بلوچ اسٹوڈنٹس ایکشن کمیٹی قلات ہنکین نا ہنکینی لس دیوان اڈ تننگا۔
سمیع بلوچ ہنکینی کارمستر و ماریہ بلوچ کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی قلات ہنکین نا ہنکینی لس دیوان ہنکینی کارمستر سمیع بلوچ نا کماشی ٹی اڈ تننگا۔ دیوان نا مہمان بنجائی کمک کماش علی بلوچ و بنجائی کمیٹی نا باسک حانی بلوچ ئسر۔
دیوان ئٹ بنجائی سرکیولر، ہنکینی احوال، نغد کاری، گل کاری، ہندی و جہانی سیاسی حالیت نا ٹِک آتیا است جمی ئٹ ہیت و گپ کننگ آن پد بروکا گامگیج ئٹ مسکوہی کابینہ ایسر کننگا و پوسکنا ہنکینی کابینہ کن سنگتاک گچین کننگار۔
اولیکو ٹِک بنجائی سرکیولر ئس، بنجائی سنگت دیوان ئٹ بنجائی سرکیولر ءِ خوانا ہراٹی تیوہ غا بنجائی لس مجلس نا احوال ئتون اوار بنجائی فیسلہ آتے ہم دیوان نا مون آ تخا۔ سرکیولر نا زی آ گپ آن پد دا سرحال بند کننگا و مونی ہنکنی احوال نا ٹِک ملنگا۔ ارٹمیکو ٹِک ہنکینی احوال ئس ہنکین نا احوال خواننگا ہراٹی ہنکینی ہیلکاری دیوان، لٹریچر، گل کاری و ایلو کاریمک اوار ئسر، سنگت آتا سوج و ورندی آن پد دا ٹِک بند کننگا۔ مسٹمیکو ٹِک نغدکاری ئس نغدی کاری نا بشخ ئٹ باسک آک ہنکینی کاریم تیا است جمی ئٹ تینا نغد آتے تخار۔ سنگتاک ہیت کریسہ پاریر کہ نغد مدام اسہ کامل ءُ عمل ئسے ہرا ہر ہمو عمل نا کمی و نسخان آتے ہمو وخت آ مون آ ہتیسہ اونا جوانی نا سلاہ ءِ ہیتک، ہرافک کہ کاریم تے نسخان تننگ و توننگ نا وسیلہ مریر۔ ہراتم کہ اسہ بندغ ئس تینے عملی آ کاریم تیان مر تورے وعمل نا بشخ متو گڑا اونا خڑک ئٹ مروکا ہر مٹی و بدلی بیرہ عمل ئس چائنگک و او عمل ادارہ ئٹ مرے، چاگڑد ئٹ مرے یا بندغ نا تینا جند ئنا تہٹی مرے اگہ دافتیا نغدی جاچ متو گڑا ہندا عمل نا جوانی وگندئی، سواد و نسخان آن بےسماء مریک۔ ننا خڑک ئٹ کیہی عمل یا کاریم آک مننگ ءُ، اسٹی نا درشم آن ہلیس مچی نا درشم ئٹ مننگ ئسکان، ہرافتامسخت ءِ کہ بلوچ چاگڑد ءِ مٹ کننگ ءِ۔ داڑے اِرا تپہ نا عمل برجا ءِ اسٹ بلوچ چاگڑد نا جوانی، علمی و شعوری آ چاگڑد ءِ گندئی تیان کشنگ کن کوشست کننگ ءِ، و ایلو نیمہ غا اِرٹمیکو ہمو تپہ ءِ ہرانامسخت بلوچ چاگڑد نا سوگوࣿ ئنگا درشم ءِ مٹ کریسہ داٹی ہر چاگڑدی گندئی ءِ جاغہ ہیتے۔ اگہ نن تینے نغدکاری نا عمل آن بےسماء کین گڑا دانا معنہ دا مرو کہ نن تینے چاگڑد آن کشکسہ اُن و نن ہم ہر ہمو نسخان آتا گواچی مریسہ انن ہرافک ننا چاہنداری عمل ءِ توریسہ اسہ بےسماء ءُ چاگڑد ئسے ٹی مٹ کننگ نا سوب مننگ ءُ۔ ننے دا کل عمل آتا حوالہ ئٹ بھاز چاہندار مریسہ دافتا توننگ کن کوشست کروئی ءِ کہ ننا چاگڑد اسہ چاہندار ءُ چاگڑد ئس مرے۔
