بلوچ اسٹوڈنٹس ایکشن کمیٹی ڈیرہ غازی خان ھنکین ءِ لس دیوان اڈ دیگ بیثہ۔
شکیل بلوچ ھنکینی کارمستر ءُ مھمد خان بلوچ ھنکینی کارگشاد گشین کنگ بیثگ اَنت۔
بلوچ اسٹوڈنٹس ایکشن کمیٹی
بساک ڈیرہ غازیخان ھنکین ءِ ھنکینی لس دیوان گوستگیں ھنکینی کارمستر راز بلوچ ءِ پاگواجہی ءَ اڈ دیگ بیثہ۔ دیوان ءَ مہمانء ھاس بنجاہی مزن کارگشاد اظہر بلوچ سانڑی اَث۔ دیوان ءَ بنُجاہی سرکیولر، ھنکینی اھوال، تنقیدی نشست، تنظیمی امور، عالمی و علاقائی سیاسی صورتحالءِ ایجنڈہانی سرا دلجمی ءَ گپ ءُ تران ءَ پدا گُڈی ایجنڈا آوکیں گامگیج ءَ گوستگیں ھنکینی کابینہ ھلاس ءُ نوکیں ھنکینی کابینہ گشین کنگ بیثہ۔
دیوان ءَ بنجاہی مزن کارگشادءَگالوار کنان ءَ گوشتگ کہ پجار ءِ رکینگ انسان ءِ زندگ بوئگ ءِ بنک حق ءُ اولی لوٹ اِنت۔ ابید پجار ءَ انسان ء ِ چاگرد ءَ ہچ وڑیں بستار نیست اِنت۔بلوچ وتی راجی پجار ءِ رکینگءِ ھاترا گوستگیں ہفتاد سال ءَ چہ گرانیں ءُ مزنیں پندے بُرگ ءَ اِنت۔ بلوچستان پراہءُ شاھگان اِنت۔ زور آور ءَ وڑ وڑیں پندل سازی ءَ گو ں بلوچستان بہر ءُ بانگ کُتگ۔ کوہ سلیمان ءِ دمگ ڈیرہ غازیخان، راجن پور، تونسہ شریف ھمے بہرءُ بانگی پالیسیانی چیرءَ پنجاب ءَ دیگ بیثگ اَنت۔ سد سال ءَ چے برزیں کہ اے علاقہانی بلوچ مھلوق انتظامی ھوالہ پنجابءِ مزنیں شہر لاہور، ملتان ءَ گوں بندوک اَنت۔ ھمے سوب اِنت کہ لکھانی کساس نشتگیں بلوچانی روش پہ روش راجی پجار ، بلوچی زبان، بلوچ دود ء ُربیدگ گار بئیگءَاَنت۔ وانگ ءَ چہ بہ گر انسانی بنیادی حق ءَ چہ زبہر ایں بلوچ مھلوق وختےوتی توارءَ چست کنگ ءِ جہد کنت گُڑا ریاستی مشینری سرجمیں تاکتءَ گوں ھمے توار ءَ کاونٹر کنت۔ھمے ساھت ءَ کہ سرجمیں بلوچستان ریاستی ظلم ءُ زوراکی ءِ آماچ اِنت گُڑا کوہ سلیمان ءِ دمگ بارکھان، راڑہ شم، تونسہ شریف ءُ دیرو ءَ دئے ھمے زوراکی جتائیں ایں دروشم ءَ برجاہ اِنت۔
کوہ سلیمان ءِ کلیں دمگاں بلوچ راجی جُنز ءِ کاونٹر کنگ ءِ واستہ استان ءِ پندل سازی ءُ زورآواری گیش بیگءَ اَنت۔ بساک ءِ نیمگہ چہ اڈ داتگیں کتاب اسٹالانی سرا پنجاب پولیس ءِ اُرش ، ماتی زبانانی پروگرامءِ روش ءَ آرٹ کونسل ءِ بندش، تونسہ ءَ زھرشانی سرءَ پنجاب پولیس ءِ اکریک ڈاون ، پنجاب پولیسءُ بی ایم پی ءِ پلوا شہ تنظیمی سنگت و سیاسی کارکنانی ہراسمنٹ ، دھمکی دئیگ، تھانہ ءُ کیمپ ءَ لوٹائینگ اے پالیسی واضح کنگ ءَ اَنت کہ استان بلوچ نام ءِ سرا ہرچ وڑیں سیاسی عمل ءِ برجاہ دارگ ءَ سک ترس ایت۔ بلے تنظیمی سنگتانی کمٹمنٹ اِنت کہ انچوشیں نگیگیں جاورھال ءُ زورآوری ءِدیم ءَ اوشتاتگ اَنت ءُ سیاسی عمل ءِ برجاہ دارگءِ واستہ وتی وس ءُ واک ءَجہد کنگ ءَ اَنت۔
