بلوچ اسٹوڈنٹس ایکشن کمیٹی کراچی ھنکین ءِ نیمگ ءَ چہ یک مزن ھیلکاری دیوانے کارمستر بھرام بلوچ ءِ سروکی ءَ برجم دارگ بوت۔ دیوان ءِ مھمانءِ ھاس گل ءِ بُنجاھی کماش شبیر بلوچ ءُ بُنجاھی ھالرسانی کارگشاد اُزیر بلوچ بوتگ اَنت۔
( The Congress)سرھال: کانگریس
ترانکار: بُنجاھی ھالرسانی کارگُشاد اُزیر بلوچ
دیوان ءِ بندات ءَ سنگت ءَ گیشینت کہ کانگریس ءَ چہ مراد ھندوستان ءَ انڈین نیشنل کانگریس اِنت کہ سرجمیں دیوان ءَ کانگریس ءِ نِزّ ءَ چاران ءُ باوست کنگ بیت۔
دیوان ءَ تران کنان ءَ سنگت ءَ گُوَشت کہ ھندوستان ءِ ایردستی ءِ رگ ءُ روتگ چہ مزنیں استحصالی کمپنی ایسٹ انڈیا کمپنی چہ بِنا بیت اِنت کہ یک مُدّتے ءَ پد باقائدگی ءَ گوں برطانیہ ءِ ھکومت ءِ شوربندیاں ھندوستان ءِ سر ءَ کپ اَنت ءُ سرجمیں ھُشکنات ( sub-continent ) ایر دست کنگ بیت اِنت۔کساس ہپتدہمی کرن ءَ اے کمپنی کاروبار ءِ نیت ءَہندوستان ءَ کئیت ءُ کم کم ءَ ہندوستان ءِ سیاست ءَ دور کنت، استاناں تہ ءَ چہ نزور کنت ءُ سرجمیں ہندوسستان ءَ وتی ایردسست کنت۔ وتی ایردستی ءِ زمانگ ءَ ہندوستان ءَ بے کساس لُٹ ءُ پُل ءَ کنت۔ ایردستی ءِ گرانیں ازیتانی سبب ءَ چہ ھندوستان ءِ جُتائیں ٹَکّ ءُ مزہبی ٹولی یکجاہ بنت ءُ 1857 ءَ مزنی جنگے گوں انگریزاں کن اَنت بلے برطانیہ وتی مزنیں لشکرے ہندوستان ءَ کار ایت ءُ مہلوکی گھگیری ءَ پروش دنت،مزنیں مھلوکے جَنگ بیت ءُ ایردستیں مھلوک پروش وارت اِنت۔
سنگت ءَ دیمترا گُوَشت کہ 1857 ءَ پد ھندوستان سرجمی ءَ برطانیہ ایردستی ءِ آماچ بیت اِنت ءُ جُتائیں شوربندیانی وسیلہاں چہ کالونی ءِ گِر ءُ دار کنگ ءِ جُہد بیت اِنت کہ اِشانی تہ ءَ یک انچیں پارٹی ئے جوڈ کنگ اِنت کہ مھلوک اِے پارٹی ءِ بھر بہ بنت ءُ برطانیہ ءِ ھلاپ ورزی ءَ مہ کن اَنت۔ ھمے پالیسی ءِ رِد ءَ 1885 ءَ انڈین نیشنل کانگریس جوڈ کنگ بیت اِنت ءُ وانندگیں تَبک ءِ ھندوستانی بھر زیر اَنت ءُ پارٹی ءِ جُہدءَ ہوار بنت ۔ وہد ءِ ہمراہی ءَ کانگریس ءِ تہ ءَمٹی کئیت ءُ رہشون ءُ جہدکارنی تہ ءَ سنچ گیش بیت گڑا پاٹی ءَ چہ انگریز ءَ ساناں کش اَنت بلے لھتیں وھد ءِ تہءَ 1905-1907 ءَ پارٹی وتی اندر ءَ اختلافانی سبب ءَ چہ پروش اِیت ءُ بازیں مردمے وتی کِشک ءَ گِستہ کنت۔اے پرُشگ ریڈیکل سوچ ءُ ریفارمسٹ سوچ ءِ سوب ءَ بیت۔
