چمشانک: تنویر بلوچ
جہانی لبزانک ءِ تہ ءَ مارا سک باز گدار دست کَپ اَنت کہ آ جُتائیں سرھال ءُ جیڑھانی سر ءَ نبشتہ کنگ بیتگ اَنت۔ چوناہا گدار نویسوک مُدام وتی کش ءُ گور ءِ جیڑہانی سرءَ نبشتہ کن اَنت ءُ بازیں براں آ جیڑہ چاگردی بنت ءُ باز براں گدار نویسوک وتی دل ءِ گَپاں گُشگ ءِ ھاتر ءَ آھاں گدار ءِ دروشم ءَ درشان کن اَنت۔
اے راستی یے کہ ارکس وتی تب ءِ ھساب ءَ نبشتہ کنت۔ توری آ ہر چونیں سرھالے بہ بیت، بلے یک گَپے زھن ءَ بہ بیت کہ گدار نبشتہ کنگ ءِ واستہ ہما مھلوک وتی دیم ءَ ایر کنگی اِنت کہ آ ہمے گدار ءَ وان ایت یاکہ ہما چاگرد ءِ جیڑہ وتی دیم ءَ ایر کنگی انت کہ ہمائی ءِ تہ ءَ نبشتہ کار زندگ اِنت۔ وھدے کہ گپ یک ایردستیں چاگردے ءِ کیت گُڑا اود ءَ سرھال ہما چاگرد ءِ راستیاں گوں بندوک بنت۔ اگاں ما ایردستیں چاگردے ءِ تہ ءَ نشتگ ایں ءُ لس جیڈہاں ابید دگہ سرھالانی سرءَ نبشتہ بہ کن ایں گُڑا اے وتی تہ ءَ وت تزادے بیت۔
چوناہا بلوچی ءَ بازیں گدار نبشتہ کنگ بیتگ بلے وھدے کہ تو جمیل مھراب ءِ گدار “آوار جتیں زند” ءَ وان ئے گڑا ترا سما بیت کہ اے گدار یک آدینکے کہ آ بلوچ چاگرد ءِ راستیاں پیش دارگ ءَ انت۔ اے گدار ءِ تہ ءَ تو وت ءَ دیست کن ئے یا وتی چاگرد ءِ تہ ءِ ہما مردماں دیست کن ئے کہ آ ہمے جیڈھانی آماچ اَنت پرچاکہ چُشیں گدار سک کم اِنت کہ آھی ءِ تہ ءَ تو وت ءَ دیست بہ کن ئے۔
ایردستی ءِ جاوراں بلوچ بازیں جیڑھانی دیمپان اِنت۔ ہمے جیڑھانی سبب ءَ بلوچ ءِ چاگرد یک سیاہ شپی ءَ مان پوشتگ، انچو سما بیت مئے زمین یک نہ کٹوکیں ڈکالے ءَ وتی ارجاں جتگ۔ اے گدار ءِ تہ ءَ ترا بلوچ چاگرد ءِ ہمروچیگیں جیڑہ گندگ ءَ کاینت۔ پہ درور زوراکیانی سبب ءَ مردم وتی ھلک ءُ زمین ءَ یلہ کنگ ءَ مجبور انت، بلوچ مھلوک زور بیگواہی ءِ ھلاپ ءَ مُدام دگانی سرءَ وپتگ ءُ مُدام دگ بند ءُ اڈتال انت۔ بلوچ سرزمین ءِ تہ ءَ چُشیں لوگے نیست کہ آ اے درد ءِ آماچ نہ انت۔
اے گدار ءِ تہ ءَ ہما تہلیں راستی نبشتہ اِنت کہ مُدام ما گوں وتی چماں گندگ ءَ انت۔ جونانی سوگاتانی نہ کٹوکیں درچے کہ ہمک روچ باریں چنچو مات ءِ چم ارسیگ بنت ءُ باریں چنچو گوہارانی دل آبلہ۔ ہمے جاورانی تہ ءَ بلوچ مات ءُ گوہار پہ وتی گاریں مردمانی آجوئی ءِ واستہ دگانی سرءَ ویل انت، ایشانی تہ ءَ ہما ھاٹیگ گندگ بیت کہ اے داں کیامت دم نہ بر اَنت ءُ ایشانی چمانی تہ ءَ یک نہ کٹوکیں ودارے گندگ بیت ءُ کس نہ زانت کہ ودار کدی آسر بنت۔
