بلوچ اسٹوڈنٹس ایکشن کمیٹی شال ھنکین ءِ نیمگ ءَ یک زانشتی دیوانے برجم دارگ بیتگ۔
بلوچ اسٹوڈنٹس ایکشن کمیٹی شال ھنکین ءِ نیمگ ءَ یک زانشتی دیوانے برجم دارگ بیتگ۔
بلوچ اسٹوڈنٹس ایکشن کمیٹی شال ھنکین ءِ نیمگ ءَ یک زانشتی دیوانے ھنکینی کارمستر اجاز بلوچ ءِ سروکی ءَ برجم دارگ بوت۔ دیوان ءِ مہمان بنجائی سنگت نگرہ بلوچ، رحمان بلوچ ءُ سھیل بلوچ بوتگ اَنت۔ دیوان ءِ تران کار بنجائی سنگت رحمان بلوچ بوتگ
سرھال : Global Students Resistence: A Historical Overview
سنگت ءَ دیوان ءِ بندات ءَ تران کنان ءَ گُشت کہ یک راجمانے ءِ تہ ءَ جتائیں تبک ءِ مردم زندگی کن اَنت ءُ پہ شریں راجمانی جوڑشت سازی ءَ ہر طبقہ ءِ وتی جتائیں ھاسیت بنت کہ آ پہ راجمانی دیمروئی ءَ کارآمد اَنت۔ ھمے ھساب ءَ یک راجمانے ءِ تہ ءَ جتائیں طبقہ کہ زندگی کنت ءُ اِے طبقہانی وتی جیڑہ ءُ جنجال بنت ھمے جیڑہ ءُ جنجالانی توجیل سازی ءَ پہ اے مردم جھد کن اَنت۔ اگاں ما نودربراں بہ چارایں گڑا آ ھم ھمے راجمانءِ بھر اَنت کہ آئی ءِ تہءَ زندگی کنگ ءَ اَنت، اِے تبک ھم پہ وتی لوٹ ءُ زلورتانی سرجم کنگ ءَ دست ءُ پاد جنت، زوراکی ءِ دیم ءَ گھگیری کنت ءُ وت ءَ رکینیت۔
ھمے ھساب ماں نودربر تبک ءِ ابرم ءَ بہ چارایں گڑا آئی ءِ ابرم ءِ تہ ءَ سرجھلی مارا کم گندگ ءَ کئیت اِنت، مارا چہ دُگنیا ءِ گوستانک ءَ ھمے درس رسیت کہ نودربر تبک زوراک ءِ دیم ءَ اُوشتاتگ، آئی ءَ گھگیری کنگ ءِ ءُ وتی ھک ءُ اُگبالانی گرگ ءِ بودناکی بوتگ پرچہ آ وتی تہ ءَ یک پُر جزبگیں تبکے ءُ نودربری زمانگ ورناہانی ھما وھد اِنت کہ عملی ءُ بودشتی تک ءَ تگ ءُ تاچ ءَ پہ گیش توانگر اَنت۔ چہ ایشاں ابید دِگہ سوب اِش اَنت کہ اِے تبک وتی راجمانءِ تہءَ جیڑوکیں تبک اِنت ءُ گیشتر سوشل کارستیں تبک اِنت، مھلوک ءَ پجاہ کاریت، ھمے سوب بوتگ اَنت کہ آئی ءَ گھگیری کنگ ءِ سکین رستگ۔
سنگت ءَ دیمتر ءَ تران کنان ءَ گُشت کہ مرچیگیں اھد ءَ نودربرانی گھگیری راجمان ءِ مُچانکی جُھد اِنت کہ آئی ءِ وسیلہ ءَ دربرجاہ ءُ شاہ دربرجاہ ءِ سیاسی جاور، برابری ءُ چاگردی جیڑھاں گیش ءُ گیوار کنگ ءَ عمل بیت اِنت۔ نودربر گھگیری ءِ بُنکی دپتر مارا چہ یورپی سماج ءَ ماں 12ھمی کرن ءَ گندگ ءَ کئیت۔ بنداتی وھد ءَ نا چُشیں وانگی ادارھے بوتگ ءُ نئیکہ ھاسیں وانگی رھبندے بوتگ، اِے وھد ءَ وانگ پہ ھاسیں تبکے ءَ بوتگ چُشکہ مالدار ءُ مذہبی مردمانی ھاتر ءَ، ھمے وھد ءَ یک نودربرے ءَ پہ وت ءَ یک ھاسیں اُستادے گچین کُتگ ءُ ھما کرا پہ وانگ ءَ شُتگ ءُ ھمے اھد ءِ نودربر گھگیری باروا زانتکار چو گُشنت کہ جہمنندیں میتگاں پہ نودربراں چیزانی نھاد گراں کنگ بوتگ گڈا ھمے زمانگ ءَ نودربر شور ءُ سلاھ کن اَنت کہ مارا گوں انصاف نہ بوھگ ءَ اِنت ءُ گھگیری ءَ پہ جاڑیگ بنت ءُ گوں وتی استاداں ھوار اِے شھر ءُ میتگاں یلہ کن اَنت ءُ دگہ ھندے ءَ رونت، چرے کاراں لس مھلوک تاوان وارت، سبب اِش اِنت کہ ورناہانی زر ءُ مالاں چہ میتگ ءِ روزیگ گہتر بوتگ۔ اِے عمل نودربر گھگیری ءِ بنگیج زانگ بیت کہ آ وتی سر ءَ بوتگیں ناانساپی برداشت نہ کن اَنت۔ میزان میزانءَ گوں وھد ءِ ھواری ءَ اے وانگ ءِ رھبند ءِ تہءَ مٹی آیان کنت، کسانیں وانگی ادارہ ماں شاہدربرجاھانی تہءَ مٹءُ بدل بنت ءُ نودربر گھگیری ماں وتی تہ ءَ گیش مزن بوان ءُ آھانی لوٹ گیشر بوان بنت۔ انچوش کہ ادارھانی تہءَ مٹی کیت نودربرانی لوٹانی تہءَ ھم مٹی آیان کنت۔
