بلوچ اسٹوڈنٹس ایکشن کمیٹی ملیر ھنکین ءِ نیمگءَ چہ یک وانگی دیوانے ھنکینی کارمستر سنگت شاہ تاج بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان گل ءِ بنجاھی ھالرسانی کارگشاد سنگت عُزیر بلوچ بوتگ۔
دیوان ءِ سرھال: راجدوستی ءُ بلوچ راجدوستی
دیوان ءِ ترانکار: سنگت عزیر بلوچ
سنگت ءَ دیوانءِ بِندات ءَ راج ءُ راجدوستی ءِ سرءَ تران کنان ءَ گوْشت کہ مردمانی ھما مچّی، ٹولی یا یکجاہی کہ آ یک گچین ایں ڈیھ ءُ سر زمین ءِ سرءَ جاھمنند بہ بنت ءُ زِند بہ گوازین اِنت، آھانی یکجاہیں( مُشترکہ) زبان، دود ءُریبدگ، راجدپتر، نفسیات ءُ سیاسی ءُ معاشی درگت ءَ یک بیگ ءَ ہوار آھانی ھیال ءُ لیکہ وت ماں وت بندوک بہ بنت آ یک راجے گوشگ بیت۔ راج ءِ سر ءَ جتائیں لیکہ ءُ ہیال ہست اَنت بلے آئی ءِ بُن دپتر ءِ سر ءَ دو ہیال اَنت یکے پری مورڈیل ءُ دومی موڈرنیسٹ اِنت۔ پریمورڈئیل ءِ منگ اِنت کہ راج گوستءَ چہ بیتگ ءُ انسان ءِ ھون ءَ ہوار اِنت ءُ پیداگ اِنت، بہ زاں راج گوست ءَ چہ بیتگ ءُ کم کم ءَ دیمروئی کنان ءَ مرچی اے دروشم ءَ اتکگ۔ دومی موڈنرسٹ ہیال ءِ منوگرانی گوْشگ اِنت کہ راج یک نوکیں چِزے ءُ یورپ ءَ اشی ءِ بُن ہِشت ایر کنگ بیتگ بہ زاں راج یورپ ءِ پیدا کُتگیں یک چزے کہ ہما مخصوصیں مردماں گوْشگ بیت کہ آہانی وتی جتائیں زمین، زبان، دود ءُ ربیدگ ءُ تب ئے بہ بیت ءُ آ وتءَ یک بہ گوش ایت راجے گُشگ بیت۔ بہ گُپت ارنسٹ رینن کہ راج یک روحانی شئے ئے، بہ زاں راج ہما مردمانی ارواہ ءَ گوں بندوک اِنت۔ دو چِز اَنت کہ راج ءَ ارواہ ءُ بالاد ءِ پیم ءَ جوڈین اَنت گوْست ءُ ہست ءِ یات۔ یک راجے ءِ گْورءَ گوست ءِ یاداشت بنت کہ مردماں نزیک کن اَنت ءُ دومی ہست ءَ آہانی یکجاہی ءَ نِندگ ءُ زِند گوࣿازینگ ءِ ھُب ءُ واھگ اِنت۔ پہ مردماں گوْست ءِ دپتر میراس بیت ءُ آہانی یاداشت یک بیت ءُ ہست ءَ گشین ایت ءُ راج ءَ زِندگ کنت۔
