَ سرجنان ءَ جُنزان اَنت۔ صباء ءِ دیستگیں واب ءَ بر کُتگ ءُ آئی ءِ براں ہزارانی کچ ءَ دگہ صباء ودی کتگ کہ آہاں کندیل دست ءَ اِنت ءُ رژن ءَ تالان کنان ءَ بلوچستان ءِ ہمک کوچگ ءُ میتگاں سرجنان انت۔
چوش بلوچستان ءِ تہ ءَ بازیں زانتکار ءُ استادے ودی بیتگ ءُ ہست کہ آہاں راستی ءُ ھک ءِ سپر ءَ وتی ساہ ہم بکشاتگ اَنت ءُ ہمایانی کرُتناں چہ سارتیں چاگردے سازگ ءِ عمل مہکمتر ءُ توانا بیتگ بلے صباء ہما کردار اِنت کہ آئی ءَ یک ءُ تہنائیں بالاد ءَ گوں ہما کار کُت کہ مرچیگیں ہزار اُستادانی ہمت ءُ وس ءَ چہ ہما دیم اِنت۔ آئی ءَ ہزار ہیل ءُ بہانہ یکِر کُت اَنت ءُ پہ تہنا بلوچ، بلوچی ءُ بلوچستان جیڑ ایت ءُ ہمے سئینانی زِندگ دارگ ءَ پہ وتی ساہ ءَ چہ ہم سرگوست، پرچاکہ آ شعور ءِ ہما پدیانک ءَ سر اَت کہ آئی ءَ چہ دیم انسان ہمک ڈولیں نزوری ءُ نادراہیاں چہ سرگوز ایت ءُ پشت کپ ایت ایوک ءَ آئی ءِ مکسد ءُ مکسد ءَ پہ عمل ءُ جُنزگ کہ صباء ہمے مساپروں چہ یکے اَت۔
صباء پہ ایردست ءَ مہکمیں توار ءُ پہ بدواہاں ہما شمہات اَت کہ آئی ءِ عمل ءُ گپاں چہ آہانی شپانی واب ھرام کُتگ اَت۔ پمیشکا آ سال 2011 ءَ 1 جون ءِ ماہ ءَ شال ءِ دمگ سریاب ءَ بدواہانی دست ءَ چہ تیرباران کنگ بیت ءُ نمیران کنگ بیت۔ مرچی صباء جسدی رنگ ءَ مئے دیم ءَ نہ اِنت بلے آہی ءِ دیستگیں واب ءُ داتگیں پلسپہ بلوچستان ءِ ہمک دربرجاہاں تالان اِنت۔
بلوچ اسٹوڈنٹس ایکشن کمیٹی
