لورالائی ھنکینءَ گرینڈ اسٹڈی سرکلےبرجم داشتگ

بلوچ اسٹوڈنٹس ایکشن کمیٹی لورالائی ھنکین ءِ نیمگ ءَ چہ گرینڈ اسٹڈی سرکلے ھنکینی آرگنائزر ءِ سروکی ءَ برجم دارگ بوتگ۔

سرھال: زالبول ءُ چاگرد
ترانکار: ھنکینی آرگنائزر

دیوانءِ بندات ءَ سنگت ءَ گْشت کہ ایردستیں چاگرد ءِ اگاں گپ ءَ بکنے چوں زورگر ظالم ریاست وتی ایردستی برجاہ دارگ ءِ ھاتر ءَ تاکت ءُ زوراکی ءَ ھوار نپسیاتی چست ءُ ایر ءَ کارمرزیت، ھمے وڑ ایردستیں قوم ءَ کٹمانی تہءَ بھر ءُ بانگ کنگءِ کوشست کنت ءَ دگہ بازیں پندل سازگیں کوشست کنت چوشکہ زورگر زالبول ءَ را چاگرد ءِ نزوریں تبک گُشیت ءُ پدا اے سوچ ءَ سرجمیں چاگرد ءَ مہلوک ءِ زہن ءَ ایرگیجگ ءِ کوشست کنت پرچاکہ آ زالبول ءِ تاکت ءَ چہ شر سرپد انت کہ زالبول چاگرد ءِ مزنیں تاگتے اگاں آہانی تہ ءَ شعورءُ زانت اتک ءُ آ یکبرے پاد اتک انت گڈا مزنیں تاگتے جوڈ بنت۔
دیمترءَ سنگت ءَ زالبول ءِ دپتر سرءَ چمشانکے دات ءُ گوْشت کہ ھمے گِندگ بیت کہ زالبول مُدام مردین ذات ءِ ایردست بُوتگ،
مردین زات ءَ ھمے پیمیں وتگڑیں پندل سازیتگ ءُ زالبول وتی گلام جوڑ کُتگ بلے انوگیں دور ءَ اے جُست یک مزنیں ارزشتے داریت کہ آیاں چہ ابرم (Nature) ءَ مردین زات ءُ زالبول برابر انت یا زالبول چہ مردین زات ءَ کمتر انت؟ اے بابت ءَ مردین زات ءَ وڑ وڑے منانک داتگ کہ چہ ابرم ءَ زالبول ءُ مردین ءِ نیام ءَ باز پرک است ھمے واستہ زالبول بازیں کار کُرت نہ کنت کہ مردین کُرت کنت۔ بلے اسلءَ چوش نہ اِنت، زالبول کرناں پیسر چاگردءِ تہ ءَ مردیناں چہ گیشتریں جاھےءَ بیتگ بلے پدا وھد گْوزانءَ زالبول جہل جنگ بیتگ، دنیاءِ دین ءُ مزہباں، کاروبار ءُ ایدگرانی سوْبءَزالبول جہل جنگ بیتگ۔
دیمترءَ سنگت ءَ گوستانک ءِ درور دات کہ زالبول ھر ھما کار ءَ کُرت کنت کہ مردین کُت کنت پدا گڑا اے گپ پدر بیت کہ زالبول ءُ مردینانی جُتا جُتائیں سیمسر ابرم ءِ ھچ کانود نہ انت بگندے اے چاگردی جوڈ کتگیں بندش ءُ دود اَنت کہ چاگردی کانود جوڈ کنگ بیتگ انت۔
دیمترءَسنگت ءَ لامارکزم ءُ زالبول ڈارونیت, ءُ زالبول فیوڈیلزم, ءُ زالبول کیپیٹل ازم, ءُ زالبول ءِ دپتر سرءَ چمشانکے دات ءُ پدا سنگت ءَ چاگرد ءِ تہ ءَ زالبول ءِ کرد ءِ بابت ءَ گپ جَت کہ چاگرد ءِ تہ آشوب ءِ واستہ ھردو مردین ءُ زالبول ءِکرد بوھگ الّمی اِنت۔ بلوچستان ءِ تہ ءَ زالبول ءِ کرد بابت ءَ گپ جت کہ بلوچستان ءِ تہءَ بلوچ زالبول ءِ کرد بے درور انت انچُش کہ بانک ھلیمہ بہ بیت یا فرزانہ مجید یا کہ لُمہ یاسمین ھر یکے ءِ کرد پہ وتی جاہ ستا کرزیت بانک کریمہ ءِ بابت ءَ اگاں گپ بہ جنے بانک ءَ مروچگیں دور ءَ بلوچ زالبول واستہ سْیاست ءِ راہ پچ کُتگ مرچی بگندے لُمہ ءِ برورد انت کہ بلوچ زالبول سیا ست ءَ ھوار انت۔ بانک وت نودربر گل بی ایس او ءِ یک سْیاسی جہدکارےءَ ھوار آہی ءِ کماش بیتگ ءُ نودربرانی رہشونی کتگ۔ بلوچ ءِ جُھد ءِ واستہ ھر دوئیں لائکی الّمی انت، یکے مردم ءِ بہادری ءُ کابلیت ءُ دومی یک مظبوطیں تنظیم کہ آ مردمانی کابلیت ءَ یکجاہ کنت ءُ آہی ءِ رہشونی ءَ کنان ءَ تربیت ءَ کنت ءُ منزل ءَ سر کنت۔
گڈسرءَ دیوان ءَ نندوکیں سنگتاں وتی جُست ایر کُت انت ءُ جُستانی پسّہ دیگ ءَ پد دیوان ءِ ھلاسی جار جنگ بوت۔

بلوچ اسٹوڈنٹس ایکشن کمیٹی لورالائی ھنکین