اے گدار ءِ کارست یک ورناہے کہ زوراکایانی سبب ءَ آئی ءِسرجمیں ھلک ءِ مردماں لڈ اِتگ۔ آئی ءِ براتے زوراکاں ماں وانگجاہ ءِ ھاسٹل ءَ چہ بُرتگ ءُ گار کُتگ کہ آئی درگیجگ ءَ آ ورناہ در پہ در اِنت۔ وتی برات ءِ درگیجگ ءَ آ ورناہ پند بُران ءَ مزن شھر ءَ رھادگ بیت۔ ماں مزن شھر ءِ سپر ءَ آ وڈ وڈیں جاور گندیت کہ زور بے گواھیں ورناھے ءِ کھول ءَ دگ بستگ ءُ پہ ورناہ ءِ یلہی ءَ زاہرشانی کنگ ءَ اَنت۔ ایشی ءَ ابید آ بس ءِ توک ءَ یک ہمسپرے ءَ گوں دوچار کپ ایت کہ آ سرجمیں راہ ءَ بلوچ ءِ سرءَ بوکیں زُلم ءُ زوراکی، بلوچ راج ءِ بزگی ءُ زمینی راستیانی بابت ءَ وت ماں وت ءَ گپ کنان ءَ وتی سپر ءَ آسر کن اَنت۔ اسل ءَ ھمے ورناہ کہ سپر ءَ گوں آئی ءَ دوچار کپ ایت، آئی ھم کسے زوراکاں بے گواہ کُتگ۔
سپر ءِ ھلاسی ءَ آ دوئیں وتی وتی دوار جاہاں رو اَنت۔ یکے ماں مزن شھر ءَ وانگ ءَ اتکگ اَت ءُ دومی وتی برات ءِ شوھاز ءَ بلے آ وھد وھد ءِ سرءَ یک دومی ءَ گوں دوچار کَپت اَنت۔ برے دگ بند ھڈتالے ءَ یاکہ پہ زور بے گواھیں مردمانی یلہی ءَ برجم داشتگیں روانکی ءَ آ دوچار کپت اَنت۔ ماں مزن شھر ءَ آ ورناہ وڈ وڈیں جاور گند ایت، برے بلوچ مات ءُ گوھار ماں دگانی سرءَ نندوک اَنت یاکہ برے سرکار ءِ چانوگر آھانی سر ءَ تیر گواری کنگ ءَ اَنت۔ برے روانکاں چہ مردم گرگ ءُ بندیگ کنگ بنت یاکہ آھانی سر ءَ دگہ زوراکی کنگ بنت۔
اے سرجمیں جاورانی میان ءَ آ ورناہ یک ھشک ءُ تھار ءُ ابیتکیں زندے گوازینگ ءَ اَت، بلاھیں مزنیں شھر ءِ مُچی ءِ توک ءَ ھم آ تھنا اَت۔ ھمے جاوراں گوں جنگ کنان ءُ پہ وتی برات ءِ پولگ ءَ پند بُران آ برے ماں آمید گِس ءُ برے ماں پریس کلب ءَ وتی توار ءَ اے کَؔر ءُ کوریں شھر ءِ مردماں سر کنگ ءِ جُھد ءَ اَت بلے اد ءَ کس آئی ءِ گوشداروک نہ اَت۔ نیکہ آئیءِ زھرشانی ءُ پریاتانی آسر ءِ گندگ پیداک اَت۔ اے سرجمیں جاورانی تہ ءَ آئی ءَ یک روچے ھالے سر بیت کہ نادرواہ جاہ ءَ لہتیں لاش سرکاری مردماں آورتگ، گڑا آ میدان میدان ءَ وت ءَ نادرواہ جاہ ءَ سر کنت کہ چو مہ بیت ھمے جونانی توک ءَ آئیءِ برات ءِ جون ھوار بہ بیت۔
