انگولا نا جدوجہد

انگولا نا جدوجہد

جاچ: سہیل بلوچ

انگولا چار لَک اشتادو یک ہزار (481000) مربع میل ئنا اَسے افریقی ڈیھ ئسے،  اَرا پاکستان نا کل کَچ آن یَک ءُ نیم چَرخ زیات بھلن ءِ۔ برصغیر افریقہ ٹی انگولا نا سید جاندُم ءُ قبلہ نا نیمہ غا ٹی ءِ انگولا نا قُطب ءُ قبلہ نیمہ غا ( زائر ) نا سیم ءِ داڑتون اَوار جاندم ءُ دے ٹک نیمہ غان تہ زیمبیا ءِ ایلو تنیا جاندم اٹ تہ نمیبیا نا سیم لگک (زائر ، زیمبیا ، نمیبیا) دا ہر مُسٹ ءَ ملک آک انگولا نا گاوانڈی (ہمسایہ) ڈیھ آکو انگولا نہ تنیا قِبلہ نیمہ غا بحرالاوقیانوس نا ہزار میل مُرغنو کنارہ اس لگک، انگولا ٹی پرتگال سامراج آن مُست گیشتر مُسے قوم ئنا مخلوق آباد اس، ارافتہ وجود کئی ہزارا سالاتیان انگولا ٹی مسونے او مُسے قوم  آن اسٹ (Mbundu) کمبنڈو ءِ اَرا نا مخلوق انگولا نا نیام ئٹ آباد مسونے، ایلو قوم (Bakongo) باکونگو ءِ اَرا نا مخلوق انگولا ٹی مون قطب نا نیمہ غا آباد مسونے ءُ مُسیٹمیکو (ovimbundu) اووِمبُنڈُو ءِ اَرا نا مخلوق انگولا نا جاندمی نیمہ غا آباد مسونے۔ دا ہر مُسٹ آ قوم آتا بولیک، دود ؤ ربیدک اسٹ ایلو آن باز خڑک مسونو۔

اینو آن پنچ سد سال مُست افریقہ نا دا ہر مُسٹ ءَ راج آتہ تینا سلطنت ءُ تینا بادشاہت آک اسر۔ او وخت ئنا بندغ تہ روزگار کِشت ءُ کشاری ، بزغری ، مُزوری یا گُڑا پاوالی آ مخلوق تینا گزارہ ءِ شکار ئٹ کریکہ۔

مخلوق نا اندا خید ءُ خواری تہ کَٹ ئٹ سلطنت آک ام اوار اسُر۔ کس ئس شکار کروس تو بادشاہ نا بشخ ءِ سر کریکہ، کِشت ءُ کشار تیان اَم برم نا نیمہ بادشاہ تا اَس، اندُن ایلو خواری کش آتیان تینا بشخ ءِ ام الکُرا دا سلطنت آتا قانود اس اگہ کس دا قانود ءِ رَد کروس تو اودے سزا تننگاکہ۔

ہر سلطنت تون گڑاس اندونو بندغ اس ارافتے او غلام جوڑ کریسُس اوفتیٹی گڑاس سلطنت نا جوڑ کروکا قانود نا سِزا وار اسُر یا گڑاس سلطنت آن پیشن نا بندغ اسُر او دافتیان تینا گرج ئنا کاریماتے الکُرا یا او دافتہ سودا ءِ ایلو سلطنت یا ایلو ڈیھ آتون زَر ئنا بدل ئٹ خلکُرا۔

سلطنت آتا بادشاہ تون اَسے اَسے اندُنو ٹولی اَم اس کہ ارافک بیرہ تیار تیار کُنگرا۔ بادشاک اوفتے ایلو مخلوق آن بُڑز  اُرارہ. مخلوق ءِ دا نا برابری نا زی آ جیڑہ باز اس ولے داخس ہم الئو کہ او تینا تینٹ نسخان ءِ کیر۔

انگولا جہان نا مونا اَسے آبادو ڈغار ئس چاہنگک، دا نا پمہ، چاہ پَتی ءِ بھلو نرخ ئس ارے۔ انگولا ٹی قدرتی مڈی تیل ئنا اَم ہچو کمی اَس اف۔ جہان انگولا نا آزاتی آن مُست اونا نرخ ءِ بحرالاوقیانوس نا ساحل آن خلککہ کہ اراتم پرتگال انگولا ءِ تینا کالونی اس جوڑ کریسُس تو جہان نہ باز آ بھلا تاغت ور ءَ راج آتا کوشست اندا اس کہ اوفک انگولا ٹی پرتگال تو اوار بحرالاوقیانوس نا دیر ئٹ زَر خلیر ءُ تینا کَٹ ءِ ارفسہ کیر۔

