بلوچ اسٹوڈنٹس ایکشن کمیٹی لورالائی ھنکین ءِ ھنکینی لس دیوان برجم دارگ بوتگ فاروق بلوچ ھنکینی کارمستر ءُ زبرین بلوچ ھنکینی کارگشاد گیچین کنگ بوتگ انت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی لورالائی ھنکین ءِ ھنکینی لس دیوان زیاء بلوچ ءِ سروکی ءَ برجم دارگ بوتگ دیوان ءِ مہمان بنجاھی کمیٹی ءِ سنگت ارشد بلوچ بوتگ۔
دیوان ءِ تہ ءَ بنجاھی سرکیولر، ھنکینی اھوال، نگدکاری، گل کاری، ھندی ءُ میان استمانی سیاسی جاور ھال ءِ بنگپانی سر ءَ گپ ءُ باوست ءَ ہوار آؤکیں گامگیج ءِ تہ ءَ گوستگیں کابینہ ھلاس کنگ بوتگ ءُ نوکیں کابینہ ءِ ھاتر ءَ سنگت گیچین کنگ بوتگ انت۔
دیوان ءِ تہ ءَ بنجاہی سرکیولر ءُ ھنکینی اھوال ءِ سر ءَ گوں دلجمی ءَ گپ ءَ پر نگدی بہر ءِ نشست پچ کنگ بوتگ۔ نگدکاری نشست ءَ سنگتاں نگد ءِ ارزشت ءِ سر ءَ باوست کتگ ءُ گشتگ کہ نگد ھما سیاسی امل انت کہ چرائی ءَ گوں ادارہ ءِ دیمروی بندوک انت وھدے کہ سیاسی ادارھانی تہ ءَ نگدی چاگرد ودی بیت آ ادارہ وھد ءِ زرورت ءُ لوٹ ءِ ھساب ءَ وتی سیاسی کاریچ ءِ تہ ءَ مَٹی ءُ بدلی آرت کت کن آں۔ پرچاکہ نگد تہنا باوستی امل ءِ نہ انت بلکیں آ یک پیسلہ سازیں جاہے ءَ ہوار آئی اہمیں پہلو یے ھم ھست کہ بئیدے نگد ءَ ما وتی تہ ءَ اصلاح کاری کت نہ کناں ھمے نگد انت کہ مارا چہ مئے ردیں کرد ءُ عملاں چہ رکینیت ءُ یک ساپ ءُ پلگاریں راہے ءِ شون ءَ دنت کہ اود ءَ ما ادارہی مستقل ءَ دیمروی دات کن انت دیمتر ءَ سنگتاں زمہ واری ءِ ارزشت ءِ سر ءَ نگد کت ءُ گوشت کہ تنظیمی فریم ورک ءِ تہ ءَ زمہ واری تہنا اُہدے ءِ سر ءَ نامانی مٹی ءُ بدلی نہ انت بلکیں اے یک ادارھی اِزاز ءِ کہ مارا ایشی ءِ ارزشت سرپد ءُ پوہ بوھگی انت ءُ وتی تہ ءَ اچ چُشیں روشت جاگہ دئیگی نہ انت کہ اود ءَ ھمے زمہ واری ءِ کَچ ءُ پیمانہ ءِ گوما نہ انساپی بہ بیت ءُ ادارہ ءِ گیشنیتگیں دستوری اصول پامال بہ بنت کہ اے پہ ادارہ ءَ تاوانے۔ اے بن گپ ءِ سر ءَ گوں دلجمیں باوست کنگ ءَ پد بند کنگ بوت۔
دیمتری بن گپ گل کاری ات کہ ایشی سر ءَ سنگتاں وتی ھیال دیوان ءِ دیما ایر کناں گوشتگ کہ گل کاری تنظیمی باندات ءِ پیسلہ سازیں بن گپ انت کہ اے ادارہ ءِ مستقبل ءِ پالیسی ءِ گیشینگ ءِ مانزامانیں بھر زانگ بیت۔ وھدے کہ تنظیمی گل کاری مھکمیں رنگے ءَ باوست کنگ ءُ نوکیں پالیسی ءِ آرگ ءَ سوبین بیت گُڑا الّم مئے ادارھی باندات رژنا بیت۔ ھمے باوست ءَ دیما براں ءَ سنگتاں کیمپس پولیٹیکس ءِ تہ ءَ تنظیم کاریءِ سر ءَ گیش زور دات ءُ گوشت کہ کیمپس پولیٹکس ءِ زرورت اوں ھمیش انت کہ مارا گوں لس نودربراں ھمگرنچ بوھگ ءَ ہوار آھانی کسان کسانیں انتزامی لوٹ ءُ گزر وتی سیاسی ایجنڈا ئے بھر کنگی انت۔ دانکہ ما آھاں وتی ھمراھی ءَ گوں جنزینت کت بہ کناں پرچاکہ ھمک سیاسی پروگرام ءِ تہ ءَ لس مردم یاکہ لس نودربرانی لوٹ ءُ زرورتانی پہریزگ ءَ ہوار آوانی گرگ ءِ ھاتر ءَ وسیلہ جوڑ کنگ نودربر گلانی کیمپس سیاست ءِ بنکی کار انت۔ ءُ ھمے بنکی زمہ واری ءُ تنظیم کاری مارا سیاسی باسکے ءِ بستار ءَ سرپد بوگی انت۔
سنگتاں دیمترا گپ کناں ءَ گشت کہ نودربر سیاست چو یک بنکی ترز کارے ھساب ءَ جنزینگ بیت انت کہ اودا نودربرانی سیاسی ھیلکاری ءِ ھمرائی ءَ مارا ھما بنکی جیڑہ ءُ ویل سرپد بوگ لوٹ اَنت، داں ما آوانی ھوالہ ءَ وتی یک تچکیں پروگرامے آؤرت کت بکن ایں۔ اے عمل مارا مئے سیاسی پروگرامانی دیما برگ ءَ مزنیں کمک کت کنت، چیاکہ ما نودربر سیاست ءِ بہریں ءُ مئے کلیں سیاسی پروگرام گوں نودربراں ءُ آوانی لوٹاں بندوک انت۔ کلیں سنگتانی گوں دلجمی ءَ گپ ءُ تران ءَ پد اے بنگپ بند کنگ بوتگ۔
گُڈی بن گپ آؤکیں گامگیج ات کہ ایشی تہ ءَ گوستگیں کابینہ ھلاس کنگ بوتگ ءُ نوکیں کابینہ ءِ ھاتر ءَ اے سنگت گیچین کنگ بوتگ انت؛ کارمستر فاروق بلوچ، کمک کارمستر عباس بلوچ، کارگشاد زبرین بلوچ، کمک کارگشاد قدیر بلوچ ءُ ھالرسانی کارگشاد قادر بلوچ گیچین کنگ بوتگ اَنت۔
بنجاھی سنگت ءَ نوک گیچین بوتگیں ہنکینی کابینہ ءِ سنگت سوگند داتگ انت ءُ دیوان ءِ آسرکنگ بوتگ۔
بنجاہی جارکش: بلوچ اسٹوڈنٹس ایکشن کمیٹی
