بلوچ اسٹوڈنٹس ایکشن کمیٹی حیدر آباد ھنکین ءِ ھنکینی لس دیوان برجم دارگ بیتگ
فدا بلوچ ھنکینی کارمستر ءُ عمران بلوچ ھنکینی کارگُشاد گچین کنئگ بیتگ انت۔
بلوچ اسٹوڈنٹس ایکشن کمیٹی حیدر آباد ھنکین ءِ ھنکینی لس دیوان ھنکینی کارمستر زبیر بلوچ ءِ سروکی ءَ برجم دارگ بیتگ، دیوان ءِ ھاسیں مہمان بنجاھی کمیٹی ءِ باسک سلیم بلوچ ءُ گچینی مہمان شیراز بلوچ بیتگ اَنت۔ دیوان ءَ بنجاھی سرکیولر، گوستگیں ھنکینی اھوال، شرگداری، گل کاری، ھندی ءُ میان استمانی سیاسی جاورھال ءُ آؤکیں گامگیج ءِ بنگپانی سرءَ گپ ءُ تران بیتگ۔
بنجاہی سنگتاں تران کنان ءَ گشت کہ اے ھند ءُ دمگاں وھد ءِ لوٹ ھمیش انت کہ گل ھندی نودربر ءُ لس مہلوک ءِ تک ءَ سر کنگ بہ بیت۔ مزن شاہدربرجاھاں ابید ھرچ ھما ھند ءَ کہ بلوچ جاہمنند انت گل ءِ اودءَ سر کنگ وھد ءِ لوٹ انت۔ ھمے ھاترءَ سنگت جہد بہ کن اَنت کہ ھما ھنداں بلوچ آبادی است اِنت اودءَ کسان ءُ مزنیں مراگش اڈ بہ دئینت۔ دیمترءَ سنگتاں نگد کنان گشت کہ نودربر سیاست ءِ تہ ءَ اژدری اِیں شئے لٹریچر انت بلے گندگ ءَ کئیت کہ سنگت لٹریچر ءَ ھمک باسک ءِ تک ءَ سر کنگ ءَ شریں وڑے ءَ سوب مند نہ بوتگ اَنت۔ نودربر سیاست ءِ تہ ءَ زمینی راستی ءِ زانگ اژدری ایں چیزے,باز زمینی راستی انچش بنت کہ بگندے بازیں کار ءُ پالیسیانی دروشم مٹ کنگ کپیت,سنگت وتی زمینی راستیاں بہ چار اَنت ءُ دیمترا ھما رنگ ءَ وتی کاراں بہ جُنزین اَنت۔
دیمتر ءَ بُجاھی سنگتاں تران کنان ءَ گُشت بلوچ نودربر جتائیں ٹولیانی نیمگ ءَ چہ وتگڈیں ھیال ءُ لیکہانی بنیاد ءَ سیاست ءَ چہ دور دارگ بوھگ ءَ اَنت ایش روشتاں یک مھکمیں سیاسی پروگرام ءُ لٹریچرے داشت کت کنت، بلوچ نودربرے ءِ بستار ءَ مارا بلوچ چاگرد ءُ جُنز ءِ استیں لوٹانی ھساب ءَ وتی لٹریچر ترتیب دئیگی اِنت ءُ وانگ ءِ عمل دیمءَ برگی اِنت داں ایش وتگڈیں روشتانی دیما داشت کُت بہ کنیں۔
جتائیں بنگپانی سرا گپ ءُ تران ءَ پد دیوان ءِ گُڈی بنگپ آؤکیں گامگیج ءِ تہ ءَ گوستگیں ھنکینی کابینہ ھلاس کنگ بوت ءُ نوکیں کابینہ ءِ ھاترا فدا بلوچ کارمستر، زبیر بلوچ کمک کارمستر، عمران بلوچ کارگشاد، غلام مستپہ بلوچ کمک کارگشاد ءُ مزمل الہی بلوچ ھالرسانی کارگشاد گچین کنگ بوت انت۔ دیوان ءِ گڑسرا نوک گچین بوتگیں کابینہ ءَ سوگند دیگ ءَ پد دیوان ءِ ھلاسی یے جار جنئگ بوت۔