بیت ھما کہ ھدا ءَ دوست اِنت، آ کہ نادرواہ جاہ ءَ سر بیت دانکہ ھما ورناہ کہ گوں آئی ءَ سپر ءَ دوچار کپتگ اَت، یک جونے ءِ سر ءَ کپتگ ءُ زار زار ءَ گریوگ ءَ اَت۔ آ ھشک ءُ ھیران، رِد ءَ ایریں جونانی توک ءَ وتی برات ءَ پولگ اَت کہ ناگت ءَ ھمے رِد ءَ آئیءَ وتی برات ءِ جون دیت کہ چہ بازیں زوراکیاں زدگ اِنت ءُ ھوناں میستگ کہ آئی ءِ دیم چارگی نہ اِنت۔ وتی برات ءِ تیر سپتگ ءُ ھوناں میچلیں جون ءِ گندگ ءَ گوں گُشے آئی ءِ ارواہ آئی ءِ جبین ءَ یلہ دات ءُ سپر کنت۔ بلوچ گُل زمین ءِ دلبند ءَ اے جاور ابکہی جاور نہ اَنت کہ زوراک ءَ دیر اِنت اشاں کارمرز کنگءَ اِنت۔ اے ورناہ بازیں زوراکیانی سبب ءَ ماں دژمن ءِ آزار جاہاں شہید بیتگ اَنت، کہ دژمن ھمک روچ ءِ بنیات ءَ مارا مئے راج ءِ پُسگانی جوناں سوگات کنت۔ ھمد ءَ چہ جمیل مھراب ءِ گدار گوں لھتے جُستاں آسر بیت۔
وھدیکہ زمین ایردست بیت گڑا جیڑہ تہنا یکے بیت بلے آئی ءِ آتراپ ءَ ہزار جیڑہ چِست بیت۔ ہمے جیڑہ ءِ توجیل کنگ ءِ ھاتر ءَ جُتائیں مردم جُتائیں پڑاں جُہد ءَ بنت۔ کسے وتی نِد ءِ وسیلہ ءُ کسے دگہ وسیلگاں اے بیمناکیں تہاری ءِ ہلاپ ءَ جنگ ءَ بیت۔ لہتے اے سپر ءَ زِندانیگ کنگ بیت۔ سیاہ ءُ تہاریں کوٹیانی آماچیں مردمانی گور ءَ بس یک اُمیتے پشت کپتگ کہ آ یک رُژنائیں بانداتے ءِ امیت اِنت۔ ہمے امیت انت کہ آھاں زلم ءُ زوراکیاں اوپار کنگ ءِ ھاٹیگ ءَ بکشائیت۔
اے گدار ءِ تہ ءَ ارکس وت ءَ دیست کنت۔ ہمے ایردستیں چاگرد، گار ءُ بے گواہی، تیر سپتگ ءُ ژانگولیں جون، روانک ءُ زاہرشانی، تیر گواری، لٹ ءُ کٹ، دگ بندی، نودربرانی چہ وانگجاہاں گار ءُ بے گواہی، پیریں مات ءِ ارسیگیں چم، گوہارانی دردگیں دل، پیریں پتانی ہمروچیگیں ودار ءُ گڈسر ءَ یک رُژنائیں بانداتے ءِ امیت کہ ارکس ءَ وتی دل ءِ تہ ءَ کنڈ کتگ ءُ اے سپر ءِ مساپر اِنت۔
اے گدار بلوچستان ءِ استیں جاورانی چہرگ ءَ جنت۔ کہ ادءَ بازینے ءَ وت ءَ کور کُتگ ءُ بازینے ءَ گُنگ۔ آ مردم بہ بنت یاکہ ھالتاک ءُ نیوز چینلانی کیمرہ، آ سرجمیں چیزانی گندگ ءُ اشکنگ ءَ پد ہم بےتوار اَنت۔ ہمے ھاموشی ءِ تہ ءَ لھتے نازرک ءُ تُرندیں توار انت کہ مُدام دگانی سرءَ اوگام جنگ ءَ انت۔ “مئے بندیگ آں آجو کن ات، ما انساپ لوٹیں، اے زورکیاں ما نہ من ایں”۔۔۔۔ ہمے اوگام انت کہ مردماں ھاٹیگ بکش اَنت ءُ پہ جہد ءَ سکین دینت۔
نبشتہ کار ہما انت کہ آ وتی چاگرد ءِ راستی ءَ گوں لبز ءُ گالاں پیش بہ دار انت دانکہ وانوک ہمے جاورانی تہ ءَ وت ءَ سما کت بہ کنت۔ جمیل مھراب ءِ گدار ہم ہمے لڑ ءِ یک بھرے۔
