بلوچ اسٹوڈنٹس ایکشن کمیٹی ملیر ھنکین ءِ ھنکینی لس دیوان برجم دارگ بوتگ، شاہ تاج بلوچ ھنکینی کارمستر ءُ گُلاب بلوچ ھنکینی کارگُشاد گچین کنگ بیتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ملیر ھنکین ءِ ھنکینی لس دیوان ھنکین ءِ گوستگیں کارمستر رضوان بلوچ ءِ پاگواجہی ءَ برجم دارگ بیتگ۔ دیوان ءَ ھاسیں مھمان بنجاہی کمیٹی ءِ باسک وقار بلوچ ءُ گچینی مھمان بُنجاہی کمیٹی ءِ باسک بالاچ بلوچ ساڑی بیتگ اَنت۔
دیوان ءَ بنجاہی سرکیولر، ھنکین ءِ گوستگیں اھوال، شرگداری، گل کاری، ھندی ءُ میان استمانی سیاسی جاورھالانی سر ءَ تران ءَ پد آوکیںں گامگیج ءَ گوستگیں کابینہ ھلاس کنگ بیتگ ءُ نوکیں ھنکینی کابینہ گچین کنگ بوت۔
سنگتاں تران کنانءَ گُشت انچوشکہ بلوچ جنز وھد ءِ ہمراہی ءَدیمروئی کنگءَ انت۔ پہ ما بطور بلوچ نودربر گل سیاست ءِ راہ ءُ رہبنداں گِشینانءَ روگءَ ایں ءُ سیاسی عمل ءِ ارزشت گیش بوانءَ دیم ءَ جنزگءَ اِنت۔ انچوشکہ یک وھدے بلوچ مھلوکءِ سیاست ءُ سیاسی عمل ءَ چہ بیسہ کم بوان بوتگءُ اے ھیالءَ مئے گلءِ سنگتانی میانءَ ہم کسانیں کچے ءَ متاثر کتگ۔ بلے چوشکہ مارا سرپد بیگ لوٹیت کہ چونیں گرانیں عمل بہ بیت وھدے کسے گوں مستقل مزاجیءُ دلءُ ستکءُ یقین کنت ءُ کار کنت آ عمل وتی پجی ءَ تئی سنگتءُ ایدگہ لس مھلوکءِ ھیالاں ہماں تئی لوٹانی ھسابءَ بدل کُت کنت۔ گڈا ہچبر تُری چونیں ہم ھالات بہ بنت مارا چہ وتی کار ءُ عملءَ چہ چکءُ پد بوئگی نہ اِنت، ہمک وھدءَ وتی کارءُ پروگرامءِ شریءُ ھرابی دوئیں پلواں چارگی اِنت۔ وھد ءِ لوٹ اِنت کہ ما وتی گلءِ پروگراماں ملیر ءِ دمگءُ میتگاں گیش فعال بہ کنیں۔ ملیر ہما دمگ اِنت کہ ادءِ گیشتر آبادی بلوچ اَنت۔ اے دمگءِ مڑدمانی وشی ایش اِنت کہ کراچیءِ ایدگہ ماھول ءَ چہ وتارءَ گِستا داشتگ ءُ وتی تہءَ بلوچی دودءُ ربیدگ داشت کُتگ۔
گُڈسر ءَ سنگتاں گُشت کہ ملیرءِ بلوچ نودربرانی وانگی کچ ءُ سیاسی بودشت ودی کنگ ءِ ھاترءَ ھنکین ءَ بلوچ لٹریسی کیمپئین ءِ وسیلہ ءَ چہ ملیر یونیورسٹیءِ بابت ءَ جنز ءُ ایدگہ ھند ءُ دمگانی وانگجاہانی بابت ءَ گامگیج زیرگ بیت۔ ایشیءَ ھوار کتابی مراگاہ، گونڈ گونڈیں وانگی مراگاہ ءُ مھم جنزینگ بیت ءُ سباء لیٹریری فیسٹول ھم اڈ دیگ ءِ جھد بیت۔ ماتی زبانانی ھاترءَ ملیر ءَ بلوچی کلاس بندات کنگ ءِ جھد بیت۔
درستیں بُنگپانی سرءَ گوں دلجمی ءَ تران ءَ پد گُڈی بنگپ آؤکیں گامگیج ءِ تہ ءَ گوستگیں کابینہ ھلاس کنگ بیتگ ءُ نوکیں کابینہ گچین کنگ بیتگ، نوکیں کابینہ ءَ شاہ تاج بلوچ ھنکینی کارمستر، یاسر بلوچ کُمک کارمستر، گُلاب بلوچ کارگشاد، سلمان بلوچ کُمک کارگشاد ءُ نعمان بلوچ ھالرسانی کارگُشاد گچین کنگ بیتگ اَنت۔
بنجاھی سنگتاں نوک گچین بیتگیں کابینہ سوگند داتگ اَنت ءُ گچین بیتگیں زمہ واراں پیمان کُتگ کہ آ وتی زمہ واریاں جوانیں رنگے ءَ جُنزین اَنت۔
بنجاہی جارکش بلوچ اسٹوڈنٹس ایکشن کمیٹی
