بلوچ لٹریسی کیمپین ءِ نام ءَ لیاری ءَ وانگی مراگشے برجم دارگ بیتگ
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی کراچی ھنکین ءِ نیمگ ءَ چہ بلوچ لیٹریسی کیمپین ءِ نام ءَ ماں لیاری ءَ مراگشے برجم دارگ بیتگ۔ مراگش ءِ مھمانِ ھاس گل ءِ بنجاھی ھالرسانی کارگُشاد اُزیر بلوچ ءُ بنجاھی کمیٹی ءِ باسک سلیم بلوچ بیتگ اَنت- مراگش چار جتائیں بھرانی تہ ءَ اَت کہ آئی ءِ تہ ءَ گُشتانک، کیریئر کاؤنسلنگ، ٹیبلو، بلوچ لیٹریسی کیمپین کتابک ءِ سرپدیءِ بھر ھوار بیتگ اَنت۔ دیوان ءَ بلوچستان کتاب کاروان ءِ نام ءَ کتاب اسٹال ہم جنگ بیتگ۔
مراگش راجی سوت ءَ گوں بندات کنگ بوت ءُ مراگشءِ اولی بھر گُشتانک اَت کہ ایشی ءِ تہ ءَ بلوچ اسٹوڈنٹس ایکشن کمیٹی ءِ بُنجائی کمیٹی ءِ باسک سلیم بلوچ ءَ وانگ ءِ ارزشت ءُ لیاری ءِ وانگی نظام ءِ سرءَ تران کُت-
سنگت ءَ تران کنان ءَ گُشت کہ وانگءِ معنا ءُ بزانت ءَ اگاں ما شریں وڈے ءَ بہ زانیں ءُ وانگ ءِ مول ءُ مراد ءَ سرپد بہ بیں گُڈا وانگ ءِ ارزشت ءَ زانت کنیں۔ وانگ ءِ مول ءُ مراد چاگرد ءِ گھتری ءِ ھاتر ءَ ورنایانی تربیت کنگ ءُ باسمائیں ءُ باشعوریں انسان جوڈ کنگ اِنت کہ آ چاگرد ءِ دیمروئی ءِ ھاتر ءَ کار کُت بہ کن اَنت- مئے بدبھتی اِنت کہ کراچی ءَ ما ہزاراں سال اِنت آباد ایں بلے کراچی ءِ سرجمیں سیاسی ءُ معاشی نظام دگہ راجانی دست ءَ اِنت ءُ بلوچ کراچی ءِ تہ ءَ مرچی اقلیت ءِ تہ ءَ اتکگ۔ لیاری زیکیں وھدءَ کسانیں یونان گوشگ بیتگ کہ اِدءَ علم، ادب، سیاست، فلسفہ ءُ ایدگہ سرہالانی سرءَ مدام دیوان ءُ باوست بیتگ بلے مرچی بلوچ دُژمنیں تاگتاں لیاری ءِ پجار تہنا گوں فٹبالءُ منشیات ءَ گوں بندوک کتگ۔
دیتمرءَ بانُک اَسیلہ بلوچ ءَ زالبولانی وانگی نظام ءِ سرءَ تران کنان ءَ گُشت کہ لیاری ءَ زالبول سکیں کسانیں کساسے ءَ پہ وانگ ءِ ھاترءَ در کاینت ایشی ءِ مستریں سوْب اِش اِنت کہ کراچی ءِ زالبول لھتیں گُپتمانانی رنگ ءَ چہ وانگ ءَ گِستا کنگ بیتگ اَنت ءُ ایشی ءَ چہ ابید بازیں پت وتی زھگ ءَ اے بنیاتءَ وانگ ءَ دیم نہ دیئنت کہ وانگ ءَ باندات ءُ مکسد نیست۔
مراگشءِ دومی بھر کیریئر کاؤنسلنگ اَت کہ آئی ءِ تہ ءَ سنگت عارف بلوچ ءَ جتائیں وانگی پِڈانی ھوالہ ءَ نودربر سرپدی دات اَنت ءُ اِشانی ارزشت ءِ سرءَ تران کُت ءُ گوْشت کہ وانگ تہنا ڈگری گرگ نہ اِنت کہ کسے ڈگری گِپت ءُ پہ نوکری ئے ءِ واستہ جہد کنت، بلکیں وانگ وتی بودانی درنگاز کنگ ءُ آہانی ھوالہ ءَ کار کنگ اِنت۔
