بلوچ اسٹوڈنٹس ایکشن کمیٹی شال ہنکین ءِ لس دیوان برجم دارگ بیتگ۔ ارشد بلوچ کارمستر ءُ بیبگر بلوچ کارگشاد گچین کنگ بیتگ اَنت۔
بلوچ اسٹوڈنٹس ایکشن کمیٹی
شال ءَ سائنس فسٹیول ءُ کیرئیر کونسلنگ ءِ نام ءَ مراگشے برجم دارگ بیت۔
بلوچ اسٹوڈنٹس ایکشن کمیٹی شال ہنکین ءِ ہنکینی لس دیوان گوستگیں کُمک کارمستر لیاقت بلوچ ءِ سروکی ءَ برجم دارگ بیتگ۔ دیوان ءِ ہاسیں مہمان گل ءِ کماش شبیر بلوچ ءُ بُنجاہی سنگت پیرجان بلوچ ءُ علی بلوچ بوتگ اَنت۔ دیوان ءَ بُنجاہی سرکیولر، ھنکینی اہوال، نگد کاری، گل کاری، ھندی ءُ میاں استمانی سیاسی جاورہال ءُ آوکیں گامگیج ءِ سرءَ دلجمی ءَ گپ ءُ تران بیتگ۔
دیوان ءِ اولی ایجنڈا بُنجاہی سرکیولر اَت کہ بُنجاہی سنگت ءَ دیوان ءِ دیمءَ بُنجاہی سرکیولر ونت ءُ ایشی ہمرائی ءِ گل ءِ بُنجاہی دیوان ءَ زُرتگیں پیسلہ ھم دیوان ءِ دیمءَ پیش کُت اَنت۔ دومی ایجنڈا ھنکینی اہوال اَت کہ ھنکینی سنگت ءَ ھنکینی اہوال دیوانءِ دیمءَ پیش کَت اَنت کہ آہانی تہ ءَ ھنکینی جتا جتاہیں کمیٹیانی اہوال ہوار بیتگ اَنت۔
دیوان ءِ دیمتری بنگپ نگد کاری بیتگ، ایشیءِ تہ ءَدیوان ءَ نِشتگیں سنگتاں گوں دلجمی ءَ وتی نگد دیوان ءِ دیمءَ اِیر کُتگ اَنت۔ سنگتاں گپ کنان ءَ گُشتگ کہ نگد سیاسی ادارہانی ءُ سیاسی جہد ءِ تہ ءَ سک باز ارزشت داریت، نگد تئی کُتگیں کار ءُ پروگرام ءُ گوستگیں سرجمیں نزوریاں تئی دیمءَ اِیر کنت پدا تو گوستگیں نزوریانی نشاندہی ءَ کنے ءُ دیمءَ ہمے نزوریانی ھلاس یا کمتِر کنگ ءِ جہد ءَ برجاہ دارے ،اے عمل پہ ادارہ ءُ جہد ءِ ہاترءَ توانگر بیت کنت۔ ما بازیں جاہ ءَ وتی نزوریانی نشاندہی ءَ کنیں ءُ ہمیشاں منیں ہم بلے باز براں ما وتی کُتگیں نزوریانی سرءَ بس ہمے گشیں ہو نزوری بیتگ اَنت ءُ آوکیں وہد ءَ نہ بنت ءُ اے رویشت ہم وتی تہ ءَ اداراہ ءِ ھاترءَ سک ھترناک اِنت ،اگاں اے وڈ بہ بیت ہر کس بئیت ءُ بہ گُشیت نزوری بیتگ اَنت دیمءَ نہ بنت گڑا ادارہ ءِ کار بیھ، شر ءُ گہتر کنگ نہ بنت۔
