بلوچ اسٹوڈنٹس ایکشن کمیٹی نصیر آباد ہنکین نا ہنکینی لس دیوان مسکوہی ہنکینی کارمستر وسیم بلوچ نا کماشی ٹی اڈ تننگا۔
عدنان بلوچ کارمستر و علی بلوچ کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نصیرآباد ہنکین نا ہنکینی لس دیوان اڈ تننگا، دیوان ئٹ بنجائی سنگت مصدق بلوچ ساڑی ئس۔ دیوان ئٹ بنجائی سرکیولر، ہنکینی احوال آک، نغدکاری نشست، گل کاری، ہندی و جہانی سیاسی حالیت و بروکا گامگیج نا سرحال آتا زی آ گپ و تران مس۔ بروکا گامگیج ئٹ مسکوہی ہنکینی کابینہ ایسر کننگا و پوسکنا کابینہ گچین کننگا۔
دیوان ئٹ بنجائی سرکیولر ءِ بنجائی سنگت لس دیوان ئٹ پیش کرسہ بنجائی فیصلہ و پالیسی تے سنگت آتا مون آ تخا۔ ارٹمیکو ایجنڈا ہنکینی احوال نامہ ئس ہراٹی نصیرآباد ہنکین نا مسکوہی احوال آک دیوان نا مون آ تخنگار، ہراٹی کارگشاد نا احوال، فائنانس احوال، لٹریچر و میڈیا نا احوال آک اوار ئسر۔
نغدکاری ایجنڈا ٹی سنگتاک جوانو وڑ ئسے ئٹ بشخ ہلکر و ہنکین نا کاریم تا زی آ اُست جمی ئٹ گپ و تران کریسہ پاریر کہ ہنکین تینا وس و واک ئٹ کاریم تے جوانو وڑ ئسے ئٹ مون آ درسہ کرینے، ولے نصیرآباد ئٹ پین گیشتر خوانندہ غاک ریاست نا تروکا بیانیہ نا گواچی ءُ، خوانندہ غاک تینا لمئی بولی بلوچی و براہوئی ءِ ہلیسہ پیشن نا بولی ئس تینا کرینو دنکہ سندھی بولی ءِ تینا تہٹی جاگہ تسنو ہرانا سوب آن بلوچ نا دود و ربیدہ نا زی آ اسہ بھلو زہم ئس تمانے، اندنکہ نن سرپد ان بولی ہمو گِڑا ءِ کہ او دود و ربیدہ ءِ زندہ تخک و ربیدہ بولی نا وسیلہ ئٹ دیمروی کیک، دود آتا اسہ زنک ئسے آن ایلو زنک اسکان سر کننگ بھلو اہمیت ئس تخک اندا سوب آن ہراتم بولی شیف خلنگے گڑا ربیدہ ہم شیف خلنگک۔ نصیرآباد ئٹ گیشتر خوانندہ غاک دائسکان غیر سیاسی ءُ ہرافتیٹی ہمو راجی فکر بھاز نزور کننگانے کہ خوانندہ غاک راج ئنا ویل آتا زی آ جوانی ئٹ اوار مریر اندا سوب آن ننے اداراہ نا کاریم و پروگرام ءِ زیات آن زیات مونا دروئی ءِ تانکہ داڑے سیاسی چاگڑد ئس جوڑ مرے۔
مونی گل کاری نا سرحال آ غٹ سنگتاک تینا تنظیمی امور نا ڈرافٹ آتے خوانار و نصیرآباد ہنکین نا بروکا کاریم تیکن تینا سلاہ تے پاریر۔ سنگتاک ہیت کریسہ پاریر کہ اگہ ہُننگے کہ داڑے خوانندہ غاتا غیرسیاسی مننگ نا سوب تینا حالیت آتے سرپد افس، دانا اسہ سوب ئس تعلیمی نظام ءِ کہ ہرا نا سوب آن خوانندہ غاک اندا ادارہ غاتا وسیلہ ئٹ غیر سیاسی کننگانو۔ اینو نن دا خوانندہ غاتا جوزہ غاتے خننگن گڑا نن اندا پہہ مرینہ کہ ننے دا پلیٹ فارم تننگانے ہنداٹی نن مچ مرین و ادارہ نا وسیلہ ئٹ راجی شعور ءِ سوگو کننگ کن کاریم کین۔
ہمو قبائل آک ہرا ننا خواہندار مسنو اینو ننے اندا قبائل آتا بنیات آ بشخ کننگ ءُ گڑا دا ننا زمہ واری مریک کہ نن راجی سوچ ئنا جاچ ءِ ہلین و تینا چاگڑد نا ناجوڑی تا سوب آتے سرپد مرین و اندافتا برخلاف عملی کوشست کین۔ نصیرآباد ہرا بلوچستان ئٹ کشت و کشاری نا ڈغار ئس چائنگک ولے اینو اندا ڈغار آن کشت و کشار آتا نہاد آک ہنداخس کم کننگانو دے پہ دے آن بزغر تا اُست ڈغار نا ترجیح تیان کم مرسہ ءِ تانکہ اوفک تینا جاگہ غاتے سرکار نا بندغ آتیتون بہا کیر۔ ننے سرکار نا پالیسی تے سرپد مروئی ءِ تانکہ نن اوفتا برخلاف بندغ آتے سرپدی تننگ کین و ننا بندغ آک ریاست نا پالیسی تے پہہ مریر و عملی کوشست کیر۔
گڈیکو ایجنڈا ٹی مسکوہی کابینہ ایسر کننگا و پوسکنا کابینہ گچین کننگا ہراٹی کارمستر عدنان بلوچ، کمک کارمستر نصیب بلوچ، کارگشاد علی بلوچ، کمک کارگشاد الطاف بلوچ، و احوالکاری کارگشاد نواز بلوچ گچین کننگار۔ ایسر ئٹ پوسکن گچین مروکا سنگت آتے سوغند تننگا و ولدا دیوان ایسر کننگا۔
بنجائی ترجمان بلوچ اسٹودنٹس ایکشن کمیٹی
