بلوچ اسٹوڈنٹس ایکشن کمیٹی تربت ھنکین ءِ ھنکینی لس دیوان برجم دارگ بیتگ، عبداللہ بلوچ ھنکینی کارمستر ءُ نوروز بلوچ ھنکینی کارگُشاد گچین کنگ بیتگ اَنت
بلوچ اسٹوڈنٹس ایکشن کمیٹی تربت ھنکین ءِ ھنکینی لس دیوان ھنکین ءِ گوستگیں کارمستر سنگت حبیب بلوچ ءِ سروکی ءَ برجم دارگ بیتگ۔ دیوان ءِ مہمان ءِ ھاس بنجاھی کمیٹی ءِ باسک سنگت عامر بلوچ ءُ گچینی مہمان بُنجاھی کمیٹی ءِ باسک سنگت سلیم بلوچ بیتگ اَنت۔
دیوان ءَ بنجاھی سرکیولر، ھنکین ءِ گوستگیں اھوال، شرگداری، گَل کاری، ھندی ءُ میان اُستمانی سیاسی جاورھال ءِ سرھالانی سرا گپ ءُ تران ءَ پد آؤکیں گامگیج ءَ گوستگیں ھنکینی کابینہ ھلاس کنگ بوت ءُ پہ نوکیں کابینہ ءَ سنگت گچین کنگ بیت اَنت۔
دیوان ءِ اولی سرھال بنجاھی سرکیولر اَت کہ بُنجاھی سنگت ءَ دومی بنجاھی کمیٹی ءِ اھوال ءُ پیسلہ دیوان ءِ دیما ایر کُت اَنت ءُ دومی سرھال ھنکینی رپورٹ اَت، ھنکینی کارگُشاد ءَ ھنکین سرجمیں رپورٹ دیوان ءَ ایر کُت اَنت- دیوان ءِ سئیمی سرھال شر گداری ءِ تہ ءَ دیوان ءَ نشتگیں سنگتاں ھنکین ءِ نزوری ءُ پشت کپتگیں کارانی سرا وتی نگد کُت اَنت-
دیوان ءِ دیمی بُنگپ گَل کاری کہ آئی ءِ تہ ءَ بُنجاھی سنگتاں تران کنان ءَ گُشت کہ گوستگیں سالاں تربت ءَ نودربر سیاست ءِ شریں وڈے ءَ فعال نہ بوھگ ءِ سبب ءَ ورنا وڈ وڈیں چاگردی سلکاری ءُ جیڑھانی آماچ کنگ بیتگ اَنت ءُ وانگی ادارہانی تہ ءَ انچیں ماھول جوڈ کنگ بیتگ کہ نودربر وتئ چاگردی ءُ راجی جیڑھاں چہ سرجم ءَ گِستا دارگ بیتگ اَنت، بلے بحیثیت نودربرانی مستریں ءُ زمہ واریں ادارہے ءِ بستار ءَ کُجام ھم ٹولی یا ادارہ بلوچ نودربراں غیر سیاسی کنگ اَنت ما آیانی دیما اوشت اِنت- ادارہ ءَ وتارا مرچی بلوچ چاگرد ءِ تہ ءَ منارینتگ ءُ یک مہکمیں بیسہ ئے جوڈ کنگ ءَ سوبمند بیتگ، ادارہ ءِ مُدام جہد ھمیش اِنت کہ بلوچ نودربرانی میان ءَ علمی ءُ سیاسی ماھول جوڈ کنگ بہ بیت داں بلوچ نودربر وتئ راجی جیڑھاں شریں وڈے ءَ سرپد بوھگ ءَ ھوار آیانی توجیل ءَ عملی دروشم ءَ کار بکن اَنت ءُ وتی راجی ادارہانی مہکم کنگ وتی کِرد ءَ پیلو بکن اَنت-
بُنجاھی سنگتاں تران کنان ءَ گُشت تُربَت ھنکین ءَ وتی کار شوکیں وڈے ءَ دیما بُرتگ اَنت ءُ بنجاھی پروگرام بلوچ لٹریسی کیمپئن، بلوچستان کتاب کاروان ءِ سرا دلجمیں رنگے ءَ کار کنگ بیتگ- ھنکین ءِ جتائیں کار ءُ پروگرامانی سرا گپ ءُ تران کنگ ءَ پد پہ دیمے کارانی ھاتر ءَ جتائیں پیسلہ زیرگ ءَ ھوار بلوچ لٹریسی کیمپئن ءِ اولی فیز ءِ گیشتریں کارانی سرجم کنگءَ پد دومی فیز ءِ کارانی سرا پیسلہ زیرگ بیت-
دیوان ءِ درستیں بنگپانی سرا گپ ءُ تران ءَ پد آوکیں گامگیج ءِ تہ ءَ گوستگیں ھنکینی کابینہ ھلاس کنگ بیت ءُ پہ نوکیں ھنکینی کابینہ گچین کنگ بیت- نوکیں کابینہ ءِ تہ ءَ عبدللہ بلوچ کارمستر، نگرہ بلوچ کُمک کارمستر، نوروز بلوچ کارگُشاد، دلاور بلوچ کُمک کارگُشاد ءُ مختار بلوچ ھالرسانی کارگشاد گچین کنگ بیتگ
بنجاہی جارکش بلوچ اسٹوڈنٹس ایکشن کمیٹی
