بلوچ اسٹوڈنٹس ایکشن کمیٹی ءِ پنچمی بنجاہی کمیٹی دیوان کماش شبیر بلوچ ءِ سروکی ءَ برجم دارگ بیتگ۔
بلوچ ورنا وتی ہمک ساھتاں پہ راجی نپاں ہرچ کنگ ءِ جرت بہ دار اَنتءُ وتی عملءِ تہ ءَ مھنت کنانءَ ہمک ڈولیں کُربانی دیگ ءَ جاڑیگ بہ بنت۔
کماش شبیر بلوچ
بلوچ اسٹوڈنٹس ایکشن کمیٹی ءِ پنچمی بنجاہی کمیٹی دیوان کماش شبیر بلوچ ءِ سروکی ءَ سوبمندی ءَ گوں برجم دارگ بیتگ۔ دیوان ءِ بن گپ گل ءِگوستگیں اہوال، نگدکاری، گَلکاری، ہندی ءُ میاں استمانی سیاسی جاورہال ءُ آؤکیں گامگیج بیتگ اَنت۔ دیوان ءِ سرجمیں بُنگپانی سر ءَ دلجمی ءَ گپ ءُ تران ءَ پد آؤکیں گامگیج ءِ بھر ءَ پہ آؤکیں کارانی ہاتر ءَ جتائیں نوکیں فیصلہ زیرگ بیتگ اَنت۔
دیوان ءِ بندات چہ بنجاہی کماش ءِ رزا ءَ کنگ بوت، دیوانءِ اولی بُن گپ گوستگیں اہوال اَت کہ آئی ءِ تہ ءَ بنجاہی مزن کارگشاد ءَ گل ءِ گوستگیں اہوال دیوان ءِ دیم ءَ پیش کت اَنت کہ آہانی تہ ءَ گل ءِ کسان ءُ مزنیں مراگش چوشکہ صباء لٹریری فیسٹیول، زانشتی مراگش ءُ ھنکینی مراگش، ھنکینانی سیاسی چِست ءُ ایراں ہوار ایدگہ گل ءِ انتظامی کار ہوار اِت اَنت، اشاں ہوار گل ءِ جتائیں کمیٹی لبزانک، رسانکدر، زر ءُ مال، بلوچستان کتاب کاروانءُ بلوچ لٹریسی کیمپئین ءِ اہوال دیوا ن ءِ دیم ءَ یک یک ءَ پیش کنگ ءُ وانگ بیت اَنت۔
دیوان ءِ دیمی بن گپ نگدکاری اَت،سنگتاں ادارہ ءِ کمی ءُ نزوریانی سر ءَ یک یک ءَ نگد کتءُآہانی شر کنگ ءَ پہ نوکیں شور ءُ سلاہ دات۔سنگتاں نگد ءِ سرءَتران کنان ءَ گوشت کہ سیاسی جہد یک سائنسی عملےءُ ہمک سائنسی عمل گوں اگلءُ منانک ءَ بیت، ہمےاگل اِنت کہ مردماں جیڑگ پرمائیت، ہمے جیڑگ اَنت کہ انسان ءَ گہتری ءُ شرتری ءِ نیمگ ءَ بر اَنت۔ ہمےوڈ سیاسی عمل ءِتہ ءَ جیڑگ ءَ چہ سیاسی جہدکاروتی تہ ءِ ءُ کش ءُ گور ءِ نزوری ءُ ردیانی سر ءَ نگد کُت کنت ءُ پہ وتی ادارہ ءِ شرتریءَنوکیں شوربندی ٹہینت کنت۔ سائنسی کانود ءِ رد ءَ ہمک اوشتاتگیں شئےجم ایت یا شِنزبند ایت،ہمے پیم سیاست ءِ تہ ءَ ہمک مٹ نہ بیوک ءُ اوشتاتگیں عمل پولنگ چِنت، ہمے پولنگانی سوب ءَ ادارہاں تاوان رس ایت۔ اشیءِ اگلی توجیل نگد کنگ اِنت، نگد کنگ ءُ نزوریں عمل ءَشرتر ءُ مہکم کنگ نہ تہنا آشوبی عملے بلکیں سیاسی زلورتے ہم، پمیشکا ہمک سیاسی سنگت پہ سیاسی ءُ راجی نپانی پہریزگ ءُ سیاسی جہد ءِ تہ ءَ مدام آشوب آرگءِ ہاتر ءَ انچیں نگد بہ کن اَنت کہ آہاں چہ سیاسی جہدکار ءُ گلانی تہ ءِ ردیں عمل ءُ روشت گیچن بہ بنت ءُ سیاسی جُنزچہ رد آشوبی ہمک عملاں پاک ءُ پلگاربہ بنت۔
دیوانءِ دیمتری بھر گل کاری اَت کہ آئی ءِ تہ ءَ گل ءِ سرجمیں ہنکینانی سر ءَ ہیرتی ءَگوں چمشانک دیگ بوت ءُ آیانی کُلیں چِست ءُ ایر ءُ جاورانی سر ءَ دلجمی ءَ گپ ءُ تران کنگ بوت۔ چہ شی ءَ پد کُلیں بنجاہی سنگتاں وتی وتی پیشنہاددیوان ءِ دیم ءَ ونت اَنت ءُ دیمی کار ءُ عملانی ہاتر ءَ نوکیں شور ءُ سلاہ دات۔
