نوشتکار: جعفر قمبرانی
ہشت مارچ نیاڑی تا جہانی دے و بلوچ نیاڑی تا کڑد
نوشتکار: جعفر قمبرانی
ہر سال 8 مارچ ءِ نیاڑی تا جہانی دے ئنا وڑٹ اڈ تننگک۔ دا دے ئنا یات گیری نا مسخت جہانی پڑ آ نیاڑی تا جہد، قربانی، سرسہبی و راج آتیکن اوفتا کڑد ءِ تالان کننگ و شرف تننگ ءِ۔ دا دے ننے یات ترفک کہ نیاڑیک ہم ننا چاگڑد نا اسہ بشخ ئسے ءُ و دا بیرہ اُراتیٹی کیزی کننگ کن ودی متنو بلکن چاگڑد آتا شونداری ٹی ہم دافتا بھاز بھلو کڑد اس مننگ المی ءِ۔ راج آتیٹی نیاڑی تا مفرنگ راج آتے کور و منڈ جوڑ کیک و دیمروی نا ہچو وڑ دو بفک۔ بلکن دا پاننگ ہم راست ءِ کہ نیاڑی نا مفرنگ آن بندغی پدریچ سلک کُٹّک و دے اس ایسر مریک۔
نیاڑی تا کڑد ءِ گیشتر ہمو راج آک پوہ مریرہ ہرافک اوفتے بندغ تکیرہ و بندغی حق آتے تریسہ اوفتے ہم نرینہ تیتون اوار چاگڑد ئٹی تینا زمہ واری تے ایسرکننگ کن یلہ کیرہ۔ نیاڑیک ہراتم نرینہ تیانبار چاگڑد ئٹ بریسہ تینا سیاسی، چاگڑدی، ادبی و علمی بشخ ءِ شاغرہ گڑا دنچاہ کہ راج ئنا سد درسد مخلوق تینا کڑد ءِ سر تننگ ءِ و ہمو راج آک سد درسد شونداری نا پارہ غا گام خلیسہ کارہ۔ دنکہ نیلسن منڈیلہ ‘اے این سی’ نا اسہ برانز ئسے ٹی نیاڑی تا رش گش ءِ خنیسہ بِشخندہ کریسہ پارے “تینا آجوئی نا دے تے نن تینا خن ئٹ داسا الّم خنون کہ داسا نن تون ننا نیاڑیک ہم گون ءُ۔”
جہان ئٹ نیاڑی تا کڑد ءِ سرپند مننگ کن بی بی عائشہ نا جنگ جمل ٹی بشخ ہلنگ آن الیس، ملک سباء نا گودی ملکہ بلقیس نا حضرت سلیمان تون سیاسی اوڑدہی، اندرا گاندھی بھارت نا اولیکو نیاڑی وزیر اعظم کہ ہرا 1957 ئنا جنگ ئٹی تینا اسہ بھلو کڑد اس سر تس تو داکان برطانیہ نا آئرن لیڈی مارگریٹ تھیچر کہ ہرادے برطانیہ نا اولیکو نیاڑی وزیراعظم مننگ نا شرف رسینگا، ارنگ مننگ کیرہ۔ ہندن جرمنی آن انجیلا مارکیل ہرا یورپ نا سوگؤ انگا سیاسی بندغ آتیٹی حساب مریک و ادب نا پڑ آ کل آن زیات پنی آ نیاڑی ناول نگار جین آسٹن، مؤن سِلی آتا ویل آتیا نوشت کروک ٹانی موریسن کہ تینا دلیری ٹی پنی ئسک و برطانیہ غان ورجینیا وولف ہراکہ نیاڑی تا آزاتی و شناخت کن نوشت کریسہ جہان ئٹ تین کن پن اس تخانے و ہندن اگہ نن ایلو تنظیم آتیا نظر شاغن تو فرانس نا جان آرک کہ ہرا فرانس نا سد سال نا جنگ ئٹی فوج ئنا راہشونی ءِ کرے، و رومی سلطنت نا برخلاف بغاوت کننگ بنا کروک گودی بوڈیکا و 1857 نا جنگ ئٹی انگریز نا برخلاف رانی لکھشمی بائی یات کننگ نا لائخ ءُ زالبول ءُ۔ داڑان بیدس خدائی حکمت ئٹ نیاڑی تے پیغمبری تننگ متنے ولے ہمو بریبر نا کڑد نیاڑیک تینا علم، چاہنداری و زانت ئنا بنیات آ سر تسنو کہ حضرت مریم ہرادے کہ اسلام ئٹ گواچن ئٹ پیغمبری نا اگدہ رسینگتو ولے کلہؤ سر کننگ و آسمانی وحی تا وسیلہ ئٹ پیغمبر تیانبار پیش گوئی کرفنگ نا شرف رسینگا دنکہ حضرت عیسی علیہ السلام نا ودی مننگ نا مستائی و دائے۔ ہندن رابعہ بصری کہ ارواء نا علم زانشت و وحی نا وڑٹ انگا تجربہ غا تا ہم دعوی کریکہ ولے جند تے پیغمبری نا اگدہ تے آ الؤ انتئے کہ باقاعدہ پیغمبری اسلام ئٹ نیاڑی تے رسینگتنے ولے دا نیاڑی تا جند ئنا جیرت و شرف مسونے کہ او دا نیمغہ ہم تینے پدی توتنو و تینے نرینہ غاتیتون ہم کوپہ تکانو۔ دنکہ نبی کریم صلی اللہ علیہ وسلم نا دور ئٹی سجاح بنت حارث پنی آ نیاڑی نا (دروغ ئٹ) نبوت نا دعوی کننگ دا گڑا نا پاش ءُ شاھدی ئسے کہ نیاڑیک بندغی پڑ آ نرینہ تو ہم گام و ہم کوپہ مسنو و تینے اسل ہم کم تکیتنو۔
