صباء لٹریری فیسٹیول ، ملیر ءَ سوبمندی ءَ گوں برجم دارگ بیتگ۔
صباء یک کندیلے اَت کہ بلوچ چاگرءَ رُژنا کنگ ءِ سپر ءَ نمیران بوت، بلے اے فیسٹیول پدر کنت کہ صباء ءِ پگرءُ کاروان روچ ء مرچی ہم بلوچ ورنایانی دروشم ءَ زندگ اِنت ۔
بلوچ اسٹوڈنٹس ایکشن کمیٹی
چہ بلوچ اسٹوڈنٹس ایکشن کمیٹی ءِ نیمگ ءَ صباء لٹریری فیسٹیول، ملیر ءَسوبمندی ءَ گوں برجم دارگ بوت، اے یک روچی مراگش ءَجتائیں زانت ءُ زانشتی بھر ہوار بیتگ اَنت ۔بلوچ ءِراجدپتری کوہنتریں سرڈگاراں چہ یک ملیرءَ23 استپان (فروری) ءَ برجم داشتگیں صباء لٹریری فیسٹیولءَ گُشتانک، پینل ڈسکشن،لمئی بولی کتابُک ءِ دیمدرائی، پٹ ءُ پولی تاک، ڈاکیومنٹری،کسمانک، ٹیبلو، زہگانی گام بھرءُنمیرانیں کمانچر بلوچ ءِ نام ءَ آرٹ ایگزبیشن ہواربیتگ اَنت، مراگشءَ بنجاہی سنگتاں ہوار مزن مزنیں بلوچ زانتکار،استاد، ادیب ءُ سیاسی جہدکاراں وتی ہیال درشان کتگ اَنت۔
مراگش ءِ بندات گوں بلوچ راجی سوت ءَ کنگ ءَپد نمیرانیں صباء ءِ سر ءَ پنتاک ءُ نبشتانکی تاکے وانگ بیتگ ، دیمتر ءَ نمیرانیں صباء ءِ سر ءَ پینل ڈسکشنے اَت کہ مہمان رمضان بامری،اصغر علی آزگ ءُ ظریف بلوچ بیتگ اَنت ءُ دیوان ءِ مہمانداری مُزیر بلوچ ءَ کُتگ، دیم ءِ پینل ڈسکشن کراچی ءَ بلوچ ءِہستیں جیڑہ ءِ سرہال ءِ سر ءَ نور بلوچ ءَ مہمانداری کتگ ءُ مہمان حفیظ بلوچ ءُ زرخان بلوچ بیتگ اَنت۔گُشتانکی بھر ءِ تہ ءَ بلوچ نبشتہ کار ءُ تجزیہ نگار انور ساجدی ءَ بلوچ سیاست ءُ ہستیں دور، پروفیسر ڈاکٹر فاروق بلوچ ءَ بلوچ ءُ بلوچستان ؛ عہدی دپتری پُژدر ،بساکءِ بنجاہی مزن کارگشاداظہر بلوچ ءَ بلوچ نودربر ءُ سیاسی گھگیری ءُ بساک ءِ بنجاہی ہالرسانی کارگشاد اُزیر بلوچ ءَ صباء لٹریری فیسٹیول ءِ ارزشت ءُ سوبمندی ءِ سرہالانی سر ءَ تران کتگ۔ اشی ءَ پدپٹ ءُ پولی تاکانی تہ ءَ کندیلیں صباء ءِ رزوان بلوچ، رند ءُ لاشارءِ جنگءِ غلام رسول کلمتی ، رسانکدر ءُ بلوچ راجءِ فہد بلوچ، بانل دشیاری ءِ شاہ تاج بلوچ ءُ کراچی ءَ بلوچ راجی سیاست ءِ پُژدر ءِ تاک پیرجان بلوچ ءَ ونتگ اَنت۔ مراگش ءَ چار ڈاکیومنٹری پیش کنگ بیتگ کہ چو اے ڈول ءَ اَنت ؛کندیل ایں صباء، بلوچستان کتاب کاروان، نمیرانیں مبارک قاضیءُ نشہ آماچیں بلوچءِ سرہال بیتگ اَنت، اشاں پد گام بھر ءِ تہ ءَ زہگانی گپ ءُ ترانے ‘ کوہنیں ملیر ءُ نوکیں ملیر’ ءِ سر ءَ ہوار، گام چاپ،گام پریزنٹیشن ، گام کسہ ءُ گام آرٹس ہوار بیتگ اَنت۔دیمی بھرانی تہ ءَ چہ سُر سنگار ازمی مجلس ءِ نیمگ ءَ نمیرنیں صباء ءِ سر ءَ ‘بیا او مُرید’ ءِ نام ءَ کسمانکے ءُ دلیریں شیرزال نمیرانیں صبین محمود ءَ دروت ندر کنان ءَ آئی ءِ سرءَ یک کسمانکے پش کنگ بیتگ ۔ ہمے پیم نمیرانیں کمانچر بلوچ ءِ نامءَآرٹ ایگزبیشن ءِ ہم بھرے ہواربیتگ ءُ اود ءَ بلوچ آرٹسٹ ءُ اکسکشاں مہروان آرٹ اکیڈمی ءُ حمل سالار ءَ ہوار ایدگراں وتی آرٹ ءُ اکسانی اسٹال جنگ ءَ ہوار آہانی دیمدرائی ہم کتگ۔مراگش ءَ ‘لمئی بولی’ کتابُک ءِ دیمدرائی ہم کنگ بیتگءُ بلوچستان کتاب کاروان ءِ کتاب اسٹال ءُ سید ریفرینس کتابجاہ ءِ کتاب اسٹالے ہم برجم دارگ بیتگ۔
