کراچی ھنکین ءِ پولیٹکس آف جیوگرافی ءِسرءَ ھیلکاری دیوانے

بلوچ اسٹوڈنٹس ایکشن کمیٹی کراچی ھنکین ءِ نیمگ ءَ چہ یک ھیلکاری دیوانے ھنکینی کارمستر زکریا بلوچ ءِ سروکی ءَ برجم دارگ بُوت۔  دیوانءِھاسیں مہمان  بُنجائی کماش سنگت شبیر بلوچ ءُ بُنجائی ھالرسانی کارگُشاد سنگت اُزیر بلوچ ءُ گچینی مہمان بُنجائی کمیٹی ءِ باسک سنگت سلیم بلوچ اِت اَنت

سرھال: پولیٹکس آف جیوگرافی

تران کار: اُزیر بلوچ  (بُنجائی ھالرسانی کارگُشاد)

دیوانءِ بندات ءَ سنگت ءَ تران کُت ءُ گُشت کہ مُلکانی دیمروئی کنگءَ جیوگرافی ءِ سکیں مزنیں ارزشتے اَست ءُ دنیا ءِ تہ ءَ مروچی امریکہ تاگتور گوشگ بیت، یک زانتکارے گوشیت کہ امریکہءِ تاگتوری ءِ پُشت ءَ آئی ءِ ادارہ اَنت کہ مظبوط انت بلے ٹیم مارشل گوشیت دنیا ءِ تہ ءَ ھرچ وڈ ءَ کہ یک ملک ئےءِ لشکرے مُہرءُ مظبوط بہ بیت ھرچ وڈ آئی ءِ ادارہ مظبوط بہ بنت بلے آہیءَ اگاں شریں جیوگرافی ئے مہ بیت آ مُلک تاگتور بیت نہ کنت۔ امریکہ مروچی تاگتور اِنت ءُ آئی ءِ نیوی دنیا ءِ تہ ءَ مستریں نیوی اِنت بلے مستریں چیز آئی ءِ جیوگرافی اِنت کہ آئی ءِ انچیں جیوگرافی ئے گون ءُ آ اٹالنٹک ءُ پیسیفک مزن زراں ھُگمرانی کنت، آہیءَ سکیں مزنیں جیوگرافی ئے گون اِنت۔

اگاں مروچی امریکہ ءِ زمین ءَ کہ چارے آہی ءِ سر کینڈا ءَ بہ گِر دانکہ یورپ ءَ سک اِنت ءُ امریکہ ءَ مروچی یک انچیں فیڈریشن ئے کہ آہیءَ سک باز استان یکجاہ کُتگ ءُ داشتگ انت۔نوں ھمے بُنیات ءَ امریکہ ءِ سوپر میسی چلگ اِنت کہ آئی ءَ دو مزن زر گون ءُ آہانی سرءَ ھگمرانی کنگ ءَ اِنت کہ آ اٹلانٹک ءُ پیسیپک ءِ نام ءَ زمانگ بنت، اے دوئیں مزن زر کہ آئی دست ءَ اَنت ھمے مزن زِرانی بنیات ءَ آ دنیاءَ گوں نزیک اِنت  کاروبار کنگ ءَ اِنت۔ ایشی ءِ سان چین ءِ سرءَ ہم کپنت پرچاکہ چینءَ ماں اے زراں چوشیں مزنیں تاگتے نیست۔ چین ءِ کشءِ گوریچانی چائینہ دریاءَ چین ءِ سرجمءَ ھُگمرانی نیست بلکیں سنگاپور، ملائیشیاء، تائیوان ءُ ایدگہ ملک ہم اودءَ ھمگرانی کن اَنتءُ اے ملکانی نزیکی گوں امریکہ ءَ اِنت۔

دیمترءَ سنگت ءَ روس ءِ سرءَ گپ کُت کہ روس ھم وتی تہ ءَ تاگتے جوڈ اِنت بلے روس ءِ بدبھتی اِش اِنت کہ روس یک نیمگےءَ بند اِنت۔ روسءَ بِلّے مزنیں زمینے گون اِنت مہریں لشکرے ہست اِنت، آئی ءِ سیکریٹ ایجنسی سک باز تاگتور اِنت ءُ دگہ سک باز آئی ءِ مہری ہست اَنت بلے بد بھتی اِش اِنت کہ آئی ءَ گرمیں آپ ءَ دزرس نیست، ھمے ھاترءَ آ سرجم ءَ گوں ارزشتداریں مزن زراں سستگ۔ ہستیں یوکرئین ءُ روس ءِ جنگ بہ گِندے زاہرءَ دگہ رنگے دیگ بیت بلے سیاسی ہوالہءَ اے جاھ ءِ مزنیں ارشتے ہست کہ پہ روسءَ باد کیمتی اِنت۔ اے جاھءَ ایشیاء ءُ یورپ ھوار بنت ءُ اے پہ روس ءَ دنیاءِ ایدگہ ملکءُ دمگاں گوں ھوار بیگ ءُ کاروبار کنگ ءِ راہ اِنت۔ اگاں اے راہ ءُ دمگاں روس ہلاپیں تاگتے بہ نندیت داں روس سرجمءَ چہ میانی روبرکتءُ ایدگہ دمگاں سدیت۔ ادءَ کہ کسے ھُگمرانی کنت گڈا دنیاءِ مزنیں کچےءَ وتی گوں نزیک کُت کنت۔

