بلوچ اسٹوڈنٹس ایکشن کمیٹی نال ھنکین ءِ ھنکینی لس دیوان برجم دارگ بوتگ۔
وہاب بلوچ ھنکینی کارمستر ءُ بلال بلوچ کارگشاد گچین کنگ بوتگ اَنت۔
بلوچ اسٹوڈنٹس ایکشن کمیٹی نال ھنکین ءِ ھنکینی لس دیوان شعیب بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان گَل ءِ بنجاہی کمیٹی باسک سنگت سلیم بلوچ ءُ پیرجان بلوچ بوتگ اَنت۔
دیوان ءِ بُنگپ بنجاہی سرکیولر، گوستگیں ھنکینی رپورٹ، شرگداری، گَل کاری، ھندی ءُ میان استمانی سیاسی جاورھال ءُ آؤکیں گامگیج بوتگ اَنت۔
دیوان ءِ اولی بُنگپ بُنجاہی سرکیولر اَت کہ بنجاہی سنگت ءَ سیمی بنجاہی کمیٹی دیوان ءِ سرجمیں اھوال سنگتانی دیم ءَ ایر کُت اَنت ءُ تنظیم ءِ کار ءُ پروگراماں ھوار دیمتر ءِ پیسلہ آنی سرا سرپدی دات۔ دیوان ءِ دومی بُنگپ ھنکینی اھوال اَت، ھنکینی سنگت ءَ سرجمیں ھنکینی اھوال کہ آیانی تہ ءَ جتائیں کمیٹیانی اھوال ھم دیوان ءَ پیش کنگ بوت اَنت۔
دیوان ءِ دیمی بھرانی تہ ءَ بُنجاہی کمیٹی ءِ سنگتاں تران کنان ءَ گُشت کہ اے میان ءَ گَل ءِ نال ھنکین ءِ تہ ءَ دیمروئی اتکگ ءُ سنگتاں وتی کَچّ ءَ تنظیمی کار ءُ پروگرام نال، گریشہ ءُ کش ءُ گور ءِ ایندگہ میتگاں سر کُتگ اَنت۔ ھمے وڈ ءَ نال ءَ واجہ مبارک قاضی ءِ یات ءَ سوبمندیں مراگشے اڈ دیگ، بلوچستان کتاب کاروان ءِ نام ءَ کتاب مراگاہ ءُ ایندگہ کارانی تہ ءَ گھتری گندگ بوتگ۔ بلے آشوبی گَلے ءِ بستار ءَ مارا زوت دلجم نہ بوگی اِنت بگندے ھمے کار گیش ترندی ءَ گوں دیمءَ برگی اَنت ءُ یکشل ءَ جہد ءِ فلسفہ بنیات ءَ کار کنگ ءُ میتگانی تہ ءَ بلوچ سیاست ءِ دوبر فعال کنگ ءِ جہد برجاہ دارگی اِنت۔
دیمترا سنگتاں تران کنان ءَ گُشت چُش کہ سرجمیں بلوچستان ءَ وانگی آسراتی سک کم اِنت بلے نال ءُ گریشہ ءِ تہ ءَ مزن شاہ دربرجاہ ءُ دگہ وانگی آسراتی نہ بوگ ءِ برابر اِنت گُڈا اے جاورانی تہ ءَ مارا وتی ادارہ منظم کنگی اَنت داں ما وتی ورناھاں وت وانینت کُت بہ کنیں۔ جتائیں بنگپانی سرءَ باوست کنگ ءَ پد دیمءِ کارانی ھاتر ءَ دیوان ءَ نشتگیں سنگتاں وتی سلاہ ایر کُت اَنت ءُ جتائیں پیسلہ زورگ بوت کہ آیانی تہ ءَ نال ءُ گریشہ ءِ ھند ءُ دمگاں تنظیم کاری ءِ واستہ بُنزہ جوڈ کنگ، بی ایل سی ءِ کار ءُ گام کلاسانی ترتیب ھوار اِت اَنت۔
درستیں بنگپانی سر ءَ دلجمی ءَ گپ ءُ تران ءَ پد دیوان ءِ گُڈی بُنگپ آوکیں گامگیج ءِ تہ ءَ گوستگیں ھنکینی کابینہ ھلاس کنگ بوت ءُ پہ نوکیں کابینہ ءِ ھاتر ءَ سنگت گچین کنگ بوت اَنت۔ نوک گچین بیتگیں ھنکینی کابینہ ءَ وہاب بلوچ کارمستر، عدنان بلوچ کُمک کارمستر، بلال بلوچ کارگشاد، عارف بلوچ کمک کارگشاد ءُ ماجد بلوچ ھالرسانی کارگشاد گچین کنگ بوت اَنت۔ دیوان ءِ گُڈسر ءَ نوک گچین بیتگیں سنگتاں گَل ءِ سوگند دیگ ءَ پد دیوان ءِ ھلاسی ءِ جار کنگ بوت۔
بنجاھی جارکش بلوچ اسٹوڈنٹس ایکشن کمیٹی
