بلوچ اسٹوڈنٹس ایکشن کمیٹی مستونگ ہنکین نا لس مجلس اڈ تننگا-
میر احمد بلوچ کارمستر و نصیر بلوچ کارگشاد گچین کننگار۔
بلوچ اسٹوڈنٹس ایکشن کمیٹی مستونگ ہنکین نا ہنکینی لس مجلس ہنکینی آرگنائزر میراحمد بلوچ نا کماشی ٹی اڈ تننگا، دیوان نا مہمان بنجائی کمیٹی نا باسک علی بلوچ و پیر جان بلوچ ئسر۔
مجلس ئٹ بنجائی سرکیولر، ہنکینی احوال، نغدکاری، گل کاری، ہندی و جہانی سیاسی حالیت آک و بروکا گام گیج نا ٹِک آتا زی آ است جمی ئٹ ہیت و گپ مس۔ دیوان نا اولیکو ٹِک بنجائی سرکیولر ئس، بنجائی سنگت مجلس نا مون آ بنجائی سرکیولر ءِ خوانا اوڑتون اوار بنجائی دیوان ئٹ ارفنگوک آ فیصلہ غاتے ہم مجلس نا مون آ تخا۔ ارٹمیکو ٹِک ہنکینی احوال ئس، ہرادے ہنکینی سنگت مجلس نا مون آ تخا، ہراٹی ہنکینی کاریم تیتون اوار ہنکین نا کمیٹی تا احوال آک ہم اوار ئسر۔
مجلس ءِ مون آ دریسہ سنگت آک کل ٹِک آتا زی آ اُست جمی ئٹ ہیت و گپ کریر۔ ومجلس ئٹ ساڑی آ بنجائی سنگتاک ہیت کریسہ پاریر کہ جہان ئٹ امر ءُ ہم گل ئس مرے اگہ اوڑے نغد متو گڑا ہمو گل ئٹ نزوری، نا لائخی و کمبوتی و بے پامی تا اسہ لڑ ئس بریک ہرا گل ءِ نسخان تریسہ اودے سلنگ نا گواچی کیک۔ نغد ہمو عمل ءِ ہرا مدام کاریم تا، ادارہ غاتا نزوری و کمبوتی تے کشیسہ اوفتے سوگوی نا پارہ غا دیک، اندن پارہ کہ جہان ئٹ ہچس ہم پورو اف ولے نغد ہمو عمل ءِ ہرا جہان نا ہر گڑا ءِ پورئی نا پارہ غا دیک، اندا وڑ نغد ئنا کل آن گچین انگا دروشم جند نغدی یعنی خود تنقیدی ءِ ہرا بندغ نا جند ئنا نزوری تے پاش کیک و بندغ ءِ مہکم مننگ آ کمک کیک و بندغ ئٹ سیاسی جیرت ئس ودی کیک ہراڑان بندغ تینے آ مروکا نغد ءِ سگنگ نا تاغت ئس ودی کیک۔ اسہ سیاسی گل ئسے نا دروشم ئٹ گل نا سوگوی و دیمروی نا بھلا اوزار نغد ءِ ہرا کہ گل و گل ئنا باسک آتا ہر نزوری و کمی تے کشیسہ اوفتے سوگوی و گچینی نا پارہ غا دننگ کن اسہ گام ئسے نا آنبار کاریم کیک۔
دیوان ءِ مون آ دریسہ بنجائی سنگت آم ہیت کریر کہ مستونگ نا ہنکین دا گڑاس وخت ئٹ تینے مہکم کننگ نا اسہ کوشست ئس کرینے ہرانا سوب آن اینو دا ہنکینی مجلس اڈ تننگ مننگ ءِ۔ سنگت آتا ساندہ کوشست اندا مسنے کہ گل ءِ مستونگ آنبار انگا جاغہ ٹی مہکم و سوگو کین۔ اندا جوزہ، سیاست و ہمت ننے اینو اسہ سوگو ءُ خوانندہ گل ئس کرینے و اندا مخلصی و جوزہ ننے مون آ پورہ بلوچستان ئٹ خوانندہ غاتا حق آتیکن سلنگ و مزاحمت کننگ کن بیدار کریسہ کیک۔
سنگتاک ہیت کریسہ پاریر کہ مستونگ نا سیاسی چاگڑد ءِ ایسر کننگ کن وڑ وڑ ئنا چم آتیتون اوار اوار چاگڑدی گندئی تا گواچی کریسہ ءُ تاکہ مستونگ ئٹ تولوک آ مخلوق تون اوار خوانندہ غاتے ہم راجی سیاست آن مر توننگے، ولے سنگت آتا جہد ئنا وسیلہ ئٹ اینو مستونگ ہنکین ساڑی اف بلکن دا ہند ئنا سیاسی آ چاگڑد ءِ برجاء تخنگ کن اسہ کوشست ئس کننگ ءِ۔ انتئے کہ سنگتاک سرپد ءُ کہ اینو نا وخت ئنا خواست آک انت ءُ و راجی تحریک نا خواست آک دا وخت آ انت پارہ، ہمو وڑا تینا سیاسی کاریم تے مون آ دریسہ و تینا لائخی تے کاریم ئٹ ہتیسہ ءُ کہ مستونگ تون اوار بلوچستان نا ایلو ہند آتیٹی ہم اسہ جوان، گچین، سوگو و ترند ءُ سیاسی پروگرام و ایکٹوٹی ئس مرے۔
مجلس نا گڈیکو ٹِک بروکا گامگیج ئس، ہراٹی مستونگ ہنکین نا مسکوہی ہنکینی کابینہ ایسر کننگا و پوسکنا ہنکینی کابینہ گچین کننگا۔ پوسکن گچین مروکا کابینہ ٹی میر احمد بلوچ ہنکینی کارمستر، جواد بلوچ کمک کارمستر، نصیر بلوچ کارگشاد، عاطف بلوچ کمک کارگشاد، فائزہ بلوچ حوالکاری کارگشاد گچین کننگار۔ بنجائی سنگت پوسکن گچین مروکا ہنکینی کابینہ ءِ سوغند تس و مجلس ایسر کننگا۔
بلوچ اسٹوڈنٹس ایکشن کمیٹی
