بلوچ اسٹوڈنٹس ایکشن کمیٹی شال ہنکین نا نیمہ غان اسہ ہنکینی ہیلکاری دیوان اس ہنکینی کارمستر علی جان مقصود بلوچ نا کماشی ٹی اڈ تننگا۔ دیوان نا مہمان خاص بنجائی کماش شبیر بلوچ و بنجائی کمک کماش رفیق بلوچ ئسر و گچینی مہمان بنجائی بھلا کارگشاد اظہر بلوچ ئسک۔
Topic: The Development Dictionary; A guide to Knowledge as Power
ہیت کروک: بنجائی کماش شبیر بلوچ
سنگت ہیت ءِ بناء کریسہ پارے کہ دا کتاب ئسے ہرا پورو آ لوز ڈویلپمنٹ نا زی آ شرہ کیک و داٹی بھاز سرحال ارے ولے نن گڑاس سرحال آتا زی آ شرہ کینہ، ایہن دا لوز ڈویلپمنٹ ہر جاگہ غا دیمروی کن کاریم ئٹ ہتنگک ولے دا کتاب اندا پائک کہ دا اسہ لوز ئسے ہرا نا گواچنی آ معنہ مٹ و گم مسنے۔ دا ہیلکاری دیوان ئٹی نن اندا لوز آتا یلہ کننگ یا اوفتا معنہ تا مٹ مننگ نا زی آ ہیت کینہ۔
سنگت پارے کہ تینا زبان نا یلہ کننگ آن تہذیب بھس مریک، اندا وڑ لوز آتا مٹ مننگ نفسیات ءِ ہم مٹ کیک۔ دانا مطلب دادے کہ لوز آک نیک نیتی و بد نیتی ٹی کاریم ئٹ ہتنگرہ۔ مثیل کہ نن مون انگا دے ءِ بلیک ڈے پانہ یا کہ مون بھاز جاگہ غا بد یا خراب کن کاریم ئٹ ہتنگک۔ اینو ڈویلپمنٹ نا پن آ جہان اسہ مونتس ئسے نا پارہ غا ہنانے، دن کہ تینا سواد آتیکن یا کہ سیاسی تاغت ءِ پاش کننگ کن قطر ئٹی فٹبال ورلڈکپ مسک اوٹی او تینا سیاسی تاغت ءِ پاش کرے کہ ہرافتا زی آ کنا منشا مریک ہمو گڑاک کاریم ئٹ ہتنگر نئے کہ پین گڑاک، داسا کہ او تاغت اس ئسک گڑا اونا برخلاف عملی گام ہچ متو۔ ڈویلپمنٹ ہم اندادے کہ ہراتم نی تاغت ئسے اس گڑا نا ہر عمل جہان کن ڈویلپمنٹ نا بشخ اس پاننگک۔
سنگت مونی ہیت کریسہ پارے کہ اینو جہان نا ڈویلپمنٹ نا وسیلہ ئٹ ایلوفتا خیال آک ہلنگ مننگ ءُ، و اندا ڈویلپمنٹ نا سوب آن انصاف نا معیار اندا جوڑ مسونے کہ ہر بندغ خوائک کنے زند گدریفنگ نا آسودئی و آسراتیک رسینگر۔ دن کہ Well-settle مننگ نا خیال دا اسہ انفرادی ءُ سوچ ئسے ہرا راجی دیمروی نا خیال آن کشک بندغ ءِ۔
اندا ڈویلپمنٹ نا سوب آن اوپن مارکیٹ و گلوبل ویلیج نا دروشم ئٹ ننے سواد آتیان گیشتر نسخان رسینگک انتئے کہ گلوبل ویلیج راجی سیم تے لغت و بے شرف کیک، دن بلوچستان ئٹی چین، سعودی و کینڈا وغیرہ، ہراتم ہم خواست کیرہ ڈویلپمنٹ نا پن آ سیاسی و زرگزرانی دروشم ئٹ بلوچستان نا مڈی تے لٹ و پل کیرہ و کننگ ءُ۔
سنگت دیوان ءِ مونی دریسہ گڑاس لوز آتا زی آ شرہ کرے ہرا کہ دا کتاب ئٹی شرہ مسونو۔