سنگتاں تران کنان ءَ گُشت کہ مزنیں ادارہ کہ جوڈ بنت گڑا نودربرانی لوٹ وانگی راھبند، فیس ءُ انتظامی بنت ھمے زمانگءَ نودربر کہ اِے چیزانی تہءَ زوراکی گندیت گڑا آ چو کپوت ءَ وتی چمّاں بند نَہ کنت بلکیں چو مہکمیں کوہ ءَ ھمے زوراکیانی دارگ ءَ پہ جھد کنت بلے ھمے داب ءَ انسان ءِ زند دیم ءَ کنزان بیت، وھد ءُ زلورتانی ھسابءَ ہر تبک ءِ لوٹ ءُ زلورت مٹّاں بنت ءُ ھمے وڑ نودربرانی لوٹ گیش گوں چاگردی ءُ دومی سیمی جیڑھانی گیش ءُ گیورای ءَ بندوک بوان بنت۔
سنگت ءَ گشت کہ نودربرانی گھگیری گوں وھد ءِ روانی ءَ وتی دروشم ءَ مٹ کناں کنت برے یک دابےءَ رنگ زوران بیت ءُ مروچی داں مارا اتکگ ءُ سر اِنت۔ بندات ءِ وھد ءَ یورپ ءَ نودربر گھگیری کن اَنت، گڑا اے زمانگءَ نودربرانی کِرّا چُشیں فریم ورک نہ بوتگ، فریم ورکءِ نہ بوگ ءَ اے وھداں نودربر گھگیری پہ چاگردی زوراکاں چُشیں سانمندیں توارے نہ بوتگ، نوں کہ آیاں وتی دربرجاہ ءُ شاہ دربرجاہاں ڈن دگہ جیڑھ دست ءَ کتگ اَنت کہ آھانی گُورا چُشیں شوربندی یے بوتگ کہ چرائی راجمانی جیڑھ گیشینگ بہ بنت۔
بلے وھد گوزیت، نودربر روچے یک تجربگے کن اَنت ءُ پہ وت یک دور سریں شوربندی یے ساز اَنت نودربراں ماں یک پترےءَ جم کن اَنت ءُ چہ وانگی جیڑھاں ڈنءَ لس مھلوکءِ جیڑھاں ماں وتی کوپگاں کن اَنت۔ ھمے آرگنائیزیشنءِ بروردءَ بنگالی نودربراں ماں بنگلہ دیش ءِ جھد ءِ تہ ءَ مزنیں کردے پیلو کتگ۔ چینءِ تہ ءَ 1989 ءِ زمانگ ءَ نودربر گلاں وتی زھرشانیاں گوں چین ءِ رجیمے دیم ءَ گوں مھکمی ءَ اوشتات اَنت۔ چونائی ءَ نودربر سیاست ءَ یا نودربر گھگیری ءَ دُگنیا ءِ تہءَ مزنیں راجمانی آشوب آؤرتگ ءُ جتائیں سیاسی ءُ راجمانی جیڑہانی توجیل وتی کوپگاں زُرتگ کہ آوانی تہ ءَ وانگی ادارہ، استانی شوربندی، ریسیزم، ءُ اندگہ شوربندیانی ھلاپ ءَ اوشتاتگ اَنت۔
گُڈسرا سنگت ءَ گپ جنان ءَ گشت کہ بلوچ نودربر گلانی ھبرءَ وھدے بہ کن ایں گڑا گوں ھمے نودربرانی ارتقائی سپرءَ ھمے پیم وتی توکی تجربگ، کپگ، پروشگ، ءُ ایشی ہواری ءَ بھرءُ بانگی، بلوچ نودربر گلانی دپتر ءِ بھر اَنت۔ بلوچ نودربر سیاست وتی بنداتی گاماں جنان داں استیں روچ ءَ بلوچ ورناہاں ھمک روچی ھساب ءَ لیکہی ءُ سیاسی جہد ءَ برجاہ داشتگ ءُ جتائیں جیڑہاں ابید ھم بلوچ ءَ سیاسی پجّار ءِ دیگ ءَ پہ وتی سرجمیں وھد ءُ کربانی داتگ اَنت۔ بلوچ ورناہاں زانگ لوٹ ایت کہ جہانی تک ءَ نودربرانی سیاسی گوستانک ءُ داں استیں Gen-Z ءِ کہ گہگیری ءِ عمل ھم گوں مئے ہستانک ءَ بندوک اِنت پمے ھاتر ءَ مارا نودربرانی سیاسی میراس وتی لیکگی اَنت ءُ وتی جہد ءَ ھم ھمینکدر مہکم کنگی اِنت کہ ماں پہ وتی راج ءَ مہکمیں بہرشت دات کُت بہ کنیں۔
سنگت ءِ سرجمیں تران ءُ جُستانی پسّو ءَ چہ پد کارمستر ءِ رزا ءَ چہ دیوان ءِ ھلاسی ءِ جار جنگ بوت۔
