ماتی زبان ءِ سرءَ پسنی، پَنجگُور، کراچی ءُ ملیر، شال، ڈی جی خان، نال، تونسہ شریف، حیدرآباد، ھاران، دالبندین ءَ مراگش اڈ دیگ بیتگ
بلوچ اسٹوڈنٹس ایکشن کمیٹی
سرجمیں دنیا ءَ 21 اُستپان(فروری) ءَ ماتی زُبانانی میان اُستمانی روچ دارگ بیت اِنت، اے درگت ءَ بلوچستان ءِ بازیں ھنداں بلوچ اسٹوڈنٹس ایکشن کمیٹی ءِ نیمگ ءَ ماتی زُبانانی میان اُستمانی روچ ءِ درگت ءَ مراگش برجم دارگ بُوتگ۔
ماتی زبانانی میان استمانی روچ ءِ درگت ءَ مُبارک قاضی ءِ یات ءَ پسنی، پَنجگُور، کراچی ءُ ملیر، شال، ڈی جی خان، نال، تونسہ شریف، حیدرآباد، ھاران، دالبندین ءَ مراگش اڈ دیگ بیتگ-
واجہ مبارک قاضی ءِ ھند پسنی ءَ اڈ داتگیں دیوان ءِ تہ ءَ ماتی زبان سرءَ پنتاک، گُشتانک، کسمانک، ماتی زبان کتابک ءِ کتاب دیمدرائی، دیوانے گوں منیر مومن ءَ، کتاب میڑہ، ماتی زبان ءُ مبارک قاضی ءِ سرءَ پٹ ءُ پولی نبشتاکءُ ڈاکومنٹری، آرٹ اگزیبیشن، شئیر ءُ شائری ءُ ساز ءُ زیملی بھر ھوار بیتگ اَنت۔
دیوان ءَ بنجاہی مزن کارگشاد اظہر بلوچ، بنجاہی کمیٹی ءِ باسک فوزیہ بلوچ ءُ بالاچ بلوچ ءَ ھوار منیر مومن، اے آر داد، میر عمر میر، زبیر مختار، ڈولی بیگ، ندیم اکرم، امیر دوست، شامیر دیدگ, ھسام بلوچ، سپیہ بلوچ، الف میم داد ,آسمی بلوچ,نصیب مزار ءُ کسان سالیں سُھراب بھر زرتگ۔
کراچی ءُ ملیر ھنکین ءِ نیمگ ءَ چہ نمیرانیں شائر واجہ مبارک قاضی ءِ نام ءَ اڈ داتگیں دیوان ءَ شائر، زبان دوست ءُ لس مھلوک ءَ ھوار نودربرانی مزیں کچے ءَ دیوان ءَ بہر زرتگ۔ دیوان ءِ مہمان ھاس بُنجائی کمیٹی ءِ باسک وقار بلوچ بیتگ۔ مراگش ءَ ملیر ھنکین ءِ کارمستر ءُ کراچی ھنکین ءِ کُمک کارگُشاد ءَ پنتاک ءُ نمیرانیں سباء ءِ سرءَ نبشتانکے ونتگ, واجہ مبارک قاضی ءِ زند ءُ اِزم سرءَ بنجاہی کمیٹی ءِ باسک وقار بلوچ ءَ پٹ ءُ پولی نبشتانکے ونتگ۔سیمی بہر پینل ڈسکیشن کہ ایشی ءِ تہ ءَ موڈریٹر جہانزیب بلوچ ءُ پینلسٹ ثانی سیّد بلوچ ءُ واجہ گُلام رسول کلمتی ءَ بہر زرتگ۔ دیوان ءِ گڈی بھر شئیر ءُ شائری ءُ ڈاکومنٹری بوتگ انت۔ اے درگت ءَ کتاب میڑہ ہم اڈ دیگ بوتگ کہ ایشی تہ ءَ گل ءِ نیمگ ءَ چہ چاپ ءُ شنگ بوتگ ایں کتابک “ماتی زبان” ءُ ایدگہ کتاب ایر کنگ بوتگ انت۔