ساڑی آ دور ئٹ انگولا برصغیر افریقہ نا اسے آزاتو ملک ئسے. ارا بھلو جدوجہد ئسے آن گڈ پرتگال آن آزادتی الک ۔ 1473 ٹی انگولا نا شار “لوانڈہ” (اینو پگہ انگولا نا دارالحکومت ءِ) ٹی روزگار ئنا بابت ئٹ پرتگالی واپارک برسہ کریر۔ او تینا اَسے خلق ئس آباد کریر پرتگالی واپارک انگولا نا مخلوق ءِ خنار اوفتہ دود ءُ ربیدہ غاتہ سادہی ءِ خنار تو پین چالاخ مسر۔

اے وخت ءَ اوفتہ مسخت روزگار نا اسّکہ تو پرتگالی واپارک تینا روزگار نا بنا ءِ غلام ہلنگ آن کریر۔ اوفک سلطنت نا بادشاہ تیان غلام بہا اَٹ ہلسہ کریر ءُ اندا غلام اتیان بزغری کرفسہ کریر۔

اندا رد ئٹ بادشاہ کن ام جوانو روزگار ئسے نا بناء مس، داڑتون اوار پرتگالی واپارک تینا روزگار نا بناء ءِ بکانگو سلطنت نا بادشاہ تیان کریر۔ بکانگو سلطنت نا بادشاہ تا بھلو تاغت ئس انگولا ٹی اس دا روزگار برجاہ مرسہ اندُنو نیمہ سے آ ہنسہ کرے کہ بادشاہ تہ غلام اک خلاس مرسہ کریر۔ بادشاک تینا مخلوق ءَ زلم زوراکی ءِ ودفیر، تینا مخلوق نا سودائی ءِ خلسہ کریر۔ دا ردئٹ پرتگالی واپارک بکانگو سلطنت نا بادشاک تینا روزگار ءِ ودکی ہتنگ کن سَلہ کریر کہ اوفک کمبنڈو سلطنت ءَ حلمہ کیر ءُ اونا مخلوق ءِ غلام جوڑ کیر او زَر مُچ کیر۔ اراتم پرتگالی واپار آتو اوار بکانگو نا بادشاک کمبنڈو سلطنت ءَ قوضہ کننگ کن سر الکُر تو کمبنڈو سلطنت نا بادشاک بکانگو سلطنت نا بادشاہ ءُ پرتگالی واپارتون جنگ تسر۔ او ہچ تیار الور کہ ننا مخلوق ءَ دا تاغت ورک قابض مریر۔ بھلو مزاحمت ئسے آن گڈ پرتگالی سامراج سلطنت کمبنڈو ءِ 1680 اٹ تینا تاغت نا زور ئٹ قوضہ کرے ءُ تینا روزگار ءِ برجاہ تخا۔ مخلوق ءَ زلم ءِ تروند کرے۔ کمبنڈو سلطنت نا مخلوق نا ڈغارتے پلسہ کریر ءُ اوفتیان اوفتہ جند ئنا ڈغار اتئے کاریم ہلسہ کریر

داڑان گڈ انگولا نا مُسٹمی سلطنت ءِ ہم تاغت نا زوراکی اٹ قوضہ کریر، اونا مخلوق ءِ غلام جوڑ کریر، اوفتیان کاریم ہلسہ کریر ءُ جنداک تا عیش کرسہ کریر۔ بھلو وخت ئس پرتگالی واپارک ءُ بکانگو سلطنت نا بادشاہ تہ دا روزگار چلینگسہ کرے۔ پرتگالی واپار تہ انگولا ٹی سامراجی آ نیت پاش مس۔ اراتم پرتگالی واپارک تینا قوضہ ءِ جوان سوگو کریر ءُ بکانگو سلطنت نا بادشاہ تیتون تینا روزگار ءِ ایسر کننگ نا نیمہ غا درسہ کریر۔ گڈسر ئٹ ہمو دے بس کہ پرتگالی سامراج سلطنت بکانگو ءِ ہم قوضہ کرے، ولدا مچ انگولا غا راج پرتگالی سامراج نا مس ءُ انگولا نا سرزمین ءَ پنچ سد سال قابض مس، بیدے اسے قانود ئسے آن بیرہ پرتگال سامراج ءُ انگولا نا مخلوق نا سیالی غلام ءُ آقا نا اس

