بلوچ اسٹوڈنٹس ایکشن کمیٹی حیدرآباد ہنکین نا ہنکینی لس دیوان اڈ تننگا۔
زبیر بلوچ ہنکینی کارمستر و اُزیر بلوچ ہنکینی کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی حیدرآباد ہنکین نا ہنکینی لس دیوان ہنکینی کارمستر زبیر بلوچ نا کماشی ٹی اڈ تننگا، دیوان نا مہمان بنجاہی کمیٹی نا باسک رحمان بلوچ و سہیل بلوچ اسر۔ ہنکینی لس دیوان ئٹ جتاء جتا غا ٹک آک اوار ئسر ، ہرافتیٹی بنجاہی سرکولر، ہنکینی حوال، نغد کاری، گل کاری، ہندی و جہانی سیاست حالیت و بروکا گامگیج اوار ئسر۔
دیوان نا اولیکو ٹِک بنجاہی سرکیولر ئس۔ دیوان ئٹ ساڑی بنجاہی سنگت بنجاہی سرکولر ءِ اُست جمی ئٹ دیوان نا مون آ تخا کہ ہراٹی گَل ئنا بروکا اِرا سال ئنا ارفوکا فیصلہ غاک اسٹ اسٹ آ خواننگار و دیوان ءِ رسیفنگار۔ ارٹمیکو ٹِک ہنکینی حوال ئس ہرادے ہنکینی سنگت دیوان نا مون آ تخا، ہراٹی ہنکینی پروگرام، تربیتی سرکل، لٹریچر و ایلو ہنکینی حوال آک اوار ئسر۔
مسٹمیکو ٹِک نغد کاری ئس ہراٹی سنگتاک اُست جمی ئٹ ہیت و گپ کریر۔ سنگتاک ہیت کریسہ پاریر کہ نغد اسہ اندنو عمل ئسے نا پن ءِ ہرادے نن کاریم ئٹ ہتیسہ تینا ہر وڑ ئنا ردی و نزوری تے کشنگ نا وسیلہ کننگ کینہ۔ انتئے کہ ردی تا مننگ فطری گڑاسے گُڑا دا بھاز وخت آ تینٹ چائنگپک کہ نن ہراڑے امر ءُ ردی کننگ اُن، ولے اگہ نن اندا نغدکاری نا عمل ئٹ گدرینگسہ کینہ گڑا نن تینا ہر نزوری ءِ چائنگ تون اورا اوفتے ہلنگ و توننگ کینہ۔ دا تنظیم آتیٹی کل آن سوگوْ ئنگا عمل ءِ کہ نی تینا ردی تے تینٹ ہریسہ یاکہ نیتون اوار پین سنگت ئس دافتا نشاندہی کیک۔ تانکہ دافک ہلنگ و ایسر کننگ مریر۔ سنگت آک گل ئنا و سنگت آتا گلکاری، لٹریچر و ایلو کاریم تا زی آ اُست جمی ئٹ نغد کریر و دا سرحال ایسر کننگا۔
مونی سنگتاک گل کاری نا زی آ تینا نوشتہ کروک آ ڈرفٹ آتے خوانیسہ ہیت و گپ کریر۔ سنگتاک ہنکین نا زی آ تینا جتاء آ مشورہ و پروگرام آتا ہئت و گپ کریر ہراٹی ہنکین کن دا ہند و اداراہ غاتیٹی کاریم کننگ نا وڑ و ڈول تا زی آ ڈسکشن مس۔ سنگت آک ہیت کریسہ پاریر کہ گل کاری ادارہ نا تہٹی بھاز ارزشت تخوکو بشخ ئسے ہراٹی نن مون آ جتا آ پروگرام تیتون کاریم کننگ کینہ۔
دیوان ئٹ ساڈی بنجائی سنگت آک تران کریسہ پاریر کہ اینو دا مچی ءِ خنیسہ امیت آک گیش مننگ ءُ کہ داڑے دا اداراہ و ہنڈ آتیٹی گل ئنا سنگتاک مہکمی ئٹ کاریم کریسہ اینو گل ءِ دا جاغہ آ سر کننگ آ سرسہب مسونو۔ دا گل و اونا پروگرام آتیتون مخلص مننگ نا پن ءِ کہ سنگتاک اسہ وڑا سلوک و مون آ گام خلیسہ ءُ۔ سنگتاک اسہ گڑاس تینا ملی ٹی تخیسہ کاریم کیر کہ اوفک خوانندہ آتا ترتبیتی اداراہ نا باسک و زمہ وار ءُ ننا دُو آن و ننا کاریم تیان دنو ہچو عمل ئس مف کہ اونا سوب آن ننا اداراہ نا زمہ واریک ایسر مننگ کپس۔ حیدرآباد اسہ بلوچ آباتی والا ہند ئس چائنگک گڑا ننا ہر ہمو پروگرام دا ہند ئنا خوانندہ تیتون اوار مخلوک نا خواست و بکار آتا بنیات آ مریر۔ تانکہ نن تینا تربیتی عمل ءِ اسہ سوگوْ وڑ ئسے ئٹ مون آ دننگ کین۔
سنگت آتا اُست جمی ئٹ کل ٹِک آتا زی آ ہیت و گپ آن پد گڈیکو ٹِک بروکا گامگیج ئس ہراٹی ہنکینی کابینہ ایسر کننگا و پوسکنا ہنکینی کابینہ گچین کننگا ہراٹی کارمستر زبیر بلوچ، کمک کارمستر جہانزیب بلوچ، کارگشاد اُزیر بلوچ، کمک کارگشاد اسحاق بلوچ و حوالکار آصف بلوچ گچین کننگار۔
بنجائی سنگت پوسکن گچین مروکا ہنکینی کابینہ ءِ سوغند تس و دیوان انداکان ایسر کننگا۔
بنجائی ترجمان: بلوچ اسٹوڈنٹس ایکشن کمیٹی
