بلوچ تاریخ کی قدیم شخصیات
نبشتہ کار: ڈاکٹر فاروق بلوچ
چمشانک: سارہ بلوچ
اے کتاب بلوچ راج ءِ گوستانکی بامردانی سر ءَ انت۔ ایشی ءِ نبشتکار ڈاکٹر فاروق بلوچ اِنت کہ آ یک بندپتر نویسے ءُآئی ءَ بلوچ گوستانک سر ءَ بازیں کتابے نبشتہ کُتگ۔ اے کتاب کہ من ونتگ بلوچ راج ءِ راجدپتر ءُ آئی ءِ گوست ءِ سر ءَ نبشتہ کنگ بوتگ۔ اے کتاب نہ ایوک ءَ بلوچ ءِ راجدپتری پجار اِنت بلکیں بلوچ راج ءِ مڑاہ ، بہادری ءُ کربانیانی یک زندگیں اکسے ھم پیش دارگ ءَ اِنت۔
نبشتہ کار ءَ گوں مزنیں جھد ءُ راستی ءَ بلوچ راج ءِ ھما بامردانی نام گپتگ کہ آھاں وتی سرڈگار، وتی راجی استان ءُ وتی پجار ءِ ہاترا بے دروریں کربانی داتگ۔ کتاب ءِ اولی بہر ءِ تہ ءَ ندکار ءَ بلوچ راج ءِ بُنھشت ، آئی ءِ دود ءُ ربیدگ ، زبان ءُ ربیدگی پُشدر ءِ باروا جوانیں رنگے ءَ درشان کتگ۔ اے بھر ءِ وانگ ءَ پد وانوک ھمے سرپد بیت کہ بلوچ راج ھر وھد ءَ یک تپاکیں ءُ دور چاریں راجے بوتگ ءُ مھمان نوازی ، وپاداری ءُ ایمان داری ءِ وڑیں سپّت آں چہ سرچکاریں راجے بوتگ۔ نبشتہ کار بلوچ ءِ کوَھنیں چاگرد ءِ دود ءُ ربیدگ گوں راجدپتری شوھاز ءَ یکجا کنگ ءُ یک جوانیں رنگے ءَ پیش دارگ ءَ سوبین بوتگ۔
دومی بہر ءَ نبشتکار ءَ بلوچ راجدپتر ءِ کوھنیں بامردانی سر ءَ باوست کتگ، اے تاک چہ ھما بھادریں کردارانی توسیپ ءُ ستا ءَ سرچکار اِنت کہ آھاں وتی راج ءِ آجوئی ءِ ھاتر ءَ عمل ءُ بہادری پیش داشتگ۔ یک راجی ءِ بہادری، آئی ءِ زندگی ءِ مانزمان اِنت کہ اے بہر ءِ تہ ءَ میر چاکر خان رند، میر نوری نصیر خان ءُ دگہ بازیں بامرد ھوار اَنت کہ آھاں وتی کردار ءَ گوں راجدپتر ءَ وتی نام نکش کتگ۔
اے کتاب نوک باھُندیں پدریچ ءِ ہاترا یک ارزشت داریں سوگاتے پرچہ کہ آھاں وتی راج ءِ گوست ءَ گوں ھمگرنچ کنت ءُ آواں وتی پجار ءِ سر ءَ پھر بندگ ءِ سکین ءَ دنت۔ کتاب ءِ وانگ ءَ پد یک وانوکے ءَ اے سما بیت کہ وھدے راج وتی گوست ءَ مہ زانت گُڈا آ وتی باندات ءِ راہ ءَ پچ کت نہ کنت۔ بلوچ راج ءِ راجدپتر چہ کربانی ءُ جپاکشی ءَ سرّیچ اِنت ءُ اے کتاب ھمے کربانیانی یات کنگ ءِ یک جوانیں پَنتے کہ بلوچ ورنا ایشی ءَ بہ وان انت ءُ وتی بامرداں گیر بیار اَنت۔ تاریخ انسان ءِ گوست ءِ کِسہ اِنت۔ اے مارا ھمے سرپدی ءَ دنت کہ انسان ءَ چوں دیمروئی، جھد ءُ جَپائے پژدری ءَ زند ءِ پِڑ ءَ دیمروئی کتگ۔ انسانی چاگِرد ءِ دیمروئی ءِ تہ ءَ لھتیں انچیں بامرد ھست اَنت کہ آھاں بھادری ، سما ءُ سسّا ءُ کربانی ءِ گوما مزنیں کردے پیلو کتگ ءُ ایشاں راجدپتری بامرد گُش اَنت۔ مرچی ہمے بامردانی سوب اِنت کہ بلوچ یک زندگیں راجے ءِ نام ءَ زانگ بیت۔
