بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نصیر آباد ہنکین نا ہنکینی لس دیوان ہنکینی کمک کارمستر سنگت وسیم بلوچ نا کماشی ٹی اڈ تننگانے۔ دیوان نا مہمان بنجائی سنگت جعفر بلوچ و علی بلوچ مسونو۔
دیوان ئٹ بنجائی سرکیولر، ہنکینی احوال، تنقیدی نشست، گل کاری، ہندی و جہانی سیاسی حالیت نا ٹِک آتیا است جمی ئٹ تران آن پد بروکا گامگیج ئٹ تدوکا ہنکینی کابینہ ایسر کننگانے و پوسکنا ہنکینی کابینہ کن سنگتاک گچین کننگانو۔
اولیکو ٹک ئٹ بنجائی سنگت دیوان ئٹی بنجائی سرکیولر ءِ خوانانے ہراٹی تیوہ غا بنجائی لس مجلس نا حوال تون اوار بنجائی فیسلہ و پروگرام آتے ہم دیوان نا مون آ تخانے۔ مونی ہنکنی حوال نا ٹِک مسونے کہ ہراٹی نصیر آباد ہنکین نا حوالاک خواننگانو کہ اوفتیٹی ہنکینی ہیلکاری دیوان، لٹریچر، تنظیم کاری کتاب مچی و ایلو مراگش آک اوار مسونو، سنگت آتا سوج و ورندی آن پد دا ٹِک بند کننگانے۔
مونی تنقیدی نشست مسونے کہ سنگت آک تنقید نا زی آ تران کریسہ پارینو کہ تنقید تینٹ ہم اسہ سیاسی ءُ عمل ئسے کہ سیاسی وڑٹ مروک آ تنقید دلیل و منطق نا بنیات آ سیاسی فرد یا کہ گل آتا تدوکا ردی تے مون آ تخیسہ بروک آ وخت اکن ہمو ردی تے آن تینے و گل ءِ رکھنگ نا کوشست کننگک۔ سنگت آک پاریر کہ تنقید نا بھلو ارزشت ئسے اگہ تنقید ءِ سیاست آن کشنگے گڑا پد ئٹ نن تون ہچس رہینگپک۔ تنقید کننگ و تنقیدی سوچ ئس جوڑ کننگ سیاسی گل و خاص کر بلوچ خوانندہ سیاست نا مسخت ءِ کہ بلوچ ورناک تخلیقی، تنقید کار و تنقید ءِ سگوک مریر۔
مون مستی گل کاری نا ٹِک ئنا زی آ دیوان نا سنگتاک تینا شور و سلاہ تے تسر و بروکا ہنکینی کاریم تا جوانی کن تینا سلاہ و مشورہ تے دیوان نا سنگت آتا مون آ تخار۔ دیوان ئٹ ساڑی بنجائی سنگتاک ہیت کریسہ پاریر کہ نصیر آباد کہ بلوچستان نا زرعی و کشت کشاری ہند ئسے ہراڑے بلوچ راج واپاری نا رند ئٹ تمیسہ تینا گواچن و شناخت ءِ گم کرینے و تینا ڈیہہ ئٹ وہوکا دیر ( کینال) تیا نالائخی کریسہ پیشن نا مخلوق ءِ کوزہ گیری کن یلہ الانے کہ اینو نصیر آباد ئٹ تولوک مخلوق سیاسی و زرگزرانی شعور مفرنگ نا سوب آن بزگی و نیزگاری نا زند تدیفنگ ءِ۔ سنگت آک پاریر کہ نصیر آباد ہنکین کہ ہراڑے تاغتور آتا بیانیہ بھاز تالان مریسہ بلوچ مخلوک نا برخلاف ترند مسونے دادے ایسر کننگ و بلوچ خوانندہ سیاست نا وسیلہ ئٹ بلوچ مخلوق ءِ سیاسی رد ئٹ شعور تننگ نا گرج ءِ۔ مستی ہیت کریسہ سنگتاک پایر کہ نصیر آباد ہنکین ئٹ پیشن نا بروک آتیکن جاگہ خورک الّوئی افک و ہندا نودربر سیاست نا وسیلہ ئٹ تینا مخلوق ءِ تینتون اوار کننگ نا جہد کروئی ءِ۔ سنگت پارے کہ تعلیمی ادارہ، سیمینار، رسمی و غیر رسمی دیوان آتا وسیلہ ئٹ مخلوک تون توڷ بش گیشتر کروئی ءِ و نصیر آباد ہنکین نا مخلوق ءِ دا کلہؤ تروئی ءِ کہ اوفک ہم بلوچ نا بشخ ئسے، واوفتا ملی آن پیشن نا بیانیہ، فنڈ و لالچ نا کسہ تے کشوئی ءِ۔ ننا سنگتاتے تینا ہنکینی کاریم تے گیشتر وخت تریسہ اوفتے نصیرآباد وڑو ہند آتیٹی جوانی ئٹ ایسر کروئی ءِ، انتئے کہ داڑے ننتون تعلیمی ادارہ ارے ولے دافتیٹی ہچو سیاسی عمل ئس مننگ اف دا اسہ بھلو نزوری سے، سنگتاک کوشست کیر کہ خوانندہ آتیتون گیشتر خڑکی کیر و ہنکین نا کاریم تے گیشتر جوان و مہکم کیر۔
سنگت آتا اُست جمی ئٹ کل ٹِک آتا زی آ ہیت و گپ آتیان پد گڈیکو ٹِک بروکا گامگیج ئس ہراٹی مسکوہی ہنکینی کابینہ ایسر کننگانے و پوسکنا ہنکینی کابینہ کن سنگتاک گچین کنگانو۔ ہنکینی کابینہ ٹی ہنکینی کارمستر الطاف بلوچ، ہنکینی کمک کارمستر مشتاق بلوچ، کارگشاد سلطان بلوچ، کمک کار گشاد یٰسین بلوچ و ہنکینی حوالکاری کارگشاد اعجاز گچین کننگانو۔
پوسکن گچین مروکا سنگت آتے بنجائی سنگت سوغند تس و دیوان ایسر کننگانے۔
بنجائی ترجمان: بلوچ اسٹوڈنٹس ایکشن کمیٹی