دیوان ءَ انور ساجدی ءَ تران کنان ءَ گوشت کہ نی ہما وہداتکگ کہ ما راستیں گپءَ بہ کن ایں ءُ تاریخ ءَ تچک بہ کن ایں ، پہ راجی نپانی ہاتر ءَ کسی لھاز کنگی نہ اِنت، دوہزار ءَ پیش گوست ءَ ہما رہشون ءُ سیاسی سروک کہ آہانی سر ءَ بلوچ مہلوک ءَسِتک داشتگ اَت ، آہاں بلوچ راج ءُ بلوچ گُلزمین ءِ پہ وزارتے ءَ سودا جت ءُ مزاکرات ءُ جمہوریت ءِ نام ءِ سر ءَ بلوچ راج رد دات ، اے مزنیں تاوانے ءُ ہمشی ءَ چہ مئے بنجاہ سال زوال بیت،اے بلوچ راجدپتر ءُ بلوچ جُنزءِ تہ ءَ مستریں دگا اِنت۔بلے مرچی آہانی دور شتگ ءُ اے زمہ واری نی ورنایاں گون اِنت ءُ دیم ءَ برگ ءَ اَنت۔ نی بلوچ ورنایاں اے دروگیں سیاست رد کتگ ءُ وتی راہ تچک کتگ ءُ من سدکاں کہ نی اے ورنا پُشت نہ کنز اَنت ءُ وتی ساہاں ندر کن اَنت بلے مکسد ءَ چہ سرینڈر نہ کن اَنت۔ ہمے پیم بلوچ راجدپتر زانت ڈاکٹر فاروق بلوچ ءَ تران کنان ءَ بلوچ ءُ بلوچستان ءَ راجدپتر ماں عہدی پژدر ءَگشینت کہ چوں ءُ چے پیم بلوچ ءُ بلوچستان اے مزنیں سرزمین ءِ واہند اَنت ءُ آہاں چے پیم وتی ڈیھ رکینتگ۔ اے دمگ ءِ سرجمیں عہدی آرٹ ءُ نشانی بلوچ ءِدوداں گوں سیادی دار اَنت ءُ اد ءِ سرجمیں نشانی ہمے پدر کن اَنت کہ اے زمین گوست ءَ چہ بلوچ ئیگ اِنت۔
دیوان ءَ بنجاہی سنگتاں صباء لٹریری فیسٹیول ءِ ارزشت ءُ مکسد گشینت ءُ گوشت کہ اے فیسٹیول ءِ مکسد صباء ءِ پگر ءُ فلسفہ ءِ زندگ دارگ ءُ آئی ءِ واب ءَ عملی دروشم ءَ مانا دیگ اِنت ءُ اے مُچی ہمے پدر کنت کہ صباء نہ تہنا زندگ اِنت بلکیں آئی ءِ پگر مہکم بیان ءَ ورنایانی دروشمءَ دیم ءَ جُنزان اِنت۔ دیمتر ءَ سنگتاں گوشت کہ اینچو اڈ جنجال ءِ تہ ءَ ہم بلوچ ورنایانی سیاسی گھگیری مہکم اِنت ءُ ہمک ڈولیں جنجالانی دیم ءَ اوشتاگ ءُبدواہاں جور جواب اِنتءُ اے جہد ءُ سپر ہمے داب ءَ روا ن کنت ءُ مہکم تر بیان کنت۔
دیوانءَ مزنیں کچے ءَ مہلوک ءَ بھر زُرت ءُدیوان ءَ ھاسیں مہمان انور ساجدی، ڈاکٹر فاروق بلوچ، اصغر علی آزگ، رمضان بامری، زرخان بلوچ، حفیظ بلوچ، لالا وہاب بلوچ، رمضان بلوچ، نثار احمد ، ظریف بلوچ، ناصر , نور بلوچ، بلال بلوچ، فوزیہ بلوچ، سلیم شہزادہ ءُ دیوان ءَ ساڑی ئیں بساک ءِ بنجاہی مزن کارگُشاد اظہر بلوچ،ہالرسانی کارگشاد اُزیر بلوچ، بنجاہی کمیٹی ءِ باسک پیرجان بلوچ ءُ فہد بلوچ بیتگ اَنت۔مراگش ءَ اتکگیں کُلیں مہمان ءُ ادارہانی ھاس سید ہاشمی ریفرینس کتابجاہ،ماسٹر امام بخش کتاب جاہ، مہروان آرٹ اکیڈمی، سُرسنگار ازمی مجلس ءُ ایدگہ آرٹسٹ ءُ اکسکشانی منتواریں کہ دیوان ءَ بھر زُرت ءُ اے راجی جہد ءَ مئے ہمراہ داری کُت۔
مراگش ءَ سرجمیں بھر یک یک ءَ سوبمندی ءَ گوں دارگ ءَ پد گُڈسر ءَ ساز ءُ زیملی بھر ءِ دیوان ءَ گوں آسر کنگ بیتگ۔
بنجاہی جارکش بلوچ اسٹوڈنٹس ایکشن کمیٹی
