بلوچستان کتاب کاروان ءِ 9 روچی کتاب میڑہ ملیر ءَ برجم دارگ بیتگ
بلوچ اسٹوڈنٹس ایکشن کمیٹی ءِ نیمگ ءَ بلوچستان کتاب کاروان ءِ نام ءَ چہ ملیر ھنکینءِ نیمگ ءَ 9 روچی کتاب میڑہ ملیر ءِ جتا جتائیں دمگاں اڈ دیگ بوتگ۔اے کتاب میڑہ 6 جنوری ءَ بگر داں 15 جنوری ءَ ملیر ءِ جتائیں جاہاں برجم دارگ بوتگ ۔
اے کتاب میڑہ ءِ اولی روچ ءَ اولڈ تھانہ ءَ برجم دارگ بوت ۔دومی روچ داؤد گوٹھ ،سیئمی روچ نیک مھمد میتگ ء،چارمی روچ شاہ علی میتگ شراپی ءَ، پنچُمی روچ صالح مھمد میتگ ءَ ، ششمُی روچ م جام کنڈہ ، ہپتمُی روچ گبول اسٹاپ گڈاپ ءَ، ہشتمی روچ سراج میتگ کاٹھور ءَ، نوہمی روچ صدیق میتگ ءَ
اے 9روچی کتاب میڑہ ءِ تہءَ جتا جتائیں تبکہ داروکیں مھلوک اتکگ ءُ اے کتابی میڑہانی بھر بوتگ اَنت چوشکہ اُستاد ، ادیب ، شائر ، زانتکار ءُ کواساں، نودربراں ھوار زالبولاں ھم بھر زُرتگ ۔ اے بُک اِسٹالانی تہءَ جِتا جتائیں کتاب ھوار بوتگ اَنت، چوشکہ ، دنیاءِ دپتر، بلوچ راجدپتر ، سیاسی ، لبزانکی، سائنسی، فلسفہی، کسمانکی ءُ شائری کتاباں ھوار گل ءِ لٹریچر ، نوشت، گام ءُ کپمیوٹر ءِ پجار ھم ھوار بوتگ اَنت۔ اے کتابی میڑہانی تہا مزنیں کچے ءَ مھلوک ءَ بھر زُرتگ۔ مھلوک ءِ دلبڈی ھمے بوتگ کہ مئے گور ءَ پیسر ءَ چُشیں کتابی میڑہ اَڑ دیگ نہ بوتگ ، مئے ھاسکر بلوچ مھلوک ءُ نودربر چہ اے وڑیں وانگی پروگراماں ءُ کتابی میڑہاں دور دارگ بوتگ اَنت ءُ ما بساک ءِ اے پیمیں وانگی پروگراماں وش اَت کنیں ءُ منت ءَ گریں کہ ، مئے چاگرد ءِ تہا اے پیمیں کتاب وانگی ماھول جوڑ کنگ ءَ اِنت ءُ بایدیں بساک ءِ اے کتابی میڑہانی درِچ آؤکیں وھداں ھم برجاه بہ بنت۔ ھمے پیم ءَ بازیں بلوچ ادیب ءُ زانتکاراں وتی دانک گوشت اَنت کہ ما مُدام چہ وتی راجدپتر ءُ وتی لبزانکی وانگ ءَ چہ زبھر بوتگ ایں مئے گور ءَ چُشیں وسیلگ ءُ کتاب نہ بوتگ یاکہ نہ رستگ ، پمیشکا ما چہ وتی راجدپتر ، زبان ، راج ءُ زمین ءَ دور بوتگ ایں ۔ مئے کِرءَ ابید اسکول ءُ کالِجانی کتاب ءَ دگہ چُشیں ، بلوچ راجدپتر ءُ بلوچ بامردانی بابت ءَ کتاب نہ رستگ کہ ما چہ وتی گوست ءَ آشناہ بہ بئیں ۔۔ ھمے پیم ءَ مھلوک ءَ وتی دانک درشانک کتگ اَنتءُ بساک ملیر ھنکین ءَ را اے دلبڑی داتگ اِش کہ آؤکیں وھداں ہمے ہم کوشست بیت کہ گوں نوکیں شوربندیاں اے کتاب میڑہ اَڑ دیگ بہ بنت۔
بلوچ اسٹوڈنٹس ایکشن کمیٹی
