بلوچستان کتاب کاروان ءِ نام ءَ اوستہ محمد ڈگری کالج ءَ دو روچی کتاب میڑہ ئے برجم دارگ بیتگ۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نصیرآباد ھنکین ءِ نیمگ ءَ بلوچستان کتاب کاروان ءِ نام ءَ دو روچی کتاب میڑہ ئے برجم دارگ بیتگ۔ کتاب میڑہ اوستہ محمد ڈگری کالج ءَ برجم دارگ بیتگ کہ دو روچ ءَ جنزیتگ، نودربر ءُ ایدگہ مردماں بھر زرتگ ءُ وتی دوستیگیں کتاب زرتگ۔
کتاب میڑہ ءَ گل ءِ تاک نوْشت ءُ زہگانی تاک گام ایر کنگ ءَ اوار ایدگہ جتائیں سرہالانی سرءَ کتاب ایر کنگ بیتگ۔ نودربر ءُ استاداں گوں وشنودی ءَ پہ وانگ ءَ وتی دوستیگیں کتاب درچیتگ ءُ زرتگ اَنت۔
بلوچستان کتاب کاروان گل ءِ یک کتاب میڑہی کیمپئن ئے کہ بلوچستان ءِ وانگی ادارہاں اوار میتگ ءُ بازاراں برجم دارگ بیت داں بلوچ نودربر کتاباں گوں نزیکی بہ کن اَنت ءُ زانت ءُ دربرگ ءِ نیمگءَ بیا اَنت۔
ما گوں دل پہکی ءَ اے کیمپئن ءَ بلوچستان ءِ کُنڈ کُنڈ ءَ سر کنیں ءُ وتی راج ءِ تہ ءَ زانت ءُ زانشت ءَ گیش شِنگ ءُ تالان کنگ ءِ جہد ءَ کنیں۔
