بساک نا چارمیکو بنجائی کونسل سیشن
ماہ گنج بلوچ
بساک ،بلوچ نا دروشُم ء نشان تِروکا آدینک
بساک،روشنی بشخوکا چراغ
بساک،چاڑدہی آ توبے
بساک،زِرزِروکا استار
بساک،گواڑخ نا پُھل
بساک،سمندر نا کڑمبی
بساک،نوشکل نا تالان انگا ریکستان
بساک ہر بلوچ نا تہ ٹی ہمو بلوچ ءِ زندہ کنِنگ نا پِن ءِ کہ اونا اُست ئٹی، رغ تیٹی، جاگہ ئس آخا جاگہ ئس بلوچستان وہِک۔ اودے ہمو بلوچ آن سرپد کنِنگ و اونا دروشُم ءِ نشان تِننگ نا پِن ءِ کہ تینا ہمو تہہ ئنا بلوچ ءِ او گیرام کپ۔بساک نا جُہد ہمو بلوچ ءِ زندہ تِخنگ کِن ءِ کہ او جہان ئٹی رُست مریک تینا:
وتن دوستی،زبان دوستی،دود ربیدہ تون سنگتی، رسم و دود، وفاداری، دلیری،مہر و میبت،مہمانداری، عزت کِن ندر منِنگ، تینا بولی ءَ سلِنگ۔
بساک نا چارمیکو کونسل سیشن بساک نا مسخت آتے اُستا شاغنِنگ، اوفتے زندہ تخِننگ و جُہد آتے پین گیشتر مُستی دنِنگ کِن ءِ ۔ بساک نا مسخت بلوچستان نا ہر اسہ کُنڈ ئٹی، ہر اسہ گدان ئٹی علم و آگاہی بشخنگ، علم کِن جُہد کنِنگ، ہر اسہ بلوچ نا چُنا نا دُوٹی قلم و کتاب تِننگ، اودے گچین او کسر نشان تننگ، اودے اسہ گچینو تعلیم ئس تنِنگ، اگہ اودے دا حق مِلپ تو اوڑ کِن ہیت و گپ کنِنگ، اودے ہمت، حوصلہ و جیرت تننگ، اودے راج ئیا ویل و ڈکھ آتے آن سرپد کنِنگ ءِ کہ پگہ دے او تینا کسر آن مُر ہِنپ و تینا راج کِن او ہم دا جُہد ئٹی اوار تمے۔
بساک بلوچ قوم ءِ زندہ تخِننگ نا پِن ءِ، بلوچ نا دیہاڑ، دود، رسم ءِ و بولی تے زندہ تِخننگ نا پن ءِ۔ بساک نا کاریم بلوچ ورنا ءِ اونا دیہاڑ آن واخب کننگ، دیہاڑ ئٹی گدرینگوکا ہمو جُہدکار آتا جُہد ءِ زندہ تخِننگ ءِ کہ اوفتے او گیرام کپ و ہر اسہ بلوچ ورنا ءِ ہندا جُہد کار آتے آن رنگ ارفنگ ہیل تِننگ ءِ ۔ننا زبان آک، براہوئی و بلوچی ہرا کہ بیرہ ننے اسِٹ ایلو تون ہیت کنِنگ کِن اوار کپسہ،ننا دڑد و ڈکھ آتے پانِنگ نا دا لوز آکو و ننا بلسمی آ ثقافت نا دا رنگ آکو۔ بساک نا جہد ننا ہندا وسیع و ہنینا بولی تے زندہ تخِننگ ءِ و ننا اِرا یکّہ اِنگا بولی( براہوی و بلوچی) ٹی تران کروکا بلوچ ورنا تے اوار کنِنگ ءِ، اوفتے سرپدی تِننگ ءِ کہ نن اسِٹ اُن، ننا زبان ءِ مُستی دنِنگ ءِ او ہر بلوچ ورنا ءِ تومکا زبان تے ہیل تِننگ ءِ ۔
شاعر پائک کہ
لُمئ دُوّی کو داڑے اِرٹ او
سوچ اسِٹ ءِ خیال اسِٹ ءِ
یورپ تینا تہذیب نا زیہا اینو ہرا کاریم تے کنِنگ ئٹی ءِ ہمو گڑاک کیہئ سال مست آن بلوچ نا تہذیب نا بشخو۔ اینو مُچا جہان نیاڑی ءِ اونا حق ءِ تِننگ نا ہیت ءِ کنِنگ ئٹی و بلوچ کیہئ سال مُست تینا نیاڑی ءِ تینا نرینہ نا کچھ شرف بشخانے و اودے ہنداخس حق تسونے گُڑا او چاگلی نا شگل ئٹی مرے یا گُل بی بی نا۔ جہان ئٹی ہرا بلوچ نا پِن ءِ و جہان ئٹی اگہ او زندہ پانِنگِک تو تینا قوم او اونا تہذیب نا سوب آن ۔بیرہ تعلیم ننے اسہ وجود ئس تِفک ولے ننا وجود ءِ ننا قوم ئنا تہذیب ءِ زندہ تخنگ کِن ننے اسہ تعلیم ئسے نا گرج تمِک و ہمو تعلیم ء ننے تِننگ کن بساک جہد کنِنگ ئٹی ءِ۔
انت لکھوّ تینا نیاڑی نا ننگ ئکن، پردہ کِن و اونا
گُد ئکن
انت لکھوّ بڑز انگا ،خزمُل خنی ء خواجہ نا خنتا
شرف ئکن
بساک بلوچستان نا ہر کُنڈ ئنا بلوچ آتے اوار کنِنگ او اسہ کسر ئسے آ شاغِنگ نا پِن ءِ ، ہرا کہ قد و کاٹ ، رنگ و دروشم و زبان ئٹی یکہ مننگ کیرہ ولے اوفتا اُست آک اسٹ و اوفتا راج انا ویل آک اسِٹ او ۔
بساک تینا بروکا چارمیکو کونسل سیشن ءِ بلوچ نا ہمو نیاڑی تا پنا کرینے کہ ارا اینو قوم ءِ راہشونی بشخانو و دیہاڑ ئٹی گدرینگوکا کڑد آک
“آزات جمالدینی” و “عطا شاد” پنی ء ہمو کڑد آتا پن آ کرینے کہ او تینا شاعری ئٹ بلوچ نا زِند ءِ رژنا کریر ۔ بساک آگاہی و علم بشخنگ کن یکہ یکہ اِنگا خوانوکا جاہ تیٹی دیوان اڈھ ایتِک و بلوچستان کتاب کاروان نا پِنا کتاب بشخِک کہ بلوچ تینا جِند آن سرپد مرے و ہمے مُست ئنا بلوچ ءِ گیرام کپ و بلوچ نا پن مُستی کِن جہان ئٹی زندہ سلے۔ بساک نا بروکا کونسل سیشن ئٹی کابینہ نا بدلی نا مسخت جُہدکار اِنگا ورنا تے گچین کننگ، ہر اسہ ورنا ءِ جُہد نا موقع تِننگ ءِ او تینا دا جُہد ءِ مُستی ہندا وڑ برجا کنِنگ ءِ ۔
کر جہان ء رژنا نی ورنا کنا
روشنائی بشخوکا نی اِستار مر سنگت