انگولا نا مخلوق انداخس غلام جوڑ کننگاسس کہ او تینا حق ءِ تتوکہ، اودے اونا دیہاڑ ئنا ام سماء الو او غلامی نا ہمو حالت ءِ سلوک اس کہ او زند مچ آزاتی النگ کتوکہ، اونا کل آن بھلا وجہ تعلیم نا کمی اس۔ انگولا نا مخلوق انداخس پرتگالی سامراج آن کالونائزڈ اَس کہ او اسکول، کالج، یونیورسٹی تہ پِن ءِ انگہ تتوکہ کہ دا انت گڑاؤ مزاحمت تو مُر ئنا گڑا اَس ئس۔

پرتگالی سامراج نا انگولا غا قبضہ ءُ زلم زوراکی جوان گیشتر ئس۔ داکان یورپ اٹ جہان نا اولیکو جہانی جنگ نا 1914 ٹی بناء مس۔ دا جنگ آن انگولا نا مخلوق ءِ بھلو فائدہ اس دا مس کہ انگولائی مخلوق نا مِلی آ دا جنگ جوان اثر شاغسہ کرے مخلوق جوان شعور ئنا نیمہ غا انسہ کرے ۔ مخلوق ءِ تینا غلامی نہ چڑت لگہ او تینے ازات کنیگ نہ تُخ ءِ خنسہ کرے، مخلوق تینا آزاتی نا جہد ءِ بناء کرے۔ ولے پرتگالی سامراج مخلوق ءَ زلم ءِ گیشتر کرے، اوفتے ختم کریر ۔ پرتگالی سامراج خنا کہ مخلوق ئٹ سیاسی شعور بننگ ءِ، او تینا حق ئکن بش مننگ ءِ تو او 1920 ئٹ چٹ تینا قبضہ ءِ انگولا غا کرے ءُ جہان ءِ باور کرفے کہ دا کنا ٹکر ئسے۔ ولے پرتگال نا انگولا ٹی مسخت بیرہ لُٹ ؤ پُل اس۔ وخت اِنسہ کرے انگولائی مخلوق ءَ پرتگالی زلم برجاہ اس، ولے زلم ئنا بدل ئٹ سامراج ءِ انگولا نا مخلوق نا نیمہ غان جوانو مزاحمت ملاکہ تو مخلوق نا مزاحمت ءِ تورنگ کن سامراج 1927 ئٹ انگولا غا نوآبادیاتی نظام ئس جوڑ کرے۔ پرتگا تینا معاشی جیڑہ غاتے حل کننگ کن انگولا ٹی تینا لُٹ ءُ پُل ءِ زیات کرسہ کرے۔ تینا شیف طبقہ نا مخلوق ءِ انگولا غا اتسہ ءُ آباد کرسہ کرے۔ او انگولائی مخلوق نا ڈغارتے اوفتیان زوراکی اٹ الک ءُ تینا مخلوق ءَ بشخسہ کرے۔ اندُن مرسہ 1940 اسکان انگولا ٹی پیہن رنگی آ پرتگالی تہ تعداد  4400 اس، مونی اندُن 1965 ئٹ اِرا لکھ ءَ اِنا سر مس۔

پرتگالی سامراج نا انگولا ٹی لُٹ ؤ پُل جوان گیشتر اس او انگولا نا مخلوق ءِ زوراکی اٹ عیسائی کرفیرہ۔ مخلوق نا نیمہ غان ہم کم کم جدوجہد برجاہ اس۔ 1932 ئٹ “سالازار” پرتگال نا وزیراعظم مس سالازار ئسے فاشسٹ ئس اَس۔ سالازار انگولائی مخلوق ءَ انداخس زلم کرے انداخس تہ خلک کہ پرتگالی سامراجیت ئٹ کس دُن زلم کتوسس۔

اراتم اراٹمی جہانی جنگ نا بناء مس تو جہان اٹ گیشتر نوآبادیات آتیٹ آزادتی نا تحریک اک پیشن مرسہ کریر ءُ آزاتی الکُر۔ برصغیر ایشیاء ٹی ویتنام، انڈونیشیا، ہندوستان ءُ برما دا مُچ ملک اک آزاتی الکُر، چین نا ہم انقلاب خوش نام مس۔ دا جنگ آن گڈ آزاتی نا بھلو چرخ ئس برطانیہ ، فرانس ءُ افریقہ نا نوآبادی تیٹی تالان مس۔ دا کُل نوآبادکار اک دماغی حوالہ اَٹ تیار اسُر کہ ننے تینا نوآبادی تے زوت آزاتی تروئی تمک۔ ولے پرتگال ہچ انگولا ءِ تینا نوآبادی اس مننگ کن تیار الو، او معاشی حوالہ اٹ باز نزور ئس۔