ہندن نن بلوچ نیاڑی تا پارہ غا برین گڑا اینو نا دے ئنا رد ئٹ نن خنینہ کہ بلوچ نیاڑیک ہم جہان نا ایلو نیاڑی تیانبار مہکم و سوگوی ئٹ راجی کاریم تیٹی اوار مریسہ تینا کڑد ءِ سر تننگ ئٹ پدی سلتنو۔ یات سلے کہ بلوچ نیاڑی نا کل آن گچین آ کڑد دادے کہ او فک تینا اُرانا نرینہ تیان آجوئی کن جہد کپسہ بلکن تینا اُرا نا نرینہ تیتوب اوار پیشن نا زورآور و طاغت آتا برخلاف کوشست کیرہ۔ دا ننا نیاڑی تا جیرت ءِ کہ تینا زند و زمانہ تے تینا بیگواہ غا ایلم، باوہ ارغ و دشتار تیکن ندر کریسہ کسر تا زی آ عئید و روچہ تے گدریفرہ۔ بلوچ نیاڑی تا کڑد جہان نا کل نیاڑی تا کڑد آن ترّپّوک ءُ گیشتر ءِ کہ اسہ نیمہ غا اوفک تینا نرینہ تا بیگوائی آن آجوئی کن کوشست کیرہ تو ایلو نیمہ غا اُرائی زمواری تے تینا کوپہ تیا ارفیسہ اِرغ دِیر روفہ رزان تون اوار لشی، جلک، مہمانداری و کشت و کشار ہم کننگ ئٹی ءُ۔ بلوچ نیاڑی تیٹی لمہ گل بی بی آن ہلیس، لسبیلہ نا ماہی چاگلی، بی بی بانڑی آن ہلیس لمہ کریمہ و صبیحہ و ماہرنگ نادیہ، شلی بلوچ، گلزادی و است و جغر تخوکا ایلو بھازو لمہ ئس یات کننگ نا لائخ ءُ، بے کچ لائخ!!!
ہندن اینو بلوچ نیاڑی اگہ تینے تینا نرینہ تیتون گون کریسہ سیاست، ادب و چاگڑدی پڑ آ اوار کرینو تو زندان تیٹی ہم تینا ایلم تیتون اوار تارمہ غا کوٹی تا گواچی مننگ آن ہم پد سلتنو۔ دنکہ تدوکا سال ئٹ بلوچ نیاڑی تا زندان یا بیگواہی نا گواچی مروک آتیٹی ڈاکٹر ماہرنگ، گلزادی آن بیدس نسرین بلوچ خضدار آن فرزانہ بلوچ، دالبندین آن رحیمہ بلوچ، ماہ جبین بلوچ و ہاجرہ بلوچ کہ ہرافتا دائسکان ڈس و پد افک۔
سیاسی پڑ آ اُرن تو ڈاکٹر ماہرنگ و صبیحہ نوری نصیر خان نا ہمو تغ ئنا تعبیر آکو کہ ہرادے و خناو پارے کہ بلوچستان نا سیم و حد آک انت ءُ و ماہرنگ و صبیحہ کراچی آن الیس تونسہ اسکان مخلوق ءِ ڈہ تسر کہ ببو نم ننے آن ارے۔
لمہ کریمہ تینا کڑد ئٹ دا کلہؤ ءِ الا کے راج آک راہشون آتا کہنگ آن کسپسہ بلکن پین ترند و مہکمی ئٹ جک سلرہ۔ ادب نا پڑ آ بلوچستان ئٹ نیاڑی تا کڑد ڈکوک اف کہ طاہرہ احساس جتک و پین کیہیک دا میدان ئٹ تینا قلم ءِ بڑز کریسہ شرف دوئی کرینو و سلہہ بندغ زرمبش ئٹی لمہ ایڑھ تا جہد و قربانی تا حساب کچ و کساس آن گیشتر و لووز اتیٹی بفروک ءُ احساس ئسے ہرادے بیان کننگ کنا نزور آ قلم نا وس آن سفا پیشن ءِ۔
یخینن اینو بلوچ زالبول آتا کڑد ءِ نن جہانی پڑ آ زالبول تا کڑد اتون اوار کننگ کپنہ و مقابلہ تننگ کپنہ کہ اسہ کنڈان جہان ئٹ ریک ئنا ڈِک اس سلوک بریسہ ہننگ ءِ تو ایلو کنڈان بلوچستان ئٹی چلتن شاشان ہربوئی سیاجی و لوڑہ غانبارو سوگؤ ءُ مش اس سلوک تینا راج ئنا شناخت کن نت و دو خلنگ ءِ۔ ای پاؤ پاپر ولے بلوچستان نا مَش و تالار آک الم اینو بلوچ زالبول تا کڑد ئنا مون آ تینا لخ ِ شیف کریسہ بلوچ زالبول آتے خیسنو سلام و دروت اس ندر کرور و سلام پارور تا۔
