بلوچ اسٹوڈنٹس ایکشن کمیٹی ڈیرہ غازی خان ھنکین ءِ ھنکینی لس دیوان برجم دارگ بیتگ۔
شفیق بلوچ ھنکینی کار مستر ءُ گُل بھار بلوچ کارگُشاد گچین کنگ بوتگ اَنت
بلوچ اسٹوڈنٹس ایکشن کمیٹی ڈیرہ غازی خان ھنکین ءِ ھنکینی لس دیوان ھنکینی کارمستر شفیق بلوچ ءِ سروکی ءَ برجم دارگ بوتگ۔ دیوان ءِ مھمان ءِ ھاس بُنجاھی کُمک کارگُشاد مھمد بلوچ بوتگ۔ دیوان ءِ بُنگپ بُنجاھی سرکیولر، ھنکینی اھوال، نگدی دیوان، گَل کاری ءُ ھندی ءُ میان استمانی سیاسی جاورھال ءِ سرا دلجمی ءَ باوست ءَ پد گُڈی بُنگپ آؤکیں گامگیج ءَ پیسری کابینہ ھلاس کنگ بوت ءُ نوکیں کابینہ گچین کنگ بوت۔
دیوان ءَ جتائیں بُنگپانی سرءَ تْران کنان ءَ بُنجاھی سنگت ءَ گُشت کہ تنظیمی ڈسپلن ءِ بنیاد ءَ باسکانی تربیت کنگ ءُ بلوچ سیاست ءِ تہ ءَ ادارہ جاتی پگر ءُ سسا ءِمہکم کنگ ءَ گوں مستقل مزاجیں جہد کار پیداک بنت۔ مارا وتی ادارہ گیش مہکم کنگی اِنت ءُ ادارتی سوچ ءِ بنیاد ءَ سیاسی ءُ شعوری تربیت ءِ سرا زور دیگ لوٹیت۔گل ھمینکس کہ ودّان ءُ شاھگان بوان بنت گل ءِ تہی ءُ ڈنی اڈاند ءُ جیڑہ گیش بوان بنت کہ ابید چہ مھکمیں ڈسپلن ءُ راھبند ءَ آھانی توجیل بوت نہ کنت۔ بلوچستان ءِ ھرچ ھند ءُ دمگ ءِ وتی یک زمینی راستی ئے، ھرچ دمگ ءِ تب جتا اِنت، مارا زمینی راستی ءُ مردمانی تب ءِ بنیاد ءَ گل ءِ پالیسی ٹھینگ لوٹ اَنت۔ انچش کہ گل ءِ باسک گل ءِ مستریں مڈی اَنت، باسکانی شعوری تربیت ءُ سیاسی سوچ ءِمہکمی ءَ گل مہکم بنت۔ مرچی بلوچ ورنا معیاری سیاسی لیٹریچر ءَ گوں گیش نزیک کنگی اَنت ءُ کتاب کلچر ودینگی اِنت ءُ نودربر سیاسی سرکلانی بھر کنگی اَنت ءُ چہ پد منتگیں سوچ ءَ در کنگی اَنت، معیاری لیٹریچر ءِ وانگ ءُ باوست دیمروی دوستیں سوچ ودی کنت ءُ ھمے سوچ مارا نوکیں زندے بکشائیت۔
تْران کنان ءَ سنگتاں گُشت کہ ڈیرہ غازی خان بلوچانی سرڈگار اِنت ءُ بلوچ جہمنند اَنت بلے انگت بلوچ نودربر ادارھانی تھا وتی بنیادی حقّاں چہ زبہر اَنت۔ وانگی ادارہ گوں پدمنتگیں وانگی راھند ءَ بلوچ ورنا مہدود کتگ اَنت ءُ چہ آھاں ادارھانی تھا نودربر سیاست ءُ وتی زبان ءُ گوستانک ءِ سرا باوست کنگ ءِ حق پچ گرگ بوتگ۔ مرچی نودربر سیاست ءِ ھاترا کیمپس پالیٹکس ءُ کیمپس کنٹرول الم اِنت پمیشکہ گل ادارھانی تھا مھکم کنگی اِنت تاکہ بلوچ ورھانی بنیادی حقّاں پچ گیپت بہ کن ایں ءُ وتی وانگی ءُ سیاسی سرکل ءُ پروگرام آں کُت بکن ایں۔ ورنا سیاسی شعور ءُ ادارتی پگر ءَ گوں گل آں ھوار بہ بنت ءُ وتی راجی ادارہ آں مہکم بہ کن اَنت ءُ بلوچ جہد ءِ بھر بہ بنت۔
جتائیں بُنگپانی سرا دلجمی ءَ باوست ءَ پد آؤکیں گامگیج ءِ بُنگپ ءَ گوستگیں ھنکینی کابینہ ھلاس کنگ بوت ءُ نوکیں کابینہ گچین کنگ بوت۔ گچین بوتگیں کابینہ ءَ شفیق بلوچ ھنکینی کارمستر، راز بلوچ کُمک کارمستر، گُل بھار بلوچ کارگُشاد، شاہد بلوچ کُمک کارگُشاد ءُ قیوم بلوچ ھال رسانی کارگُشاد گچین کنگ بوتگ اَنت۔
گُڈسرا سوگندی بھر ءَ پد دیوان ھلاس کنگ بوتگ۔
بنجاہی جارکش بلوچ اسٹوڈنٹس ایکشن کمیٹی