انگولا نا مخلوق آ زلم ءِ پین گیشتر کننگ کن سالازار تینا اَسے اندرو پُولیس ٹیم اس جوڑ کرے ارا زوراکی اَٹ مخلوق ءِ چُپ کرفنگ نا کوشست ءِ کریکہ تو مخلوق تینا مزاحمت ءِ شاعری ٹی مونا ایسّکہ، تینا جہد ءِ نزور مننگ کن التوکہ ءُ دا گڑا ام سامراج اتیکن بھلو نسخان ئس اس۔ تو او انگولا ٹی اخس کہ ادبی تنظیم اک اسر کل ءِ ختم کرے۔ حالانکہ اوفتیٹی سامراج نا جند ئنا پرتگالی ادب ؤ زبان اَم اس ولے کُل ءِ بند کرے۔ انگولا نا مخلوق نا جہد گڑاس وخت ئکن نزور سلیس۔

خدا نا شان اُر کہ پرتگالی سامراج انگولا آن گڑاس ورنا خواننگ کن پرتگال ءَ رائی کرے کہ اوفک پرتگال نا منوگر مریر پرتگالی زبان ادب ءِ ہیل کیر او انگولا نا مخلوق ءَ پرتگالی زبان نا زی آ کاریم کیر۔ ولے مس دُن کہ سامراج نا جند ئنا رائی کروک آ ورناتیان گڑاس ورنا پرتگال ئٹ فاشزم نا خلاف جدوجہد ءَ یقین کریر۔ او ورناک پرتگال ئٹ  سوشلسٹ ءُ جمہوریت پسند ٹولی تون اوار پرتگال نا کُل نوآبادی تے ختم کننگ نا جدوجہد بنا کریر۔ دا ورنا تیٹی اسٹ اگستینیو نیتو اَس اَرا ڈاکٹری، ماریودی آند ادب نا نودربر اس ءُ مسیٹمی فرانسسکو چیز میئرو اَس ارا آزاتی آن مُست 1963 ٹی فوت کرے۔ دافتون پرتگال سوشلسٹ تحریک ئٹ اوار اسٹ ” ایملکار کئبرال ” ئس ارا گنی بساؤ (Guinea-Bissau) آن تعلق تخاکہ۔  گنی بساؤ ام پرتگال نا اَسے کالونی اَس ئس ارا افریقہ نا جاندومی نیمہ غان ءِ ارا اینو پگہ اسے آزاتو ملک ئسینا بابت ئٹ جہان ئٹ چاہنگک۔

ایملکار کئبرال، اگستینیو نیتو استو اوار پرتگال ئٹ (Agriculture  Engineering) نا طالب علم ئس اس ارا گنی بساؤ نا تحریک آزادتی نا راہشون اس ارا افریقہ نا کل آن بھلا سیاسی چاہندار نا حیثیت ئٹ جہان ئٹ چاہنگ ءَ۔

ایملکار کئبرال خواننگے خلاس کننگ تون تینا وطن گنی بساؤ آ بس، بننگ تون پرتگال اودے انگولا ٹی زراعت نا ملازمت ئس تس۔ کئبرال انگولا نا تہٹی آزاتی پسنداتون اندری رابطہ کرے۔ اونا کوشست آتیان 15 دسمبر 1956 ئٹ انگولا نا دارالحکومت لوآندا ٹی آزاتی نا اسے عظیم او تنظیم ئسے نا بنیات تخنگا اَراٹی انگولا نا کل قوم پرست یا ہیلو سیاسی تنظیم اک اوار مسُر۔ دا تنظیم نا پِن انگولا نا مخلوق نا آزاتی نا پِن ئٹ تخنگ ءَ ارا ایم پی ایل اے ( Movement People’s for the libration of Angola)  نا پن ئٹ جہان نا مون ءَ بس۔ ایم پی ایل اے نا اولی صدر الیدیو مچادو مس ارا انگولا ٹی بھلو وختس جہد کریسُس دا وخت اسکان ایم پی ایل اے تینا باسک اتیکن پَٹ و لُوٹ ءِ تیز کرے۔

