بلوچ اسٹوڈنٹس ایکشن کمیٹی مستونگ ہنکین نا ہنکینی لس مجلس اڈ تننگا۔ نصیر بلوچ ہنکینی کارمستر و نوید بلوچ کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی مستونگ ہنکین نا ہنکینی لس مجلس ہنکین نا تدوکا کارمستر میر احمد بلوچ نا کماشی ٹی اڈ تننگا۔ دیوان نا مہمان بنجائی کمیٹی نا باسک سنگت ارشد بلوچ ئسک۔
دیوان نا ٹک آک بنجاہی سرکیولر، ہنکینی رپورٹ، نغدی نشست، گل کاری، ہندی و جہانی سیاسی حالیت و بروکا گامگیچ ئسر و بروکا گامگیچ ئٹی مست ئنا کابینہ ایسر کننگا و پوسکن آ کابینہ کن سنگت آک گچین کننگار۔
نغدی نشست نا ٹک ئٹ تران کریسہ سنگت آک پاریر کہ سیاسی گل آتیٹی نغد کاری نا تینا اسہ گرج ئسے ہراتم کہ ادارہ ئس نغدکاری آن تینے مُر تورک گڑا او ادارہ مستی گام خلنگ کپک بلکن زوال نا پارہ غا روان مریک۔ نغد ہمو عمل ءِ کہ ہراڑٹ نن تینا مسکوہی نزوری تا زی آ تینا خیال آتے تخیسہ و اوفتا ایسری کن ہم کوشست کینہ۔سنگت آک مستی پاریر کہ دا نیام ئٹ ننا بھاز آ نزوری تا سوب آن ہنکین نا پروگراماک ہراڑے کہ سر کروئی مسونو دنچا کہ ننا نزوری تا سوب آن ہموڑے سرسہبی ئٹ سر متنو۔ دنکہ ہنکین نا بھاز کاریم و پروگرام آک وخت آ ایسر مفرنگ نا سوب آن ننا گل کاری ٹی نزوری خننگ ئٹ بریک۔ مستی سنگتاک تینا ہنکین نا چنکا بھلا نزوری تا زی آ ہیت و گپ کننگ آن پد دا ٹک ءِ بند کریر۔
مون نا ٹک گل کاری ئسک کہ گل کاری نا ٹک ئٹ بنجائی سنگت ہیت کریسہ پاریر کہ مستونگ ہمو گلزمین ءِ کہ ہراڑے عبدالعزیز کرد نا وڑ ءُ راہشون ودی مسونے کہ ہرا بلوچ سیاسی گل آتا بنداوہ تخوکا راہشون ئسے نا وڑٹ چائنگ مریک۔ نن ہم ہندافتا زنک آن اُن کہ اینو بساک نا وڑ ءُ گل ئس دا جاغہ ءِ سر مسونے گڑا ننا زی آ المی ءِ کہ نن گل ئنا کاریم و پروگرام آتے ہر اُراٹی سر کین یاکہ ہمو ورناک کہ اینو دا گل ئنا بشخ افس اوفتے تینتون ہمراہ کین و مستی روان مرین۔
گل کاری نا زی آ سنگت ایسر ئٹ ہیت کریسہ پارے کہ داسا تنظیم کاری نا زی آ ننے پین گیشتر زور تننگ نا بکار ءِ انتئے کہ ہراتم ہنکین ئس تینا جند ئنا ڈھانچہ نا جند ءِ رکھنگ کرے گڑا او مستی تینا کاریم و پروگرام آتے دننگ کیک ہندا سوب آن ننے تینا گل کاری نا زی آ گیشتر عمل کننگ نا ضرورت ءِ تانکہ نن تینا ہنکین و اونا کاریم و پروگرام آتیٹی شون اتنگ کین۔ دا ٹک ئنا زی آ است جمی ئٹ گپ و تران آن پد سروک نا موکل ئٹ دا ٹک بند کننگا۔
کل ٹِک آتا زی آ اُست جمی ئٹ تران کننگ آن پد بروکا گامگیچ ئٹ کہ ہراٹی تدوکا ہنکینی کابینہ ایسر کننگا و پوسکنا کابینہ کن سنگتاک گچین کننگار، ہراٹی ہنکینی کارمستر نصیر بلوچ، کمک کار مستر وقار بلوچ، کارگشاد نوید بلوچ، کمک کار گشاد یاسین بلوچ، و حوال کاری کارگشاد فائزہ بلوچ گچین کننگار۔ پوسکنا گچین مروک آ سنگت آتے بنجاہی سنگت سوغند تس و دیوان ایسر کننگا۔
بنجائی ترجمان: بلوچ اسٹوڈنٹس ایکشن کمیٹی