انچوش کہ دگنیا ءِ ایدگہ راجاں وتی بامرد ھست اَنت ھمے پیم ءَ بلوچ راج ءِ تہ ءَ ھم بازیں بامرد ءُ مزن نامیں کِرد ھست اَنت کہ آھاں وتی راج ءِ رھشونی کتگ، اے بامرداں نہ ایوک ءَ جنگانی تہ ءَ بامردی پیش داشتگ بلکیں مرچی آ انساپ ، ازت ءُ احترام ءِ درور جوڑ بوتگ اَنت۔ ہمے ھستیاں وتی راج ءِ ہاترا کربانی داتگ ءُ آوانی سوبمندی مروچی ھم یات کنگ بنت۔ ہمے بامردانی بھادری ءُ ایمان داری ءَ بلوچ راج ءَ یک پجّارے داتگ۔ چُشیں بامردانی نام راجدپترانی تہ ءَ مدام زندگ مان اَنت پرچاکہ کردار کدی شموشکار نہ بنت۔ بلکیں آ پہ اَبد زندگ بنت ءُ ھمے وڑ ءَ بلوچ راج ءِ راجدپتر ءَ چُشیں بامرد سک باز اِنت کہ آہاں وتی سر پہ بلوچ راج ءِ باندات ءُ وشھالی ءَ ندر کتگ اَنت۔ بلوچ راج ءِ راجدپتر چہ ھما بامرد، رھشون ءُ بھادریں سراں سرچکار اِنت کہ آھاں وتی راج ءِ ہاترا کربانی داتگ ءُ گلزمین رکّینتگ کہ مرچی ما زند گوازینگ ءَ اِنت۔ اے بامرد نہ ایوک ءَ جنگول بوتگاں بلکیں راج ءِ سروک پُرمڑاہ ءُ شرپ مندیں کردار بوتگ اَنت، چہ ھمے بامرداں یکے میر چاکر خان رند انت۔
میر چاکر خان رند بلوچ راجدپتر ءِ تہ ءَ نامدار تریں بامرد ءَ چہ یکے کہ آئی ءَ رند ءُ لاشار ءِ قبیلہ یکجاہ کُتگ اَنت ءُ وتی یک منّظمیں تاکتے جوڑ کُتگ کہ آ مرچی ءَ ھم یک بہادریں ، ناتُرس ءُ دلیریں رہشونے ءِ نام ءَ ماں بلوچ راجدپتر ءَ یات کنگ بیت۔
میر گوھر خان
میر گوھر خان چاکر رند ءِ زمانگ ءِ زانتکاریں سردارے بوتگ کہ آئی ءَ بلوچ ٹک ءُ کٹمانی تہ ءَ امن ءُ ایمنی ءِ برجاہ دارگ ءَ مزنیں کردے پیلو کُتگ۔ آئی ءَ مدام اے پنت داتگ کہ راج پہ یکمشتی ءُ تپاکی ءَ یک وشھالیں بانداتے ءِ واھُند بوت کن اَنت۔
میر عمر خان
میر عمرخان یک دلیریں سردارے بوتگ کہ آئی ءَ وتی زمین چہ دژمناں رکّینگ ءِ مدام کوشست کتگ۔ آئی ءَ ہر وھد ءَ وتی زمین ، وتی راج ءَ پہ جیڑ اِتگ ءُ پہ وتی راج ءِ باندات ءَ گڈی وھد ءَ گوں دژمناں جنگ داتگ ءُ وت ءَ ندر کتگ۔
میر شھداد خان
میر شھداد خان بلوچ راج ءِ پُرمڑاہ ءُ مھروانیں رھشون ءِ بوتگ، آئی ءَ مدام وتی راج گوں ایمانداری ءُ انساپ ءِ نگاہاں چار اِتگ ءُ رہشونی کتگ۔