دیمتری سرہال گل کاری اَت کہ دیوان ءَ ساڈی ایں سنگتاں ھنکین ءِ دیمتری کارانی گہتر کنگ ءِ ہاترا وتی شور ءُ سلاہ دیوان ءِ دیمءَ اِیر کُت اَنت۔ دیوان ءَ بُنجاہی سنگتاں گپ کنان ءَ گشتگ کہ گوستگیں ہپتءُ ہشت سال اِنت کہ ادارہ سپر کنان اِنت ءُ پیداک اِنت ،مرچی ادارہءَ وتءَ بلوچ سر ڈگار ءِ بازیں ھند ءُ دمّگاں سر کُتگ، ادارہ مرچی بلوچ وریانی رہشونی ءَ کنگ ءَ اِنت، ادارہ ءِ جہد ہمیش اِنت کہ بلوچ ورنایانی پگری ءُ لیکہی تربیت ءَ بہ کنت ،ادارہ وتی ہمے کار ءَ جتا جتائیں طرزکارانی بنیات ءَ کنگ ءَ اِنت۔مرچی زمینی جاور ہر روچ ءِ ہساب ءَ گوں تیزی ءَ مٹ بوان اَنت، گڑا مارا نودربر گل ئے ءِ بستار ءَ ھم وتی تہ ءَ ہر روچ ءِ ھساب ءَ مٹی ءُ بدلی آرگ لوٹیت دانکہ ما زمینی جاوراں گوں وتءَجُنزینت بہ کن اِیں، اگاں ما بدل بوؤکیں جاورانی تہ ءَ وتی تہ ءَ مٹی میّار ایں ءُ گہتر مہ کن ایں گڑا ممکن اِنت کہ آؤکیں وہد ءَ ما بلوچ نودربرانی آ کچ ءَ رہشونی کنگ ءَ ءُ بلوچ چاگرد ءَ زانشتی عمل ءِ جنزینگ ءَ نزور بہ بیں ۔ بلوچستان ءِ وانگی ادارہ مئے سیاسی بُنجل اَنت بلے استیں وہد ءَ استان جتا جتائیں طرزکاراں گوں مئے سیاسی بُنجلانی سرءَ اُرش کنگ ءَ اِنت، استیں وہد شال ءِ وانگی ادارہاں بگرداں بلوچستان ءِ جتاجتائیں وانگی ادارہانی تہ ءَ جیڑہ جوڈ کنگءَ بیا، اے کُل مئے اگل، زہانت، سسا ءُ پگر ءِ سر ءَ بندش جنگ ءِ پندل اَنت داں مامہ جیڑ ایں، مہ پہم ایں ءُ عمل مہ کن ایں۔ استان ءِ اے پندلانی دیمءَ مارا گوں ترندی ءَ اُوشتگی اِنت اگاں مرچی ما اے عمل ءِ سرءَ بے توار بہ بیں، گڑا آؤکیں وہد ءَ بلوچستان ءِ وانگی ادارہانی تہ ءَ زانت ءُ زانشت، پگری گپ ءُ تران، جُست ءُ پُرس، جیڑگ ءُ ہیال کنگ پشت نہ کپ ایت پمیشکا ہستیں وہد ءَ مارا گوں ترندی ءَ اے عمل ءِ ھلاپ ءَ گامگیج زیرگی اِنت ءُ شال ءِ تہ وانگی ادارہانی ملٹرائزیشن ءِ ھلاپ ءَ مہکمیں زرمبشتے جُنزینگی اِنت۔
گڈسرءَ آوکیں گامگیج ءَ گوستگیں ہنکینی کابینہ ھلاس کنگ بیتگ ءُ نوکیں ہنکینی کابینہ گچین کنگ بیتگ، نوکیں کابینہ ءِ تہ ءَ ارشد بلوچ کارمستر، ولید بلوچ کُمک کارمستر، بیبگر بلوچ کارگشاد، گلاب گلزار کُمک کارگشاد، خالدہ بلوچ ھالرسانی کارگشاد گچین کنگ بیتگ اَنت۔ بُنجاہی سنگت ءَ ہنکینی نوکیں کابینہ ءِ سنگت سوگِند داتگ اَنت ءُ دیوان ءِ ھلاسی ءِ جار جنگ بیتگ۔
بلوچ اسٹوڈنٹس ایکشن کمیٹی
