بلوچ اسٹوڈنٹس ایکشن کمیٹی خضدار ہنکین نا لس دیوان اڈ تننگا۔
جویریہ بلوچ ہنکینی کارمستر و رمیز بلوچ ہنکینی کارگشاد گچین کننگار۔
بلوچ اسٹوڈنٹس ایکشن کمیٹی خضدار ہنکین نا ہنکینی لس دیوان ہنکینی کارمستر شاہنور بلوچ نا کماشی ٹی اڈ تننگا۔ دیوان نا مہمان خاص بنجاہی کمیٹی نا باسک شیراز بلوچ و گچینی مہمان بنجاہی کمیٹی نا باسک وقار بلوچ و بالاچ بلوچ ئسر۔ دیوان ئٹ بنجاہی سرکیولر، مسکوہی ہنکینی احوال، نغد کاری، تنظیمی امور، و ہندی و جہانی سیاسی حالیت نا ٹِک آتا زی آ است جمی ئٹ گپ و تران آن پد بروکا گامگیج ئٹ ہنکینی کابینہ ایسر کننگا و پوسکن آ ہنکینی کابینہ گچین کننگا۔
دیوان ئٹ سنگت آک ہیت کریسہ پاریر کہ ننے دا سرپند مروئی ءِ کہ نن اسہ محکوم راج ئسے نا سیاست ءِ کننگ اُن گڑا ننے تینا اہمیت ءِ ہم پہہ مروئی ءِ کہ سیاسی باسک ئسے نا حیثیت ئٹ ننا ذمہ واریک انت ءُ۔ محکوم آ راج آتا جہد آتیٹی خواننده غاتا اہمیت بھاز بھلن مریک۔ نن تینٹ تینے تنقیدی نظر ئٹ ہُرن کہ نن گواچن ئٹ اندا وڑ سوبری ئٹ کاریم کننگ اُن یا آخہ؟ اینو نا خوانندہ غاتے فارمیلٹی نا بنداو آ سیاست کروئی اف بلکن تیوہ غا وس و واک ئتون سوبری ئٹ سیاست کروئی ءِ۔ گل ئنا ہر گڑا راج اکن المی ءِ و دانا شینک و تالان کننگ ہر باسک ئنا ذمہ واری ءِ۔ گل ہمو وخت آ جوانو وڑ اسیٹ کاریم کننگ کرو ہراتم بنجاہ آن ہلیس باسک آتسکان تینا ذمہ واری تے سرپند مرین۔
مونی سنگت آک ہیت کریسہ پاریر کہ دا دورانیہ ٹی سنگت آک جوانو وڑ اسیٹ کاریم کرینو و اُلس تون خڑکی کننگ ئٹ سرسہب مسنو۔ ایس ایس ایف نا بساک ئٹی اوار مننگ ہم اندا نشان تیک کہ مسکوہی کابینہ است جمی ئٹ کاریم کرینے ولے گل ئنا کاریمک تینٹی انگہ پوروْ افس۔
بی ایل سی نا کاریمک پوروْ کننگ خوائرہ۔ خضدار نا لس ورناک اینو ہم خواننگ آن مر ءُ یاکہ گیشتر خواننگ جاگہ غاک بند ءُ۔ بلوچ خواننده گل ئنا حیثیت ئٹ ننا ذمہ واری مریک کہ نن خواننگ جاگہ تے فعال کننگ کن تینا کڑد ءِ سر تین۔ اینو اندن خننگک کہ باسک آک تینا مون کتاب ارفسہ خوانرہ کہ او کتاب آک ننا گواچن حالیت آتیتون گنڈوک افس۔ باسک آک تینا خواننگ ءِ گل ئنا لٹریچر نا خاکہ نا حساب ئٹ کیر یا تینا زمینی گواچنی تا بنداو آ کیر۔
دیوان ئٹی تیوہ غا ٹک آتا زی آ است جمی ئٹ گپ و تران آن گڈ بروکا گامگیج ئٹی ہنکینی کابینہ ایسر کننگا و پوسکن آ ہنکینی کابینہ گچین کننگا۔ پوسکن آ کابینہ ٹی جویریہ بلوچ ہنکینی کارمستر، ازیر بلوچ ہنکینی کمک کارمستر، رمیز بلوچ ہنکینی کارگشاد، خلیل بلوچ ہنکینی کمک کارگشاد و یحیٰی بلوچ ہنکینی حوال کاری کارگشاد گچین کننگار۔
بنجاہی سنگت پوسکن گچین مروکا کابینہ ءِ سوغند تس و پوسکن گچین مروکا سنگت آک تینا ذمہ واری تے ایسر کننگ نا سوغند ارفیر۔
بنجاہی ترجمان بلوچ اسٹوڈنٹس ایکشن کمیٹی