1959 ئٹ انگولا نا ہمسایہ ملک زائر (ہراڑے بیلجیم قابض ئس) ٹی آزاتی نا جہد ئٹ ترندی بس، زائر نا مچ نظام سلیس تو اندا وخت ئٹ بھلو اثر اس انگولا غا تما مخلوق جوان بیدار مس ءُ تینا آزاتی نا خواست اٹ پیشن مس جاگہ جاگہ غا پمفلٹ بشخار۔ پرتگال اٹ داوڑ مالو ہچ متوسُس تو اوڑا بھلو بوج ئس بس اودے انگولا نا جتائی نا خُلیس ارفے۔ پرتگال ایم پی ایل اے نا باسک اتے ہیلی کاپٹر ئٹ ہوائی حلمہ کرسہ کرے بھلو مخلوق ئس خلک ءُ بھلوس بیگواہ کرے۔ اندا سال ئٹ اگستینو نیتو ام خواننگ ءِ خلاس کرے بس لوآندا غا سر مس۔ اگستینو نیتو ڈاکٹر ئس اس تو او مِلی نا ناجوڑاتہ علاج کننگ نا بنائے کرے۔ داڑتون اوار او تینا مخلوق ءِ سیاسی سوج ترسہ کریکہ۔ نیتو نا دا کاریم آن سامراج ءِ باز خُلیس ارفے ءُ جون 1960 ئٹ اودے زندان اٹ شاغا۔ نیتو نا گرفتاری آن گڈ انگولا نا مخلوق لوآندا ٹی ہزاراتہ حساب ئٹ پیشن مس او نیتو نا یلہ مننگ کن ہر نیمہ غا جُلوس کشار۔ مخلوق نیتو ءِ زندانی کننگ آن بھاش لار ئٹ ئس ولے پرتگال مخلوق ءَ violence نا استعمال ءِ کرے لوآندا ٹی پیشن مروک ءَ مخلوق ءِ مون پہ مون سُم شلا ءُ سِی بندغ خلنگار ءُ 200 نا کچ ٹپی مسر۔ دا زالمی آن مخلوق ئنا اُست ئٹ پرتگال ئکن اَسے لار ئس بش مس ءُ آزاتی نا تحریک پین بیدار ءُ مسلح جدوجہد نا بناء مس۔ مسلح جدوجہد مُستی ام اَس ولے داسہ پین زوراکی اَٹ مونا بس ءُ سامراج کن بلہ اَس ثابت مس۔

سال 1961 ئٹی مسلح جدوجہد ئٹ جوان ترندی بس ءُ زلم ئنا بدل ءِ ہمو وڑ تننگ نا بناء ءِ کرے۔ مخلوق پرتگال کن کِشت ءُ کشار ءِ بند کرے سامراج زوراکی کرے گڑا مخلوق ام تینا روایتی آ سلہ تے ارفے او کہنگ ءُ کسفنگ کن تیار مس۔ سامراج مخلوق ءِ خلنگ کن تینا روزگار ءِ واپس بناء کننگ کن جہاز آن حلمہ کرسہ کرے مخلوق باز نسخان کُنگ ولے تینا مسخت ان پدی گام ارفتو۔

پرتگالی خیال ئس کہ او مخلوق ءِ تاغت نا زور ئٹ خلک ءُ آزاتی نا تحریک ءِ نزور کننگ ئٹ سرسوب مس ولے دُن الو۔ انگولائی مخلوق، ایم پی ایل اے نا باسک ءُ زموارک اسیوار ولدا زندانی مسُر۔ اوفتہ آجوئی کن جہد کننگ ءَ، زندان ءَ جلہو مس  چِل بندغ ءِ خلنگا ءُ ولے مخلوق ام بدل ئٹ ہفت سپاہی خلک۔ اسیوار ولدا زندان ءَ جلہو مس دا وار بھلو مخلوق ئس خلنگ ءَ ارافتیٹ سئے سد آن زیات زالبول اسر۔ دا وار سامراج تینا زلمے جہان آن ڈکنگ کتو، جند ئناتہ فوجی تیان گڑاس ملازمتاتے الار ارافتیٹی اَسے کیپٹن ئس ام اَس۔

