بلوچ اسٹوڈنٹس ایکشن کمیٹی نصیرآباد ھنکین ءِ ھنکینی لس دیوان برجم دارگ بُوتگ
علی بلوچ ھنکینی کارمستر ءُ الطاف بلوچ ھنکینی کارگُشاد گچین کنگ بُوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نصیرآباد ھنکین ءِ ھنکینی لس دیوان ھنکین ءِ گوستگیں کارمستر عدنان بلوچ ءِ پاگواجہی ءَ برجم دارگ بُوتگ ،وان ءِ مہمان ء ھاس بُنجاہی کمیٹی ءِ باسک عامر بلوچ بُوتگ۔دیوان ءَ بُنجاہی سرکولر، ھنکین ءِ گوستگیں اھوال، نگدکاری، گل کاری، ھندی ءُ میان اُستمانی سیاسی جاورھال ءِ بُنگپانی سر ءَ باوست ءَ پد گُڈی بُنگپ آؤکیں گامگیج ءَ ھنکین ءِ گوستگیں کابینہ ھلاس کنگ بُوتگ ءُ نوکیں ھنکینی کابینہ ءِ ھاتر ءَ سنگت گچین کنگ بُوتگ انت۔
دیوان ءَ بُنجاہی سنگت ءَ وتی ہیال درشان کنان ءَ گُشت بلوچ نودربر سیاست ءَ گوں بندوکیں باسکے ءِ بِنداتی کار وانگ ءُ زانگ اِنت، ھما وانگ کہ آ بلوچ راج ءِ دیمروی ءِ مانزمان اِنت، زانت ھما شئے اِنت کہ تئی ھیالاں پراہ ءُ شاھِگان کنتءُ یک نودربرے ءَ جیڑگ پرمائیت ءُ مُدام جُھد کنگ ءِ سکین ءَ بکشائیت۔ مروچی دُگنیا ءِ منتگیں ملک نوکیں منگ نامگ ءُ جتائیں شوربندیانی بُنیات ءَ وتی برجاہ اِیں ھاکِمی ءَ مُھکم دارگ ءِ جُھد ءَ اَنت، سیاسی نودربرے ءِ بستار ءَ بساک ءِ ھمُک باسک بلوچ ڈیھ ءِ استیں جاوراں ھوار دُگنیا ءِ مٹ بُوکیں جاوراں سرپد بہ بیت ءُ وھد ءِ لوٹ ھم ھمیش اِنت کہ بلوچ سیاسی نودربرے ھما وانگ ءُ زانگ ءَ چہ وتءَ ھمگرنچ بہ کنت کہ آ بلوچ ءِ استیں وھد ءِ لوٹ ءُ دُگنیا ءِ تُرندیں جاوراں سرپد بُوت بہ کنت ءُ ھمے زانت ءِ وسیلہ ءَ نوک نوکیں ھیالاں گوں سیاسی عمل ءَ دیم ءَ بہ جُنزین ایت ۔
بُنجاہی سنگت ءَ دیمتر ءَوتی ہیال درشان کنان ءَ گُشت کہ نصیرآباد بلوچ ڈیھ ءِ ھما دمگاں ھوار اِنت کہ آ بلوچ راج ءِ معیشت ءِ وسیلہ زانگ بنت بلے مروچی استان ءِ زوراکیاں مئے راج ھما جاہ ءَ سر کُتگ کہ آ وتی مڈیّانی وارثی ءَ ھم کُت نہ کنت۔اے دمگ ءِ مہلوک ھمے جیڑہانی تہ ءَ انچیں ڈؤلے ءَ مانگیشینگ بُوتگ کہ آ بلوچ ءُ بلوچ جُنز ءَ چہ وتءَ گِستا دارگ ءَ اِنت اے عمل استان ءِ ھما شوربندیاں گوں ھوار اَنت کہ آ بلوچ چُکچینی ءِ وسیلہ زانگ بنت۔نصیرآباد ءِ نودربراں یوتھ فیسٹیول ءُ اِسپورٹس ءِ نام ءَ یک انچیں کرپٹیں ذہنیت ءِ دیگ بُوگ ءَ اِنت دانکہ آ بلوچ چاگردءِھکیکیں جیڑہاں چہ بے سما بہ بنت ءُ اِد ءِ ورناہانی ذہن سازی ءِ ھاتر ءَ وانگجاہاں ھوار جتائیں ادارہانی تہ ءَ استان ءِ سروکی ءَ مراگش برجم دارگ بیت دانکہ بلوچ نودربراں سیاست، سیاسی زانت ءُ تخلیقی زانت ءَ چہ گِستا دارگ بہ بیت۔
دیوان ءِ گُڈسر ءَ بُنجاہی سنگت ءَ تران کنان ءَ گُشت کہ نصیرآباد ءِ دمگاں گل جُھد کنت کہ نودربرانی ھیلکاری ءِ ھاتر ءَ باوستی چاگردے ودی بہ کنت ءُ استان ءِ ھر ھما پالیسیانی ھلاپ ءَ شوربندی جوڑ بہ کنت کہ آ بلوچ نودربراں یک جوانیں چاگردے ءِ ھاتر ءَ کُمک بہ کنت۔بلوچ لیٹریسی کمپیئن ءِ وسیلہ ءَ نودربرانی وانگی جیڑہانی گیشوار کنگ ءَ گل ءِ نیمگ ءَ جُھد کنگ بیت۔
گُڈی بُنگپ آؤکیں گامگیج ءَ ھنکین ءِ گوستگیں کابینہ ھلاس کنگ بُوتگ ءُ پہ نوکیں ھنکینی کابینہ ءِ ھاتر ءَ علی بلوچ کارمستر، وسیم بلوچ کُمک کارمستر، الطاف بلوچ کارگُشاد، نصیب بلوچ کُمک کارگُشاد ءُ نواز بلوچ ھالرسانی کارگُشاد گچین کنگ بُوتگ اَنت۔
بُنجاہی سنگت ءَ نوک گچین بُوتگیں سنگت سوگند دات اَنت ءُ دیوان ھلاس کنگ بُوتگ۔
بنجاہی جارکش: بلوچ اسٹوڈنٹس ایکشن کمیٹی