زورآوری ءِ پجی ءَ استان ءَ دیروءِ کلیں دمگاں سافٹ ایں دروشم ءَ بلوچ ورنایانی ذہنی مفلوج کنگ ءِ ہاترا باز کار ءُ پروگرام دیم ءَ آرتگ ، انچوشکہ پنجاب کلچر ڈے نام ءَ کوہ سلیمان ءِ اسکولاں پروگرام اڈ دئیگ، آرٹ کونسل ءَ ھمک دومی روش وت گڑیں سیاسی و ادبی مراگش اڈ دئیگ بوئگ ءَاَنت، غازی یونیورسٹی ءَ بلوچ کلچر ڈےءِ نام ءِ سرءَ بلوچ دود ءُ ربیدگانی مسخ کنگ، نوکریانی نام ءَ پنجاب پولیس، بی ایم پی ، لیویز ءَ سدانی کچ ءَ بلوچ ورنا بھرتی کنگ،انٹرنشپس، ورکشاپ وڑیں مختلف ایں پروگرام دیم ءَ آرگ ءَ اِنت کہ آسرجمیں بلوچ سیاسی جنز ءُ راجی پجارءِکاونٹر کنگءِ واستہ جوڈینگ بیثگ اَنت۔ استان ءِھمے سافٹ ءُ ہارڈ پالیسیانی سرپد بوئگ ءُ ایشانی دیم ءَ مھکمی ءَ اوشتگءِ واستہ کوہ سلیمان ءِ سیاسی گل ءُ کیڈرانی نیام ءَ حکمت عملی ءِ نہ بوئگ، ترس و بیم، جمود ءُ بے عملی ءِ گندگ پیداک اِنت کہ اے آوکیں وخت ءَ بلوچ راجی جُنز ءَ سک باز تاوان داث کنت۔
دیمتر ءَ سنگت ءَ تران کنان ءَ گوشتگ یک نیمگہ ما گوشیں ما مزنیں سیاسی جہدکاریں بلے دومی پلوا مئے کردارءُ عمل ہستیں بلوچ راجی لوٹ ءَگوں اینچو ھمگرنچ نہ اَنت کہ بیگی اَنت۔ بلوچ بوئگ، پدا جُنز ءُ سیاسی عمل ءِ بھر بیگ چو ارزان نہ اِنت کہ ماں بے عملی ءُ بازیں زہنی نادراہیانی آماچ بہ بیں، اے پیم ءَمئے راجی زمہ واری پیلو بیت نہ کن اَنت۔ راجی جُنز ءِ دیم برگ ءِ واستہ ھمک ورنا ءَ زاتی واہشت، غیر آشوبی روٹین، وخت ءِ قربانی دیگ لوٹیت وتارءَ ذاتی پسند ءُ ناپسند، انا ءُ کینگ ، ناپہتوئیں سیاسی اُمیت ءَ چہ کشگ ءُ سرجمی ءَ بلوچ راجی جنزءِ بہر کنگ و پابند کنگی اِنت۔ ما انچوشیں سیاسی عمل ءِبہر ایں کہ ایزا بازیں جیڑہ ءُ جنجال، ترس ، مایوسی، ریاستی زورآوری ھست اَنت گڑ ا پمیشکا اے وہد اِنت کہ ما یکمشتی ءُ منظمی ءِ سیاسی کاروان ءَ دیم ءَ بہ جنزین ایں۔
دیروےکُلیں بلوچ سیاسی گل ءُ سیاسی کیڈر انی واستہ جھیڑگءِ گالوارے کہ مرشی غیر آشوبی رویہ مئے ورنا یانی تہءَ ھنَد گرگ ء َاَنت، وھد زوالی، نہ وانگ، سیاسی گل ءَ چہ دیر بیگ، سیاسی گل ءُ راہشونانی سرءَ وت گڑیں باوست کنگ، سرفیس سیاست ء َایر جنگ، عیاشی، بیگانگی، سیاسی عمل ءَچہ سرجمی ءَ وتار سائیڈ کنگ، ذاتی نپ ءُ پائیدگانی رندءَوتی سیاسی کرد ءُ لیکہ ءَ بیھال کنگ پہ بلوچ جہد ءَ مزنیں تاوانے۔ جوانیں حکمت عملیءَ ریاستی ظلم ءُ زوراکیانی دیم ءَاوشتگ ءِ جاہ ءَ سیاست ءُ راجی جُنزءَ چہ گسِتا بیگ اجتماعی خودکشی ئے بیث۔ ریاستی ظلم ءُ زوراکیانی دیم ءَ اوشتگ ءُ پند ءِ دیم ءَ برگ ءِ واستہ گروانڈ ءِ سرءَ سیاسی عمل، اجتماعی حکمتِ عملی، یکجائی ءُ یکمشتی باز زروری اِنت ۔ بلوچ ورنا ءُ نودربر ھمے زرورت ءَ پوہ بہ بنت ءُ وتءَ گیش ءَ چہ گیش سیاسی عمل ءَ گوں بندوک کنگ ءِ سرا جہدبہ کن اَنت۔
دیوان ءِ کُلیں ایجنڈا مرکزی سرکیولر، ھنکینی گوستگیں اھوال، تنقیدی نشست، تنظیمی امور، ھندی و میان اُستمانی سیاسی صورتحال سرءَ دلجمی ءَ گپ ءُ تران ءَ پد گُڈی ایجنڈا ٓوکیں گامگیج ءَ گوستگیں ھنکینی کابینہ ھلاس کنگ بیثہ ءُ نوکیں کابینہ ءِ واستہ ھنکینی کارمستر شکیل بلوچ، ھنکینی کمک کارمستر زاھربلوچ، ھنکینی کارگشاد مھمد خان بلوچ، ھنکینی کمک کارگشاد میر ہزار بلوچ ءُ ھنکینی ھالرسانی کارگشاد عبداللہ بلوچ گشین کنگ بیثگ اَنت۔ دیوان ءِ گُڈ سرا نوکیں کابینہ حلف دئیگ ءَ پد دیوان آسر کنگ بیثہ۔
بنجاہی جارکش: بلوچ اسٹوڈنٹس ایکشن کمیٹی
