نبشتہکار: لیو شاؤ چی
چمشانک : اِھسان
لیو شاؤ چی ءِ نامداریں کتابک On Inner Party Struggle چین کمیونسٹ پارٹی ءِ سنگتانی واستہ یک کتابکے کہ پارٹی ءِ اندری پیچیدگیانی سرءَ باوست کنت۔ لیو شاؤ چی 1941 ءَ پارٹی اسکول فار سنٹرل چین ءَ یک گشتانکی ءِ تہ ءَ پارٹی ءِ اندری جھد ءِ سرءَ باوست کنت، دیمترا اے گشتانک ءَ لیو شاؤ چی ءِ جند نبشتہی دروشم ءَ شنگ کنت داںکہ چین کمیوسنٹ پارٹی ءِ سنگت ایشی سرءَ دلمجی ءَ گور ءُ فکر بہ کن انت ءُ آوکیں وھدا پارٹی ءِ سنگت، پارٹی ءِ اندری پیچ ءُ تاباں سرپد بہ بنت۔ لیوشاؤ چی اے وھدا سی سی پی ( چین کمیوسٹ پارٹی) ءِ بنجاہی پترے باسک ءِ بیت۔ لیو شاؤ چی 1900 ءَ ماں چین ءِ مزن شہر نینگسانگ ءَ ودی بیت۔ لیو ءِ سیاسی سپر 1920 ءَ سوشلسٹ سوویت آف چین ءِ آوار بوھگ ءَ گوں بندات بیت ءُ 1921 ءَ سی سی پی ءِ بُنھشت ایر بیت کہ پدا سی سی پی ءِ باسک بیت ءُ داں چین آشوب ءَ سی سی پی ءِ راہشونی ءَ کنت۔ 1949 ءَ وھدے ریپبلک اف چین جوڑ بیت گڑا لیو کمک کماش گچین کنگ بیت۔ آن انر پارٹی اسٹرگل ءَ ابید لیو ءِ تنظیمی کار ءُ پروگرامانی سرا دگے ھم بازیں نبشتانک ءُ کتاب است اَنت چش کہ On party, How to be a Good communist ,Internationalism and Nationalism ءُ دگے بازیں۔
آن انر پارٹی اسٹرگل یک کتابکے کہ ایشی تہ ءَ لیو ءِ گشتانک ءُ یک نبشتانک ءِ آوار اِنت، اے گشتانک ءِ تہ ءَ لیو سی سی پی ءِ سنگتاں سرپدی دیگ ءِ جھد ءَ کنت کہ چون ءُ کجام ڈول ءَ پارٹی ءِ اندری پیچیدگیانی دیمپانی کنگ بہ بیت داںکہ سنگتانی تہ ءَ یک مہکمیں ءُ ترندیں آشوبی روشت ءِ جاہ بہ کنت۔ اے کتابک چوناھا پنچ بھرانی میان ءَ بھر اِنت ءُ پنچیں بھر یک دومیگ ءَ گوں ھمگونگ اَنت۔ اولی بھر ءِ تہ ءَ آ اے ھبر ءِ گشینگ ءِ جھد ءَ کنت کہ آ کجام ھاسیں شئے بوتگ اَنت کہ سی سی پی ءِ جوڑشت ایر کنگ بوتگ ءُ لھتیں رَدراھی (Deviations) بوتگ اَنت کہ سی سی پی ءِ تہ ءَ جاہ اِش کتگ۔ دومی بھر ءِ تہ ءَ لیو جھد کنت کہ لھتیں اندری پارٹی جد ءُ جُہد بہ گیشن ایت پرچا کہ پارٹی ءِ اندری جد و جھد مشینی رنگ ڈولا ءُ بے ھساب کنگ بوتگ اَنت۔ سئمی بھر ءِ تہ ءَ آ اے درجنَگ ءِ جھد ءَ کنت کہ پارٹی ءِ تہ ءَ در رھبندی کار کنگ بوھگ ءَ اِنت۔ چارمی بھر ءِ تہ ءَ لیو سنگتانی میان ءَ اے ھبر ءِ ایر کنگ ءِ جھد ءَ کنت کہ اندری پارٹی جھد چون کنگ بیت ءٗ گُڈی بھر ءِ تہ ءَ لیو ءِ یک نبشتانکے کہ آ ھمے چیز ءِ سرءَ زور دنت کہ مانشویکانی لیکہ ءُ ھیال چہ پارٹی ءِ تہ ءَ چوں ولگوج کنگی اَنت۔
