ھانی

ھانی
دلگوش: اے چہ ڈاکٹر جلال ءِ کتاب ‘عورت اور سماج’ ءَ زیرگ ءُ رجانک کنگ بیتگ۔
رجانک: شائستہ بلوچ
راج ءُ وتن ءِ ھاترءَ دراہیں شئے آنی ندر کنگ ءِ جوزہ بلوچ راج ءَ چہ گْوستءَ گون اِنت ۔اِے پڑءَ آھاں بے دروریں راجدپترے ایر کتگ۔ آ چاگردی استحصال ءِ نشانگ ھم بیتگ انت۔ بلوچ راجدپتر ءِ تہءَ اشی ءِ درساں چہ مستریں درور ھانی اِنت ۔میر مندو (ھما میر مندو اِنت کہ قلات ءِ پرشگءَ پد رِنداں آہیءَ اودءِ ھاکمی ءِ زمہ واری بکش اِت)ءِ گسءَ ودی بیوکیں ھانی شئے مریدءِ دشتار بیت۔ دوئیں پہ یکے دومیءَ ساہ بھر کن انت۔ بلے وھدے سردارءَ اِے دوستداراناں ھم نہ بکش اِت ءُ یک روچے ھانی چاکرءِ لوگبانک بیت۔ چہ کسانیءَ مرید وتی ناکو میر مندوءِ زیبا ءُ شرّنگیں جنک ھانیءِ نام گِپت ات، مریدءَ ھانی بےکساس دوست ات، ءُ آ گوں بےتاھیری ھما روچءِ وداریگ ات کہ وھدے ھانی پہ دائمیءَ آہیءِ بیت۔ رِندانی مزنیں سردار میر چاکر ھانی ءُ مرید ءِ مھر ءِ درگتءَ سرپد ات ءُ آ وڈے نہ وڈےءَ ھانیءَ وتی کنگ ءِ جھدءَ ات۔
چاکرءَ ھانی وتی لوگبانک وَ جوڈ کت بلے آ تیوگیں زندءَ آہیءِ مھرءِ کٹّگءَ بے سوب بیت۔
ھانی چہ شئے مرید ءَ جتا بیت ھمے میان ءَ بلوچانی بیست ءُ ھپت سالیگیں وت ماں وتی جنگ (خانہ جنگی ) بندات بیت۔ھانی چُش کہ چہ رِندانی لشکرءَ بیت ھمے ھاترءَ آ جنگءِ پِڑءَ وتی ورناھانی توکلءِ برز کنگ ءَ پہ آھاناں سکین دنت۔ بلوچانی وت ماں وتی جنگءَ ابید ھانی ءِ جنگءِ پِڑءَ بودشت ھما وھدءَ گیشتر پدّر بنت کہ وھدے ارغون ءُ رِندانی میانءَ جنگ بِنا بیت۔ وت ماں وتی جنگءِ سوبءَ بلوچانی تاکت شنگ ءُ شانگ بیت۔ ھمے سوبءَ جنگءِ تہءَ ارغون باج برگءِ وڈءَ بنت ءُ اِے پیم ھم بیت کتگ ات کہ آھاں بلوچ پروش بہ داتین انت۔ ھمے ساھتءَ ھانی ءَ اے ھیال کئیت کہ آہیءِ سپاھی ھما وھدءَ ارغوناں پروش دات کن انت وھدے کہ آھانی پِیلاں زیر بکن انت ۔گڑا ھانی چاکرءَ گُشیت کہ لشکر ءِ تہءِ اُشتراں یکجاہ کن اِت ،آھانی سرءَ دار بہ لڈ اِت ءُ آھاں آس مان دار اِت ءُ دیم پہ ارغون لشکرءَ دیم بہ دئیت ۔اُشتر ءُ آھانی سرءَ لڈّاتگیں دارانی سرءَ آسی برانزانی گندگءَ گوں ارغونانی پِیل بےسار بنت ءُ وتی لشکرءَ وت لگت دے انت۔ بلوچ لشکر وھدے کہ ھانیءِ سوج ءَ زیر ایت گڑا اشیءِ آسر ھما درکئیت کہ ھما ھانی ءَ گشتگ ات ۔ءُ اے رنگءَ بلوچ لشکر ھانی ءِ بودشتانی سوبءَ یک بےسوب بیوکیں جنگے ءَ باج بر انت۔
اِے جنگانی تہءَ ھانی ءِ کِرد ءَ ڈاکٹر شاہ مھمد مری اِے وڈءَ گیشینیت کہ من نہ زان آں کہ رند ءُ لاشار ءِ سی سالی جنگءَ راجکاری (سیاسی) بگش آں یا کہ نہ ،قندھار ءِ زلنون بیگءِ بلوچستان ءِ سرءَ قوضہ ءِ کوشست ءُ گھگیریءَ راجکاری بگش آں یا کہ اناں، رِندانی داں ملتانءَ پروش ورگ راجکاری اِنت یا کہ نہ، من اِے گشگ لوٹ آں کہ اِے دراھیں مرحلہ ءِ شوربندی زالبولےءَ ٹہینتگ انت، ھما زالبول کہ آ چہ وتی دوستدار ءُ دشتارءَ رد دئیگ ءُ پُلگ بیتگ ات۔ چاگردی استحصال ءِ آماچ بئیگ ءَ ابید ھم اِے جنگانی تہ ءَ ھانی وتی کرد ءِ سوب ءَ راج ءُ وتن دوستی ءِ مزنیں دروَرے جوڈ بیت۔ آ پیش داریت کہ درساں چہ پیش وتن ءُ آئی ءِ مردم ۔ آئی ءِ ھمے کرد آئی ءِ شانءَ دو ھمینچو کن انت کہ آئی ءِ سرءَ ھمک بلوچ ءَ ناز اِنت۔