دیمترءَ سنگت ءَ تران کنان ءَ گُشت کہ روس ءَ سک باز گوشست کُتگ کہ آ گرمیں آپ ءَ بئیتءُ  آئی ءِ اے ھم واھشت بوتگ کہ ل گوادر ءَ بیایاں،  چوناھ ءَ ہژدھمی کرنءَ روس ءِ یک بادشاہ ئے بیتگ ایشی ءِ واب بیت کہ آہانی لشکریِ سپاہیگ وتی پاداں گرمیں آپ ءَ بشود اَنت۔ ہمے ھسابءَ آ افغانستان ءَ کارمرز کنت داں گوادر ءَ سر بہ بیت ءُ انڈین زر ءَ داں وتی دزرس ءَ بہ کنت، ادا کہ اتک گڈا بزاں آئی ءَسرجمیں روٹ قبضہ کُت ءُ آ گوں سرجمیں دنیا ءَ ھور بیت ءُ آسانی ءَ کاروبار کُت کنت۔ اے دمگ ءِ انچیں مزنیں ارزشتے کہ بازیں تاگتانی چم ادءَ سک اَنت۔ دومی نیمگءَ مروچی چائینہ اِنت کہ آئی ءَ تیل ءِ زورگ ءِ واستہ سک باز جنجالی اِنت ھمے کہ تیل اِنت کہ میڈل ایسٹ ءَ چہ در آیگ ءَ اِنت اے در کیت یکبرے ھرمز اسٹریٹ ءَ گوزیت کہ بلوچستان ءِ بندر عباس ءِ تہءَ کئیت ھما جاہ اِنت مروچی ایران ءِ ایردستی ءِ تہ ءَ اِنت۔ ادءَ چہ کہ تیل ءُ ایدگہ سامان گوزنت اے نیم ایران ءَ گون اِنت ءُ نیم اومان ءَ گون اِنت۔ پیشکا چینءُ ھندوستان وتی سیادیاں گوں ایران ءَ شر کنگ لوٹ اَنت۔

دگہ یک مزنیں اڈاندے چین ءِ واستہ ملاکہ اسٹریٹ اِنت کہ ملیشیاءَ ءُ سنگاپور ءِ میان ءَ اِنت ءُ اے  سکیں کسانیں ءُ رشیں راہے۔ اگاں اے راہءَ سنگاپور ءُ ملیشیا بند بہ کن اَنت گڈا چین سرجم ءَ بند بیت۔ چین ءِ کہ تیل سپلائی اِنت آ سرجم ءَ بند بیت نوں ھمے کہ تیل اِنت آئی ءَ لیٹرے 200 ءَ رسیت بلے گوادر کہ آئی ءِ قبضہ ءَ بیت ھمے لیٹر تیل آئی ءَ 50 ءَ رسیت پمیشکا چین وتی گڈی کوست ءُ وسءَ کنگ ءَ اِنت کہ آ اے جاہاں وتی دست ءَ بہ کنت۔

دیمترا ءَ تران کنان ءَ گُشت کہ مرچی امریکہ اگاں چین ءَ گوں جنگ بہ کنت گڈا آہیءَ پہ اُرشءَ بگندے زمین ءِ پکار مہ بیت بلکیں زر ءِ وسیلہ ءَ اے اُرشاں کُت کنت۔  زی امریکہ ءَ روس ءِ سرءَ حملہ کنگ ءِ واستہ زمین ءِ زلورت بوتگ کہ آہیءَ ترکی ءِ وڈیں ملک کارمرز کتگ اَنت بلے مروچی گوشگ بیت اگاں چینءُ ایدگہ ملکانی سرءَ اگاں امریکہ ارش بہ کنت آئی ءَ زمین ءِ زلورت نہ اِنت آئی ءَ زر گون اِنتءُ  زرانی تہ ءَ وتی مزنیں شیپ کیرئیر( بالی گرابانی ایرائگ ءِ آپی گراب) جوڈ کُتگ۔

بلے چوناہءَ اگاں یک استانئےءِ جیوگرافی لوکیشن انچوں مظبوط بہ بیت ءُ شر بہ بیت بلے اگاں آ تاگتور نہ بوت یک وتواجہیں استانے نہ بوت گڈا دنیا ءِ اے مزنیں تاگت آہیءَ وتی نپانی ہاترءَ  بزّگ ن اَنت کہ ایشی ءِ درور بلوچستان، کردستان، یوکرئین، پولینڈءُ تائیوان ءِ ڈولیں مُلک اَنت۔ ما اے گُشت کنیں کہ جیوگرافی ءِ انچیں مزنیں ارزشتے ہست کہ آ راجاں تباہ ھم کنت ءُ جوڈ ہم کنت، اگاں نزور بیت گڈا ایردست اگاں زورار بیت گڈا ھُگمرانی کنت، انچوشکہ روس اِنت آئی ءَ سکیں مزنیں زمینے گوں آ تاگتور اِنت بلے اگاں آ وتواجہیں استانے مہ بیت اِنت گڈا مروچی پروشتگ اَت۔

گڈسرءَ سنگتاں وتی جُست ایر کُت اَنت ءُ سنگت ءَ جُستانی پسُو دیگ ءَ رند کارمستر ءِ رزا ءَ چہ دیوانءِ ھلاسی ءِ جار جنگ بوت۔

بلوچ اسٹوڈنٹس ایکشن کمیٹی کراچی ھنکین