بلوچ اسٹوڈنٹس ایکشن کمیٹی شال ھنکین نا ھیلکاری دیوان ئس اڈ بتننگا۔

بلوچ اسٹوڈنٹس ایکشن کمیٹی شال ہنکین نا اسہ ہنکینی ہیلکاری دیوان ئس ہنکینی کارمستر سنگت ارشد بلوچ نا کماشی ٹی اڈ تننگا۔ دیوان نا مہمان بنجائی کمیٹی نا باسک سنگت پیر جان بلوچ، علی بلوچ و فہد بلوچ ئسر۔

دیوان نا سرحال : میڈیا، مائنڈ، ءُ پولیٹیکس

ہیت کروک: بنجائی کمیٹی نا سنگت فہد بلوچ

سنگت تینا تران ءِ گڑاس ٹرم پارے و اوفتا معنٰہ و ڈیفینیشن تی پارے و اوکان پد او تینا سرحال آ بسک۔ ہیت کریسہ پارے کہ تیوہ جہان ئٹ رابطہ کاری اسہ مرکزی کڑد ئسے کاریمے کیک، اندا وڑا میڈیا سیاست ئٹ اسہ مرکزی ءُ کڑد ئس نا کاریم ءِ کریسہ سیاسی و زہنی خیال آتا حوالہ ئٹ اسہ گمان ئس ودی کننگ نا کوشست کیک۔ اینو پگہ جہان ئٹ اندا ہیت ئنا زی آ گیشتر پام تننگک کہ جنگ آتا اسہ پرنسپل ئس دادے کہ جنگ کروئی اف، بلکن آ آئیڈیاز آتے تاغت ئس تروئی ءِ، یاکہ نن پان دا پرسپشن (Perception) نا جنگ ئسے۔ انتئے اینو نا جہان پائک کہ سیاست، جنگ ہار یا پار بیرہ بیانیہ و پرسپشن تون گنڈوک ءِ۔

نن ہراتم کہ میڈیا نا زی آ ہیت کینہ مننگ کیک پین بھازو گڑاسے نا زی آ ہیت کینہ ولے ننا دنکہ سرحال سیاست و سیاسی شیف و بڑزی تیٹی میڈیا نا حوالہ ئٹ ءِ گڑا ننے میڈیا ءِ سیاسی حوالہ ئٹ ہُرینہ۔

سیاست ئٹ میڈیا مُسے کاریم کیک کرافتیٹی؛ اولیکو دادے کہ میڈیا سیاست ئٹ سیاسی پروگرام و ایوونٹس (Events) آتا حوالہ اسہ نظر ئس ہیتک ہرافک کہ چاگڑد ءِ اثرمند کیرہ۔ ارٹمیکو دا کہ چاگڑد ئٹ ہمو سیاسی پروگرام و ایوونٹس آتا حوالہ ئٹ ہمو چاہنداری ءِ اسٹ کننگ نا کوشست کیک، مثیل کہ؛ ہرا کہ سیاسی شیف و بڑزی ئس مریک چاگڑد نا اسہ بندغ ئس خنک تا تینا اسہ تجزیہ و آئیڈیا ئس ڈسکس کیک گڑا میڈیا نا وسیلہ ئٹ اندا نا بابت ءَ تینا چاگڑد نا پین کسس ءِ سر کننگ نا کوشست کیک۔ مسٹمیکو دا کہ اندا چاگڑد نا سیاسی و چاگڑدی ویلیوز و نارمز (دود و ربیدہ نا بشخ آک) آتے اسہ جاغہ آن ایلو جاغہ آ سر کننگ کن ممکن کیک۔

