بلوچ اسٹوڈنٹس ایکشن کمیٹی ءِ چارمی بنجاہی کمیٹی ءِ دیوان کماش شبیر بلوچ ءِ سروکی ءَ برجم دارگ بیتگ۔
ماتی زبانانی میان استمانی روچ ءِ درگت ءَ عبدالکریم شورش ءُ عبدالعزیز کرد ءِ یات ءَ مستونگ ءَ مراگشے برجم دارگ بیت اِنت۔
بلوچ زمین ءِ سر ءَ ودی بیتگیں اوبادگے ءَ بیھ وتی عمل سرجم ءُ گُڈی پہمگی نہ اَنت بلکیں ہمک عمل ءُ کار ءِ تہ ءَ ہمک روچ ءُ ماہ ءُ سال ءِ ھساب ءَ گہتر، شرترءُ مہکم تر کنگ ءِ ھیال زیرگی اِنت ءُ جہد کنگی اِنت۔
چئیرمین شبیر بلوچ
بلوچ اسٹوڈنٹس ایکشن کمیٹیءِ چارمی بنجاہی کمیٹی ءِ دیوان کماش شبیر بلوچ ءِ سروکی ءَدو پُریں روچاں برجم دارگ بیتگ۔ دو روچی دیوان ءِ بن گپ گل ءِگوستگیں اھوال، نگدکاری، گَل کاری،ہندی ءُ میان استمانی سیاسی جاورھال ءُ آؤکیں گامگیج بیتگ اَنت۔ دیوان ءَ سرجمیں بنگپانی سر ءَ یک یک ءَ گپ ءُ تران ءَ پد پہ آؤکیں کاراں جتائیں فیصلہ زیرگ بیتگ۔
دیوان ءِاولی روچ ءِ بندات چہ کماش شبیر بلوچ ءِ رزا ءَ کنگ بوت ، اولی بن گپ گل ءِگوستگیں اہوال اَت کہ دیوان ءِ دیم ءَ پیش کنگ بیت اَنت، آئی ءِ تہ ءَ مزن کارگشاد ءِ اہوال، گل ءِ کُلیں کمیٹیانی اہوال کہ آہانی تہ ءَ لبزانکی، رسانکدری، فائنانس،بلوچ لٹریسی کیمپئین ءُ بلوچستان کتاب کاروان کمیٹی ءِ اھوا ل ہوار اِت اَنت۔ کمیٹیانی اھوالاں ہوار گل ءِ سرجمیں ھنکینانی سر ءَ ھیرتی ءَ گوں چمشانک ءُ صباء لٹریری فیسٹیول ءِ مراگشانی اہوالءُ ایدگہ کسان ءُ مزنیں اہوال دیوان ءَ ایر کنگ بیت اَنت۔
دیوان ءِ دومی بن گپ نگدکاری ءِ تہ ءَ سنگتاں گل ءِ کسان ءُ مزنیں نزوریانی سرءَ یک یک ءَ گپ ءُ تران کُت ءُ آہانی گِرگءَ پہ شور ءُ سلاہ اِش دات۔ سنگتاں سیاست ءُ سیاسی گلانی تہ ءَ نگدءِ سر ءَ درائینت ءُ گوشت کہ نگد ہما پدیانک اِنت کہ اشی ءِ گوزگ ءَ چہ جہدکارےچہ ہر وڈیں ردآشوبی روشتاں پاک ءُ پلگار بیان بیت ءُ نہ تہنا وتی سیاسی مکسد ءَ سر بیت بلکیں کاملیں آشوبے بیت ءُ در کئیت۔ دنیا ءِ ہمک راج یاکہ سیاسی گلاں نگدءِ چاگرد ءَ گوں سپر جتگ، آ مرچی بازیں وتگڈیں گپچلاں چہ پاک وتی دیمروئی ءِ سپر ءَ مہکمی ءَ گوں گام جنان اَنت، اشی ءِ مستریں سوباں چہ یکے کہ آہاں وتی سیاسی عمل ءِ شر ءُ گہترکنگءَ پہ نگدکتگ ءُ راجی نپ ءُ سیت پہازیتگ اَنت ۔ ہمے پیم مارا وتی راجی نپ ءُ سیت چارگی اَنت ءُ ہمک ردیں عمل کہ راج ءَ پہ تاوان اِنت نگد ءِ راستیں عمل ءَ گوں شر کنگی اَنت پمیشکا نگد ءِ چاگردے ودی کنگ ءِ ہاتر ءَ پہ المی اِنت کہ نگد کنوک ءُ نگد گوشداروک ءَ ہردوئیناں سگگ ءِ ہاٹیگ بہ بیت۔ اوپار ءُ سگگ ءِ ہاٹیگ ءَ گوں نہ تہنا نگد ءَ گوں بندوکیں آشوبی چاگردے ودی بیت بلکیں جہد ءِ تہ ءَ ہمک ڈولیں ردیں عمل ءُ روشت دارگ ءُ شر کنگ بنت۔
دیوان یک روچے ءِ آسر ءَ پد دومی روچ ءَ گوں کماش ءِ رزا ءَ بندات کنگ بوت ءُ سیمی بن گپ گَل کاری ءِ تہ ءَ سنگتاں گل کاری ءِ سر ءَ نبشتگیں وتی پیشنہاد ونت اَنت کہ آہانی تہ ءَ اے میان ءَبیتگیں کار ءُ پہ دیم ءِ کارانی گہتریءُ نوکیں کارانی نیمگءَ روگ ءِ سر ءَ گپ ءُ شور ہوار اِت اَنت۔ سنگتاں گَل کاری ءِ سر ءَ گپ کنان ءَ گوشت کہ گوستگیں سالے ءُ کپے ءِ تہ ءَ گل ءَ وت ءَ کساس سرجمیں بلوچستان ءَ نہ تہنا سر کُتگ بلکیں بلوچ ورنایانی ہاتر ءَ زانت ءُ زانشتی چاگردے ودی کنگ ءَ ہم یک ھدےءَ سوبین بیتگ۔ اے گل ءِ مہکمی ءُ سنگتانی ہمت ءُ ہاٹیگ ءِبرورد اِنت کہ ادارہ ءِ کار ءُ پالیسی روچ پہ روچ شرتر ءُ گہتر بیان اَنت، بلے بلوچ زمین ءِ سر ءَ ودی بیتگیں اوبادگے ءَ بیھ وتی عمل سرجم ءُ گُڈی پہمگی نہ اَنت بلکیں ہمک عمل ءُ کار ءِ تہ ءَ ہمک روچ ءُ ماہ ءُ سال ءِ ھساب ءَ گہتر، شرترءُ مہکم تر کنگ ءِ ھیال زیرگی اِنت ءُ جہد کنگی اِنت۔ پہ بلوچ ورنائےءَ وتی ہمک عمل پہ راجی جُہدءَ کسانیں بہرشتے سرپد بیگی اَنت، مدام گیشءُ گہتر ءَ چہ گہتر ءِ نیت ءَ گوں پہتوئیں پگرءَ سیاسی عمل جنزینگی اِنت دانکہ آ ہستیں ہرڈولیں گامبیلانی (چیلنج) دیمپانی ءَ کُت بہ کن اَنت۔ بلوچ ورنایاں وت ءَ پگری ہوالہ ءَ انچو پُہتو کنگی اِنت کہ آئی ءِ ہمک سیاسی عمل یک دلجمیں آسرے ءِ دیگ ءَ ہوار آ ہمک ڈولیں گرانی ءُ اڈاندانی دیم ءَ دیرچاری ءَ گوں بہ اوشت ایت ۔ پگری ہوالہ ءَپُہتو ءُ وتی عمل ءِ سر ءَ بیسہ داروکیں جہدکار بیھ پُشت نہ کنز ایت بلکیں مدام اڈاندانی دیم ءَ مہکمی ءَ اوشت ایت ءُ آہاں توجیل کنگ ءِ جہد ءَ کنت۔ اے پُہتوئی ورنایاں چہ وتی بلوچ زمین ءِ لگتمالی ءِ راستی ءُ ایدگہ دنیائی زانت ءُ زانشت ءِ پہمگ ءُ دربرگ ءَ چہ کئیت پمشکا ہمک عمل گوں سنچءُ شعور ءِ عینک ءَپہ راجی سیتاں کارمرز گی اِنت۔ہمے پیم مرچی بلوچستان کتاب کاروان ءِ وسیلہ ءَ بلوچ ورنا ءُ مہلوک ءِ تہ ءَ وانگ ءُ زانشت ءِ ماھول ودی کنگ بہ بیت یاکہ بی ایل سی ءِ وسیلہ ءَ بلوچستان ءِ وانگی وادارہانی زوالی ءِبگیری ءَ توار چست کنگ ءُ آہاں شر کنگ ءِ عملی جہد بہ بیت، گل ءَ نودربر گل ئے ءِ بستار ءَ پہ بلوچ راجءَ اے کارانی عملی دروشم ءَ جہدے کنگ ءَ اِنت ءُگلءَمرچی سوبینی ءِ کشک ءَ وت ءَ ہمدپ کتگ۔
دیوان ءِ گُڈی بن گپ آؤکیں گامگیج ءِ تہءَ سنگتانی داتگیں شور ءُسلاہاں چہ پہ گیشیں کار ءُ کاراں شرترءَ چہ شرتر کنگ ءِ واستہ نوکیں فیصلہ زیرگ بیت اَنت۔آؤکیں وھد ءَ صباء لٹریری فیسٹیول ملیر ءُڈی جی خان ءَ برجم دارگ بیت،میان استمانی ماتی زبانانی روچ ءِ درگت ءَ عبدالکریم شورش ءُ عبدالعزیز کرد ءِ یات ءَ مستونگ ءَ مراگشے اڈ دیگ بیت، بلوچستان کتاب کاروان ءَ مہکم کنان ءَنوکیں سال ءِ درگت ءَ سرجمیں بلوچستان ءَ کتاب میڑہانی مہمےجنزینگ بیت ءُ آسر ءَ سیمینارے اڈ دیگ بیت، بلوچ نودربر سیاست ءِ سرءَ شال ءُ اوتھل ءَ سیمنار اڈ دیگ بیت، بلوچ لٹریسی کیمپئین ءِ کاراں گیش مہکم کنا ن ءَ بلوچستان ءِ بنداتی وانگی ادارہانی جیڑہانی سر ءَ نکان شِنگ کنگ ءَ ہوار وانگجاہانی جم کتگیں ڈیٹایانی یک بریفینگ سیمنارے اڈ دیگ بیت، بلوچستان کتاب کاروان، رسانکدر ءُ کیرئیر کونسلنگ ءِ سر ءَ کتابُک اڈ دیگ بیت ءُ ماتی زبان ءِسر ءَ براہوئی ءَ کتابُکے چاپ ءُشِنگ کنگ بیت۔ اشاں ہوار بنجاہی کمیٹیءِ سئے باسک شیرازبلوچ، فوزیہ بلوچ ءُ مصدق بلوچ ءِ چہ بنجاہی کمیٹی ءِ اُگدہاں دزکشی منگ بیتگ ءُ پہ ہورکیں اُگدہاں خضدار ھنکین ءِ گوستگیں کارمستر جویریہ بلوچ، شال ھنکین ءِ ہستیں کارمسترفہد بلوچ ءُ گوستگیں کارگُشاد علی بلوچ پہ بنجاہی کمیٹی ءِ ہاتر ءَ گچین کنگ بیتگ اَنت۔
دو روچی دیوان ءِ سرجمیں بہرانی سر ءَ یک یک ءَ دلجمی ءَ گوں گپ ءُ تران ءَ پد آؤکیں گامگیج ءِ تہءَ جتائیں فیصلہانی زیرگ ءَ گوں دومی روچ ءِ آسر ءَ پد کماش ءِ رزا ءَ چہ آسر کنگ بیتگ۔
بنجاہی جارکش بلوچ اسٹوڈنٹس ایکشن کمیٹی