گل کاری ءِ سر ءَ سنگتاں تران کنان ءَ گوشت کہ ادارہءَ اے سالانی میان ءَ وت ءَ بلوچستان ءِ ہمک میتگ، ھلک ءُکوچگ، شہر ءُ ادارہاں سر کنگ ءِ جہد کتگ ءُ اے جہد ءَ مزنیں کچے ءَ سوبمندی رستگ بلے اے پہ یک آشوبی ادارہ ئے ءَ انگت کم اِنت پرچاکہ سیاسی عمل بیھ سرجم نہ بیت بلکیں آ ہمک دور ءُ باریگ ءَ گیش مہکمتر ءُ شرتربیان کنت ءُ دیم ءَ روت۔ مرچی ادارہ ءَ ہمے یکشلیں جہد ءِ سائنسی فلسفہ زُرتگ ءُ نہ تہنا دیم ءَ روان اِنت بلکیں پراہ ءُ شاہگان بیان ءَ تُرند ءُ تیزی ءَ گوں وتی سپر ءَ برجاہ داران ءَ بلوچ ورنایانی سیاسی ءُ پگری ہیلکاری ءَ کنگ ءَ اِنت۔ اے میان ءَ ادارہ ءِ رہشوناں پہم اِتگ کہ مدام روایتی عمل ءُ کارانی کنگ وت یک سیاسی مرگے، پرچاکہ آشوب ءِ جِند مٹی ءُ بدلی ءِ نام اِنت ءُ اگاں ادارہ وہد ءُ دور ءُ باریگ ءِ ہمراہی ءَ وت ءَ مٹ مہ کن اَنت گڑا آ اے تیزگامیں دنیا ءِ تہ ءَ دنزءُ مُجاں گار بنت کہ اےمزنیں راجی تاوانے۔ پمیشکا ادارہ ءَ بلوچ جُنز ءِ لوٹ ءُ زلورتانی ھساب ءَجتاجتائیں سیاسی کار ءُ پروگرامانی سر ءَ کار کنان ءَ پہ بلوچ ورنایاں نوکیں گہتریں سیاسی ءُ زانشتی چاگردے ودی کنگ ءِ جہد کتگ دانکہ بلوچ ورنا نہ تہنا سیاسی ہوالہ ءَ زانتکار بہ بنت بلکیں ہمک زانشتی ءُ سائنسی پِڑاں بلد ءُ دانا بہ بنت۔ کتاب وانگءِھُب ءُ واہگ ودی کنگ ءِ جہدءَ چہ بلوچ چاگردءَ یک پُرامُیتیں بامسارے گندگ بیت کہ آؤکیں بلوچ ورنا کتاب ءُ زانشتءَچہ نہ تہنا وتی تہ ءَمٹی ءُ گہتری آورت کن اَنت بلکیں بلوچ چاگرد ءَ نوک نوکیں آشوبی رواجانی نیمگ ءَ برگ ءَ کمک کت کن اَنت۔اے درگت ءَ بلوچ ورنا وتی ہمک ساھتاں پہ راجی نپاں ہرچ کنگ ءِ جرت بہ دار اَنتءُ وتی عملءِ تہ ءَ مھنت کنانءَ ہمک ڈولیں کُربانی دیگ ءَ جاڑیگ بہ بنت۔
سنگتاں میاں استمانی سیاسی جاورہال ءِ بن گپ ءَ تران کنان ءَ گوشت کہ میاں استمانی سیاست بیھ یک وڈ نہ اِنت بلکیں مُدام مٹ بیان ءَ جُنز ایت پرچاکہ ہمک استان ءِ نپ مٹ بنت ءُ ہمک دور ءُ باریگ ءَ نوک نوکیں ٹولی ءُ لوبی جوڈ بنت ءُ وتی نپاں پہریز اَنت اشی ءَ چہ دنیا ءِ سیاست ءَ ہم سانے کپت کنت۔ باز جاہ ءَ بگندے منگ بہ بیت کہ دنیا ملٹی پولر جوڈ بیتگ، بگندے نوک نوکیں استان دیمروئی کنان ءَ تاگت جوڈ بیگ ءَ اَنت بلے اے ہم راستی یے کہ دنیا ءِ سیاست داں انگت سیاسی لیکہی بنیات ءَ گیشتر یونیپولر اِنت، اشی ءِ درور ہستیں وہد ءَ بیتگیں جنگی وئیل اَنت۔ ہمک دور ءَ کہ نوک نوکیں جنگ ءُ میڑ گندگ بنت، اے یکیں شپ ءَ ودی بیتگیں جیڑہ نہ اَنت بلکیں اشانی سر گوست ءِ سیاسی ءُ پگری لیکہی دیگریاں گوں بندوک اَنت کہ توجیل نہ بیتگیں جیڑہ اَنت ءُ ہمک دور ءُ باریگ ءَ سر چِست کنان اَنت۔
دیوان ءِ سرجمیں بنگپانی سرءَ دلجمی ءَ گپ ءُ تران ءَ پدآوکیں گامگیج ءِ تہ ءَ بنجاہی کمیٹی ءَ پہ آؤکیں کارانی ہاتر ءَ نوک نوکیں فیصلہ زُرت کہ آہانی تہ ءَدمگی اسکول ءِ اڈ دیگ، بلوچ نودربر سیاست ءِ سر ءَ سیمنار ءَ ہوار رسانکدری، لبزانکی،بلوچ لٹریسی کیمپین ءُ بلوچستان کتاب کاروان ءِکمیٹیانی فیصلہ ہوار اِت اَنت۔
بنجاہی کمیٹی دیوان ءِ سرجمیں بنگپانی سر ءَ دلجمی ءَ گپ ءُ تران ءُ آؤکیں گامگیج ءَ نوکیں فیصلہانی زیرگ ءَ پدچہ بنجاہی کماش ءِ رزا ءَ دیوان آسر کنگ بیتگ۔
بنجاہی جارکش: بلوچ اسٹوڈنٹس ایکشن کمیٹی