سنگت ءَ دیمتر ءَ تران کنان ءَ گوْشت کہ دومی راجدوستی اِنت، روج دوستی بہ زاں نیشنلزم راج ءِ جوڈ کنگ ءُ آئی ءِ سرجمیں تک ءُ پھناتانی رکینگ ءَ راج دوستی گْوش اَنت۔ راج دوستی ءِ سرءَ جتائیں زانتکار ءُ سیاسی رہشوناں وتی وتی لیکہ گوْشتگ اَنت پہ درور لہتے گوْش ایت وتی راج ءِ وتواجہی رکینگ، راج ءِ زمین، زُبان ءُ دود ءَ ربیدگاں ہوار کُل شئے آں رکینگ ءِ عمل راج دوستی اِنت۔ یکے گوش ایت کہ راج ءَ ہچ ءَ چہ زیرگ ءُ آرگ یک راجے جوڈ کنگ ءِ عمل راج دوستی اِنت۔ ہمے پیم ما گِند ایں کہ راج دوستی دومی مزن جہانی جنگ ءِ میان ءَ ءُ پد گیشتر دیم ءَ کئیت ءُ دنیا ءَ سیاست ءِ بھر بیت چوشکہ اے میان ءَ بازیں ایردستیں راجے راج دوستی ءِ لیکہ ءَ زیر ایت ءُ کالونائزیشن ءِ ہلاپ ءَ وتی وتواجہی ءَ جہد ءَ دیم ءَ بارت ءُ سوبین بیت۔
دیوان ءِ دیمتر ءَ سنگت ءَ بلوچ راج ءُ راجدوستی ءِ سرءَ تران کنان ءَ گوࣿشت کہ بلوچ ہما راج اِنت کہ آئی ءِ جتائیں تچکیں زمین، زبان، دود ءُ ربیدگ، تب ءُ زِند گوازینگ ءِ رواجے ہست کہ وتی کش ءُ گور ءِ ہمساہگیں راج ءُ مہلوک ءَ چہ جُتا اِنت۔ بلوچ یک ناسرجمیں راجے کہ وتی راج ءِ جوڈینگ ءُ رکینگ ءِ جُہد ءَ اِنت۔ بلوچ ءِ گورءَ راج دوستی ءِ مُہکم بیگ ءِ باز درور ہست کہ آ گوں زمین ءُ راج ءَ بندوک اَنت پہ درور بلوچ وتی زمین ءُ گُلزمین گوش ایت بہ زاں پُل ءِ زمین، یا روح ءِ بھشتِ زمین بہ زاں ہما زمین کہ بھشت ءِ چھرگ ءَ جنت۔ بلوچ ءِ گوْست ءِ یاداشت ءَ بلوچ ہست ءَ یک ءُ یکجاہ کُتگ کہ آ وت ءَ یک جتائیں راجے لیک ایت۔ بلوچ راجدوستی ءِ لیکہ بلوچ سیاست ءِ تہ ءَ نہ ایوکءَ مھکمیں سیاسی لیکہ ئے بگندے بلوچ راج ءِ مدامی سیاسی لیکہ بوتگ ءُ پیداگ اِنت۔ بلوچ راجدوستی ءِ لیکہ بلوچ چاگرد ءِ تہ ءَ درستیں تبکّاں چہ سیادی داروکیں مہلوکءِ لیکہ اِنت۔ بلوچ ءِ گورءَ زبان یکے ءَ چہ گیش اَنت بلے آئی ءَ گْوست، دود ءُ ربیدگ ءُ زمین یک اِنت، بلوچ ءِ گوْر ءَ زِند گوازینگ ءِ چاگرد ءِ تہ ءَ کانود ءُ ایمنی آرگ ءِ ہاتر ءَ بلوچی رواج ہست اِنت۔ پمیشکا بلوچ ءَ وت ءَ نہ تہنا گشینتگ بلکیں منارینتگ ہم کہ بلوچ یک راجے کہ وتی استان ءِ رکینگ ءُ راج ءِ سرجمیں تک ءُ پھناتانی پہازگ ءِ جُہد ءَ راج دوستی ءِ لیکہ زُرتگ ءُ دیمءَ جُنزان اِنت۔
دیوان دلجمی ءَ گوں سرجم بیت ءُ دیوان ءِ آسرءَ سنگت ءَ جستانی پسّو دات اَنت ءُ چہ کارمستر ءِ موکل ءَ دیوان ھلاس کنگ بوت۔