میر نوری نصیر خان
میر نوری نصیر خان بلوچ راج ءِ ہما رہشون بوتگ کہ آئی ءَ کلات استان ءِ ھاکمی گوں مھکمیں جوزگاں دیما برتگ۔ بلوچ سرڈگار ءِ سیمسرانی گیشّینوکیں رھشون ھنم نصیر خان بوتگ کہ آئی ءَ بنداتی وھد ءَ درستیں بلوچ یکّیں بیرک ءِ چیر ءَ آرتگ اَنت ءُ کلات استان ءِ بنھشت ءِ ایر کنگ ءَ سوبین بوتگ۔ نصیر خان ھما کردار بوتگ کہ آئی تہ ءَ رھشونی ءِ درستیں سپت مان بوتگاں کہ ھماھانی برورد ءَ آ مرچی ھم گپ ءُ باوستانی تہ ءَ زندگ اِنت۔
تابال کرمانی
تابال کرمانی بلوچ راجدپتر ءِ بنداتی دور ءَ یک مزن نامیں ءُ دلیریں ھستی ءِ رنگ ءَ دیم ءَ کئیت۔ آ نہ ایوک ءَ دلیریں سردارے بوتگ بلکیں زانتکار ءُ انساپ دوستیں ھاکمے ھم بوتگ۔ تابال کرمانی ءَ ششمی کرن ءِ میان ءَ بلوچ راج ءَ را یک منظمیں تاکتے ءِ جوڑ کنگ ءِ کوشش کُتگ۔ آ سائرس ءِ دمگ ءَ وتی آجوئیں سرکار جوڑ کنگ ءَ سوبین بوتگ ءُ آئی ءَ ھوار بلوچ راج ءِ تہ ءَ تپاکی، بھادری ءِ جزبہ ودی کنگ ءَ ھم سوبین بوتگ کہ آئی ءِ راھشونی مرچی ھم یات کنگ بیت۔ تابال کرمانی ءِ رھشونی ءَ بلوچ راج سیاسی ءُ جنگی ہردوئیں تک ءَ دیمروئی داتگ دانکہ بلوچ راج وتی ھاکمی ءَ برجا داشت بہ کنت۔ بلے گڈسر ءَ دژمناں آئی ءِ ھلاپ ءَ پندل سازی کُت ءُ آ یک داوتے ءَ لوٹارینگ ءَ پد نمیران کنگ بوت۔ بلے مرچی آئی ءِ نمیرانی بلوچ راجدپتر ءِ تہ ءَ جوزگ ءُ دلیری ءِ درور جوڑ بوتگ۔ تابال کرمانی ءِ کردار مارا اے سکین ءَ دنت کہ ھما کہ پہ آجوئی ءُ شرپ ءِ راہ ءَ کربانی دینت، آھاں چہ راج کدی شموشکار نہ بیت بلکیں آ مدام راج ءِ دلانی تہ ءَ زندگ مان اَنت۔
سیستان
سیستان (کہ مرچی ایران ءُ اوگانستان ءِ میانجی ءَ یک دمگے) بلوچ راجدپتر ءِ بنداتی اھد ءَ ارزشتداریں دمگے بوتگ۔ سیستان بلوچ راج ءِ بنداتی راجدپتر ءُ آھانی بامردانی (مزاریں جنگول) پڑ ءَ نامدار اِنت۔ بلوچ راجدپتر ءِ بنداتی زمانگ ءَ سیستان یک مزنیں ءُ گوستانکی دمگے بوتگ کہ اُودا بلوچ راج ءِ بازیں دلیریں سروک ءُ جنگول ودی بوتگ اَنت۔ اے ھما دور اَت کہ بلوچ راج وتی سرڈگار ءُ آجوئی ءِ رکّینگ ءَ مُدام جُھد ءَ اَت۔ سیستان ءِ اے بامرداں گوں وتی دلیری، کُربانی ءُ شرپ ءَ راج ءِ نام برز کُت۔ ایشانی تہ ءَ یک نامداریں نامے تھام کرمانی ئیگ اِنت کہ آ وتی دلیری ءُ راج دوستی ءِ سبب ءَ نامدار بوتگ۔ سیستان ءِ اے جنگولاں نہ تھنا وتی زمین رکّینتگ بلکیں بلوچ روایت، زبان ءُ دود ءُ ربیدگ ءِ پھازوک ھم بوتگ اَنت۔ ایشانی کردار ءَ بلوچ راج ءِ تہ ءَ راجدوستی ءُ بھادری ءِ جزبگ دیما آورتگ کہ تاں روچ ءِ مرچی زندگ اِنت۔ ھمے سوب اَنت کہ سیستان ءَ بلوچ راجدپتر ءِ (cradle of bravery) گش اَنت۔