اولیکو برابری: سنگت پارے کہ بر اینو نا وخت آتیٹی برابری نا درجہ حاکم بیرہ محکوم آتیکن کاریم ئٹ ہتیک، اونا مونا بیرہ محکوم آک تینتون برابر ءُ۔
مونی مدت یا کمک نا بکار: سنگت دا لوز ئنا زی آ ہیت کریسہ پارے کہ جہان ئٹی استحصالی پروجیکٹ آک مونا بننگ ءُ، دا پروجیکٹ آک لٹ و پل اکن جوڑ ءُ و دا ظلم و بیدادی کیرہ ولے اندا استحصالی پروجیکٹ آک اسہ پارہ غا ظلم کیرہ ایلو پارہ غا تینا این جی اوز تے ایکٹو کیرہ کہ نن نما کمک کن بسونن گواچنی ئٹ دا ہمو استحصالی پروجیکٹ و اوفتا ظلم و بیدادی تے ڈکھیرہ۔
مونی بکار ئسک: دا لوز ئنا زی آ سنگت پارے کہ ہراتم دا لوز بکار بریک گڑا اندا پاننگک کہ اینو نا وخت آ آسراتی یا کہ سہولت اسہ بکار ئسے یا کہ اینو پگہ بکار دادے کہ انصاف رسینگے او انصاف ہم آسراتی نا بنیات آ مرے۔ اینو بکار اسہ نشہ ئس مسونے، ہر ہمو گڑا کہ دانائی نا بنیات آ ارفنگک او چاہنداری ئسے۔
مونی لوز بزگی آ شرہ کرے: سنگت پارے کہ بزگی ہم دا ڈکشنری ٹی دا پاننگک کہ ہر ہمو بندغ اینو نا گُرج آتے ہلنگ کپک ہرا بزگ ءِ، اونا مثیل ءِ سنگت دن تس کہ 1987 ٹی اسہ اینکر اس لداخ ئٹ اسہ بندغ ئسے سوج کیک کہ نما ہند آ اٹ بندغ بزگ ءُ او ورندی تیک کہ داڑے کسس بزگ اف، اوکان پد 2002 ئٹی ہراتم ہمو بندغ پائک کہ ننے کمک نا بکار ءِ گڑا داڑے اندا گڑا چائنگک کہ بزگی اف ولے بکار آک بزگی ہتیرہ۔
گڈیکو لوز ٹیکنالوجی ئسک: سنگت دا لوز ئنا زی آ ہیت کریسہ پارے کہ لوز ڈویلپمنٹ 1988 و 1990 آ پوسٹ ڈویلپمنٹ نا دروشم ئٹ مونا بس ہراٹی مسکوہی ڈویلپمنٹ ءِ پدماندہ پاننگا و پوسکن آ ڈویلپمنٹ، ہرا پوسٹ ڈویلپمنٹ ئٹ چائنگک، دیمروی نا بنیات آ چائنگا، دا وخت آ دا پاننگا کہ مسکوہی ڈویلپمنٹ ئٹی ٹیکنالوجی متنے دا ٹی ٹیکنالوجی، میڈیا یا کہ آرٹیفشیل انٹیلیجنس ارے مطلب کہ دا ٹیکنالوجی نا سوب آن ڈویلپمنٹ ءِ معنہ تسر المی اف کہ اینو نا وخت آتیٹی نن ٹیکنالوجی آن تیوہ نمن مرین ولے ننے دافتا گواچنی آ مسخت ءِ چاہوئی ءِ۔ اندن کہ میڈیا نا اسہ گڑا ئسے ننے چاہوئی ءِ کہ میڈیا امر بندغ آتا خیال آتے تورک۔
سنگت پارے کہ دا کتاب خواننگ آن بناء ٹی مچٹ کنفیوز ہم کیک انتئے کہ اسہ پورو ءُ بے امنائی نا دروشم اس خننگک، ولے نن کن دانا خواننگ المی ءِ انتئے کہ ننے لوز آتا مٹ مننگ نا سوب آتے سرپند مروئی ءِ۔
سنگت تینا ہیت آتے انداڑے ایسر کرے، و سوج و ورندی نا بشخ آن گڈ ہنکینی ہیلکاری دیوان ایسر کننگا۔
بلوچ اسٹوڈنٹس ایکشن کمیٹی
