بلوچ اسٹوڈنٹس ایکشن کمیٹی شال ھنکین بی ایم سی بنزہ ءِ نیمگءَ چہ نوک آؤکیں نودربرانی واستہ یک وش اتکی مراگشے برجم دارگ بوت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی شال ھنکین بی ایم سی بنزہ ءِ نیمگءَ چہ نوک آؤکیں نودربرانی واستہ یک وش اتکی مراگشے برجم دارگ بوت۔ مراگش ءِ مھمان ھاس گل ءِ بنجاھی کماش شبیر بلوچ ءُ گوستگیں بنجاھی کماش ڈاکٹر صبیحہ بلوچ بوتگ اَنت۔ مراگش ءِ تہءَ جتا جتائیں بھرانی سرءَ تران، ٹیبلو، ڈاکومنٹری، کسمانک، بلوچی چاپ سوت ءُ ایندگہ بھر اڈ دیگ بوت انت۔
مراگش ءِ بندات گوں راجی سوت ءَ بوت، ءُ نوک اتکگیں نودربرگوں ناکو فیض محمد فیضک ءِ ترز ءِ چاپ ءَ وش اتک کنگ بوت اَنت۔ دومی بہرانی سرءَ مراگش دیما برانءَ کندیلِ بلوچ استاد واجہ صباء دشتیاری ءِ زند، جہد ءُ آئی نمیرانیءِ سرءَ یک ٹیبلو ئے پیش دارگ بوت، حنیف شریف ءِ تامر بلوچستان ھوٹل ڈرامہ ءِ رنگ ءَ پیش دارگ بوت، شائرِ آشوب واجہ مبارک قاضی ءِ زند سرءَ یک ڈاکومینٹری ئے ھم پیش دارگ بوت۔
دیوان ءَ دیما براں سنگتاں بلوچستان ءِ جیوگرافی سرءَ یک ڈاکومینٹری ئے ھم پیش داشتءُ بابائے بلوچ قوم بابا خیر بخش مری ءِ زند سرءَ یک ڈاکومینٹری ئے پیش دارگ بوت۔ لمہِ وطن بانک کریمہ ءِ نمیرانی سرءَیک ٹیبلو ئےِ اڈ دات ءُ آئی زند، سیاست ءُ عمل ءِ سرءَ یک ڈاکومینٹری یے پیش داشت ءُ آئی ءِ یات ءَ چراگ ھم بالینگ بوت۔ بلوچستان ءِ تہءَ ھر روچ ءِ بیگواھیءِ سرءَ یک ٹیبلو ئےِ ہم پیش کنگ بوت کہ ایشی ءِ تہءَ بازیں کردارانی راستی ھم دیما آرگ بوت اَنت۔ دیوانءِ تہءَ بلوچی چاپ ءُ سوت ہم اوار اِت اِنت۔
دیمترءَ دیوان ءِ مھمان بلوچ اسٹوڈنٹس ایکشن کمیٹی ءِ بنجاھی کماش شبیر بلوچ ءِ تران ات کہ آئی ءَ وتی تران کرت ءُ گشت کہ مرچی باز وشی بیت کہ بلوچستان ءِ جتائیں دمگاں چہ نودربر میڈیکل ءِ چکاس ءَ پاس کن اَنت ءُ اِدءَ کاینت بلے بژن ھمیش اِنت کہ اِدءَ آیگ ءَ رند بازیں وتگڑیں بیانیه ءُ ڈسکورسانی آماچ بنت ءُ وتءَ چہ سیاست ءَ دور دار اَنت۔
کماش ءَ گشت کہ مروچی بلوچ راجی لوٹ ھمیش انت کہ ما شما کل بلوچ سیاست ءَ ھوار بہ بیں ءُ بلوچ سیاست ءِ لوٹاں پیلو بہ کن ایں۔ اگاں کسّے بلوچ سرزمین ءَ نشتگ ءُ زند گوازینگ ءَ انت ءُ ھمے بیانیه ءِ منوگر انت کہ من بلوچ سرزمین ءَ ننداں، چماں بند کناں ءُ سیاست نہ کناں، گڑا من ھمے سرپد باں کہ آ مستریں مناپکاں چہ یکے۔
کماش ءَ وتی گپانی آسر گوں لہتیں گپاں کرت کہ آ گپ چو اے وڑا اِت اَنت کہ چوں بلوچ ءَ غیر سیاسی کنگ ءِ راہ ءُ راہبندانی سرءَ کار بوگ ءَ انت، یا کہ دوہمی ھما جیڑہ کہ بلوچ نودربر آئی ءِ آماچ بوگ ءَ پد بلوچ راجی سیاست ءَ چہ سرجم ءَ گستا بنت، بلے اے مئے کُلیں ورنایانی راجی زمہ واری اِنت کہ آ وتی راجی ھک ءَ ادا کنگءَ سیاسی عمل ءِ گہتریں رنگے ءَ بھر بہ بنت۔
دوہمی مھمان گوستگیں بنجاھی کماش ڈاکٹر صبیحہ بلوچ ات کہ آئی تران کرت ءُ وتی بی ایم سی ءِ سپر دیوانءَ دیمءَ ایر کرت۔ سنگت ءَ گپ کنانءَ گشت کہ من بی ایم سی آیگ ءَ پیسر یا کہ آیگ ءَ رند ءُ بساک ءَ ھوار بوگ ءَ پیسر اے نہ زانتگ کہ چہ بی ایم سی ءُ ڈاکٹری ءِ فیلڈ ءَ ابید ھم دگہ دگنیا ئے ھست، بلے بساک ءَ آیگ ءَ رند منءَ نہ تہنا وتی زند، زبان، راجدپتر ءُ راجی بقاء ءِ شوھازگ ءَ کمک رستگ بگندئے وتی زانت، پگر، ءُ شعور ءَ چہ وتی سیاسی عمل ءِ دیمءَ برگ ءِ سکیں ھم رستگ۔
سنگت ءَ دیمترءَ گشت کہ اگاں کسّے اے گپ ءِ سرءَ بیسہ داریت کہ جی من بس واناں ءُ سیاست ءُ عمل ءِ بہر نہ باں گڑا المی انت کہ آ ھمے بی ایم سی چہ در تکگیں مردمانی زندءِ سرءَ چمشانکے بہ دنت کہ آہاں بی ایم سیءِ تہءَ ونتگ ءُ عمل ءَ گوں سرجم ءَ ھوار بوتگ انت۔ وتی فیلڈ ءَ گوں جوانی ءَ وانگ ءُ دربرگ ءَ رند ما بگندئے یک جوانیں ڈاکٹر ئے بوت بہ کن ایں بلے یک جوانیں جھدکارے ءُ یک جوانیں بلوچے بوت نہ کنیں، مارا گوں وتی فیلڈ ءِ ھواری ءَ بلوچ راجی سیاستءِ جند شریں وڈے ءَ پہمگی انت۔ بےسمائی ءِ تہءَ وتی زند گوازینگ ءُ چم بند کنگی نہ اَنت۔ ما بلوچ راج ءَ گوں سیادی داریں گڈا مئے ہمک عمل ءُ گام بلوچ راج ءِ واستہ یک مکسدے داریت ءُ مارا ھمے راجی مکسد ءِ جند زانگ ءُ مارگی انت۔
دیوان ءِ سرجمیں بھر گوں دلجمی ءَ اڈ دیگ بیت اَنت ءُ گڈ سرءَ مراگش ءِ آسر کنگ ءِ جار جنگ بوت ءُ مراگش ھلاس بوت۔
بلوچ اسٹوڈنٹس ایکشن کمیٹی
