بلوچ اسٹوڈنٹس ایکشن کمیٹی کراچی ہنکین ءِ ہنکینی لس دیوان برجم دارگ بیتگ۔ بہرام بلو چ ہنکینی کارمستر ءُ عبدالرحمان بلوچ ہنکینی کارگشاد گچین کنگ بیتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی کراچی ہنکین ءِ ہنکینی لس دیوان ہنکینی کمک کارمستر حمل بلوچ ءِ سروکی ءَ برجم دارگ بیتگ۔ دیوان ءِ ہاسیں مہمان بنجاہی ہالرسانی کارگُشاد سنگت اُزیر بلوچ،بنجاہی کمیٹی ءِ باسک سنگت پیرجان بلوچ ءُ فہد بلوچ بیتگ اَنت۔ دیوان ءَبنجاہی سرکیولر، ھنکینی اہوال، نگد کاری، گَل کاری، ھَندی ءُ میاں استمانی سیاسی جاورہال ءُ آوکیں گامگیج ءِ بنگپانی سر ءَ گپ ءُ تران بیتگ۔
دیوان ءِ اولی بُنگپ ءَبنجاہی سنگتاں سرکیولر دیوانءِ دیم ءَ پیش کُت کہ آئی ءِ تہ ءَ بنجاہی دیوان ءِ سرجمیں اہوال ، تران ءُ فیصلہ ہوار اِت اَنت،دومی بن گپ ءَ ھنکینی گوستگیں اہوال وانگ بیت اَنت کہ آئی ءِ تہ ءَ ھنکین ءِ گوستگیں کتگیں کار ءُ عمل ہوار اِت اَنت۔ سرجمیں اہوال یک یک ءَ چارگ ءُ ٹپاسگ ءَ پد دیوان دیم ءِ بن گپ ءَ برگ بیت۔
دیوان ءِ دیمی بنگپ نگدکاری اَت، نگدکاری ءِ تہ ءَ سنگتاں ہنکینی کارانی سر ءَ یک یک ءَ نگد کُت ءُ آہاں گہتر کنگ ءِ ہاتر ءَ شور ءُ سلاہ دات۔ سنگتاں دیوان ءَ تران کنان ءَ گوشت کہ ہمک کسان ءُ مزنیں ردی ءُ جیڑہانی سر ءَ نگد بہ بیت ءُ آہانی توجیل کنگ ءِ ہاتر ءَ پہ نوکیں ءُ گہتریں فیصلہ زیرگ بہ بیت پرچاکہ وتی ردیانیءُ نزوریانی گرگ ءَ پد سیاسی عمل گیشتر پارسا ءُ مہکم تر بیان بیت ،ہما سیاسی عمل کہ مئے کش ءُ گور ءِ ورنا ءُ مردمانی سر ءَ آشوبی سان دور دنت۔ یک سیاسی گل ئے ءِ ہاتر ءَ نگد ہما شاہیم اِنت کہ اود ءَ ما وتی عملاں سَنگ کن ایں ءُ ردیاں زانت کن ایں ،پدا ہمے ردیاں گہتریں رنگے ءَ کش ایت کن ایں۔ ما سائنسی بنیات ءَ کہ سیاسی عمل ءَ جنزینگ ءَ ایں گڑا نگدسائنسی بنیات ءِ بنکی بھراں چہ یکے کہ اود ءَ ریشنلی گو ں پہتوئیں سیاسی پگر ءَ گپ ءُ باوست بیت ءُ گل ءِ سیاسی کاراں گہترءُ شرتر کنگ ءِ میان ءَ ہمک ڈولیں اڈاند کشگ ءُ دیر کنگ بنت۔
دیوان ءَ دیمی بنگپ گَلکاری اَت کہ آئی ءِ تہ ءَ سنگتاں وتی نبشتہ کتگیں ڈرافٹ دیوان ءِ دیم ءَ ونت اَنتءُ گل ءِ کاراں گہتر کنگ ءَپہ شور ءُ سلاہ دات۔ دیوان ءَ بنجاہی سنگتاں تران کنان ءَ گوشت کہ اے مئے گلءِ ربیدگ اِنت ءُ سنگتانی سیاسی جُرت اِنت کہ ما وتی کتگیں کاراں نندیں چاریں ءُ ٹپاسیں، ٹپاسگ ءَ رند بے رحمیں نگد کن ایں ءُ دومی ءِ نگداں گوش داریں، نزوریاں من ایں ءُ آہاں کشگ ءِ پیمان کن ایں۔ اسل ءَ بہ بیت ہم ہمے وڈ کہ مئے تہ ءَ پہ گل ءِ مہکم کنگ ءُ گہتر کنگ ءَ نگد کنگ ، گوشدارگ ءُنزوریاں کشگ ءِ جُرت بہ بیت۔ ہمے پیم مئے تہ ءَ ھکیگیں سیاسی اتھیکس ہم بہ بیت کہ ما یک کارے کُت نہ کنیں یا نزوری پیش داریں گڑا بے تُرس ءُ لرز اشی ءَ بہ من ایں ءُ شر کنگ ءِ گُڈٰی وس ءَ داں جہد بہ کنیں۔ کراچی ھنکین ءِ ہرچ باسکے کہ اد ءَ نشتگ ءُ ساڑی اِنت آئی ءَ ہمک بلوچ دژمنیں پندل کہ آہانی تہ ءَ سیاسی، معاشی،دود ءُ ربیدگی، چاگردی، وانگی ءُ ایدگہ پندل ہوار اَنت، اشانی دیم ءَ اوشتگی اِنت ءُ جہد کنگی اِنت ءُ باسکاں اے گپ زانگی اِنت کہ ہمک وہد ءِ مٹ بیگ ءَ گوں جاور گیش ترند ءُ سکت تر بیگ ءِ ہواری ءَ کار گیشتر ہم بنت پمیشکا باسکاں زہنی ءُپگری ہوالہ ءَ وت ءَ جاڑی ءُ پہتو کنگی اِنت۔
دیوانءِ سرجمیں بنگپانی سر ءَ گپ ءُ تران ءَ پد گڈی بنگپ آوکیں گامگیج اَت، اے بھر ءِ تہءَ پہ ہنکین ءَ گیشیں کار ءُ کاراں شرتر کنگ ءَ جتائیں فیصلہ زیرگ بیت۔ فیصلہانی زیرگ ءِ ہواری ءَ ہنکین ءِ گوستگیں کابینہ ہلاس کنگ بیت ءُ نوکیں کابینہ ءِ واستہ بہرام بلوچ ہنکینی کارمستر، جابر بلوچ کمک کارمستر، عبدالرحمان بلوچ کارگُشاد، فیاض بلوچ کمک کارگشاد ءُ محسن بلوچ ہالرسانی کارگشاد گچین کنگ بیتگ اَنت۔
دیوان ءِ آسر ءَ نوکیں کابینہ گوں سنگتاں سوگند دیگ بیتگ اَنت ءُ دیوان ہلاس کنگ بیتگ۔
بنجاہی جارکش بلوچ اسٹوڈنٹس ایکشن کمیٹی