شال ءَ اڈ داتگیں دیوان ءِ تہ ءَ بلوچی ءُ براہوئی زبانانی سرءَ گُشتانک دیگ بیتگ، زُبان ءِ سرءَ پنتاک ءُ مبارک قاضی ءِ سرءَ پٹ ءُ پولی نبشتانکے وانگ بیتگ ءُ بلوچ ءِ ماتیں زبانانی آکبت ءِ سرءَ گپ ءُ تران بیتگ۔ ماتی زبان ءِ سرءَ کسمانکے ءُ گُڈسرءَ شئیر ءُ شائری ہم ھوار بیتگ اَنت۔ مراگش ءَ “ماتی زُبان“ کتابک ءِ دیمدرائی ھم کنگ بیتگ۔
دیوان ءَ ھاسیں مہمان بنجاہی کماش شبیر بلوچ, بنجاہی ھالرسانی کارگشاد اُزیر بلوچ ءُ بنجاہی کمیٹی ءِ باسک پیر جان بلوچ ءَ ھوار مسلم شفیع ءُ عباس حسن، پزیر جی ایم، عابد عدید ءُ حیدر حثرت ءَ بھر زرتگ۔
ڈیرہ غازی خان ءَ اڈ داتگیں دیوان سۓ بھرانی تہ ءَ بوتگ کہ آئی تہ ءَ گشتانک, ڈاکومنٹری ءُ شئیر ءُ شائری ھوار بوتگ انت۔ دیوان ءَ واجہ اللہ بخش بزدار, بنجاہی کمک کارگشاد محمد بلوچ ءُ ڈیرہ غازی خان ھنکین ءِ کارمستر ءَ تران کتگ۔ پنجگور ءَ اڈ داتگیں دیوان ءَ تران, ڈاکومنٹری, زُبان ءِ سرءَ پنتاک ءُ مبارک قاضی ءِ سرءَ پٹ ءُ پولی نبشتانکے, شئیر ءُ شائری ءُ کتاب میڑہ ھوار بوتگ انت۔
دیوان ءَ ھدا رھیم, اکبر غمشاد, ملامراد, زید ءُ کامل بلوچ ءَ تران کتگ۔
دالبندین پریس کلب ءَ گل ءِ نیمگ ءَ چہ دیوانے اڈ دیگ بیتگ کہ سۓ بھراں بیتگ، آئی تہ ءَ تران, پینل ڈسکشن ءُ شئیر ءُ شائری ھوار بیتگ انت۔
دومی نیمگ ءَ ھاران, نال, حیدرآباد ءُ تونسہ ھنکین ءَ برجم داشتگیں مراگشانی بھرانی تہ ءَ ماتی زبانانی سرءَ گُشتاک، زُبان ءِ سرءَ پنتاک, مبارک قاضی ءِ سرءَ پٹ ءُ پولی نبشتانک ءُ شئیر ءُ شائری ھوار بوتگ انت۔
بساک ءِ نیمگ ءَ اے روچ ءِ دارگ ءِ مول ءُ مُراد وتی ماتی زُبانانی رکینگ ءِ جھد اِنت ءُ اے برجمیں مراگشاں ماتی زُبانانی ارزشت ءِ سر ءَ تران ءَ ھوار ماتی زُبان ءِ سر ءَ یک کتابُکے ہم چاپ ءُ شِنگ کنگ بُوتگ۔ ادارہ ءِ جھد پہ بلوچ ءِ ماتی زُباناں مُدام ہمے پیم برجاہ بیت ءُ مئے گوں بلوچ ورنایاں اے کلوہ اِنت کہ وتی ماتی زُبان ءَ رکینگ ءِ پہ عملی پِڈءَ جھد بہ کن اَنت۔ زبان ءَ گوں مستریں مھر اِش اِنت کہ وتی زباناں گپ بہ کن اِت ءُ نبشتہ بہ کن اِت۔
بلوچ ءِ ماتی زُبان زندگ ءُ برجم بات اَنت۔
بنجاہی جارکش بلوچ اسٹوڈنٹس ایکشن کمیٹی
