بلوچ اسٹوڈنٹس ایکشن کمیٹی خضدار ہنکین نا ہنکینی لس دیوان اڈ تننگا۔
شاہ نور بلوچ ہنکینی کارمستر و جویریہ بلوچ ہنکینی کارگشاد گچین کننگار۔
بلوچ اسٹوڈنٹس ایکشن کمیٹی خضدار ہنکین نا ہنکینی لس دیوان ہنکینی کمک کارمستر نوید بلوچ نا کماشی ٹی اڈ تننگا۔ دیوان نا مہمان خاص بنجاہی کارگشاد اظہر بلوچ و گچینی مہمان بنجاہی کمیٹی نا باسک سنگت پیر جان و سنگت بالاچ ئسر۔ دیوان ئٹ بنجاہی سرکیولر، مسکوہی ہنکینی رپورٹ، نغدکاری، گل کاری، ہندی و جہانی سیاسی حالیت آتا زی آ اُست جمئی ئٹ گپ و تران آن پد بروکا گامگیج ئٹی پوسکن آ ہنکینی کابینہ گچین کننگا۔
بنجاہی سنگت آک ہیت کریسہ پاریر کہ سیاست تینا تہٹی بھلو و شابیت ءُ عمل ئسے ہرا مدام برجا غا مٹ و بدلی تا پن ءِ۔ اسہ وخت اس خضدار بلوچ سیاست نا بنجاہ مسنے ولے وخت ئتون اوار زوراک نا زوراکی تیان پد اینو نن خنینہ کہ بلوچ خوانندہ سیاست ئٹی خضدار نا بندغ آتا کمبوتی خننگ ئٹ بریک۔ دانا بھلا سوب دا مننگ کیک کہ اینو بلوچ ورناک بھلو کچ اسیٹ گم و بیگواہ مننگ ءُ و دا حالیت آتیٹی ورناک خلیس نا گواچی مسنو و سیاسی گل آتا بشخ مننگ افس۔ ولے زوراک نا مونا سلنگ کن بے تواری و تینے پاناد کننگ حل اس اف۔ دا زوراکیک توننگ خوارہ و دافتے توننگ کن سیاست الّمی ءِ۔ اسہ خوانندہ گَل ئسے نا حیثیت ئٹ نن کوشست کینہ کہ خضدار نا ہندی بندغ آتے تینتون اوار کین، بلکن چنکو کچ اسیٹ ولے اینو خننگک کہ نن ورناتے تینتون اوار کرینن و داسہ مُستی نن خضدار ئٹ ورنا تے اوار کننگ کن بھلو کوشست کرون۔
بنجائی سنگتاک گیشتر ہیت کریسہ پاریر کہ خضدار ئٹ خواننگ جاگہ غاک ایہن کم ءُ پدا اندا ادارہ غاک ہم ویل آتا گواچی ءُ دن کہ ڈگری کالج اس ارے ولے بنداوی آسراتی تیان پدماندہ ءِ۔ اندا وڑ جھالاوان میڈیکل کالج تینا بنداوی آسراتی تیان پدماندہ ءِ و اونا انفراسٹرکچر بھس کاری نا گواچی ءِ۔ سکندر یونیورسٹی نا ماڑی تیوہ تیار ءِ ولے چار سال مریک دائسکان اوٹی خواننگ بناء متنے و اونا ماڑی اندُن تیار کننگ آن گڈ یلہ کننگانے۔ خضدار ئٹ غٹ خواننگ جاہ تا ویل آک بلوچ لٹریسی کمپیئن نا وسیلہ ئٹ گل ئنا پارہ غان ارفنگور و دافتا ایسری کن جتا ءُ گامگیج کننگو۔
دیوان ئٹ تیوہ سرحال آتا زی آ ہیت و گپ آن پد بروکا گامگیج ئٹ ہنکین نا مسکوہی کابینہ ایسر کننگا و پوسکن گچین مروکا کابینہ ٹی شاہ نور بلوچ ہنکینی کارمستر، نوید بلوچ کمک کارمستر، جویریہ بلوچ ہنکینی کارگشاد، عزیر بلوچ کمک کارگشاد و خلیل بلوچ ہنکینی احوال کاری کارگشاد گچین کننگار۔
دیوان نا ایسر ئٹ بنجاہی سنگت پوسکن گچین مروکا ہنکینی سنگت آتے سوغند تس و پوسکن گچین مروکا زمہ وار آک تینا زمہ واری تے ایسر کننگ نا سوغند ارفیر۔
اسٹوڈنٹس ایکشن کمیٹی
