بلوچ اسٹوڈنٹس ایکشن کمیٹی خضدار ہنکین نا ہنکینی لس دیوان اڈ تننگا۔
رحمان بلوچ ہنکینی کارمستر و رمیز بلوچ ہنکینی کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی خضدار ہنکین نا ہنکینی لس دیوان ہنکینی کمک کارمستر خلیل بلوچ نا کماشی ٹی اڈ تننگا، دیوان نا مہمان خاص بنجاہی حوالکاری کارگشاد اُزیر بلوچ و اعزازی مہمان بنجاہی کمیٹی نا باسک جویریہ بلوچ ئسر۔ دیوان نا ٹِک آتیٹ بنجاہی سرکیولر، ہنکینی احوال، نغدکاری نشست، تنظیمی امور، ہندی و جہانی سیاسی حالیت و بروکا گامگیج اوار ئسر۔
دیوان نا اولیکو ٹک بنجاہی سرکیولر ئس ہرادے بنجاہی سنگت خوانسہ بنجاہی دیوان نا احوال و فیصلہ تے بنفے۔ ارٹمیکو ٹک ہنکینی احوال ئس ہرادے ہنکینی سنگت دیوان نا مونا تخا۔ اندن دیوان ئٹ سنگت آک ایلو ٹک آتیا است جمی ئٹ ہیت کریر۔
سنگت آک دیوان ئٹ ہیت کریسہ پاریر کہ خضدار ہنکین نا کاریمک بھاز جوان ءُ دا گڑاس وخت ءِ ہنکین دیمروی کننگ ءِ، ولے دائسکان نن ہر خوانندہ اسکان سر افن و اوفتے اسکان سر مننگ و اوفتے سیاسی چاہنداری تننگ و شعوری کسر اس نشان تننگ خوانندہ تنظیم آتا کاریم ءِ و ننے انداخس کاریم کروئی ءِ کہ تینا خوانندہ تے اسکان سر مرین و اوفتے پروگرام ایتن۔ ننے تینا سنگت آتیتون اوار لس خوانندہ تے دا سرپد کروئی ءِ کہ اینو بلوچ تحریک نا خواست آک بھاز ءُ و ہر خوانندہ ءِ دا تحریک ئٹ تینا بشخ ءِ شاغوئی ءِ۔ گڑا داڑکن ننے اسہ خوانندہ تنظیم ئسے نا دروشم ئٹ مونا بروئی ءِ و تینتون ہر بلوچ خوانندہ ءِ اوار کروئی ءِ تانکہ او تینا غیر سیاسی روٹین آن پیشتمر و تینا راجی ذمہ واری تے پہہ مریر و بلوچ جہد ئنا خواست آتے پورہ کیر۔
سنگت آک ہیت کریسہ پاریر کہ ساڑی آ وخت ئٹ بلوچ نا ویل و حالیت آک ننا مونا کتاب آنبار ملوک ءُ و ہر گڑا ننا مونا پاش ءِ اندا خاطران دا کاریم ننا ورنا تا زی آٹے کہ اوفک اندن تولرہ یا تینا راجی ذمہ واری تے سر ایترہ۔ دا وخت تولنگ، اُننگ و وخت زوالی نا اف بلکن ٹک خلنگ، پام کننگ، فکر و عمل کننگ نا وخت ءِ۔ ننے اسہ راج ئسے نا دروشم ئٹ ہر ہمو راجی ذمہ واری ءِ تینا کوپہ تیا ارفوئی ءِ ہرا ننا چاگڑد و راج اکن المی ءُ۔ دا دیہاڑ نا پنہ تیا نخش ءِ کہ جوان انگا کاریم و تحریک آتا مونا سختی و سوریک بسنو ولے ہرا راج آک زوراکی و سخت تیتون مون تسنو گڑا ہموفک سرسہب مسنو۔ اندا خاطران ننے اینو نا حالیت آتیان خُلوئی و بھیم ئنا گواچی مروئی اف بلکن خلوئی ءِ ہمو دے آن کہ ہرازدے ننا پجار ننے آن پُلنگہ، و فیصلہ کروکا وخت اندادے ہراڑان نن گدرینگ اُن، اگہ بلوچ ورناک تینا طاغت آن دو ارفپس و ہر حالیت تون سوگوی ئٹ مون ایتر گڑا دا نہ بیرہ ساڑی آ بلکن بروکا زنک اکن ہم حالیت آک جوان مرور و اوفتا مون آن بھاز آ ہڑاند آک ایسر مرور۔ اندا خاطران تینا سیاسی عمل ءِ شعوری و لائخی حوالہ غا گیشتر سوگو و طاغتور کروئی ءِ و مونا ہنوئی ءِ۔
دیوان نا گڈیکو ٹک بروکا گامگیج ئٹ ہراٹی تدوکا کابینہ ایسر کننگا و پوسکنا ہنکینی کابینہ گچین کننگا ہراٹی رحمان بلوچ ہنکینی کارمستر، بلال بلوچ ہنکینی کمک کارمستر، رمیز بلوچ ہنکینی کارگشاد، وسیم بلوچ ہنکینی کمک کارگشاد و مبارک بلوچ ہنکینی حوالکاری کارگشاد گچین کننگار۔ دیوان نا ایسر ئٹ بنجاہی سنگت پوسکن گچین مروکا کابینہ ءِ سوغند تس و اوکان پد دیوان ایسر کننگا۔
بنجاہی ترجمان: بلوچ اسٹوڈنٹس ایکشن کمیٹی
