بلوچ اسٹوڈنٹس ایکشن کمیٹی شال ھنکین ءِ ھیلکاری دیوانے ھنکینی کارمستر شئے مرید بلوچ ءِ پاگواجھی ءَ برجم دارگ بوت- دیوان ءِ ھاسیں مھمان بنجاھی کماش شبیر بلوچ ءُ بنجاھی مزن کارگشاد اظہر بلوچ ات اَنت۔
دیوان ءِ سرھال: این ایپل ٹو دی ینگ ۔
تران کنوک : رحیم سید (بیوٹمز ءَ لیکچرارے)
تران کنوک ءَ تران بندات کنان ءَ گشت کہ اے سرھال روسی (رشین) انارکسٹ پیٹر کروپوٹکن ءِ اِنت کہ آ وت روسی آشوب ءِ وھد ءِ مردم ئے۔ آئی ءَ گشت کہ اے سرھال بزانکہ این اپیل ٹو دی ینگ ءِ مول مراد ایش انت ھما مردم کہ آ مجگی ءُ شعوری ھوالہ ءَ ورنا اَنت ھما ایش سرھال ءَ بوان اَنت چیا کہ ایشی ءَ سرپد بوت کنت۔ اے سرھال یک نبشتانکے کہ ایشی تہءَ بھازیں پروفیشنل ادارھانی مردمانی کرد پہ راجی دیمروئی ءِ ھاتر ءَ یا کہ ھاس ایردستیں راجے ءِ بزّگیانی ھلاپ ءَ چوں کارمرز کنگ بنت۔
آئی ءِ گشگ ات کہ پیٹر اول سرا ڈاکٹری ءِ پروفیشن ءِ سرا گپ کنت گشیت کہ یک ایردستیں راجے ئے ڈاکٹر نا تہنا وتی نادراہیں مھلوک ءِ علاج ءَ بہ کنت بلکیں آئی ءَ ھمے نادراہی ءِ سوب ءَ ھم بگش ایت گوں ۔ پہ درور اگاں ما بلوچستان ءِ تہا ایشی ءِ سرا گپ کناں گڑا چش بیت کہ چاغی ءَ ایٹمی دھماکہ ءَ چہ رند ودی بوتگیں شُمُک (کینسر) ءِ نادراہی ءَ بگر دانکہ کوہِ سلیمان ءَ یورینیم ءِ ریفائنری چہ دیما اتکگیں شُمُک ءَ بیا، ایشی ءِ نادراہانی علاج کنگ ءَ گوں اوار ایشانی سوب ھم وتی مھلوک ءَ سرپد کنگ بہ بیت۔ چیا کہ ڈاکٹر ءَ انسانی اگبالانی تہ ءَ راجدوستی دروشم ءَ جہان ءِ مردمانی وڑا وتی ایردستیں راج ءِ لوٹانی ھساب ءَ وتی پروفیشن کارمرز کنگی اَنت۔
ھمے داب ءَ یک راجےءِ تہءَ کہ انساپ ءِ ادارہ است اَنت اودءَ آ ایردستیں راجے نہ اِنت پمیشکا پیٹر ءِ جند ھمے جوڈ بوتگیں کانود ءِ ھلاپ ایں مردمے بوتگ آئی ءِ گوشگ اِنت کہ اے کانودے نہ انت بگندئے بازیں کانوداں کہ ھمک مردمءِ واستا جتا انت ، ایش کانودے نہ انت بس زورگیرانی واستا جوازے۔ بلے گشیت کہ اے وڑیں چاگرد ءِ تہا ھما کہ انسانی حق ءُ ایندگہ وکیل بنت آ ھمے وتی مردمی اگبالانی واستا جھد بہ کن اَنت ءُ وتی مھلوک ءَ اے کانودانی بابت ءَ سرپدی دیگ ءِ جھد بہ کن اَنت۔