سنگت ہیت کریسہ پارے کہ ایہُن سوال دادے کہ میڈیا بندغ آتا آئیڈیاز و خیال آتے سانمند (اثرمند) انتئے کیک؟ دانا جواب ءِ نن میڈیا، مائنڈ و سیاست ئٹ دن خنینہ کہ ہرا ہم بندغ بزان لس مخلوک ئس کہ ارے اود سیاسی حوالہ آ اسہ گل یاکہ پارٹی ئسے تون گنڈوک اف یاکہ اونا سیاسی چاہنداری نزور ءِ، گڑا اونا علمی کچ  و چاہنداری ہم بھاز نزرو مرو، اندا سوب آن سائیکولوجی پائک کہ دا بندغ کوگنیٹوولی نزور ءِ (Individual is subjected to cognitive laziness)۔ دانا متلب دادے کہ اود شعوری بنیات آ نزور ءِ۔ ہراتم کہ اود شعوری بنیات آ نزور تمک گڑا اودے میڈیا نا ہیت آک تینا پارہ غا ہتنگ کن کوشست کیرہ۔ اندا سوب ءِ کہ ہر تاغت اود ریاست ئس مرے یاکہ راجی تحریک ئس میڈیا ٹی اسہ اِرا گڑا ءِ توننگ کن کوشست کیک اسٹ کوگنیٹوو ڈزونینس (Cognitive dissonance) ءِ، ہرانا نا متلب دادے کہ ہمو انفارمیشن ہرا کہ نا ساڈی آ یخین یاکہ believes آتیتون ہمگام یاکہ اوار مننگ اف گڑا نیکن دافک پین جتاء ءُ گڑا ءُ، ہرا مننگ کیک نے نا آئیڈیاز و خیال آتیان کشیسہ پین خیال ئسے ٹی دیر۔

ارٹمیکو گڑا کہ توروئی ءِ اودے پارہ سلیکٹوو ایکسپوژر (Selective Exposure)، دانا متلب دادے کہ کہ بندغ آک تینا خیال آتے تینٹ پک کیرہ یاکہ ہر ہمو خیال آک تینے مُر کیرہ ہرا اوفتا خیال و آئیڈیاز آتے نسخان ہیتک یاکہ تینا سواد آتیکن ہر ہمو انفارمیشن ءِ ہرفیرہ ہرا کہ اوفتیکین گچینی مریک۔

سنگت ہیت ءِ مون آ دریسہ پارے کہ سیاست ئٹ میڈیا مُسے گڑا نا بنیات آ مون آ دننگک، ہرافتیٹی اولیکو گڑا ایجنڈا سیٹنگ ءِ؛ دانا متلب کہ ماہلو نی اسہ ایجنڈا ئس سیٹ کیسہ کہ دا ایجنڈا مرے۔ دنکہ بلوچ پائک کنا زنک ایسری مننگے ہرانا برخلاف آ کنے کاریم کروئی ءِ، گڑا او میڈیا ٹی تینا ایجنڈا ئس جوڈ کیک زنک ایسری۔ ارٹمیکو گڑا پرائمنگ ءِ؛ دانا متلب دادے کہ اگہ ایجنڈا نسل کُشی ءِ گڑا نسل کُشی نا بھازو وڑو ہرافتے نا دژمن کیک تہ، داسا داڑے نے ہمو مخصوص آ طریقہ پاروئی ءِ کہ خلنگ بِٹنگ ءِ، روڈ ایکسیڈنٹ وکینسر ءِ یا پین وڑ ئسے ئٹ مننگے متلب کہ نی ہمو کانٹینٹ (Contents) آتے ہتیسہ۔ مسٹمیکو گڑا فریمنگ ءِ ہراڑے نی ایجنڈا تون اوار کانٹینٹس آتیان پد ہمو مخصوص آ گڑا ءِ فریم کیسہ گڑا مخلوک نا مون آ تخیسہ داسا دا گرا نیکن اسہ بیانیہ ئس جوڈ کیک۔ نا مخلوک ءِ سرپد کیک، و ہراتم کہ مخلوک سرپد مس گڑا مخلوک ءِ دا گڑا کن پاننگ مریک کہ اوفک انت ئنا بابت ئٹ سوچ خلیر یاکہ امر سوچ خلیر، داڑتون اوار اوفک ہمو حوالہ ئٹ سیاسی کمپئین نا تہٹی بشخ ہلیرہ نا خیال و بیانیہ ءِ مون آ دیرہ۔

سنگت نا ڈسکشن آن پد سنگت آک تینا سوج آتے کریر ہرافتا ورندی تننگ آن پد ہنکینی کارگشاد ہیلکاری دیوان ءِ کارمستر نا موکل ئٹ بند کرے۔

بلوچ اسٹوڈنٹس ایکشن کمیٹی شال ہنکین