بلوچ اسٹوڈنٹس ایکشن کمیٹی ھاران ہنکین ءِ ہنکینی لس دیوان برجم دارگ بوتگ۔ اعجاز بلوچ ہنکینی کارمستر ءُ نوید بلوچ ہنکینی کارگشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن ھاران ہنکین ءِ ہنکینی لس دیوان گوستگیں ہنکینی کارمستر اقبال بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان بنجاہی کارگشاد پیرجان بلوچ ءُ بنجاہی کمیٹی ءِ باسک ھانی بلوچ ءُ عدنان بلوچ بوتگ اَنت۔ دیوان ءِ تہ ءَ بنجاہی سرکیولر، ہنکینی اہوال، نگدی نشست، گل کاری، ھندی ءُ میان استمانی سیاسی جاورھال ءِ بنگپانی سر ءَ گوں دلجمی ءَ گپ ءُ تران کنگ ءَ پد آوکیں گامگیج ءِ تہ ءَ گوستگیں کابینہ ھلاس کنگ بوتگ ءُ نوکیں کابینہ ءِ ھاترا سنگت گچین کنگ بوتگ اَنت۔
دیوان ءِ تہ ءَ بنجاہی سنگتاں تران کنان ءَ گشتگ کہ لہتیں وہد پیسر ھاران ءِ تہ ءَ بساک ءُ نودربر سیاست ءِ نہ بوھگ ءِ سبب ءَ نودربر گِشتر سیاسی چاگرد ءِ بھر نہ بوتگ اَنت۔ نودربرانی سیاست ءِ بھر نہ بوھگ ءِ سبب ءَ مزنیں کچ ءَ نودربر سرجم ءَ نپری سوچ ءُ پگرانی واھُند بوتگ اَنت ءُ دومی نیمگ ءَ نودربر گیشتر جتا جتائیں ڈسکورسانی آماچ بوتگ اَنت۔ بلے وہدے کہ گل ھاران ءَ وتارا سر کنگ ءَ سوبمند بیت اشی ءَ چہ پد مارا مزنیں کچے ءَ نودربر سیاسی چاگرد ءِ بھر بیگ ءَ گِندگ ءَ کایاں ءُ سنگتانی اے میان ءَ ھاران ءِ تہ ءَ مخلصی ءَ گوں کار کنگ ءِ برورد اِنت کہ مرچی مارا نودربرانی تہ ءَ مزنیں کساس ءَ بدلی ءِ گِندگ ءَ پیداک اِنت ءُ مرچی ھاران ءِ نودربر ھاسیں وڈے ءَ بلوچ نودربر سیاست ءِ بھر بوھگ ءَ اَنت ءُ شوکیں دابے ءَ وتی زمہ واریاں پیلو کنان اَنت۔ بلے سیاست ہمے وڈیں عمل ءِ کہ تو شپ ءُ روچ کار بہ کنے ءُ سالانی سال کار بہ کنے بلے سیاست ءِ تہ ءَ مطمئین بوھگی نہ ایں بلکیں گوستگیں وہد ءَ چہ ہم باز کار کنگ لوٹیت ءُ باز وہد دیگ لوٹیت پمیشکہ مارا اوں مطمئین بوھگی نہ ایں بلکیں گیشتر کار کنگ لوٹیت چُشکہ ھاران وتی تہ ءَ سک مزن اِنت گڑاں مارا گل کاری ءِ سر ءَ گِشتر کار کنگی اِنت گل ءِ پروگرام ھاران ءِ ہرچ کسان ءُ مزنیں کوچگ ءُ میتگاں سر کنگی اِنت۔
دیمترا سنگتاں تران کنان ءَ گُشتگ کہ راجانی دیمروئی ءِ سبب وانگ ءُ زانگ اِنت راج ہما وہد ءَ دیمروئی کُت کنان وھدے آ وانگ ءُ زانگ ءَ گوں نزینک بہ بنت ءُ مہکمی ءَ گوں علمی پروگرامانی بہر بہ بنت۔ ابید ءِ وانگ ءُ زانگ ءَ راجاں ہچبر دیمروئی نہ کتگ ءُ نئیکہ دیمروئی کُت کناں۔ ما اگاں سرجمیں رکشان ریجن ءَ بہ چاریں گڑاں رکشان سک مزن اِنت بلے وانگی راہبند چارگ بہ بیت گڑاں مارا یک ہم مزن شھدربرجاہ ءِ گِندگ ءَ نئیت اِنت بس ھاران ءِ تہ ءَ پہ نام یک کیمپس ءِ است پدا ہمے ہم ہزارہ جیڑہ ءُ جنجالانی آماچ اِنت۔ دومی نیمگ ءَ بلوچستان ءِ وتسریں نمائندگ ہمک روچ ءَ رسانکدر ءَ ہمے گپ ءَ جن اَنت کہ ما بلوچستان ءِ نودربراں دری ملکاں پہ وانگ ءَ دیم دیگ ءَ ایں بلے راستی مئے چمانی دیما اِنت کہ رکشان ءِ تہ ءَ ہزاراں ورنا مزن شھدربرجاہ ءِ نہ بوھگ ءِ سبب ءَ وتی وانگ ءَ دیما بُرت کت کنگ ءَ نہ آں ءُ وانگ ءَ یل کنگ ءَ اَنت۔ اے سرجمیں چیز مارا سرپد بوگی اَنت ءُ وتی مہلوک ءُ ونا سرپد کنگی اَنت۔
گڈ سرا سرجمیں بُنگپانی سر ءَ گوں دلجمی ءَ گپ ءُ تران ءَ پد آؤکیں گامگیج ءِ تہ ءَ گوستگیں کابینہ ھلاس کنگ بوتگ ءُ پہ نوکیں کابینہ ءِ ھاترا سنگت گچین کنگ بوتگ اَنت۔ نوکیں کابینہ ءِ تہ ءَ کارمستر اعجاز بلوچ، کمک کارمستر رافیہ بلوچ، کارگُشاد نوید بلوچ، کمک کارگشاد فضل بلوچ ءُ ھالرسانی کارگشاد ابراہیم بلوچ گچین کنگ بوتگ اَنت۔
نوک گچین بوتگیں سنگتاں ءَ بنجاہی سنگت ءَ سوگند داتگ ءُ دیوان آسر کنگ بوتگ۔
بنجائی جارکش: بلوچ اسٹوڈنٹس ایکشن کمیٹی