اگاں ما بلوچ راج ءِ گْوستءَ بہ چاریں تَہ مارا زالبول لائکِ پھریں کردے ءَ گندگ ءَ کاینت۔ آ مائی بیبو بہ بیت ،مائی زینب ءِ کرد بہ بیت یا مھنازءِ مزنیں کرد۔ ھماہانی رنگ ءَ بگندئے ھانی ءِ کرد درساں چہ پدّرتر بہ بیت پرچا کہ یکے وَ آ چاگردی روشتانی ارجان لگ اِت کہ نہ تھنا آئی ءِ مھر چہ آئیءَ پلگ بیت بلکیں آ یک سردارے ءِ زوراکیءِ دیمپان ھم بیت۔ اشیءَ چہ ابید ھم ھانی ءِ تہءَ ما آجوئی ءِ جوزہ ءُ راج ءُ وتن ءِ گوما مھر ءِ ندارگ ءَ دیست کنیں۔ ھانی ءِ کرد ءِ چارگ ءَ چہ اِے راستی پدّر بیت کہ ھانیءَ راجی نپ وتی جندءَ چہ دیمتر کتگ انت، کہ اِے مارا تُرک بلوچ جنگ ءِ چارگءَ گوں گندگ کئیت ۔اگاں ھانی یک لس زالبولے بیتیں گڑا آئیءَ بیر ءِ ھساب ءَ ترکانی ھلاپ ءَ بلوچ ءَ را جنگی شؤربندی نہ ٹہینت ءُ نہ دات۔ بلے ھانیءَ وتی راجدوستی ءِ شھمیں درورے دات ھمے ھاترءَ راجدپتر ھانیءَ یک جتاھیں بستارے دنت۔ بلوچستان ءِ شھر کوئٹہ ءَ کوہِ مرڈدار ( کوہِ مردار) ءِ دامنءَ ھانیءِ تھت (تخت) بیتگ۔ مروچاں ھمے ھلکءِ نام تختِ ھانیءَ چہ لگشتگ ءُ تختانی جوڈ بیتگ۔ اِے ھلک رِند گڑھ ءِ دیمءِ کوہ ءِ دامنءَ اِنت۔ چش ھم بیت کنت کہ آ زمانگءَ اودءَ چاگردی سوڈگ بیتگ انت کہ آھانی زمہ واری ھانیءَ گوں بیتگ انت پرچا کہ اشیءَ ابید دگہ ھچ دلیل گندگءَ نئیت کہ اِے ویرانیں ھلکءِ تہءَ اِے تخت ءِ مانا چی اِنت۔
سرداری زوراکی ءِ وپاداری ءِ جتگیں ھانی کہ آئی ءِ باراھا اے نامدار اِنت کہ وھدے شئے مرید پیریءَ واتر رِندانی ھلکءَ کئیت گڑا آئی ءِ جاورءِ گندگءَ پد ٹِک ءِ بازیں معتبر چاکر ءَ گوں دزبندی کن انت کہ ھانی ءِ سُھناں بہ دئے ءُ آہیءَ شئے مرید ءِ ھوالہ ءَ کن۔ چاکر آھانی گپاں رد نہ کنت۔ آ ھم اِے چیزءَ زانت کہ آ ھانی ءِ مھر ءِ کٹّگءَ سوبین نہ بیتگ، بگندئے آہیءَ اے گپ ءِ سما بیتگ کہ ھانی پہ تھنا شئے مرید ءَ جوڈ بیتگ۔ آئیءَ اِے ھم دیستگ کہ ھانی اِے استحصالءَ ابید ھم بلوچیت ءِ درورے مان اِتگ۔ ھؤ ،بگندئے آئی ءَ اِے سما کتگ کہ اِے ھستیءَ آئی ءِ ھکیگیں منزل بہ رسیت۔ اِے ھستی کہ زند ءِ تہ ءَ دوزہ ءَ روان دئیگ بیتگ اِے بھشتءَ روان دئیگ بہ بیت۔ بگندئے چاکرءَ اے گپءِ مالومداری بیتگ کہ گوں ھانیءَ زلم بیتگ، پمشکہ اے زلمانی بدل دئیگ ءِ وھد اتکگ ءُ اشیءِ بدل تھنا اے بیت کنت کہ ھانی ءُ شئے مرید کہ یکیں منزل ءِ راھی انت آ ھوار بہ بنت۔ گڑا اے رنگءَ چاکر ھانیءِ سُھناں دنت۔ چہ اشیءَ پد ھانی ءُ شئے مرید چہ اِے کِشکءَ در کپ انت۔ اے روایت نامدار اِنت کہ اِشیءَ چہ پد اِے دوئین ھچ کسءَ نہ دیستگ انت بلے یک روایتے ءِ ھسابءَ ھانی ءِ مانش ڈھاڈر ءُ سبیءِ میانی ھلکءَ یک کسانیں کوہے ءِ سرءَ است اِنت ۔
بلوچ اسٹوڈنٹس ایکشن کمیٹی