پرتگالی سامراج پین چال ئس کرے اوفک انگولا نا تہٹی آزاتی پسند آ باغی تے خلنگ ءُ بندی کننگ نا تیاری کرے۔  اوفتہ مخبری ءِ انگولا ٹی آباد پرتگالی مخلوق کریکہ تو انگولا نا جہی آ مخلوق تینا باغی تہ سلامتی کن پرتگالی مخلوق ءِ مخبری نا خطا اٹ خلسہ کرے داوڑ سامراج نا دا چال ام سرسوب متو۔ سامراج انگولا نا مخلوق ءَ فوجی آپریشن کرے ءُ دا آپریشن ئٹ کم سہ کم سِی ہزار بندغ کسفے۔

سامراج آن زلم ئنا بدل ءِ ایم پی ایل اے الککہ، ولے ایم پی ایل اے اونا کچ تاغتور الو، داڑتو اوار اخس کہ سامراج نا چال آک اسر اوخس ایم پی ایل اے منظم الو ۔ایم پی ایل اے نا مروک ءَ حلمہ غاک سامراج ءِ سخت پریشان کریسُر ولے سامراج  اونا بدل ءِ ارا ہموخس الککہ۔ ایم پی ایل اے نا سیاسی ءُ جنگی آ سنگتاک کُل زندان اتیٹی اسر اندا وجہ غان ام ایم پی ایل اے نزور مسوسُس۔ داڑن بیدس ایم پی ایل اے نا لیڈرشپ مچ ہیلو ہمسایہ ملک اتیٹی اَس۔

سال 1962 ئٹ اگستینیو نیتو اُلسی تاغت ئٹ زندان آن یلہ کننگا ءُ سامراج نا دُو آن پیشن مس ءُ کل آن مُست ایم پی ایل اے ءِ منظم کننگ کن ہمسایہ ملک زائر نا دارالحکومت “کنشاسا” غا تینے سر کرے۔ کنشاسا ٹی ساڑی ایم پی ایل اے نا صدر ، نیتو نا بننگ نا خوشی اَٹ صدارت ءِ یلہ کرے ۔ اگستینیو نیتو نا بننگ آن ایم پی ایل اے ءُ انگولا نا مخلوق تینا آزاتی کن جوانو تُغ خنسہ کرے۔ 1962 ئٹ ایم پی ایل اے نا کنشاسا اَٹ اولی قومی مجلس اڈ تننگ ءَ ہراٹی آزاتی نا سلوک آ جدوجہد ءِ پدی بناء کننگ نا سَلہ مس ۔

پرتگال ئٹ سالازار نا حکومت برجاہ اَس کہ سال 1963 اَٹ سالازار ایم پی ایل اے نا انگولا ٹی ساڑی آ سنگتاتے انگولا آن ختم کننگ نا سَلہ کرے۔ ایم پی ایل اے نا انگولا ٹی ساڑی آ اَر باسک انگولا آن پیشن مننگ ءَ مجبور مس۔ ایم پی ایل اے نا انگولا ٹی ساڑی آ باسک ءُ پیشن کنشاسا اَٹ نیتو ءُ ہیلو باسک اتہ سلہ مس کہ کُل ایم پی ایل اے تینا مرکز ءِ کانگو نا دارالحکومت “برازاول ” ئٹ تخر ءُ اولی ھند برازاول مرے تو اندا سلہ غا سنگتاک عمل کرسہ کُل بسر۔

