بلوچ اسٹوڈنٹس ایکشن کمیٹی خضدار ہنکین ءِ ہنکینی لس دیوان برجم دارگ بوتگ۔
بلوچ اسٹوڈنٹس ایکشن کمیٹی خضدار ہنکین ءِ ہنکینی لس دیوان برجم دارگ بوتگ۔ نسرت بلوچ ہنکینی کارمستر ءُ سفیہ بلوچ ہنکینی کارگشاد گچین کنگ بوتگ اَنت۔
بلوچ اسٹوڈنٹس ایکشن کمیٹی خضدار ہنکین ءِ لس دیوان ہنکینی کارمستر مبارک بلوچ ءِ سروکی ءَ برجم دارگ بوتگ۔ دیوان ءَ ہاسیں مہمان بنجائی کارگشاد پیرجان بلوچ ءُ بنجائی کمیٹی ءِ باسک نادر بلوچ ساڑی بوتگ اَنت۔
ہنکینی لس دیوان ءَ بنجائی سرکیولر، ہنکینی گوستگیں اھوال، نگد کاری، گل کاری، ھندی ءُ میان استعمانی سیاسی جاورہال ءُ آؤکیں گامگیج بوتگ اَنت۔ درستیں سرہالانی سر ءَ گوں دلجمی ءَ گپ ءُ تران ءَ پد آؤکیں گامگیج ءَ گوستگیں کابینہ ہلاس کنگ بوتگ ءُ نوکیں کابینہ ءِ ہاترا سنگت گچین کنگ بوتگ۔
دیوان ءَ نگدی بھر ءَ سنگتاں تران کنان ءَ گُشتگ نگد پہ ادارہاں پدروئی ءِ چیدگ نہ اِنت بلکیں ادارہ ءِ دیمروئی ءِ ہاتر ءَ مستریں وسیلہ اِنت، نگد ءِ برورد ءَ ادارہ گیش مُہکم ءُ توانگر بنت۔ نگد سرجم ءَ یک سائنسی عملے وہدے کہ سنگت نگد کن اَنت گڑا اے الّم اِنت کہ گوستگیں سرجمیں کارانی سر ءَ یک مُہکمیں زانت ءُ زانشتے بہ بیت ءُ ہمے زانت ءِ بنیات ءَ گوستگیں سرجمیں کارانی ہوالہ ءَ یک برجمیں نگدی جائزہ یے زُرت بہ کن اَنت ءُ پہ دیمتر ءِ کارانی ہوالہ ءَ یک سرجمیں گیشینتگیں پروگرامے بیار اَنت داں آؤکیں وہد ءَ ہمے پروگرام ءِ سر ءَ کار کنگ بہ بیت۔
گندگ بیت کہ ھنکین ءَ ما وتی سیاست ءِ دائرہ محدود کُتگ چُشکہ خَضدار پراہ شاہگان اِنت، اِد ءَ ہزارانی کچ ءَ نودربر است اَنت بلے سیاست ءَ چہ دور ءُ گِستا اَنت ءُ سرجم ءَ وتی نپری ہساب ءَ زِند گوزینگ ءِ جھد ءَ اَنت۔ پرے ہاتر ءَ مارا ہمے دائرہ وہد وہد ءِ سر ءَ پراہ ءُ شاہگان کنگی ایں دانکہ ما گیش ءَ چہ گیش بلوچ نودربراں وتی ہمراہ کُت بہ کنیں ءُ آہاں سیاسی چاگرد ءِ تہ آؤرت بہ کنیں۔ سیاست پہ ہمایاں بیگ ءَ اِنت ءُ کسے ہوار نہ اِنت داں مارا وتی نزوری پہمگ ءُ ہوار کنگی ایں۔ اے نگد بگندے مئے سرجمیں ورنایانی سر ءِ ہم بئیت کہ بلوچ ورنا ہمک چِز ءِ گندگ ءَ اَنت ءُ اگاں اِشاں ابید ہم سیاسی ءُ زانشتی جھد ءَ ہوار مہ بنت داں پہ مارا دُرستاں مچانکی ہوالہ ءَ تاوانے۔
گل کاری ءِ تہ ءَ سنگتاں تران کنان ءَ گُشتگ کہ بلوچ ورناں مرچی بازیں پندلانی سبب ءَ سیاست ءَ چہ دُور دارگ بوگ ءَ اَنت ہمے پندلانی سبب ءَ مرچی ہزاراں ورنا نپری سوچ ءُ پگرانی واھُند بیان اَنت چُشکہ ورناں راج ءِ باندات اَنت اگاں ورنا وتی چاگرد ءِ تہ ءَ زمہ وار مہ بنت یا کہ نپری سوچ ءُ پگرانی واھُند بہ بنت گڑا اے پہ بلوچ چاگرد ءَ مزنیں تاوانے۔ پمیشکا مارا باسمائیں ءُ سیاسی سنگت ءِ بستار ءَ راجمان ءَ ہرچ وڈیں پندل کہ است پد جنگی اَنت ءُ ایشانی ہوالہ ءَ سرجم ءَ باسماں ءُ شیوار بوگی ایں۔ اِشانی دارگ ءُ بلوچ ورنایاں سیاسی چاگرد ءِ بھر کنگ ءِ ہاترا راجمان ءَ وتی راجی کردے پیلو کنگی ایں دانکہ ما وتی چاگرد ءُ ورنایاں چہ ہمے پندلاں کش اِت بہ کنیں ءُ آواں سیاست ءُ سیاسی پروگرامانی بہر کُت بہ کنیں۔ اے دور ءَ مئے ہمک نازُرک تبی ءُ کوتاہی ناں تہنا پہ مارا بلکیں پہ سرجمیں راج ءُ باندات ءِ پدریچ ءَ مزنیں تاوانے ءِ سوب جوڑ بیت کنت۔ پمیشکا تہما سما کنگی نہ ایں بلکیں باسما بیگ ءُ عملی گامگیج ءَ ہوار بیگ اژدری اِنت۔
دیوان ءَ سرجمیں سرہالانی سر ءَ گوں دلجمی ءَ گپ ءُ تران ءَ پد گڈی سرہال آؤکیں گامگیج بوتگ آؤکیں گامگیج ءَ گوستگیں کابینہ ہلاس کنگ بوتگ پہ نوکیں کابینہ ءِ ہاترا نوکیں سنگت گچین کنگ بوتگ اَنت ایشانی تہ ءَ کارمستر نسرت بلوچ، کُمک کارمستر اشفاق بلوچ، کارگشاد سفیہ بلوچ، کمک کارگشاد ارسلان بلوچ، ہالرسانی کارگشاد ناہیدہ بلوچ گچین کنگ بوتگ اَنت۔ نوکیں سنگتاں سوگِند دیگ ءَ پد دیوان آسر کنگ بوت۔
بنجاہی جارکش: بلوچ اسٹوڈنٹس ایکشن کمیٹی