دیمترءَ آئی ءَ گشت کہ پیٹر وتی تران ءَ دیم ءَ بران ءَ گشیت کہ یک انجینیئرے چوناھا وا سائنسی رِدا نوکیں چیزانی ودی کنوک ءُ جوڈ کنوک انت، بلے وھدے کہ آ یک ایردستیں راجے ءِ تہءَ اِنت گڑا آ ھمے مزن مزنیں دگانی ءُ ریل ٹریکانی جوڈ کنگ ءَ وش مہ بیت کہ آئی ءَ اے ٹریک ءُ روڈ جوڈ کرتگ انت ءُ دو یا سئے استاناں یکجاہ کنت، آئی ءَ ھمیشانی بابت ءَ سرپدی دیگی انت کہ ایش مئے مڈیانی لُٹ ءُ پُلانی واستا اِنت ءُ دومی ھمے کہ وھدے ھمے استاناں ابرم ءَ کہ یکجاہ نہ کرتگ انسان چیا ایشی ءَ یکجاہ کنگ ءِ جھد بہ کنت۔
دیوان ءَ دیما بران ءَ آئی ءَ گشت کہ یک پروفیشن ءِ استادے کہ درستاں چہ جوانیں پروفیشنے گشگ بیت ءُ پیٹر ھم گشیت کہ استاد ھر ھما چیز کہ سائنسی انت یا ایندگہ چیزاں بندوک انت آئی ءِ روتگ گوں استاد ءَ بندوک انت۔ یک استادے ئے ءِ واستا آئی ءِ نودربر ھورکیں تاک اَنت کہ یک استادے ھر ڈولیں چیزے دیگ بہ لوٹیت آ ھمے چیزاں چہ پر کنت ئِے، بلے یک ایردستیں راجے ئے تہءَ استاد وتی نودربران ءَ ایردستی ءُ بزّگیانی سوب ءَ گوں اوار آوانی ھلاس کنگ ءِ واستا جھد کنگ ءُ جھد کنگ ءِ بابت ءَ سرپدی بہ دنت۔ چیا کہ استانی وانگی رھبند راجانی ایردستی ءَ گیشتر کننت، بھاز بَراں ھمے وانگی رھبند ھمے زوراکیاں جواز ھم دینت گڑا اے وڑیں جاورھالاں استاد سرا زمہ واری گیشتر بنت پہ وتی راجی جیڑھانی گیش ءُ گیوار کنگ ءَ۔
تران کار ءَ گڈی پروفیشن سرا تران کنان ءَ گشت کہ اے ازمانی سرءَ انت کہ ایش شاعری، آرٹ ءُ میوزک انت ءُ بہ گُپت ءِ پیٹر کہ یک ازمکارےءَ کہ آرٹ سرا جوانیں دَزرسے ھست اِنت ءُ اگاں آ یک ایردستیں راجے ءِ بھر اِنت گڈا آ راجی راستی ءُ جیڑہانی بابت ءَ وتی آرٹ ءَ کارمرز بہ کنت ناکہ تہنا یک جنکے کہ کورے ءِ لمبءَ نشتگءُ آئی ءِ عکس ءَ جوڑ بہ کنت۔ چیا کہ راجی لوٹ ءُ واھگانی ردا ایشی زرورت نہ انت ۔
گڈ سرءَ وتی تران گوں اے گپاں ھلاس کرت کہ یک نودربرے ءَ وتی راجی سیاسی چست ءُ ایرانی تہءَ اوار بوگی اِنت چیا کہ راج ءِ زانت کار ھمے نودربر انت اگاں ایش ہوار نہ بنت گڈا راج ءِ زانت کار چہ کجا ودی بنت ءُ راجی جیڑھاں سرپد بوگ ءَ پد آہانی ھلاسی ءِ راہ ءُ راھبنداں گیشین اَنت؟
دیوان ءِ گڈسر ءَ جُست ءُ پَسّو ءِ بھر اَت کہ گوشداروکیں مردماں وتی جست ترانکار ءِ دیم ءَ ایر کت اَنت آئی ءَ ایشانی جواب دات اَنت ءُ ھنکینی کارگشاد ءَ دیوان ءِ سروک ءِ اجازت ءَ چہ دیوان ءِ ھلاسی ءِ جار جت۔
بلوچ اسٹوڈنٹس ایکشن کمیٹی