ایم پی ایل اے برازاول ٹی  تینے جاگہی کننگ تو اوار کل آن مُست پرتگالی سامراج نا خلاف مسلح جہد نا تیاری تیٹی لگا۔ سال 1964 ئٹ برازاول ئٹ ایم پی ایل اے نا مجلس ئس اڈ تننگا اَراٹی تنظیم نا مُست ئنا کاریم اتے جوان تنقید مس، ایم پی ایل اے نا مجلس ٹی ساڑی آ سنگتاک محسوس کریر کہ ایم پی ایل اے پیشن ملک ئٹ زُنڈوک مرے ءُ قومی آزاتی نا ہیت کے داوڑ ئٹ آزاتی النگ مفک تو سَلہ اندا مس کہ ایم پی ایل اے تینا جند ئنا سرزمین آ کاہک ءُ تینا مخلوق نا نیام ئٹ مسلح جدوجہد ءِ تیز کیک مجلس ئٹ دا ام سَلہ مس کہ ہر کاریم کن جتاؤ تنظیمی ڈھانچہ اس جوڑ کننگے ءُ کُل سنگتاک تینا ٹکر نا جہد ءِ اوار بناء کیر۔ سال 1964 انگولا نا آزاتی  نا جدوجہد ءُ ایم پی ایل اے کن جوانو وختس ثابت مس ایم پی ایل اے ءِ پوسکن آزات مروک ترقی پسند ءَ ملک اتہ پارہ غان جوانو جنگی کمک اس رسینگاکہ۔ ایم پی ایل اے نا گڑاس گوریلا ہمو ملک آتیٹی جنگی تربیت الکسُر۔ ایم پی ایل اے تینے جوان منظم کننگ آن گڈ انگولا ٹی پرتگالی سامراج نا خلاف جوان تیزو جنگی جدوجہد ئسے نہ بناء ءِ کرے ولے دا وار پرتگالی سامراج جوان مات کنگ ءُ ایم پی ایل اے سرسوب مرسہ کرے۔ ایم پی ایل اے اندا وخت ئٹ تینا مچ مخلوق نا ہوش ءِ تینے آ کرے اندا سال ئنا آخیر ءِ اراتم انگولا نا ہیلو ہمسایہ ملک زیمبیا برطانیہ آن آزاتی الک تو ایم پی ایل اے تینا گڑاس سنگت زیمبیا غا رائی کرے ایم پی ایل اے نا مسخت دا اَس کہ انگولا نا قطبی سیم آن پرتگال نا خلاف  اَسے پوسکنو جنگ ئسے نا بناء ءِ کے۔ ولے زیمبیا نا حکومت ایم پی ایل اے نا سنگتاتے کمیونسٹ پارے ءُ زنداناتیٹی بند کرے۔ دا جیڑہ تیان بیدس آزات زیمبیا ایم پی ایل اے تو اَر وڑ نا کمک ئکن تیار ئس بلکہ اونا آزاتی نا جنگ ئٹ جنجال شاغتوکہ۔

18 مئی 1966 ئٹ ایم پی ایل اے “کابندہ” غا تینا جنگی تربیت الوکہ سپاہی تا اَسے ٹولی اس یلہ کرے ءُ پرتگالی سامراج ئتو مون پہ مون کرے دا جنگ انداخس تیز مس کہ پرتگالی سامراج مات کنسہ کابندہ غان نرنگ ءَ مجبور مس۔ انداوڑ ایم پی ایل اے کابندہ ءِ آزات کننگ ئٹ سرسوب مس (کابندہ ساڑی وھد ئٹ انگولا نا صوبہ سے ولے او وخت ءَ پرتگال ئنا کالونی نا ٹکر ئس اسکہ)۔

کابندہ نا آزاتی ان گڈ ایم پی ایل اے 1967 ئٹ انگولا نا قُطبی پارہ غا تینا جنگی سپاہی تے پرتگال نا خلاف جوان تیزو جنگ ئسیکن رائی کرے۔ اندا وخت ئٹ ایم پی ایل اے جوان تاغت ور اس تہٹی جوان منظم ءُ ہیلو ملک اتہ نیمہ غان بھلو جنگی کمک ئس اَس تہ۔ سال 1968 ئٹ ایم پی ایل اے نا صدر اگستینیو نیتو مُچ انگولا ٹی جنگ ئنا جار ءِ خلک۔ مئی 1668 ئٹ ایم پی ایل اے تینا جنگی آ سپاہی تے انگولا نا قطب ءُ دے ٹِک پارہ نا علاقہ تیٹی پرتگالی فوج ئنا خلاف تالان کرے۔ دا جنگ ئٹ پرتگالی فوج ءِ بھلو نسخان ئس مس۔ دا جنگ ئٹی ایم پی ایل اے انگولا نا باز بھلو ٹکر ئس پرتگالی سامراج اتیان الک، ہرا ٹکر حاضر ءَ وخت ئٹ اِرا صوبہ نا کچ ءِ۔ داسہ زیمبیا نا سیم آن الیس قُطبی علاقہ غاک ءُ جاندومی علاقہ غاک ایم پی ایل اے نا قوضہ ٹی بسر۔ ایم پی ایل اے تینا آزات مروک ءَ علاقہ تیٹی مخلوق نا جند ئنا نظام ئس جوڑ کرے۔ دا آزات آ علاقہ غاک پرتگال آن چٹ جتا مسر۔ ایم پی ایل اے نا زمواریک پین زیات مسر۔ داسہ ایم پی ایل اے ءِ جنگ ہم کروئی اس آزاتی کن ہیلو دا آزات ءَ علاقہ تیٹی مخلوق کن کُننگ ءُ زندہ مننگ نا اَسے وسیلہ اَس ام جوڑ کروئی اَس، تو اندا گُرج اتے مونی تخسہ ایم پی ایل اے انگولا نا پاوالی آ جاغہ سے آ اَسے بھلو عوامی مجلس ئس اڈ تِس ءُ مجلس ٹی اندا سَلہ مس کہ مخلوق آزات مروک ءَ ڈغار تیٹ کِشت ؤ کشار ءِ تیز کے ءُ اواری اٹ تینا خاہوت ءُ راج ئکن جہد کرسہ کے۔ انگولا نا آزات ءَ مخلوق کِشت ؤ کشار ءِ جوان تیز کرے ءُ تینا جند ئنا فصل اتے جوان بھلو نرخ ئسے آ سمندری ؤ باڈری علاقہ تیان جہان نا بھلا بازار اتے بہا کرسہ کرے۔ اندُن ئٹ مخلوق نا پڈ ئنا ام کاریم مس ءُ ایم پی ایل اے کن ام جوانو معاشی کمک ئس مس۔