لیو اولی بھرے سرءَ ھبر کنگ ءَ پیسر سنگتانی میان ءَ اے ھبر ءَ پچ کنت کہ ھما روچ ءَ کہ مئے پارٹی جوڈ بوتگ ھما روچ ءَ چہ مئے جھد بوتگ ما وتی سنگتانی میان ءَ پارٹی ءِ لیکہ ءَ مہکمیں رنگی ءَ جاہ بہ دیں داںکہ پارٹی ءِ تہ ءَ سنگتانی روشت ھم مھکم بہ بنت۔ دیمترا لیو گُشیت کہ اندری پارٹی جہد چوناھا لیکھی اِنت۔ اندری پارٹی جھد ءِ وسلیگ ءَ پارٹی ءِ تہ ءَ بدیں روشت ءُ بے سریں لیکہ ولگوج کنگ بنت۔ ھمے ھبر ءَ دیم ءَ بران ءَ لیو گشیت کہ مئے لیکہ پوریاگرانی لیکہ اِنت ءُ پوریاگرانی لیکہ گوں پوریاگرانی آشوب ءَ بندوک اِنت۔ اگاں پارٹی ءِ نیام ءَ ردیں ھیال ءُ لیکہاں جاہ کُت، کہ آ پوریاگرانی آشوب ءِ ھلاپ اَنت، گُڑا زوت ولگوج کنگی اَنت۔ پارٹی ءِ تہ ءَ چشیں اڑ ءُ کُڑ یا بدیں عمل مدام دو وڈیں موقع پرستانی سوب ءَ جاہ کن انت۔ یکے راستیں موقع پرست ءُ دومی چپیں موقع پرست۔ راستیں موقع پرست ھما اَنت کہ پارٹی ءِ لیکہ ءَ بدل کنگ لوٹ اَنت، پارٹی ءِ تہ ءَ بدیں روشت جاہ دینت کہ پوریاگرانی لوٹ ءُ گزر پارلیمنٹ ءِ وسلیگ ءَ گرگ بنت ءُ چش ھم گُش اَنت کہ پوریاگراں پارٹی ءِ ھچ زلورت نیست بلکہ آ یونینانی وسلیگ ءَ وتی ھکانی پاسداری ءَ کت کن اَنت۔ چپیں موقع پرست پارٹی ءِ تہ ءَ ھما ٹولی یا سنگت اَنت کہ پارٹی ءِ تہ ءَ سکیں تُرندیں تبی ءِ واھُند اَنت۔ چپیں موقع پرست انچیں دابے ءَ کار کنگ لوٹ اَنت کہ پارٹی ءِ سنگت دلپروش بوت بہ کن اَنت یاکہ انچیں دابے ءَ پارٹی ءِ کاراں کن اَنت کہ آ پارٹی ءِ لیکہ ءَ گوں بندوک نہ اَنت، بلکہ زاتی وشّی ءُ بالادستی ءَ پیش دار اَنت۔ لیو دیمترا گشیت کہ سی سی پی ءِ تہ ءَ ھم چشیں روشت ءُ موقع پرستاں جاہ کتگ ءُ اشانی گِر ءُ دار ءِ واستہ الّم اِنت کہ ما چیزاں گوں ھورتیں نگاہی ءَ بہ ٹپّاسیں داںکہ آوکیں وھد ءَ مئے پارٹی ءِ تہی کار شریں رنگی ءَ بہ جُنز اَنت۔
ایشی ءَ پد لیو وتی گشتانک ءِ اوّلی بہر ءِ تہ ءَ بندات ءَ اے چیزے سرءَ باوست کنت کہ آ کجام شئے بوتگ اَنت کہ سی سی پی ءِ جوڑشت ءِ ایر کتگ ءُ پارٹی ءِ تہ ءَ لھتیں رد راھیاں جاہ کتگ ھمیشانی پجّار ءَ کن ایں۔ لیو وھدے پارٹی ءِ جوڑشت سرا ھبر بِنا کنت گُڑا بندات ءَ مارکس ءُ اینگلز ءِ درور ءَ دیان ءَ گشیت کہ مروچی ھمیشانی برورد اِنت کہ پوریاگرانی جہد ءَ سرچست کتگ ءُ مارا مہکیں لیکہ ءِ داتگ ئے۔ اے ھمیشانی برورد اِنت کہ اولی انٹرنیشنل ءُ دومی انٹرنیشنل ءَ سرچشت کتگ ءُ وھدے ھمراہی ءَ اُُلسی پارٹی، پوریاگرانی گل ءُ ٹریڈ یونین جوڈ بوتگ انت۔ وھدے دومی انٹرنیشنل سرچست کنت گُڑا اے میان ءَ Kautsky ڈولیں موقع پرست پارٹیانی تہ ءَ ردیں ھیال جاہ دینت ءُ پارٹی، ٹریڈ یونین ءُ پوریاگرانی گل ولگوج کنگ بنت۔ گُڑا چمداں پوریاگر ھمے سرپد بنت کہ پوریاگرانانی یک ءُ واحدیں جیڑہے توجیل پوریاگرانی آشوب اِنت ءُ ابید چہ آشوب ءَ دگے ھچ راہ نیست۔ دیمترا لیو گشیت کہ مارکس ءُ اینگلز ءِ اھد چہ لینن ءِ اھد ءَ چٹ جتا بیت۔ لینن ءِ وھدا سامراجی تاکت ھم سرچست کن اَنت ءُ زرداری نظام ھم مھکم بیت۔ پدا دومی نیمگ ءَ پوریاگر بنت کہ آشوب ءِ ھاترا جھد ءَ بنت۔ گُڑا لینن سما کنت اے وھدے لوٹ ھمیش اَنت کہ یک مھکمیں پارٹی ءِ جوڑ بہ بیت داں کہ سلاہ بندیں ءُ سیاسی پرنٹ ءَ پوریاگرانی لیکہ ءَ تچک بہ کنت ءُ ھمے بنیاد ءَ پوریاگرانی آشوب ءَ سوبمند بہ کنت۔ لینن وھدے اے میان ءَ پوریاگرانی وت واجھی ءِ لوٹ ءِ بنیات ءَ جھد بنا کنت گُڑا دومی نیمگ ءَ سوشلسٹ ڈیموکریٹک پارٹی بنت کہ آ پارلیمنٹ ءِ وسیلگ ءَ پوریاگرانی زہنانی تہ ءَ بدیں روشت جاہ دینت۔ اشی ءَ ھوار مانشویک بنت کہ پارٹی ءِ لیکہ ءِ ھلاپ بنت۔ لیو چشیں ٹولیاں راستیں موقع پرست گشیت۔
لیو دیمترا وتی گوشتانک ءِ تہ ءَ گشیت کہ لینن پارٹی ءِ جوڑ کنگ ءِ نیام ءَ سک باز اڑانڈ گندیت چُشکہ مانشویک بنت کہ پارٹی ءِ تہ ءَ آزات ھیالیں لیکہ ءِ وڑیں بیانیہ ءُ تب یے جاہ دیگ لوٹ اَنت، معاشی شاہزانت بنت کہ پوریاگرانی پارٹی جوڑشت ءِ منوگر بنت ءُ گُش اَنت کہ پوریاگرانی واستہ یونین ءِ وجود گھتر انت ءُ سوشل ڈیموکریٹک پارٹی بنت کہ پارلیمٹ ءِ وسیلگ ءَ پوریاگراں گُمراہ کنگ ءِ جھد ءَ کن انت۔ اے کلّیں اڈ ءُ کُڈانی دیم ءَ لینن بیت کہ پوریاگرانی ھاکمی ءَ یکیں وسیلگ ءَ تھنا پوریاگرانی آشوب سرپد بیت ءُ پارٹی ءِ تہ ءَ ھم اے گپ ءَ جاہ دنت کہ پوریاگرانی ھاکمی گوں پوریاگرانی آشوب ءَ بندوک اِنت۔ لینن ڈیموکرٹک سنٹرلزم ءِ لیکہ ءَ دیم ءَ کاریت پدا پارٹی ءَ ھمے بنیاد ءَ جُنزین ایت ءُ لیکہ ءَ ھم تچک کنت ءُ اولی پوریاگرانی آشوب ءِ آرگ ءَ سوبمند بیت۔
لیو دیمترا نبشتہ کنت کہ بالشیوکانی آشوب ءَ پد مئے راہ تچک بوتگ پرچا کہ اکتوبر ءِ آشوب مئے واستہ یک دَرس ءُ سکین ءِ بوتگ کہ پوریاگرانی آشوب وجود داریت، ھمے سبب اَت کہ سی سی پی ءِ وجود ایر کنگ بوت۔ وھدے سی سی پی پوریاگرانی لیکہ ءَ پارٹی ءِ تہ ءَ جاہ دیگ ءَ سوبمند بیت گُڑا اے سوبمندی پوریاگریں تبک ءِ بیت۔ وھدے چین کمیونسٹ پارٹی وتی وجود ءَ ایر کنت گُڑا سی سی پی ءِ دیم ءَ چشیں سوشل ڈیموکریٹک پارٹی نہ بیت ءُ ھچ چشیں ٹولی نہ بیت کہ پارلیمٹ ءِ ھبر ءَ بہ کنت ءُ چشیں معاشی ٹولی نیست اَت کہ پوریاگرانی پارٹی ءِ وجودے ءِ ھلاپ بہ بیت۔ دیوان ءَ ساڈی ئیں سنگتانی دلگوش ءَ وتی نیمگ ءَ کنان ءَ گُشیت کہ نوں شُما سرپد بوھگ ءَ اِت کہ مئے پارٹی ءِ جوڈ بوھگ ءِ وھد ءَ بگر داں انوں بیا چشیں ھچ رنگیں ٹولی نہ بوتگ کہ راستیں موقع پرست بہ بنت بلے، مئے پارٹی ءِ تہ ءَ لھتیں چپیں موقع پرستاں جاہ کتگ۔ اے چپیں موقع پرست شعوری یا لاشعوری بنیاد ءَ پارٹی ءِ تہ ءَ بدیں روشت ءُ بے رھبندی ءِ بنیات ءَ جھد کنگ ءَ اَنت۔ لیو تران کنان ءَ گُشیت کہ سی سی پی ءِ سنگتاں اندری پارٹی جھد ءِ نام ءَ ردیں راہ ءِ گچین کتگ ۔ اگاں ردیں راہ دارگ مہ بنت گُڑا پارٹی ءِ تہ ءَ وتسریں لیکہ ءُ بدیں روشت جاہ کن اَنت۔ سنگت اے چیز ءَ شر بہ زان اَنت کہ پارٹی ءِ اندری جھد پارٹی ءِ ردیانی گرگ ءِ ھاترا ءُ پارٹی ءِ سنگتاں سرپدی دیگ ءِ ھاترا سوبمندیں عمل ءِ بلے پارٹی ءِ تہ ءَ مئے لھتیں سنگتاں ردیں راہ گچین کتگ اشانی در جنَگ الم اِنت۔ لیو دیمترا گُشیت کہ یکبرے پارٹی ءِ اندری جھد ءِ ردیں راہ آں در جنَگ ءِ جھد ءَ کن ایں ءُ گُڈسرا شُمے دیم ءَ اے ھبر ءَ ایر کن ایں کہ پارٹی ءِ اندری جھد چوں کنگ بیت۔
لیو وتی گشتانک ءِ دومی بھرے تہ ءَ سنگتاں گشیت کہ آزات ھیالیں لیکہ ءَ پارٹی ءِ میان ءَ جاگہ کتگ بلے مرچی ما آزات ھیالی ءِ سرءَ ھبر نہ کنیں بلکہ اے چیز ءِ چارگ ءِ جھد ءَ کنیں کہ وھدے پارٹی ءِ سنگت پارٹی ءِ اندری جھد ءِ سرا کار کنگ ءَ بنت گُڑا ھمے میان ءَ آزات ھیالیں روشت ءِ واھُند بنت۔ پہ درور اگاں یک سنگت ءِ ردی ءِ کنت ءُ دومی یا سئمی سنگت سرپد اِنت کہ پلاں سنگت ءَ چشیں ردی ءِ کتگ بلے اے ردی ءَ پارٹی ءِ نیام ءَ ایر نہ کن کنت۔ پرچا کہ اگاں ھما سرپدیں سنگت پارٹی ءِ نیام ءَ ھبر ءَ ایر بہ کنت گُڑا بیھار دیگ بیت یا کہ دیم ءِ سنگت ءِ گوما بدیں روشت دارگ بیت۔ اشی ءَ ھوار سنگتانی میان ءَ اے چیز ھم گندگ ءَ کیت کہ یک سنگت ءِ اگاں ردی ءِ کنت گُڑا آ سنگت ءِ باپُشت ءَ ھبر کن اَنت بلے دیم پہ دیم ھچ نہ گُش انت۔ اگاں اندری پارٹی جھد ءِ نیام ءَ چشیں روشت گندگ بوت گُڑا اے آزات ھیالی ءِ رد ءَ کاینت۔ دیمترا گشیت کہ چشیں آزات ھیالیں دگہ تب ھم گندگ ءَ کئیت بلے ما جھد کن ایں کہ پارٹی ءِ اندری جھد ءِ نیام ءَ مشینی رنگ ءَ جھد کنگ بوھگ ءَ انت ءُ بے شمار کنگ بوھگ ءَ انت ھمیشاں شُمے دیم ءَ پدر بہ کناں۔ سما بیت کہ سنگت پارٹی ءِ اندری جھد ءَ بے ھساب پریکٹس کنگ ءَ اَنت، بزاںکہ سنگتانی نیام ءَ انچیں روشت یے ءَ جاہ کتگ، سنگت ھمے جیڑ انت کہ پارٹی ءِ اندری جیڑہانی سرا جھد ھمک روچ ءُ ھمک سنگت ءِ گوما کنگ بہ بیت۔ مئے سنگت باھدیں اے ھبر ءَ پوہ بہ بنت کہ پارٹی ءِ اندری جھد گوں ہوش، سما ءُ پٹ ءُ پول ءَ کنگ بیت۔ لیو مشینی رنگ ءَ کتگیں پنچ وڈیں اندری پارٹی جد و جھداں سنگتانی نیام ءَ ایر کنت۔ اولی اش اِنت کہ پارٹی ءِ تہ ءَ وتسریں اسٹرگل ءُ میٹنگ ڈولیں بے سریں دیواناں جاہ کتگ۔ لیو نگد کنان ءَ گُشیت کہ اسٹرگل ءُ میٹنگ وتسریں عملے ءُ اسٹرگل ءُ میٹنگ بس سنگتاں گوں ترندیں تبی ءَ جواب دہ کنگ اِنت۔ ھما سنگت کہ میٹنگ ءِ پاگواجہی ءَ کن اَنت ھما سنگت وتسریں ترندیں تبی ودی کن اَنت کہ ما پارٹی ءِ اندری جھد کنگ ءَ ایں۔ چشیں میٹنگ پارٹی ءِ سنگتاں دلپروش کت کن اَنت بلے پارٹی ءِ سنگتاں ھچبر سکین دات کت نہ کن اَنت۔ پارٹی ءِ اندری جھد اے واستہ کنگ بیت کہ وھدے سنگت ءِ ردی ءِ کنت گُڑا ھما سنگت گوں نرمیں تبی ءَ سرپدگ کنگ، سکین دیگ ءُ سنگت ءَ را وانینگ بہ بیت۔ پارٹی ءِ اندری جھد ءِ نیام ءَ دومی ردی اش اِنت کہ سنگت پارٹی ءِ اندری جھد ءَ دائمی سرپد بنت، سنگت ھمے جیڑ اَنت کہ اے جھد ھمک روچ ءِ ھساب ءَ سنگتانی سرءَ کنگ بہ بیت۔ ھمک روچ پارٹی ءِ سنگتاں جواب دہ کنگ، ھمک روچ نگد کنگ ءُ ھمک روچ ترندی ءَ گوں سرپد کنگ۔ سما کپیت سنگت زوریں جیڑہ شوھاز کن اَنت ءُ ھمے جیڑ اَنت کہ ما پارٹی ءِ اندری جھد کنگ ءَ انت۔ سئمی پارٹی ءِ اندری جھد ءِ نیام ءَ رد راھی اش اِنت کہ سنگت انگت اے سرپد نہ اَنت کہ پارٹی ءِ اندری جھد بُن اسل ءَ لیکھی جھد اِنت۔ لیکہی جھد ھما وھد ءَ مھکم بیت وھدے پارٹی ءِ سنگتانی واستہ شریں تربیتی ءُ وانگی پروگرام گون بہ بیت۔ چارمی جیڑہ اش اِنت کہ سنگت چو مشینی رنگ ءَ پارٹی ءِ اندری جھد ءَ گوں پارٹی ءِ ڈنّی جھد ءَ ھور کنگ ءُ چارگ ءَ اَنت۔ پارٹی ءِ اندری جھد ءِ نام ءَ سنگت پارٹی ءِ تہ ءَ سنگتانی سرا انچیں سرویلنس ءِ دارنت گشے زاناں سنگت دژمن اَنت۔ پنچمی جیڑہ اش اِنت کہ کہ سنگت پارٹی ءِ اندری جھد ءِ سرءَ وھدے کار ءَ بنت گڑا تیاری نہ کن اَنت بس انچو رونت ءُ سنگتانی گوما نند اَنت۔ اگاں یک سنگتی ءَ ردی ءِ کتگ گُڑا شرّیں دابی ءَ پٹّ ءُ پول نہ کن اَنت بس رو اَنت دیوان ءَ نند اَنت، سنگت ءِ جست بہ گیپت گُڑا انچو پہ دیم پسّہ اِش کناں ءُ ھمے جیڑنت کہ اگاں ما پسّہ مہ کن ایں گُڑا مئے شرپ نہ مانیت۔
لیو وتی گشتانک ءِ سئمی بھر ءِ تہ ءَ نبشتہ کنت کہ سی سی پی ءِ تہ ءَ بدیں روشت ءُ بے رھبندیں جھد کنگ بوھگ ءَ اِنت۔ اگاں بے رھبندیں جھد دارگ مہ بنت گُڑا آوکیں وھد ءَ پارٹی ءِ رھبند ءُ پارٹی ءِ لیکہ ڈالچار کنگ بنت۔ دیمترا لیو بے رھبندیں جھد ءَ گشّینان ءَ گشیت کہ بنّکی بے رھبندیں جھد اِش اَنت کہ وھدے سنگت ءِ دومی سنگت ءِ سرءَ جھد کنگ ءَ بیت گُڑا دیم ءِ سنگت ءَ وتی نپری وشی یا ناوشی ءِ بنیات ءَ جواب دہ کنت۔ درور ءِ دیان ءَ گُشیت کہ وھدے سنگت نگد کن اَنت یا دیم ءِ سنگت ءَ جواب دہ کن اَنت گُڑا چُشیں جُست ایر بیت کہ چیا پلاں سنگتاناں گیشتر ءُ مارا کمتر ورگ، توپک ءُ درمان دیگ بوتگ۔ دومی بے رھبندیں جھد اِش اِنت کہ وھدے سنگت ءِ دومی سنگت ءِ گوماں زاتی اختلافات است گُڑا چشیں سنگت دیم ءِ سنگت ءَ جست کنت یا جواب دہ کنت ءُ ھمے جیڑیت کہ پارٹی ءِ تہ ءَ گیش اڑاند جاہ بہ کنت ءُ اختلافات داروکیں سنگت اڑانڈانی آرگ ءِ سبب جوڈ بہ بیت۔ چشیں جھد بس زاتی وشی ءُ ناوشی ءِ بنیات ءَ کنگ بنت بلے ھچبر اے نہ جیڑ اَنت کہ پارٹی وتی مکسد ءَ چہ دور بوھگ ءَ اِنت۔ سنگتانی میان ءَ سئمی بے رھبندیں جھد اِش اِنت کہ سنگت دیوانانی میان ءَ وتی زاتی وشی ءِ واستہ زیاتیں ءُ وتسریں جُست ایر کن انت، زیاتیں ءُ وتسریں نگد کن اَنت ءُ زیاتیں ءُ وتسریں اختلافات دار اَنت۔ پدا دگے چیزے ھم گندگ ءَ کئیت کہ سنگت اے میان ءَ وتسریں ترندیں تبے اختیار کن اَنت، چشیں زیاتیں ءُ وتسریں جست، نگد ءُ اختلافات اے واستہ ایر کن اَنت داںکہ دیوان ءَ نشتگیں سنگت مئے توسیپ ءَ بہ کن انت کہ ما چشیں دیواناں ھبر کت کن ایں ءُ سنگتانی گوما اختلافات داشت کنیں۔ چشیں جست ءُ اختلافات بدیں روشت ءَ ابید دگے ھچّ نہ اَنت۔ چارمی بے رھبندیں جھد اِش اِنت کہ سنگت پارٹی ءِ اندری جھد ءِ نام ءَ دومی سنگت ءِ سرءَ باپُشت ءَ نگد ءُ ھبر کن اَنت۔ درور دیان ءَ نبشتہ کنت کہ اگاں اے وھد ءَ کہ سنگت دیم پہ دیم اِنت گُڑا نگد نہ کن انت۔ ھما وھد ءَ نگد ءُ ھبر کن اَنت وھدے سنگت موجود نہ اِنت۔ چشیں نگد بس پارٹی تہ ءَ سنگتانی سرا بدیں روشت دور دیئنت۔
لیو دیمترا نبشتہ کنان ءَ گُشیت کہ پارٹی ءِ اندری جھد ءِ سرا نگد کنگ ءُ نزوریاں پَد جنَگ ءِ مستریں سوب اِش اِنت کہ ما وتی گوست ءِ ردیاں چہ دَر بُرت بہ کنیں ءُ مئے زمہ واری اِنت کہ ما اشاں شر کنگ ءَ ھوار پارٹی ءِ اندری جھد ءَ شریں دابے ءَ پریکٹس بہ کنیں۔ اے نزوریانی پد جنَگ ءَ پد لیو سنگتانی نیام ءَ گشتانک ءِ چارمی بھرءَ پچ کنت۔ چارمی بھر ءِ تہ ءَ آ نبشتہ کنت کہ پارٹی ءِ اندری جھد کجام وڑا کنگ بہ بیت۔ چارمی بھر ءِ بندات ءَ گشیت کہ روس ءِ بالشیوک بہ بنت، ایندگے کمیونسٹ پارٹی بہ بنت یاکہ چین ءِ کمیونسٹ پارٹی ءِ بنجاہی پتر ءِ باسک بہ بنت، ایشاں سی سی پی ءِ نیام ءَ اندری جھد گیشینتگ کہ پارٹی ءِ اندری جہد چوں ءُ پرچا برجاہ دارگ بیت۔ پارٹی ءِ اندری جھد ءِ یک مزنیں زمہ واری ءِ است۔ اشی ءَ ابید پارٹی ءِ اندری جھد پارٹی ءِ مکسد ءَ تچک کنگ ءِ نام اِنت ءُ پارٹی ءِ اندری جھد پارٹی ءِ تہ ءَ سنگتانی ردی اَں پجّارگ ءُ آھاں شر کنگ ءِ نام اِنت۔ پارٹی ءِ اندری جھد ءِ واستہ الم اِنت کہ ما یک جیڑہی ءِ سرا شریں دابے ءَ پٹّ ءُ پول بہ کنیں ءُ نوں جھد ءَ برجاہ بہ داریں، پرچاکہ ما وھدے جیڑہ ءَ شر سرپد مہ بئیں ما ھچبر آ جیڑہ ءِ توجیل ءَ کت نہ کنیں۔ لیو وتی گشتانک ءِ تہ ءَ نبشتہ کنت کہ پارٹی ءِ لیکہ سرجمیں لس مھلوک ءِ لیکہ اِنت۔ اگاں کُجام ھم سنگت ءِ پارٹی ءِ لیکہ ءُ پارٹی ءِ رھبنداں پادمال کنت داں آ سنگت گوں ترندی ءَ ایرجنَگ بہ بیت۔ بلے سنگت چُش ھم بزان اَنت کہ پارٹی ءِ تہ ءَ وھدے سنگت ءِ تنظیمی کارانی تہ ءَ ردی کنت یاکہ نزوری پیش داریت گُڑا چشیں جاگہ ءَ سنگت گوں تُرندیں تبی ءَ سنگتاں گُٹگیر مہ کن اَنت بلکہ گوں وشیں اندازے ءَ سنگتانی ردیاں شر کنگ ءِ جھد ءَ بہ کن اَنت۔ پارٹی ءِ اندری جھد ءِ اسل بزانت ھمیش اِنت کہ پارٹی ءِ سنگتاں وانگ ءُ در برگ ءِ سکین دیگ بہ بیت۔ اگاں پارٹی ءِ اندری جھد ءِ نیام ءَ سنگت ءِ دلپروش بہ بیت گُڑا پارٹی ءِ تہ ءَ بدیں روشت جاہ کن اَنت ءُ پارٹی وتی مکسد ءَ چہ دور روگ بِنا کنت۔