سنگت ءَ تران کنان ءَ گُوَشت مہاتما گاندھی ءِ 1915 ءَ کانگریس ءِ ھوار بُوّگ ءَ پد پارٹی ءِ رھشون نامینگ بیت اِنت ءُ وھد ءِ ھمراھی ءَ مھلوک ھم گاندھی ءِ سرا اُمیت دار اِیت۔ ھمے میان ءَ کانگریس ءُ برطانوی راج ءِ میان ءَ جُتائیں سبباں چہ جُتائیں مزاحمتی عمل گِندگ ءَ کئیت اِنت کہ اِشانی تہا Non-Cooperation Movement ءُ سِول نافرمانی ھوار اَنت۔ ھمے مزاحمتی عملانی درچ جُنزان بیت اِنت ءُ جاھے نا جاھے ءَ برطانوی راج مھلوکاں بندیگ کنت اِنت ءُ کُشت ءُ ھون ءَ چہ ھم چَک ءُ پد نہ بیت۔
ترانکار ءَ دیوان ءَ برطانیہ ءِ شوربندیانی سرءَ سرپدی دات کہ برطانیہ 1935 ءَ چہ کانگریس ءَ جُتائیں انڈیا ءِ پارٹیاناں موہ دنت کہ الیکشن بہ کن اَنت ءُ صوبائی سِسٹمے جوڈ بیت اِنت گُڈا ھمے وھد ءَ کانگریس گیشیں سیٹاں گوں باج بارت اِنت۔ بلے اے پالیسی ھم بے سوب بیت اِنت ءُ مھلوک پہ وتی آجوئی ءِ لوٹ کن اَنت ءُ دومی جہانی جنگ ءِ میان ءَ مزنیں کُشت ءُ ہون ، رھشونانی دزگیری، پارٹی ءِ کارانی سرا بندش جَنگ ھم بیت اِنت بلے ایردستیں انڈیا انگت وتی مُھکمی ءَ برجاہ دار اِیت ءُ دومی نیمگ ءَ برطانیہ جہانی جنگ ءِ سبب ءَ چہ نزور تَرّان ھمے سما کَنت کہ نوں اے زمین یل دیگی اِنت بلے سرجم ءَ گوں ایمنی ءَ نندگ ءَ نئیلگی اَنت۔ پمے ھاترا مُسلم لیگ ءُ کانگریس ءِ میان ءَ جُتائیں اختلافاتانی سبب ءَ ھندوستان ءِ زمین دو سیمسرانی میان ءَ دو بھر بیت اِنت ءُ 1947 ءَ یک نوکیں استانے ہم ودی کنگ بیت۔
سنگت ءَ دیوان ءِ گُڈسرءَ کانگریس ءِ سرءَ درشان کنان ءَ گُوَشت کہ کانگریس بہ گندے بندات ءَ زوراک ءِ دست ءِ چیر ءَ بوتگ ءُ پُر اِیمنی ءِ ھیال ءَ گوں جدوجُہد کُتگ بلے وتی اندر ءَ ھندوستان ءِ تہا یک مزنیں سانے بیتگ ءُ جُتائیں ٹَکّ ءُ سماجی ٹولی وتی اندر ءَ جاہ داتگ۔ بازیں چِست ءُ ایرانی تہءَ ھندوستان ءِ آجوئی ءِ ھاترا وتی کِردے پیلو کُتگ۔
گُڈسرءَ سنگت ءِ تران ءِ ھلاسی ءَ گوں دیوان ءِ نندوکیں سنگتاں جُست ءُ پُرس کُت ءُپدا کارمستر ءِ رزا ءَ چہ دیوان ءِ ھلاسی ءِ جار جنگ بوت۔