مونی گل کاری نا ٹِک ئنا زی آ دیوان نا سنگتاک تینا نوشتہ کروکا ڈرافٹ آتے خوانار و بروکا ہنکینی کاریم تا جوانی کن تے سلاہ و مشورہ تے تخار۔ دیوان ئٹ ساڑی بنجائی سنگتاک ہیت کریسہ پاریر کہ ہراتم نن نغد کاری و نغد ئنا مسخت آتیا ہیت کینہ گڑا نن سرپند مرینہ کہ نغدی ءُ چاگڑد ئس یا نغدی شعور ءِ چاگڑد نا بشخ جوڈ کننگ کن ادارہ اسہ المی ءُ شئے ئسے۔ اینو ننتون بساک نا درشم ئٹ ادارہ ئس ساڑی ءِ ہرانا مسخت چاگڑد ءِ خوانیفنگ، علم و شعور و چاہنداری تون اوار سیوتی کن جہد کننگ ءِ۔ بنجائی سنگتاک مون آ ہیت کریسہ پاریر کہ اینو داڑے دا تولوک آ دیوان نا سنگت آتا دروشم ئٹ نن گل ئنا دا زمہ واری تے اسہ سرسہب ءُ دروشم ئسے ئٹ خننگن کہ دا سنگتاک مون آ ادارہ ءِ گیشتر مہکم کریسہ قلات نا خوانندہ آتے تینتون اوار کریسہ اوفتا ہیلکاری ءِ کرور۔ دا زمہ واریک بیرہ عہدہ افس بلکہ دافتا مسخت تینا ہمو شعور ئتون انصاف کننگ ءِ۔ ہمو شعور ہرا کہ ننے اسہ مچی و سیوتی نا سوچ ئسے نا خواجہ کریسہ شعوری بنیات آ اسہ جاغہ ئس رسیف ءِ۔ اول اندا گواچنی تون امنائی کروئی ءِ کہ ننا خڑک ئٹ ہمو ورناک اگہ اینو چاگڑدی گندئی تا بشخ مننگ ءُ یاکہ گواچنی نا کسر آن بےسما ءُ گڑا دافتہ زمہوار ہم نن اُن۔ انتئے کہ اسہ شعوری ءُ بندغ ئس تینا چاگڑد ءِ مٹ کننگ نا زمہ ءِ تینا کوپہ غاتیا ہرفک گڑا اونا دا زمہ واری مریک کہ تینا چاگڑد ئٹ مروکا ہر ہمو مٹی و بدلی ءِ توننگ یاکہ چاگڑد ءِ ہمو گندئی تیان رکھنگ ہرا چاگڑد ءِ نسخان نا پارہ غا دننگ نا وسیلہ ءُ۔ داڑتون اوار ننا سنگتاک ہر ہمو عمل ءِ مون آ دیر ہرا کہ ننا ورناتے و چاگڑد ءِ اسہ اندنو چاہنداری ئسے آ رسیفنگ کے۔ ہرا کہ چاگڑد ئٹ مروکا ہر عمل ءِ چائنگ کرو ءِ کہ دا عمل چاگڑد کن جوان ءِ یاکہ گندہ ءِ تانکہ داڑتون اوار ورناتے و دا چاگڑد ءِ دا گندئی تیان رکھنگ نا وسیلہ مرور۔ سنگتاک ایسری ئٹ قلات ہنکین ءِ گیشتر فعال کننگ نا زی ہیت کریسہ پاریر کہ سنگت آتیا بھاز امیت ءِ کہ اوفک قلات نا ورناتے تینا چاہنداری و شعوری کاروان ئٹ اوار کننگ تون اوار تینا لیکہ و پروگرام ءِ اوفتیاتے رسیفنگ کن تینا کاریم تے ترند کننگ نا کوشست کرور۔
سنگت آتا اُست جمی ئٹ کل ٹِک آتا زی آ ہیت و گپ آتیان پد گڈیکو ٹِک بروکا گامگیج ئس ہراٹی مسکوہی ہنکینی کابینہ ایسر کننگا و پوسکنا ہنکینی کابینہ کن سنگتاک گچین کنگار۔ ہنکینی کابینہ ٹی ہنکینی کارمستر سمیع بلوچ، ہنکینی کمک کارمستر واحد بلوچ، کارگشاد ماریہ بلوچ، کمک کار گشاد ابرار بلوچ وہنکینی حوالکار سلاال بلوچ گچین کننگار۔
پوسکن گچین مروکا سنگت آتے بنجائی سنگت سوغند تس و دیوان ایسر کننگا۔
بنجائی ترجمان: بلوچ اسٹوڈنٹس ایکشن کمیٹی
