بلوچ اسٹوڈنٹس ایکشن کمیٹی اوتھل ھنکین ءِ ھنکینی لس دیوان برجم دارگ بوت۔
بلوچ خان ھنکینی کارمستر ءُ شفقت بلوچ ھنکینی کارگُشاد گچین کنگ بوت اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی اوتھل ھنکین ءِ ھنکینی لس دیوان ھنکین ءِ کارمستر جنید بلوچ ءِ سروکی ءَ برجم دارگ بوت، دیوان ءِ مہمان بنجاہی کمک کارگُشاد تنویر بلوچ بوتگ۔
دیوان ءِ تہ ءَ بنجاہی سرکیولر، ھنکینی اھوال، نگدی نشست، گلکاری، ھندی ءُ میانی استمانی سیاسی جاورھال ءِ بنگپانی سر ءَ گپ ءُ باوست ءَ پد آؤکیں گامگیج ءِ تہ ءَ گوستگیں کابینہ ھلاس کنگ بوت ءُ نوکیں کابینہ ءِ ھاتر ءَ سنگت گیچین کنگ بوت انت۔
دیوان ءِ بندات ءَ بُنجاہی سنگت ءَ بُنجاہی سرکیولر دیوان ءِ دیم ءَ ونت ءُ باوست کُت کہ آئی تہ ءَ لس مجلس ءِ اھوال ءُ اولی سینٹرل کمیٹی ءِ اھوال ھوار اَت اَنت۔ دیوان ءِ دیمی بُنگپ ھنکینی رپورٹ ءِ تہ ءَ ھنکین ءِ گوستگیں اھوال دیوان ءِ دیم ءَ ایر کنگ بوت اَنت ءُ آھانی سرا باوست کنگ بوت۔ نگد کاری ءِ تہ ءَ سنگتاں ھنکین ءِ کار ءُ پروگرامانی سر ءَ دلجمی ءَ نگد کُت ءُ ھنکین ءِ تہ ءِ کسان داں مزنیں نزوری دیوان ءِ دیم ءَ باوست کُت اَنت ءُ آھانی پجار کنگ ءَ پد آھاں گھتر کنگ ءِ ھاتر ءَ شور ءُ سلاہ دیوان ءِ دیم ءَ ایر کُت اَنت۔ دیمترا گلکاری ءِ تہ ءَ باسکاں وتی نبشتگیں ڈراپٹ دیوان ءِ دیم ءَ ونت اَنت کہ آھانی تہ ءَ ادارہ ءِ کار ءُ پروگراماں شوک کنگ ءُ دیم ءَ برگ ءِ ھاتر ءَ شور ءُ سلاہ ھوار اَت اَنت۔
دیوان ءَ بُنجاہی سنگت ءَ راجمان ءِ تہ ءَ نودربرانی کِرد ءِ سرا تران کنان ءَ گُشت، مرچی ما دنیا ءِ ہمک استان یا راجاں گندیں کہ دیمروئی ءِ راہ ءَ گوں گشادی ءَ سپر کنان اَنت ءُ علم ءُ سائنس ءِ پِڑ ءَ نوک نوکیں شئے دیم ءَ آرگ اَنت گڑا آھانی تہ ءَ کُلاں مستریں کِرد ھما راج ءِ ورناہانی اِنت۔ اگاں ما چوش بہ گُشیں ہم رد نہ بیت کہ ورناہاں گوں راجانی باندات بندوک اَنت۔ ھمے پیم ءَ ما وھدے کہ بلوچ چاگرد ءَ چاریں گڑا مزنیں کساسے ءَ ورناہ چہ وانگ ءُ زانشت ءَ گستہ اَنت۔ ھما ورناہ کہ مئے باندات اَنت، راج ءِ رُژنائیں باندات گوں آھاں بندوک اِنت بلے بد بھتی ءَ آ وت مرچی بے وانگی ءُ دگہ بازیں چاگردی سلکاریانی آماچ اَنت۔ چوشکہ بساک ءِ ہمے اوگام اِنت کہ ما بلوچ ورناہاں یکیں پتر ءِ سرا مچ کنیں ءُ آھانی تربیت ءَ کنیں۔ اگاں نگدی نگاہ ءَ چارگ بہ بیت گُڈا ما دنیگہ بس ورناہانی یک بھرے گوں وت ھوار کنگ ءَ سوبمند بیتگیں ءُ دنیگہ مزنیں کچے ءَ مئے راج ءِ ورناہ ما گوں وت ءَ ھوار کُت نہ کُتگ اَنت۔