لیو دیمترا گُشیت کہ اگاں سی سی پی ءِ اندری جھد ءِ سرا چمشانک ءِ دیگ بہ بیت گُڑا گندگ ءَ کئیت کہ اگاں یک سنگت ءِ پارٹی ءِ لیکہ ءُ رھبندانی سرا ردیں ھبر کنگ ءَ اِنت گُڑا اے میان ءَ سنگت دیم ءِ سنگت ءَ را ھچ نہ گُش اَنت بلے اگاں یک سنگت ءِ تنظیمی کار پشت کپتگ ا۔نت یاکہ تنظیمی کارانی تہ ءَ ردی کنگ ءَ اِنت گُڑا اے میان ءَ سنگت دیم ءِ سنگت ءَ گُٹگیر کن اَنت۔ تنظیمی کارانی تہ ءَ ردی ءِ گُنجائش است بلے اگاں سنگت ءِ پارٹی ءِ رھبندانی سرا نگد کنت یاکہ لیکہ ءِ ھلاپ ءَ ردیں ھبر کنت گُڑا چُشیں ساھت ءَ سنگت گوں ترندیں تبی ءَ جواب دہ کنگی اَنت ءُ چشیں ھبر کنگ ءَ مکن کنگی اَنت، بلے سی سی پی ءِ تہ ءَ چٹا چپّیں تبے ءَ جاہ کتگ۔ اگاں پارٹی ءِ لیکہ ھراب گُشگ بوھگ ءَ اِنت گُڑا اے میان ءَ سنگت ھاموش اَنت بلے سنگت ءِ وھدے کارانی تہ ءَ ردی کنت گُڑا اے میان ءَ ردیں سنگت ءَ انچیں دابے ءَ گرگ بیت گشے زاناں دژمن ءِ گپتگ۔ اشی ءِ ھمراہی ءَ سنگت اے ھم بزان اَنت کہ پارٹی ءِ اندری جھد ءِ میان ءَ نگد ءَ مزنیں ارزشت ءِ است۔ اگاں سنگت ءِ دومی سنگت ءِ سرءَ نگد کنت گُڑا نگد کنگ ءَ پیسر نگد کتگیں جیڑہ ءِ سرءَ شریں پٹ ءُ پولے کنگ بہ بیت ءُ پدا دیم ءِ سنگت ءَ را جواب دہ کنگ بہ بیت۔ چش ھم نہ اِنت کہ پارٹی ءِ اندری جھد ءِ نام ءَ ھمک روچ یک سنگتی ءِ سرءَ نگد کنگ بہ بیت۔ نگد کنگ ءِ وتی یک روشت ءِ است ءُ نگد وھدے کنگ بیت گُڑا نگد ءِ ھمراہی ءَ نگد کتگیں جیڑہ ءِ توجیل ھم گون بہ بیت۔ چش نہ اِنت کہ سنگت ءِ سرا نگد وَ کتگ بلے انچو یلا داتگ۔ اگاں سنگتے ءِ سرا نگد کنگ بیت گُڑا چو الّم اِنت کہ سنگت ءَ را نگد کتگیں جیڑہ ءِ سرءَ الٹرنیٹیو گوں بہ بیت ءُ چش ھم نہ اِنت کہ وھدے سنگت ءِ سرا نگد بیت تہ پدا یکدم سزہ دئیگ بہ بیت۔ سنگت ءِ سرا نگد کنگ ءَ پد چو الّم اِنت کہ دیم ءِ سنگت ھبر کنگ ءِ موہ دیگ بہ بیت۔ اشی ءَ پد لیو پارٹی ءِ اندری جھد ءُ پارٹی ءِ ڈنّی جھد ءِ سرا ھبر کنان ءَ گشیت کہ اے دو جتائیں شئے انت۔ اگاں ھردوئیں شئے ھور کنگ ءُ چارگ بوت انت گُڑا پارٹی ءِ نیام ءَ وتسریں اڑ ءُ کُڑ جاہ کن اَنت۔ اشی ءَ ھوار سی سی پی ءِ تہ ءَ وھدے سنگت پارٹی ءِ اندری جھد کنگ ءَ بنت گُڑا لھتیں بدیں روشت گندگ ءَ کئیت۔ وھدے سنگت ءِ دومی سنگت ءِ گوما اختلافات داریت گُڑا باپُشت ءَ الوت کنگ ءَ چہ شوکتریں کہ سنگت ءِ جند ءِ دیم ءَ ایر اش بہ کنت۔ اگاں سنگت ءِ اختلاف داریت گُڑا منطق ءُ منانکانی بنیات ءَ بہ دار ایت۔ اگاں سنگت ءِ دومی سنگت ءِ ردیاں گندیت گُڑا پارٹی ءِ گور ءَ اے ردی آں ایر بہ کنت، چش نہ اِنت کہ سنگت چش بہ جیڑیت کہ دیمی سنگت ءِ اگدہ چہ منی ءَ مستریں ءُ آ ھمے ردی ءِ سوب ءَ کم شرپ بہ بیت۔