حمزہ سیستانی
بلوچ راجدپتر ءِ تہ ءَ لھتیں انچیں بامرد اَنت کہ آھاں نہ ایوک ءَ وتی وھد ءَ بلکیں آؤکیں پدریچانی واستہ ھم رھشونی کردے پیلو کتگ۔ ایشانی تہ ءَ حمزہ سیستانی نامدار ءُ تاریخی رھشونے زانگ بیت۔ ڈاکٹر فاروق بلوچ ءِ پٹ ءُ پول ءِ رِد ءَ آ بلوچ ءِ کوھنیں ءُ فکری رھشونے بوتگ کہ آئی ءَ بلوچ ٹِکّانی مھکم کنگ ءُ بنجاھی وت واجھی ءِ جوڑ کنگ ءَ مزنیں کردے پیلو کتگ۔ حمزہ سیستانی ءِ سیادی گوں سیستان ءُ مکران ءِ بلوچ ٹِکّاں بوتگ۔ آ تھنا یک جنگولے نہ بوتگ بلکیں یک فکری ءُ نظریاتی رھشونے بوتگ کہ آئی ءَ بلوچ راج ءِ بنداتی پجار ءُ سیاسی تنظیم سازی ءَ کمک کتگ۔ ڈاکٹر فاروق بلوچ ءِ پٹ ءُ پول ءَ اے ھیال پدّر کتگ کہ حمزہ سیستانی حقیقی دروشم ءَ بلوچ راھشون ءِ بیتگ، نئیکہ آ بلوچ گوستانک ءِ تہ ءَ یک غیر بلوچ ءُ عربیں مردمے ءِ بستار ءَ زانگ بہ بیت۔ حمزہ سیستانی ءِ زند اے گپ ءِ درشان اِنت کہ رھشونی ءُ مزاحمت نہ ایوک ءَ چہ زور ءَ بلکیں چہ زانت ءُ سرپدی ءُ راج ءِ ھزمت ءِ تب ءَ ھم ممکن اِنت۔ آئی ءَ دمگی قبیلہ یکجاہ کتگ اَنت، آھانی جیڑہ گیش ءُ گیوار کتگ اَنت ءُ یک انچیں سیاسی ءُ چاگردی ڈھانچہ ءِ ٹھینتگ کہ رند ءَ بلوچانی سیاسی ءُ دودمانی چست ءُ ایرانی بُنھشت جوڑ بوتگ۔ حمزہ سیستانی بلوچ تاریخ ءِ تہ ءَ بنداتی آشوبی رھشون ءِ نام ءَ زانگ بیت اِنت۔ آئی ءِ رھشونی ءُ جہد ءَ بلوچ چاگرد ءَ نیشنلزم ءِ سرپدی دات کہ آوکیں پدریچانی واستہ یک درپشناکیں درورے۔ حمزہ سیستانی ءَ انگت ءَ بلوچ راج یک راجی بامردے ءِ بستار ءَ یات کنت۔ آئی ءِ زند پہ ورناہاں یک درونتے کہ پہ راج ءِ ھزمت ءَ ایمانداری، قربانی ءُ دلیری الّمی اِنت۔
بلوچ ءِ گوست ءِ سرا چمشانکے
بلوچ راج ءِ راجدپتر پرمڑاھیں داستان ءَ پُر اِنت کہ آئی ءِ ہر تاک دلیری ءُ وت واجھی ءِ زِریں آباں رُژناہ اِنت۔ گْوست ءِ سر ءَ یک چمشانکے ھما روچاں یات کنت کہ بلوچ راج پہ وتی دود ءُ ربیدگ، زبان ءُ سرڈگار ءِ رکینگ ءَ کوہ ءُ گیاباناں مھکم اوشتاتگ اَنت۔ اے راج کہ چہ مکران، سیستان ءُ کرمان ءِ سنگینیں دمکاں پیداک بوتگ اَنت، ھچبر زلم ءِ دیم ءَ سر جھل نہ کتگ۔ میر چاکر خان رند ءِ دلیری، میر گُھرام ءِ شرپ، میر عمر ءِ زانت ءُ زانِشت بلوچ گوست ءِ ھما چراگ اَنت کہ مروچی ھم راج ءِ ضمیر ءَ رژناہ کن اَنت۔ بلوچ قبیلہانی رھبند، آھانی روایتی سرداری، مھمانداری ءُ وفاداری اے گپ ءِ گواھی اِنت کہ آھانی تہ ءَ یک مھکمیں راجی ارواہے آباد بوتگ۔ بلوچ گوست ءِ تہ ءَ اے گپ پدّر بوتگ کہ بلوچ راج ءِ پجّار ایوک ءَ چہ آئی ءِ ٹک یا سرڈگار ءَ نہ اِنت بلکیں آئی ءِ آجوئی ءِ جیڑگ، آئی ءِ تپاکی ءُ راجدپتری کِرد ءَ چہ ھم ھست۔ گوست ءِ سرا یک چمشانکے ءَ اے راستی پدر بیت کہ بلوچ قوم ءَ وتی پجار، زبان، ءُ عزت ءِ پھازگ مدام وتی شان لیک اِتگ۔ بلوچ ءِ گوست مارا اے کلوہ ءَ دنت کہ ھما راج کہ گوں وتی گوست ءَ بندوک بہ بیت آ ھچبر ھلاس نہ بیت۔ بلوچ ءِ گوست ایوک ءَ راجدپتر نہ اِنت، اے یک چراگے کہ آؤکیں باندا ءَ رُژنائی دنت۔ مئے زمین، مئے دودمان ءُ مئے عزت ءَ ھوار ہمک شئے مئے پیریناں گوں بھادری ءُ قربانی ءَ رکّینتگ اَنت۔ میر چاکر خان رند ءِ دلیری، میر گُھرام ءِ شرپ، ءُ میر عمر ءِ زھرشانی مرچی ھم مئے دلانی تہ ءَ زندگ اَنت۔ مکران، سیستان ءُ کرمان ءِ کوھنیں بیاباناں مئے راج ءَ ایردستی ءِ زنجیر ھچبر نہ منّ اِتگ اَنت۔ سرداری ءِ رھبند، قبائلی یکمُشتی، مھمانداری ءُ وفاداری مئے ھونانی تہ ءَ رِد ءُ بند داتگ اَنت۔
ماں گوں وتی گوست ءَ بندوک ایں، ءُ ھمے گوست مارا اے سکین ءَ دنت کہ ھما راج کہ وتی پیرینانی قربانی ءَ شموشیت آ وتی باندات ءَ چہ زبھر بیت۔ ھمے ننگ، دلیری، ءُ قربانی ءِ جذبہ ءَ ماں ھم زندگ بہ داریں، دانکہ بلوچ راج مدام وتواجہ بہ مان اِیت۔ اے گوست ءِ توار اِنت، وتی گوست ءَ گوشدار اِت، بہ پھم اِت کہ مئے گوست مئے رژنائیں باندات ءِ راہ گیر اِنت۔
آسر
اے کتاب ءِ وانگ ءَ پد مارا سما بیت، یک راجے کہ آئی بندپتر چہ کربانی، بہادری، جپاکشی ءُ عمل ءَ سرچکار بہ بیت۔ آ راج کدی ایردست بوت نہ کن اَنت۔ پرچہ کہ مارا مئے گوستانک اے دلبڈّی ءُ سکین ءَ دنت کہ کربان بوھگ، زندگ بوھگ ءِ مانزان اِنت۔ مرچی اگاں نوری نصیر خان ءِ کربانی مئے دیما مہ بوتیں انت یاکہ میر چاکر خان رند ءِ کسہ مئے دلانی تہ ءَ زندگ مہ بوتین اَنت، بوت کت کہ مرچی ما راجدپتر ءِ تاکانی تہ ءَ یک زندگیں راجے ءِ وڑا زندگ نہ اِت اِنت۔ مرچی کہ ما وانگ ءُ گوشدارگ بئیں گڈا اے ھما بامرد ءُ جپاکشیں کارستانی جھد ءِ برورد اِنت۔