اگاں ما یک دیمروئی کتگیں ءُ وانندھیں چاگردی ءِ واب ءَ گندگ ءَ ایں گڑا مئے سرا کُلاں مستریں ڈبہ امیش اِنت کہ ما وتی راج ءِ ورناہاں وانگ ءُ زانشت ءِ نیمگ ءَ بیاریں ءُ آھاں امینچو بودناک بہ کنیں دانکہ باندا روچ آ چاگردی جوڈشت ءِ عمل ءَ دیم ءَ بُرت بہ کن اَنت۔ بساک ورناہانی گَلے ءُ ارکس پہ وتی کچ ءُ کساس ءَ بساک ءِ تہ ءَ وتی بھرشت ءَ ھوار گیجگ اِنت۔ مرچی کہ اے پتر ءِ سر ءَ ما نندوکیں باندا ادا دگہ سنگت کاینت ءُ اے کاروان ءَ دیم ءَ بر اَنت، بلے امنچو کہ مئے دست ءَ بیت ما پہ بلوچ ورناہاں کنیں۔ بُنجاہی سنگت ءَ دیمترا تران کنان ءَ گُشت، چوشکہ ھمے زوتاں اوتھل ءِ تہ ءَ سک باز معاملات ودی بیتگ اَنت کہ امیشانی سبب ءَ بازیں ھدے ءَ گَل ءِ باسک سانمند بیتگ اَنت۔ آوکیں سنگت ھمے جُہد بہ کن اَنت دوبر پیشی داب ءَ وتی کار ءُ پروگراماں برجاہ بہ دار اَنت ءُ ھچ پیمیں جاورانی تہ ءَ ادارہ ءِ عملاں اوشتگ ءَ میل اَنت۔
سنگت ءَ بی ایل سی ءُ ہنکینی ریجنل کمیٹی ءِ سر ءَ تران کنان ءَ گُشت چوشکہ شما بلوچستان ءِ یک پر ارزشت داریں ھندے ءَ سیاست کنگ اِت ءُ پیش ءَ گندگ ءَ اتکگ کہ سنگتاں ادارہ ءِ کار ءُ پروگرام تہنا شاہ دربرجاہ ءِ تہ ءَ محدود کُتگ اَنت۔ دیمی سنگت جُھد بہ کن اَنت کہ بی ایل سی ءُ ہنکینی ریجنل کمیٹی ءِ کُمک ءَ سرجمیں ریجن ءَ گَل ءِ پروگراماں سر بہ کن اَنت ءُ تنظیم کاری ءَ گیش بہ ودین اَنت۔ اے ایجنڈا ءِ گڈسر ءَ سنگت ءَ تران کنان ءَ گُشت، چوشکہ ما یک تیزیں ءُ گشادیں وھدے ءَ سیاست کنگیں، گڑا مارا ھم لوٹ ایت کہ ما ھمے تیزگامیں وھد ءِ تہ ءَ ادارہ ءِ پروگراماں نوک بہ کنیں ءُ دیم ءَ بیاریں دانکہ ما استیں دنیا ءِ ھساب ءَ جُنزت بہ کنیں۔
دیوان ءِ کُلیں بنگپانی سر ءَ دلجمی ءَ تران کنان ءَ پد آؤکیں گامگیج ءِ تہ ءَ گوستگیں کابینہ ھلاس کنگ بوت ءُ نوکیں ہنکینی کابینہ گچین کنگ بوت کہ آئی ءِ تہ ءَ کارمستر بلوچ خان، کمک کارمستر طاھر بلوچ، کارگشاد شفقت بلوچ، کمک کار گشاد بھروز بلوچ ءُ ھالرسانی کارگشاد عبید بلوچ گچین کنگ بوت اَنت۔ بنجاہی سنگت ءَ نوک گچین بوتگیں سنگتاں ءَ سوگند دات ءُ دیوان ءِ آسری ءِ جار پرینگ بوت۔
بنجائی جارکش: بلوچ اسٹوڈنٹس ایکشن کمیٹی