لیو شاؤ چی وتی کتابک ءِ تہ ءَ پارٹی ءِ اندری جھد ءِ تہ ءَ وتی نبشتانک ءِ ھوار کنت کہ آئی ءِ بنگپ پارٹی ءِ اندری جہد ءَ گوں بندوک اِنت۔ نبشتانک ءِ سرھال اِش انت کہ پارٹی ءِ تہ ءَ مانشویک لیکہ ءِ ولگوج کنگ۔ لیو وتی نبشتانک ءِ تہ ءَ نبشتہ کنت کہ سی سی پی ءَ مرچی بیست ءُ دو سال بیت کہ جھد کنگ ءَ اِنت۔ سی سی پی ءَ اے بیست ءُ دویں سالانی میان ءَ بازیں جیڑہ ءُ جنجال دیستگ ءُ ھمے جیڑہانی میان ءَ جھد کتگ۔ اے جھدے میان ءَ ما اے ھبر ءَ سرپد بوتگ ایں کہ پوریاگرانی آشوب وجود داریت ءُ ما روچے نا روچے الم سوبمند بئیں۔ اے بیست ءُ دویں سالانی میان ءَ مارا ماؤ ءِ ڈولیں راھشون رستگ کہ مئے راہ ءِ گیش تچک کتگ۔ ماؤ ءَ سی سی پی ءِ لیکہ چہ مارکس ءُ لینن ءِ لیکہاں وجود ءَ آرتگ ءُ سکین داتگ کہ پوریاگرانی ھاکمی روچے نہ روچے الّم کئیت، پمیشکہ مئے جھد برجاہ اِنت۔ مئے جھد ھمک پرنٹ ءَ جنزگ ءَ اِنت بلے سما کپیت کہ مارکس ءُ لینن ءِ لیکہ سنگتاں شریں دابے ءَ نہ پہمتگ۔ لیو دیمترا نبشتہ کنت، ما وھدے وتی سنگتاں وانین ایں ءُ سرپدی دیگ ءِ جھد ءَ کنیں گُڑا نوں سنگتانی نیام ءَ پارٹی ءِ لیکہ تچک بیت۔ سی سی پی ءِ سنگت نوں جھد بہ کن اَنت کہ چین ءِ کمیونسٹ پارٹی ءِ بیست ءُ دویں سالانی گوست ءَ بہ وان اَنت داںکہ چین ءِ تہ ءَ مارکسزم ءِ ارزشت ءَ سرپد بہ بنت۔ چین ءِ لس مھلوک نوں شر سرپد اِنت کہ چین ءِ تہ ءَ آشوب تھنا مارکسزم ءِ بنیاد ءَ اتک کنت۔ بلے سما کپیت کہ چین ءِ تہ ءَ وت ءَ بازیں مردمے مارکسسٹ گشیت۔ اشی ءَ ھوار سی سی پی ءِ تہ ءَ لس مھلوک ءِ نیام ءَ اے ھبر ھچبر اِیر کنگ نہ بوتگ کہ مارکسزم چی یے ءُ مارکسسٹ چی انت؟ Pseudo مارکسزم چی یے ءُ Pseudo مارکسسٹ چی یے؟ اے بیست ءُ دویں سالانی میان ءَ سی سی پی ءِ تہ ءَ لھتیں انچیں مارکسسٹاں جاگہ کتگ کہ آ تھنا بس دپ ءَ مارکسسٹ اَنت، آھانی عمل مارکسی نہ اَنت۔ چشیں دَپی مارکسسٹاں Pseudo مارکسسٹ گُش اَنت۔ Pseudo مارکسسٹ وھدے دیواناں نندنت گُڑا ھما ھبراں کن اَنت تو گُشے زاناں کوہ پروش اَنت بلے عمل ءِ باریگ کئیت گُڑا پشت کنز اَنت۔ لیو دیمترا نبشتہ کنت کہ دگنیا ءِ تہ ءَ چشیں مارکسسٹاں مدام سرچشت کتگ، اے انچیں ٹولی بنت کہ لس مھلوک ءَ گمراہ کن انت ءُ مارکسزم ءِ بنیات ءَ مُچ کن انت بلے مارکسزم ءَ راستیں رنگ ءَ دیم ءَ آؤرت نہ کن انت۔ پرچا کہ Pseudo مارکسسٹانی کار ھمیش اِنت کہ تھنا مارکس ءِ گشتنانی سرءَ ھبر بہ کن ءُ ھچبر جسدی رنگ ءَ کار کنگ ءِ ھاٹیگ ءَ نہ دار اَنت۔ روس ءِ آشوب ءِ وھد ءَ مانشویک ھمے دابیں روشتانی واھند بوتگ اَنت ءُ چین ءِ تہ ءَ ھم چشیں ٹولی است اَنت۔ مانشویک ءُ Pseudo مارکسزم ڈولیں لیکہ پارٹی ءِ اندر ءَ ولگوج کنگی اَنت ءُ سائنسی ءُ عملی رنگ ءَ مارکسزم پارٹی ءِ تہ ءَ جاہ دیگی اِنت۔