مراگشءِ سیمی بھر ٹیبلو اَت کہ بلوچ اسٹوڈنٹس ایکشن کمیٹی ءِ نیمگ ءَ چہ جوڈ کُتگیں ٹیبلو کہ لیاری ءِ وانگی ءُ چاگردی جیڑہانی سرءَ اَت پیشدارگ بوت-
دیوان ءَ اتکگیں مہمان واجہ حبیب حسن ءَ بساک کراچی ھنکین ءِ منت گپت ءُ اے وڈیں مراگشے اڈ دیگ ءِ ستا کت ءُ گوْشت کہ کسے پیداگ بیتگ وانندہ ئے نہ بیتگ ءُ آہی چاگرد نا وانندہ بیتگ اے آہی ءِ میار نہ اِنت بلے کسے بہ مِریت ءُ انگت آہی ءِ چاگرد وانندہ نہ اِنت گُڈا ادءَ آ میاری اِنت کہ آہی ءَ پہ وتی چاگرد ءَ ہچ کُت نہ کُتگ۔ اے واستہ وانگی نہ اِنت کہ کسے نوکری بہ گِپت بلکیں پہ زانگءَ وانگی اِنت، وانگی تہنا نہ اِنت بلکیں زانگی اِنت۔
مراگشءِ دیمی بھر بلوچ لیٹریسی کیمپین ءِ درنگازی اَت کہ آئی ءِ سرءَ ھنکینی ھالرسانی کارگُشاد ءَ بلوچ لیٹریسی کیمپئن ءِ مکسد مہلوک ءِ دیمءَ ایر کُت-
مراگش ءِ گُڈسرءَ بلوچ اسٹوڈنٹس ایکشن کمیٹی ءِ بنجاہی ھالرسانی کارگشاد اُزیر بلوچ ءَ تران کُت ءُ گوْشت کہ مرچی وشی بیت کہ استاد سباء دشتیاری ءِ میتگءَ گل ءِ نیمگءَ چہ اے وڈیں مراگش اڈ دیگ بیتگ ءُ لیاری ءِ زہگانی وانگ ءُ زانگ ءُ چاگرد ءِ تہ ءَ آہانی کرد ءِ بابت ءَ گپ ءُ تران بیگ اِنت۔ لیاری کہ بلوچ راج ءِ پجار ءِ بھر اِنت مرچی جتائیں پندلاں چہ ادءِ مردم ہرچ وڈیں بنیادتی آسراتیاں چہ زبہر کنگ بیتگ اَنت ءُ بدواہاں اے جہد کتگ کہ ادءِ مہلوک ءُ ورنا چہ بلوچ سیاست ءَ دیر بہ بنت بلے اینچو پندلاں پد ہم لیاری چہ بلوچ راجی سیاست ءَ نہ سِستگ۔ ورنایاں وتی جہد گیشتر ترند کنگی اِنت ءُ ادءَ راجی ادارہ مہکم کنگی اَنت داں بلوچ ورنا ءُ مہلوک دریں تاگتانی دست ءَ رد مہ کپیت۔
آہی ءَ گُڈسر ءَ گوْشت کہ ما اد ءِ استاد ءُ چاگردی جہدکارانی منت واریں کہ مئے ہمکوپگ اَنت ءُ اے وڈیں کاراں مئے کمک کنگءَ اَنت، مئے جہد بیت کہ لیاری ءِ ہرچ وانگجاھ ءُ میتگ ءَ ہمے وڈیں مراگش برجم بہ داریں دانکہ بلوچ زہگاں وتی ماتی زبانءَ وانینگ ءِ سکین ءُ ورنایاں چاگرد ءَ گہتریں کار کنگ ءَ سکین بہ دئیں۔
سرجمیں بھر دلجمی ءَ گوں اڈ دیگ بیت اَنت، اتکگیں مہمانیں اُستاداں بی ایل سی کتابک سوگات کنگ بوت ءُ دیوان ہلاس کنگ بوت۔
بلوچ اسٹوڈنٹس ایکشن کمیٹی
