سرور داد ھنکینی کارمستر ءُ سہیل بلوچ ھنکینی کارگشاد گچین کنگ بوتگ انت۔
بلوچ اسٹوڈنٹس ایکشن کمیٹی اوتھل ھنکین ءِ ھنکینی لس دیوان ھنکینی کارمستر سدرہ بلوچ ءِ پاگواجہی ءَ برجم دارگ بوتگ۔ دیوان ءِ مہمانِ ھاس بنجاہی کمیٹی ءِ باسک پیرجان بلوچ ءُ گچینی مہمان بنجاہی کمیٹی ءِ باسک شیراز بلوچ بوتگ انت۔دیوان ءَ بنجاہی سرکیولر، ھنکینی گوستگیں احوال، نگد کاری، گل کاری، ھندی ءُ میان استمانی سیاسی جاورہال ءِ سرءَ تران بیتگ۔
بُنجاہی سنگتاں تران کنان ءَ گشتگ کہ مرچی ہمے وڈے جاورے بلوچستان ءَ اتکگ کہ ورنا وہدے وتی ہنداں پہ وانگ ءِ واستہ دیم پہ شھر ءَ در کپ اَنت، اے ورنا سیاست ءِ بہر بیگ ءَ نہ اَنت ءُ بلوچ ڈیھ ءِ سیاسی چست ءُ اِیر ءَ زانگ ءَ نہ اَنت، اے ورنا جتا جتاہیں ڈسکورسانی آماچ بوانءَ جتا جتاہیں چاگردی سلکاریانی آماچ بیگ ءَ انت۔ وہدے کہ بلوچ ورنا وتی ڈیھ ءِ سیاسی جاوراں سرپد مہ بنت اے کم چہ کم پہ بلوچ یے ءَ سکیں مزنیں تاوان اَنت۔بلے نودربر گل یے ءِ بستارءَ مئے جہد بیت اِنت کہ ہما ورنا کہ سیاسی چست ءُ ایراں گون نہ اَنت ءُ سیاستءَ ردیں عمل ئے سرپد بنت، ہما ورنا وتی ہمراہ کنگی اَنت دانکہ ورنا وتءَ ءُ وتی راجی زمہ واریاں بہ زان اَنت ءُ پہ بلوچ ءَ وتی جہد ءَ بہ کن اَنت۔
دیمترا بُنجاہی سنگتاں تران کنان ءَ گشتگ کہ اوتھل ءِ تہءَ سنگتاں گوں سنجدگی ءَ کار کتگ مرچی اوتھل ءِ تہ ءَ ادارہ جاتی سوچ ءِ پیداک بوتگ ءُ یک شوکیں سیاسی چاگردے جوڈ کنگ بوتگ بلے سیاست ءِ تہءَ خوش فہیمی ءِ شکار بوھگی نہ اِنت بلکیں انگت گیش کنگی اِنت ءُ یونیورسٹی ءَ ابید ہم ھندگی دمگانی تہ ءَ تنظیم کاری کنگی اِنت ءُ جہد کنگی اِنت کہ ھندی ورنایاں وتی ہمراہ بہ کنیں۔ ھندگی دمگانی تہ بلوچ لٹریسی کمپئین ءِ وسیلہ ءَ وانگی جیڑہ ءُ جنجالانی واستہ عملی صورت ءُ گامگیج زوریں۔
لس دیوان ءَ سرجمیں بنگپانی سرءَ گپ ءُ تران ءَ پد گڈی بنگپ آوکیں گامگیج ءَ گوستگیں ھنکینی کابینہ ھلاس کنگ بوتگ ءُ نوکیں کابینہ گچین کنگ بوتگ۔ نوکیں کابینہ ءِ تہءَ سرور داد ھنکینی کارمستر، شکیل بلوچ ھنکینی کمک کارمستر، ھنکینی کارگشاد سہیل بلوچ، ھنکینی کمک کارگشاد ظفر بلوچ، ھنکینی ھالرسانی کارگشاد احسان بلوچ گچین کنگ بوتگ انت۔ گڈ سرءَ نوک گچین بوتگیں سنگت سوگند دیگ بوتگ انت سنگتاں گل ءِ کارانی گہتریں داب ئے ءَ دیمءَ برگ ءِ پیمان کُتگ۔