ایم پی ایل اے تون مخلوق نا دا رشتہ ءِ ختم کننگ کن پرتگالی سامراج اوفتہ تیار ءَ فصل اتے ہیلی کاپٹر تا کمک ئٹ زار چٹکار کرے ولے مخلوق ئنا مخلصی ءُ قومی جدوجہد تو اواری ءِ خلاس کننگ کتو۔

سال 1974 اٹ اراتم پرتگال نا صدر “اسنپنولانے” مس ۔ اول اٹ  اسنپنولانے پرتگال نا نوآبادی تے آزاتی تننگ نا سوال ءَ یکدم تُرند مس او اَسے صورت ہم انگولا ءِ آزاتی تننگ کہ تیار الو ولے ایم پی ایل اے نا منظم ءَ جہد انداخہ تیز ئس کہ سامراج انگولا نا آزاتی نا سوال ءَ ٹَک خلنگ کن مجبور مسر۔ انگولا نا گیشتر ڈغار ءَ ایم پی ایل اے نا حکومت ئس۔ ایم پی ایل اے انداخہ جنگی تاغت تخاکہ کہ او تینا ڈغارے سامراج آن دُوہی کے ولے ڈاکٹر اگستینیو نیتو پرتگالی حکومت آن خواست کرے کہ ” ننا سرزمین ءَ گیشتر قوضہ ننا ءِ داڑتو اوار نن اوخس تاغت تخنہ کہ نن تینا ہیلو زمین نا ٹکرے نے آن الین ولے نن امن ئٹ تینا آزاتی ءِ خوانہ ” سامراج ءِ دا ام اندازہ اس کہ ایم پی ایل اے ننا کچ داسہ تاغت تخک تو پرتگال نا حکومت انگولا نا آزاتی نا سَلہ ءِ کرے ءُ سال 1975 نا آخیر ئٹ انگولا نا آزاتی نا جار ءِ خلک۔ داسکان سال ئنا آخیر ئکن گڑاس تُو اَس تو انگولا ٹی گڑاس پین تنظیم اسر ارافتے مُست سامراج اک ایم پی ایل اے نا جہد ءِ نزور کننگ کن جوڑ کریسُر ارافتہ مسخت ئس کہ مخلوق ایم پی ایل اے آن چَپ تمے ءُ ننتو اوار مرے۔ تو اندا تنظیماک ایم پی ایل اے تون جنگ تسورہ، داڑن بیدس ایم پی ایل اے کن پین ہم رکاوٹ ودی مس ولے مخلوق نا اعتماد ءُ ایم پی ایل اے نا مخلوق دوستی دا کل جیڑہ غاک ختم مسر ءُ اندُن 11 نومبر 1975 نا دے آ ایم پی ایل اے انگولا ءِ پرتگال آن آزات کرے ءُ انگولا نا صدر ڈاکٹر اگستینیو نیتو ءِ ءُ وزیراعظم لوبونسیمیلنو ءِ گچین کرے، اَرا ایم پی ایل اے نا اولی صف نا جہدکار اسُر۔ داڑتو اوار تینا مخلوق ئکن ئسے جوانو حکومت ئس تشکیل تس۔ اینو اسکان انگولا اَسے آزات ءُ خوشحالو ملک ئسے نا شِگل ئٹ دنیا نا نقشہ غا ساڑی ءِ۔